Gegetongo 14 - Ma Jou ai Demo-demo o Totobelohoka

O Isiraele ma nyawa iwilawana Ma Jouika

¹ Ona gea yatailako o Kanani ma tonaka yolio manga nyawaika de naga yangimoi ko yotogu-togumua yaade-ade manga gogianongoruika de o hihawana ma demo. Ka de hokogea yoihene manga hidimono yangimoiino manga demo de o Isiraele ma nyawa manga doomu ma amokika duru manga hininga ma huha hiadono o futu gea yoari ihiboa-boaka ka hiadono yahidetebiniye.

² De manga gari ma ilingi ihailiye hiadono idadi o gurubungu ma demo ma amoko o Musa de o Harunika. Abe ona yotemo ato, “Koaho ngomi ma dihiraino de mihonenge o Mesiiroka la ufa ma kangela naa imiohana! De ngaro o tonaka ma kakaahaka naa de mikokihonenge ma enangohi irahai de nako miwohama o Kanani ma tonakika gea!

³ Ho adodoa ho Ma Jou o Yawe womihiboa o tonakino naa? Gea woigo la womihohonenge dika o parangi ma goronaka, eko sarakia Musa? Done ahao nanga musu yolaku de yataoko to ngone nanga feka-fekata de nanga ngofa-ngofaka ato ona yodadioka to ona manga parangi ma hasilino ho yao de yahidadi manga huhuloko! Ho naa, Musa, ibootoka! Kiani ngone holio dika nanga poretika ka hiadono o Mesiiri ma tonakika homahiadonoka!” Hokogea manga gurubungu ma demo o Musa de o Harunika.

⁴ De ahao manga hidogoronaka ona dika yomakoketemo de yomahikagaro ato, “Kiani ngone homangiriki womatengoli la wodadi nanga hihira de ahao ka idadi holio o Mesiirika.” Hokogea manga putuhu.

⁵ De ahao o Musa de o Harunu duru yomamotumuku o tonakoka o Isiraele ma nyawa manga doomu ma himangoka.

⁶ Masara yahinooto gea, o Yosua de o Kalebe abe onangoo yatotailakoino, ona duru manga hininga ihuha ma titi manga dodiawo manga hihawana ma demo manga gogianongoruika. O Yosua gea, una o Nuunu ai ngofaka, de o Kalebe gea una abe o Yefune ai ngofaka de manga hininga ikokihuha ka hiadono manga pakeanga yakakihi.

⁷ De ahao onangoli yomahingahu manga gogianongoruika to ona manga hininga abe ma titi o Kanani ma tonaka gea abe yatailakoka. Abe o Yosua de o Kalebe yaamo-amokiye yahingahu la o Isiraele ma nyawa manga doomu mata-mataika ka idadi yoihene manga demo ato, “O tonaka gea abe ngomi miatailakoka gea duru ma rorahai!

⁸ De nako Ma Jou o Yawe ai hininga isanangi ngoneino de ahao Una duru wonahidoaka o tonaka gea ngoneino. Abe Una ma hirete ahao wonahihira-hira ma oraha howohama ma tonakika gea abe o inomo duru kohangoe genangoka.

⁹ Ho ufa ngone naa hilawana Ma Jou o Yaweika! De ngaro o nyawa gea ko manga lago-agomo de ko manga bobuturungu ma tonakoka gea, masara Ma Jou o Yawe ka ihikaika naga ngoneoka ho ufa ngone hamodongo onangika. Abe ona gea ahao yatomomonoka de ko yakunua yomaduhunu abe ma oraha hangohama manga tonakika. De Ma Jou wonaduhunu ka hiadono manga dadatoko imaketero hoka ko iwaka ho ufa ngone hamodongo onangika!” Hokogea o Yosua de o Kalebe manga domoroini ma demo.

¹⁰ Masara o Isiraele manga doomu ma amokika yomakoketemo ato, “To ona manga demo ngaro ufa dika de hohigihene abe utuohi irahai hahohowono onangika! Kiani o Kalebe de o Yosua hakokihakaru ka hiadono ona yokokihonenge!” Hokogea ka yomahiketehigarohi de duru ka itodokanino ona yatodokana de o dararono ma amoko. Abe Ma Jou o Yawe wohimatoko ai medebini ma dararono ai Tau o Ngoeroka abe ihiromanga o Hikamake ma Tau. De hokogea ma amoko ai dararono hiadono o Isiraele ma nyawa mata-mataika ka idadi yamake.

¹¹ De Ma Jou o Yawe witemo o Musaika wato, “Abeika ona naa hoka ihiemono Ngohino hiadono duru ko ihihigihenua e? Kohangoe ahi heheranga todiai manga himangoka masara ko ihingakuahi Ngohino. Done sarakia ma dekanohi hokonaa manga lawana?

¹² Ngohi ahao tapoha onangika de o panyake ka hiadono ona tahikokibinaahaka masara ka ngonakahi ko nohonengua ho ahao Ngohi tonihiowa Musa, abe ka ngona dika tonihiwango la ani totoforauku yodadi ahi nyawa o dutu moi abe duru ko manga ngoe. De nako to ngona ani totoforauku gea de o Isiraele ma nyawa naa, ka to ngonahi ani totoforauku yowoe de yoputurungu.” Hokogea Ma Jou ai hininga womahingahu o Musaika.

¹³ Masara ka de ai demo gea woihene de o Musa unangoli wohuha hiadono o Isiraele ma nyawa waademo Ma Jou o Yaweika wato, “Done sarakia o Mesiiri ma nyawa manga ade-ade o nyawa utuika ma oraha yoihene gea Ngona nahikokibinaaha ani nyawa! Ona ma dihira duru o Mesiiri ma nyawa manga hidogoronaka ma oraha genangoka Ngona nahikokihupu. Ho Ngona duru de o heheranga ma ngoe ani buturungu nahimatoko o Mesiiri ma nyawaika.

¹⁴ Ho ka de o Mesiiri ma nyawa gea yoihene abe ani nyawa yokokihonenge o tonaka ma kakaahaka naa de ahao ma titi gea onangoli yaade-ade o nyawa mata-mataika. De nako ani nyawa nahohonenge de nenangoka ma nyawa onangoo yoihene de ahao manga hawana ko iwaka Ngonaika. De o tonaka naa ma amokika ona mata-mata inihiorikoka abe Ngona Ma Jou o Yawe. De ona inihiorikoo abe Ngona nomahimatoko ngomino ka hiadono ma moiokau Ngona Ma Jou o Yawe homarihimanga de ngomi ani nyawa. Ona ihioriki abe Ngona naga o Isiraele ma nyawa manga doomu ma himangoka nahihira-hira manga ngekomoka ngaro o wange-wange de ngaro o futu-futu. Abe o lobi ma lou gea naga o wange-wangeiye de nako o futu-futu idadi hoka o uku ma liate la ka ihikaika nahihira-hira ani nyawa.

¹⁵ Ho abeika ahi Jou nako ma oraha naa de ahao ani nyawa nahohonenge! O kia yafikiri o nyawa mata-mataika gea abe inihiorikoka ma titi ani heheranga de ani duduhunu ani nyawaika?

¹⁶ Marai ona o tonaka utuoka yafikiri ato, ‘Ma Jou o Yawe gea marai ko wakunokaua ai nyawa waduhunu ho ko wahigila-gilakaua o tonakika gea abe ma dodihiraka wahibehehongoka onangika. Una ko wadadiokaua ai nyawa wahigogere o tonakoka gea ho ona wakokitoma dika o tonaka ma kakaahaka angamoi ai buturungu ko ilakuokaua.’ Marai hokogea ona inihiade-ade Ngona ahi Jou ho ufa ani nyawa nahohonenge!” Hokogea o Musa waademo o Isiraele ma nyawa de ai domoroini.

¹⁷ De ahao o Musa womagahoko wato, “Duru togahoko Ngonaika, Ma Jou, la ani buturungu duru nohitararono itaana abe ilaku o hohowonika de ilakuoo notobadora o nyawaika abe hoka ma dihiraino nomihingahuoka ngomino.

¹⁸ Abe nato Ngona Ma Jou o Yawe ani hininga ko itai-taitua yatohata o nyawaika de duru kohaamoko ani dora itagi o nyawaika de duru ko itoa-toakua. Ho ngaro ani pareta o nyawa yatilakuru masara Ngona ka idadi nomatongohono de manga howono nahiapongo. De ngaro yotobalawana Ngonaika masara manga howono enangoo ma ka idadi Ngona naofi. Ho nako o nyawa de manga datoro o howonika yomahitaanoka hiadono kiani Ngona nahohowono onangika de ahao manga hohowono gea adaene manga ngofa-ngofakukuoo ka hiadono manga lape hangeuku eko iatuku.

¹⁹ Hokogea ngohi tohininga ani dora ma hohailoa abe duru ko itoa-toakua hiadono ngohi ihimoroini ani nyawa tagahoko la to Ngona ani dora ma hiokoo itagi onangika la hiadono manga howono naofi. Abeika, ka de o Mesiiri ma tonaka mianoaka de hiadono ma oraha naa de ka ihikaika ona yahowono Ngonaika masara Ngona ka ihikaika manga howono naofi ho manga howono nenanga abe ahao naa idadiokali enangoo togahoko la Ngona naofioka.” Hokogea o Isiraele ma nyawa o Musa wagahoko Ma Jouika.

²⁰ De ahao Ma Jou o Yawe wihingahu o Musaika wato, “Ona gea manga howono abe Ngohino gea Ngohi taapongoka hoka ngona nogahokoka.

²¹ Masara nagaoo ahi behehongo ma demo de ma buturungoka onangika! Ngohi Ma Jou o Yawe abe to Ngohi ahi wowango ko iwa ma bobaha de ahi medebini ma dararono tohimatoko o dunia ma amokika. Ho tohibehehongo de ahi kuahaka de aino.

^22-23 De Ngohi naa tagou-goungu, ona gea ko yowohamokaua o behehongo ma tonakika gea! Abe ona ihingamo Ngohino hiadono duru yoluku yowohama ma tonakika abe tahibehehongoka, ho ona gea ko moiua yowohama o tonakika gea abe yaolukoka! De ona gea ma dekanoka ihihioriki abe Ngohi naga ahi dararono ma goronaka de tomanoa nginioka. De to Ngohi ahi dodunguu onangoo yamake ahi heherangino abe ma oraha ka yogogerohi o Mesiiri ma tonakoka de ma oraha yotagi-tagi o tonaka ma kakaahaika naa. Masara ona ka ihikaika ihitaili Ngohino abe yoluku ihigihene ahi demoika. Igoungu manga totoforaika tahibehehongoka tato ma tonaka gea tahidoaka onangika masara ma oraha naa Ngohi tato ngaro de manga lako dika ma, ko yamakeokaua o behehongo ma tonaka gea. O nyawa moioo de ko iwa onangoka abe Ngohi ka tahigunoahi la yowohama o tonakika gea, angamoi ona gea ihiemono Ngohino. Ho naa ona ko yamakeuali.

²⁴ Masara o Kalebe ai hininga de to ona manga hininga duru imakohowono abe una woigo la to Ngohi ahi mau waniiki de ai hininga ma gahumu de ka hiadono una duru woluku waniiki o nyawa utu manga higaro ma dorou. Ho Ngohi tiao o Kalebe gea ka hiadono tihingohama o tonakika gea abe una ma hirete watailako. De to una ai ngofa-ngofakuku ahao yomale manga tonaka genangoka.

²⁵ Masara ma oraha naa ko ma orahuahi ona yowohama ho ngini ko idadiua nigila-gila o tonakika gea abe genangoka o Kanani ma nyawa de o Amaleke ma nyawa yogogere. Ho itebini de ahao ngini mata-mata kiani nimadogilioro de nilio o tonaka ma kakaahaika nia poretoka de niloiki imaketero hoka nia dumutu o Bongo-bongo ma gahioko.” Hokogea Ma Jou wihingahu o Musaika.

²⁶ De ahao Ma Jou o Yawe wahitararono o Musa de o Harunika abe o Isiraele ma nyawa manga gurubungu ma demo gea ahao wapake onangika, wato,

²⁷ “Abeika manga dorou o nyawa manga doomu ma amoko naa abe ona ka ihikaika ihihigurubungu Ngohi. Hokokiahi ma dekana manga lawanino tomatongohono? Ona marai yafikiri Ngohi Ma Jou ko toihenua manga gogurubungu ma demo masara ko moiua o Isiraele ma nyawa manga demo abe Ngohi ko toihenua.

²⁸ Hokonaa ahi demo onangika abe ngini kiani niahingahu onangika, niato, ‘Ngini niatotoihene Ma Jou ai demo nginika nenanga, Una wato, “Ngohi Ma Jou o Yawe abe ka hiado-adonika towango de Ngohi toihene nia gurubungu ma demo mata-mataika! Ho naa idadi nginika duru imaketero hoka ngini nitemoka niato Ngohi Ma Jou ahi hidee nginika tiniao o tonaka ma kakaahaino naa la nenangoka tinihohonenge. Hokogea ngini nitemoka ho hokogea ahao Ngohi Ma Jou o Yawe todiai!

²⁹ Ho nia demo gea ka ilio nginika de idadi nia hohowono nginika. De ngini abe inidaenoka gea ngini nia gogetongoka abe nia ngumuru o taongo monaoko de imahikaiye de angamoi nihihigurubungoka ho ahao ngini nikokihonenge de nia honenge imahikokabarihika o tonaka ma kakaahaka naa.

³⁰ Ho ngini ko niwohamuali o Kanani ma tonakika bowahu o Yefune ai ngofaka o Kalebe de o Nuunu ai ngofaka o Yosua. Ona dika yahinooto abe manga ngumuru o taongo monaoko de imahikaiye abe ahao yowohama o behehongo ma tonakika gea.”’” Hokogea Ma Jou ai demo abe kiani o Musa de o Harunu yadofanga o Isiraele ma nyawaika.

³¹ De ahao Ma Jou wogila-gila de ai demo o Isiraele ma nyawaika abe o Musa de o Harunu kiani yadofanga onangika, wato, “De ngini nihitae niato done Ngohi tahigunoa la ti ngini nia ngofa-ngofaka ahao yodadi nia musu manga parangi ma hasilino de yao la yahidadi manga huhuloko. Hokogea ngini niato ona yowohama o tonakika gea de manga kangela. De naa Ngohi tinihingahu, ona igoungu ahao yowohama o Kanani ma tonaka masara Ngohi ahao nia ngofa-ngofaka gea tahingohama de tahigogere de manga sanangi ma tonakoka gea abe ngini niaoluku.

³² Masara ngini abe to ona manga dimono, ti ngini nia honenge kiani yalungunu o tonaka ma kakaahaka.

³³ Abe ma dihira ngini manga dimono duru nihihibehehongo Ngohino niato ahi behehongo nginika nianiiki mata-mata de nihingounu. Masara ko nianiikua de ko nihingounua to Ngohi ahi behehongo ho hiadono ngini naa nikangela de nia ngofa-ngofakoo niahikangela abe onangoo manga taongo moruata ma dekana o tonaka ma kakaahaka yaika yaino nia aewani ma duduono yogoa-goana. De manga karajaanga hokogea mangale ngini o nau-nauru ma baluhu Ngohi tinihohowono ka hiadono nikokihonengoka.

³⁴ Hokogea nia dekanohi niaika niaino nia taongo moruata o tonaka ma kakaahaka angamoi Ngohi taetongo de ti ngini nia dodagi ma dekana abe niatotailako o Kanani ma tonakoka. De hokonaa taetongo, o wange moi ahao idadi o taongo moi abe ngini nia wange moruata naga o totailako ma dodagi ma goronaka ho taetongo la o kokangela ma tonakoka ahao nia taongo moruata ma titi ti ngini nia howono Ngohino. Hokogea todiai la duru ngini nihioriki manga kangela o nyawa onagona dika abe nako Ngohi todadioka manga musu.

³⁵ Ngohi Ma Jou o Yawe totemo ho kiani hokogea ahao idadi hoka totemoka! De o kokangela gea inidaene mata-mataika ma titi ngini ngaro nia doomu ma amokika ma ko nihihigihenua Ngohino. De ona mata-mata nia hidogoronaka abe yomahikokagaro la manga hininga ma dorou idadi moi la hiadono nioluku nihihingounu, ona gea mata-mata ahao kiani yokokihonenge nenangoka o tonaka ma kakaahaka dika.” Hokogea Ma Jou ai demo o Isiraele ma nyawaika abe ahao o Musa de o Harunu kiani yadofanga onangika.

^36-37 De duru ma oraha gea dika de o Isiraele ma nyawa manga hidimono yangimoi gea abe o Musa wahidingoto la o tonaka yatailako, abe de manga ade-ade ma dorou yodiai o rerehene, ona genangoka dika o wange gea de yokokihonenge. Angamoi Ma Jou ka ma moi wahipoha de o hone-honenge ma hohowono onangika ho ka de yoruba de yokokihonengoka Ma Jou o Yawe ai himangoka. De gea mangale ma titi ona yangimoi gea manga gogianongoru yahikapusaka de manga ade-adeino hiadono yahihuha de yahihawana manga gogianongoruika ho hiadono ona mata-mata iwilawana Ma Jou o Yaweika.

³⁸ Abe ona yatailakoino ma tonaka ona ka yahinooto dika abe Ma Jou wahigunoa la hiadono ka yowangohi. De yahinooto gea o Yosua abe o Nuunu ai ngofaka, de o Kalebe abe o Yefune ai ngofaka.

³⁹ De ahao Ma Jou o Yawe ai demo o Isiraele ma nyawaika o Musa wahingahu onangika ibooto de manga hininga ma huha ona mata-mataika yakokimao ma titi duru kohadubuho.

⁴⁰ Ho gea ona ato manga hininga yaturuuru de ma dawangeino duru o ngorumino yomahikagaro ato, “Abeika, hohitaili howohama dika! Ngone naa hataoko itiaioka Ma Jou ai demo abe inahitaana hahowonoka ho marai ka idadi naa howohama dika o tonakika gea abe Ma Jou o Yawe wonahibehehongoka wato wonahidoakoka.” Hokogea ona yomahikagaro manga demoino.

⁴¹ Masara o Musa wahiree-reeika de ai dodaere onangika, wato, “Done sarakia de ngini ka niwilawanohi Ma Jou o Yaweika? Nia hidee naa ko idadiua, Ma Jou ko winihigunoaua ho parahaja dika! Una winihuloko nginika la nilioli nia poretika o tonaka ma kakaahaika masara ngini ka nialawanohi ai demoika! Duru ko idadiokaua hokogea ti ngini nia mau dika nianiiki!

⁴² Ufa niwohama genangika! Ngini ko niwihingounua Ma Jou ho ma oraha naa ko idadiokauali niwohama. Nako bootino niaika de nanga musu o tonakoka gea ahao inikokitoma angamoi Ma Jou o Yawe ko wininiikokaua ma oraha niwohama.

⁴³ Abe ka de niaparangi hiadono niahimanga o Amaleke ma nyawa de o Kanani ma nyawa de ona ahao duru initetoruku. Ngini naa niwiporetika Ma Jou o Yaweika ho Unangoo wininoaika dika ma oraha niaparangi onangika.” Hokogea o Musa ai hitiari de ma buturungu o Isiraele ma nyawaika.

⁴⁴ Masara ona manga sade dika aniiki hiadono ko iwihigihenua o Musaika. Ho ona yomahidiai yoparangi de yosobo manga dumutu o loku-lokuika o Kanani ma tonakoka. Masara o Musa ko waniikua de ngaro Ma Jou ai Behehongo ma Peti ma enangoo yanoaika manga ngioka.

⁴⁵ De o loku-lokuiye ko yodoauahi de o Amaleke ma nyawa de o Kanani ma nyawa abe yogogere o loku-lokuoka gea yaaguti o Isiraele ma nyawauku abe ona yoboaino. Gea yaaguti de yaparangi hiadono yahidodohuku ka hiadono o Hibinaaha ma dolaika yadono.