Gegetongo 13 - Ma Jou ai Demo-demo o Totobelohoka

O Pasala 13 ma Hitararono ma hidogo Ma Jou o Isiraele ma nyawa wao o Kanani ma tonaka ma batingika de ahao manga hidingoto yowohama yatailako o Kanani ma tonaka gea

¹ O Isiraele ma nyawa yomahiadonoka o tonaka ma kakaahaka abe ihiromanga o Parana. De o Parana gea duru o Kanani ma tonaka ma batingoka de yomatogumu genangoka de ko yogila-gilakaua o Kanani ma tonakika yowohama. De genangoka Ma Jou o Yawe wihingahu o Musaika, wato,

² “O Kanani ma tonaka gea tinihidoakoka ngini o Isiraele ma nyawaika ma, niahidingoto dika genangika o nau-nauru abe ka idadi yatailako ma tonaka gea. Ona abe ahao niahidingoto kiani o Isiraele ma nyawa yairiki la ona o nauru yangimoi de yahinooto abe yomahidutu manga totoforaika homoi-homoiika la gea ona inihidimono ngini mata-mataika. De nia doomu ngimoi de hinooto homoi-homoiika kiani yairiki o nau-nauru dika abe ma dihiraino de yodadiokau manga gogianongoru manga hidimono.” Hokogea Ma Jou o Yawe wihibehehongoka o Musaika.

³ Ho o Musa wodiai duru imaketero hoka Ma Jou wihibehehongoka. Ho manga ngioka gea o Parana ma tonaka ma kakaahaka de ona wahidingoto de wahitararono onangika abe kiani yoiki yatailako o Kanani ma tonaka ibooto de ahao yoboali yaade-ade abe hokokia yamake genangoka.

^4-15 De hokonaa manga romanga de manga dutu homoi-homoiino abe o Isiraele ma nyawa manga hidimono yairiki ona abe ahao yoiki yatotailako ma tonaka gea. Manga dutu Manga hidingoto ai romanga o Rubene ma nyawa o Samua abe o Sakuru ai ngofaka o Simeono ma nyawa o Safata abe o Hori ai ngofaka o Yehuda ma nyawa o Kalebe abe o Yefune ai ngofaka o Isakara ma nyawa o Yigala abe o Yusupu ai ngofaka o Efaraimi ma nyawa o Hosea abe o Nuunu ai ngofaka o Benyamini ma nyawa o Paliti abe o Rafu ai ngofaka o Sebulono ma nyawa o Gadiele abe o Sodi ai ngofaka o Manase ma nyawa abe o Yusupino o Gadi abe o Susi ai ngofaka o Daana ma nyawa o Amiele abe o Gemali ai ngofaka o Asere ma nyawa o Seturu abe o Mikaele ai ngofaka o Nafatali ma nyawa o Nahibi abe o Wofisi ai ngofaka o Gaada ma nyawa o Guele abe o Makihi ai ngofaka

Manga dutu Manga hidingoto ai romanga

¹⁶ Hokogea manga hidimono manga roma-romanga abe o Musa wahidingoto la o Kanani ma tonaka yowohama yatailako. De o Efaraimi manga hidimono o Hosea, una gea ai romanga hinooto angamoi ma dihirainohi o Musa ai romanga o Hosea gea waturuuru de wihiromangoli o Yosua. Nako to ona manga demoka ma romanga o Hosea ma titi o duduhunu o bobinaahaino de o romangoli o Yosua ma titi Ma Jou o Yawe wonaduhunu o bobinaahaino. De ma oraha o Yesusu abe Una nagahi o duniaka de ma romanga o Yosua gea yomaritoomuika. Ho ma romanga o Yesusu de o Yosua ma titi ka moi, “Ma Jou o Yawe wonaduhunu o bobinaahaino.” Ho gea abe hamake o Matiusu 1:21 ma oraha o malaekata wihingahu o Yusupika abe hokogea kiani iwihiromanga o ngo Maria ami ngofaka.

O Hitararono ma hidogo

¹⁷ De o nau-nauru gea ko yosobouahi yowohama o Kanani ma tonakika de o Musa wahingahu onangika, wato, “Hokonaa nia dodagi ma dumutu o koremiyeuku ho o Negebe ma tonaka ma kakaahaika nianiiki ka hiadono o loku-lokuika.

¹⁸ De ka ihikaika nia dodagi ma goronaka niatailako la ka niahioriki abe manga tonaka ma rupa. De o Kanani ma nyawa niatailako la niahioriki o kiaka manga ngi-ngi yogogere de niatailakoo la o kiaka de manga buturungoka de o kiaka abe ikuranga manga buturungu.

¹⁹ De manga tonaka abe genangoka yogogere kiani ngone hohioriki irahai eko koua. De sarakia o Kanani ma nyawa manga kota-kota? Kiani ngone hohioriki nako manga kota mata-mataika ihidotadaduhoka de manga tau de gea ma dadaduhu de ma bobuturungoka eko naga utu manga kota ko yakurungaua de ma dadaduhu.

²⁰ De kiani hohiorikoo o kiaka manga tonaka ma joro de ma gutufuroka de o kiaka manga tonaka ma joro ikuranga ikutufuru. De sarakia naga ma gota yowango ma tonakoka gea eko ko iwa. Ngini naa kiani manga tonaka niwohama de manga datomo ma hasili enangoo niatailako de nihitaili niale de niao nenangino la nimihimatoko ngomino.” Hokogea o Musa ai behehongo onangika. De ma oraha wahidingoto gea manga angguru ikotomoro ihofoko.

^21-22 Ho gea o Musa wahibehehongo ibooto de ona yangimoi de yahinooto gea yosobo. Ona o Kanani ma tonaka ma batingoka daku de yauku yatotailako ka hiadono dau ngade-ngade o Kanani ma batinguku. De manga dodagi yaniiki ma oraha yakauku, genangika yaniiki o tonaka ma kakaahaika ma romanga o Sini. De o Negebe ma tonaka ma kakaahaka enangoo yoboa genangika ka hiadono yomahiadono ma ngi moi ma romanga o Rehobo abe imakadateke de o Lebo-Hamata. Ma kapongo gea dau abe imahitigika de ma dola abe genangoka o Hamata ma kota imanoa. Ngade-ngade o Kanani ma batingoka dau gea yomahiadono de yolioli manga poretika masara yololiti doka ma honongali. De ahao yakaiyeoli hiadono o Heborono abe ma dihira yotulu genangoka de ahao yogila-gila ho naa ma oraha yolio de yotuluoli genangika. O Heboronoka o Enaka ai ngofa-ngofakuku de ai dano-danonguku yogogere abe manga romanga o Ahimana, o Sesai, de o Talamai. O kota o Heborono duru ma dekanoka abe gea ihigoko o taongo tumidi ma dekana ibooto de ahao o Mesiiroka manga kota ihigoko ma romanga o Soana abe enangoo duru ma dekanoka.

²³ De naga o dola moi ma romanga o Esekolo, abe imakitingaka de o Heborono ko ikurutikaua, de ma oraha ona yowohama o Esekolo ma dolaika gea de yamake o angguru ma redi abe duru de ma gutufuroka de o angguru ma hofoko o hahaku moi ihidotobiki de gea ena yomagao. De o angguru ma hahaku moi gea duru kohaamoko ho gea ma oraha yao de kiani ihidapakitika o gotaka de o nyawa yahinooto yomarimoku angamoi kohadubuho. De o delima ma hofoko, de o gogilioro ma hofoko enangoo yotofi de yao la ka idadi yahimatoko manga gogianongoruika.

²⁴ De ma dola gea ihiromanga o Hahaku ma amoko ma dola abe to ona manga demo o Esekolo. De hokogea ma romanga ka ihikaika angamoi ma dola ena gea o angguru duru itohofoko hiadono ona o Isiraele ma nyawa yale o hahaku moi gea abe duru ma amoko.

Yatobatailako yangimoi de yahinooto yolio de manga dodagi ma hasili yaade-ade manga gogianongoruika

²⁵ De o Kanani ma tonaka yakilolitoka yomatohiki yatailako de yolio manga dodiawoinoli de o wange gea yadonoka manga wange moruata abe yotagi-tagi yatailako.

²⁶ De yoboa de manga dumutu o Musa de o Harunika de o Isiraele ma nyawa manga doomu ma amokika abe naga o Kadesoka abe o Parana ma tonaka ma kakaahaka. Ho manga gogianongoru yokokiboa yomatoomuino la ka idadi yoihene manga hidimono yangimoi de yahinooto gea manga ade-ade. De manga hidimono gea yoade-ade de manga ilingi ma amokiye manga gogianongoruika la manga doomu ma amokika ka idadi yoihene. De manga dodagi ma hasili yahimatoko onangika abe o tonaka gea ma datomo ma hasili irahai abe yaoino.

²⁷ De hokonaa yoade-ade onangika, ato, “Ngomi mimahiadono ma tonakika abe ngini nimihidingoto la miatailako de igoungu o tonaka gea irahai abe ma joro duru ikutufuru genangoka ho duru kohaamoko ma hasili. Abeika ma hofoko miaoino naa abe duru imihitaana miagou-goungu!

²⁸ Masara ma kangelaoo naga de gea ma titi o nyawa abe genangoka yogogerika, ona gea duru de manga buturungoka! De manga kota-kota duru ma ago-agomo de yodiai o kota ma dadaduhu hiadono manga kota homoi-homoiika yomahidukurungaka la o nyawa yototokiaua yangohama. De nenangoli ngomi miamake de mia lako, gea o Enaka ai totoforauku abe manga badanga duru ma ago-agomo de yogogere ma tonakoka gea!

²⁹ De naga o Amaleke ma nyawa abe yogogerika o Negebe ma tonakoka de naga o nyawa utu manga gogere o tonaka abe de ma loku-lokuoka de ona o Hete ma nyawa, de o Yebusi ma nyawa, de o Amori ma nyawa. De ona abe yomahiromanga o Kanani ma nyawa manga gogere dai o tonakoka abe imakadateke o Gogorona ma Gahi de naga utu abe yogogere o Yorodani ma akere ma dolaka.” Hokogea manga hihawana ma hingahu ma demo.

³⁰ Hokogea manga hidimono utu manga hingahu manga gogianongoruika hiadono ona de manga hawana ma gigoro yaamo-amokiye o Musa ai himangoka. Masara o Kalebe manga demo watoaka de wataere onangika la yoriidoka. De ahao wahigaro la ufa yohawana wato, “Abeika ngone homataiti o tonaka gea howohamika de homahitongoneoka dika! Ngone duru ka idadi o nyawa mata-mataika gea hahikala!” Hokogea o Kalebe wataere de ai higaro ma demo ai gogianongoruika o Musa ai himangoka.

³¹ Masara ai doo-dodiawo abe yomakiniiki o Kanani ma tonaka yatotailako gea, ona yangimoi duru manga hininga imakohowono ho yopaluhu de manga boaka ato, “Ngone duru ko hapoaua hangika haparangi o nyawa gea! Nako ona de ngone ka onangohi duru de manga buturungoka ho!”

³² Hokogea ona yangimoi abe o tonaka yomatohiki yatailakoka manga hingahu o Isiraele ma nyawaika ho idadi o higaro ma dorou ma demo. Abe ona yoade-ade ato, “O tonaka nimihidingoto genangika la miatailako gea, ena gea duru de ma boditoka onangika abe yoigo yoboa yomanoa genangoka. De gea angamoi o nyawa mata-mata abe miamake o tonakoka gea duru manga badanga ma ago-agomo!

³³ De igoungu miamake ona abe ma dihiraino manga romanga o Nefilimi ma nyawa ma titi duru yonauru ho duru yototomoroini. De manga tofora ma dodihiraka o Enaka ho manga badanga duru ma ago-agomo hiadono ngomi miamao hoka mia badanga ma amoko hoka o kabotarokahi de onangoo yomalega ngomino de hokogea to onangoo manga hininga.” Hokogea o nauru yangimoi abe o Kalebe de o Yosua yadodiawo o Kanani ma tonaka yatailako manga hininga ka hiadono duru yahihawana manga gogianongoruika.