Gegetongo 12 - Ma Jou ai Demo-demo o Totobelohoka

O Musa ai riaka o Harunu de ngoi firanga o ngo Miriama iwitaleana

¹ Ma oraha o Isiraele ma nyawa gea yogogerohi o Haseroto de o Musa ai riaka o Harunu de ngoi firanga o ngo Miriama iwihiade-ade o Musa ma titi una womale ngoi fekata o Kusi ma nyawaino masara manga hininga kuranga unangika duru ihititi manga daleana o Musaika mangale ai kuaha ilamoko.

² Abe manga daleana ma titi ona yahinooto ko yamakeua manga kuaha hoka o Musali wamake hiadono ona yahinooto yaleha o nyawaika ato, “De sarakia, itiai o Musa una dika ka idadi Ma Jou o Yawe ai demo-demo wadofanga ngoneino? Abeika, ngomioo Ma Jou ma muruono ibooto womipake imihinooto la womihidadi to Una ai uru nginika!” Hokogea o Musa ai riaka de ngoi firanga manga demo o nyawaika masara Ma Jou o Yawe Unangoo wagihene.

³ De o Musa gea ai hininga duru ma dodipokouku abe ngaro o nyawa o dunia ma lokuoka mata-mataika masara ka o Musahi ai hininga ma dodipokouku.

⁴ De ka itodokanino de Ma Jou o Yawe wabehehongo ka ma moi o Musaika, de o Harunika, de o ngo Miriamika, wato, “Ngini inihange nikokiboa o Hikamake ma Tauino.” Ho ona yahange yohupu manga doomu ma ngiino de yoboa Ma Jou ai Tau o Ngoerino.

⁵ De ahao Ma Jou o Yawe wouti de o lobi ma lou abe duru imaokoiye Ma Jou ai Tau o Ngoerino ma ngoranoka. De Una wahoko yahinooto dika wato, “Harunu de Miriama niainohi ahi himangoka.” Ho ona yomahitigika.

⁶ De ahao Ma Jou o Yawe wotemoli onangika de ai buturungu, wato, “De naa ngini inihinooto duru nitotoihene ahi demoika! Abe ma oraha naga to Ngohi ahi nyawa nia hidogoronaka abe ona tahidadi ahi uru ma dodofanga, masara Ngohi, Ma Jou o Yawe tatemo onangika de o buluhara de o himatoko.

⁷ Masara hokogenangua nako Ngohi de ahi duduhunu ka o Musahi abe ai tagongo wao itiai hiadono tihitagongo de ahi nyawa mata-mataika.

⁸ De duru waniiki ahi mau hiadono ka idadi Ngohi de o Musa mimarihimanga mimakoketemo. Ho Ngohi ngaro ufa titemo unangika de o hidulu ma demo hiadono ahi demo ma titi kiani womalingiri, masara nako o Musa una ka idadi tihiree-reeika tomahingahu ahi hininga unangika. De ka una womatengo dika abe wohimakeoka to Ngohi ahi rupa. Ho done sarakia de ngini ka idadi niwihiade-ade de inimoroini?”

⁹ Hokogea Ma Jou o Yawe ai dodaere ma demo o Harunika de o ngo Miriamika angamoi duru ai ngamo itagi onangika. De gea Ma Jou wotemo ibooto de wosobo.

¹⁰ Ho ka de o lobi ma lou gea imagoraka Ma Jou ai Tau o Ngoerino de itodokanino de o ngo Miriama ami kai duru iare-arehoka imakadaene hoka o gotoaka ma gogo ma magarehe angamoi o panyake o pado imidaenoka. Ho ka de ami iranga o Harunu womaleloro munangika de duru wohuha womimake ami rupa angamoi imipado duru itorou.

¹¹ De una wogahoko ai dodoto o Musaika, wato, “Ahi baluhu, ngomi naa igoungu duru mibodo hiadono duru miahowono! Masara irahai ufa hiadono mia howono ngonaika gea natumungika.

¹² De ufa nanga biranga nomihidogunoaika de ami hohowono ma kangela hokogea hiadono to muna ami roehe idadi imaketero hoka o ngofaka ma gilau abe imaboa ma honenge ho manga roehe ikorofuoka.” Hokogea o Harunu womidemo manga biranga o ngo Miriama.

¹³ De o Musa ai dora munangika itagi hiadono duru waamokiye womigahoko Ma Jou o Yaweika wato, “Ahi Jou, duru ngohi togahoko la Ngona nomihitogumu!”

¹⁴ De Ma Jou o Yawe wipaluhu o Musaika wato, “Nako o ngofeka modiai itorou hiadono ami baba womiobiri ami himangoko de ami hohowono kiani o maleke ma amoko hiadono ngini nimihikatingaka nia doomu ma goronaino ami wange tumidino ma dekana! Ho gea o ngo Miriama munangoo hokogea nimihihupu nia doomu ma goronaino hiadono ami wange tumidi ami dekana kiani mogogere ami maleke ma goronaka genangoka. Ma nako ami wange tumidi gea ibooto de ahao ka idadi ngini nimidafongoli muna gea.” Hokogea dika Ma Jou wopaluhu.

¹⁵ Ho o ngo Miriama gea imihihupuokahi manga doomu ma goronaino hiadono ami wange tumidi ami dekana kiani mogogere manga doomu ma poretoka de o Isiraele ma nyawa ko yogila-gilauahi ka hiadono ka idadi imidafongoli.

¹⁶ Ho gea o ngo Miriama ami hohowono adonoka ami wange tumidi ibooto de ahao ona mata-mata ka idadi o Haseroto ma ngioka de yosoboli de yoikoli o Parana ma tonaka ma kakaahaika.