Gegetongo 11 - Ma Jou ai Demo-demo o Totobelohoka

O Isiraele ma nyawa iwihigurubungu Ma Jouika de Una wahohowono onangika de o uku

¹ O Isiraele ma nyawa manga dodagi ma goronaika ko itedekanuahi de yomulaenge iwihigurubungu Ma Jou o Yaweika ma titi yamake manga kangela ma ngoe manga dodagioka. De Ma Jou o Yawe ko wosanangiua ka ihikaika woihene manga gurubungu ma demoika ka hiadono ai ngamo itagi onangika. Ka itodokanino de naga o uku itokara manga tau ma doomu ma datekoka abe Ma Jou o Yaweoka de aino ma uku gea. De ma uku Ma Jou o Yaweino gea duru itokara ma amokika manga doomu ma ngi ma honongaka hiadono naga o nyawa utu yauku hiadono yotinoka. De ngaro ikuranga yowoe abe yohonenge o uku ma goronaka, masara manga tau o ngoerino manga doomu ma datekoka kohangoe ko iwaka angamoi youku de ma uku gea.

² De o Isiraele ma nyawa manga doomu ma amokika yopoa-poaka yomagahoko o Musaika ato, “Musa, nomiduhunu! Kiani nomiduhunu done imiuku hiadono mimamataka!” De ona o Musa wagahoko Ma Jou o Yaweika de ma uku gea ihonenge.

³ Gea ipaha de manga ngi genangoka ihiromanga, “Yokonitoka,” abe nako to ona manga demo gea “Tabera,” angamoi genangoka Ma Jou o Yawe ai uku itokara kohaamoko manga ngioka gea.

O Isiraele ma nyawa Ma Jou iwihigurubungoli ma titi ko iwa manga inomo o roehe

⁴ De ahao naga o nyawa yomulaengoli yokurubungoli. De gea imulaenge o homoa ma nyawaka abe naga o homoa ma nyawa yorupa-rupa abe yomadionikika o Isiraele ma nyawa manga doomuika. Ona gea duru yohafini o inomo ma rahai abe ma dihira iwoe o Mesiiri ma tonakoka hiadono o Isiraele ma nyawaika imahora-hora manga hafini. De onangoo yokurubungu ato, “Iti ngone naga o roehe haolomo!

⁵ Ei, de nako ngone o Mesiiroka ma nawoko gea ena ka haolomo abe ngaro ufa dika de hofangu masara holomo dika ka hiadono inapunuhu. De naga o timu, de o hamaaka, de o bawanga ma doka-dokara, de o bawanga ma gare-garehe, de o bawanga ma ago-agomo ho duru nanga hafini itagi ma inomika gea.

⁶ Masara ma oraha naa haolomo o mana dika ka hiadono nanga hafini enangika ko itagiokaua! O wange-wangeiye holomo o mana, ka o mana dika ho hodebeturoka enangika haolomo.” Hokogea manga gurubungu ma demo.

⁷ De manga inomo o mana gea iarehe hoka o baru ma ketoko de ma rupa ma hohumuduru de hoka o nawoko ma unafa ma mangaluhu.

^8-9 De iboa o futuoka ka ma moi de ma gagini de ahao ma ngoru-ngorumino naga o tonaka ma lokuoka o gagini abe ka de yodiriiuku de ihagaka de yodudungoka o mana gea. De manga inomo o mana gea naga manga ngi yahigilolitino. Ho o ngorumino de ona yoiki yomadoraka. De abe yotoomuino yawedere eko yatutuku manga luhungoka ka hiadono idadi hoka o tarigu ma mangaluhu. De gea ka idadi yahibauru de utu yapake yodiai hoka o roti o hinyoleino. De ma ngolomo ma mao hoka naga ma ogana ma hisapuru o saitunu ma minya ma gohakino. Ho gea ena manga inomo Ma Jouoka de aino abe yodebeturoka yaolomo.

¹⁰ De o Isiraele ma nyawa manga tau homoi-homoiika ona naga manga tau ma hima-himangoka yoari de manga gurubungu ma gari ma ilingi ma amokiye. De Ma Jou o Yawe ai ngamo duru ihauku itagi manga hininga ma datorika gea. De o Musa unangoo duru wohuha woihene to ona manga gurubungu ma demoika.

¹¹ De o Musa ai hininga womahingahu Ma Jou o Yaweika, wato, “Ngohi todadioka to Ngona ani gilaongo masara adodoa ho hiadono Ngona, Ma Jou nohiboa o huha ma amoko hokonaa ngohino? O kia ngohi todiai abe ko tonihisanangiua hiadono nohihitagongo de o tagongo ma dubuho abe o nyawa manga ngoeika nenanga?

¹² Ona naa ko to ngohiua ahi ngofa-ngofaka idodutu ho ko ngohinoua yomaboa! Ho adodoa ho Ngona nohihikarajaanga la tapaliara imaketero hoka o ngofaka ma gilau abe kiani tatotirino ahi giamoka? Sarakia, kiani ka ihikaika hokonaa dika tamake ma huha ka hiadono ani behehongo ma tonakika miwohamika abe ma dodihiraka nahibehehongoka to ngomi mia totoforaika?

¹³ Abeika to ona manga gogahoko ma daiana naa, o kiaino ngohi tamake o roehe la ka idadi tahikokiolomo? Ka ihikaika gea ena manga gogahoko ato, ‘Musa, kiani nomihidoaka o roehe!’ Ho done sarakia tahikokiolomo o roehe?

¹⁴ Ngohi naa ko tapoaua tao itiai ona mata-mataika nako ka tomatengo dika. Kohadubuhoholi abe ma tagongo gea Ngona nohihidoaka ngohino hiadono gea ko tapoakaua.

¹⁵ Nako ka ihikaika hokonaa dika Ngona nohihidogunoaika ahi kangela ma goronaka de toigo dika Ngona nohihohonenge la ibooto ahi huha naa.” Hokogea o Musa ai hininga ma huha womahingahu Ma Jou o Yaweika.

O nauru yamoritumidi Ma Jou wahidadi o Isiraele ma nyawa manga hihira la ka idadi o Musa iwiduhunu

¹⁶ Gea o Musa womahingahu ai hininga ma huha ibooto de ahao Ma Jou o Yawe wihibehehongo o Musaika wato, “Hokonaa Musa toniduhunu, ngona natoomuino o Isiraele ma nyawa manga hihira yamoritumidi abe ona gea nahioriki ona yososawaro o kokawaaha yahihira de manga hiaturu itiai. De ahao ona gea nao nanga Hikamake ma Tauino. Duru ahi Tau o Ngoerino ma himangoka ngini nimatatorika ngona de ona yamoritumidi gea.

¹⁷ De Ngohi ahao touti nginika de genangoka tonitemo-temo ngonaika. De ahi Womaha abe naga ngonaka la ka ihikaika woniduhunu de ahao ka idadi duru o hiakunu ahi Womahino gea tahinoa onangukuoo. De hokogea tahiakunu onangika la ka idadi ona iniduhunu de ani tagongo o nyawa mata-mataika nenanga. De ngona kalioli nohuhaholi namao hoka nomatengoka.” Hokogea Ma Jou wilaru o Musaika.

¹⁸ De ahao wihingahuohi o Musaika wato, “De kiani ngona nahingahu o Isiraele ma nyawa mata-mataika abe kiani yomahitebinokahi ahi himangoka la ka idadi Ngohino ahi hidoaka yodafongo. De hokogea kiani yodiai angamoi itebini tahidoaka onangika o roehe abe ka idadi yaolomo. Ho ka idadi nahingahu onangika nato, ‘Ma Jou o Yawe winigihenoka nia gurubungu ma gari abe nia demo niato, “Ngomi naa iti naga o roehe abe ka idadi miaolomo! Utuohi irahai hogogerohi o Mesiiroka dika!” Hokogea nia gurubungino nia gogahoko de Ma Jou o Yawe winihidoaka o roehe! De kiani ma roehe gea niaolomo!

¹⁹ De ufa niafikiri o wange moi eko o wange hinooto dika niaolomo de ko iwaka! De ngaro o wange motoa ma dekana masara ka nagahi nia roehe de ngaro o wange ngimoi ma ko niamatauahi. De ngaro o wange monaoko ma dekana masara nagahi!

²⁰ Ngini ahao kiani niaolomo o roehe o mede moi ma dekanino ka hiadono ma roehe gea nialahiroo ma ko idadiokaua de ka de nialahiri de initaamika de nihingunanga. Hokogea nia inomo o roehe tinihidoaka angamoi Ngohi naa Ma Jou o Yawe abe nihioluku. Ngohi naa abe tinihihupu o Mesiiri ma tonakino de togogere duru ti ngini nia hidogoronaka masara ngini ka nikurubungohi niato, “Ngomi mimatoduba o Mesiiri ma tonaka mianoaka. Ka de ngini nitemo hokogea de duru imaketero hoka nihioluku Ngohino!”’ Hokogea Musa kiani nahingahu onangika.”

²¹ De o Musa wolehali Ma Jouika wato, “Done o kiaino o roehe gea miamake ma amoko? Barikua nako haetongo mia tentara dika de duru ko manga ngoe abe mia nau-nauru yasana o ratuhu butaanga abe yodadioka to ngomi mia tentara. Masara Ngona Ma Jou nahibehehongo onangika nato nahiolomo de o roehe hokogea ma amoko hiadono o mede moi ma dekana!

²² Masara ngaro to ngomi mia aewani ma duduono mata-mataika mimadoma ma, sarakia ka idadi miahiwedono manga roehe nako o mede moiino manga inomo? Ko idadiua de miahiwedono! De ngaro o nawoko mata-mata abe naga o gahioka hakokitomaino ma enangoo ko yahiwedonua ho done sarakia?” Hokogea o Musa ai heranga ma leleha.

²³ De ahao Ma Jou o Yawe Unangoli wileha o Musaika, wato, “Ho sarakia Musa, ngona nato to Ngohi ahi buturungu de ma batingoka? Ahao naa de ngini duru nihikokioriki nako Ngohi tagou-goungu todiai o nyawaika hoka tohibehehongoka. Abe duru de ma oraha nenanga de Ngohi duru tagoungu tinihidailako o roehe gea imakadaene hoka tinihibehehongoka la duru ngini nihihioriki to Ngohi ahi kuaha mata-mataika yadaene. Abe ka de hokogea niamake de duru nihingaku Ngohino abe Ngohi tagou-goungu.” Hokogea Ma Jou wihingahu o Musaika.

²⁴ Ho woihene ibooto Ma Jou ai demo hokogea de o Musa wosobo woiki ai nyawaika de wahikokingahu Ma Jou o Yawe ai demo onangika. De onangoka naga manga dimo-dimono yamoritumidi de ona o Musa wahokino de ahao wahiaturu la yomatatorika Ma Jou ai Tau o Ngoerino ihigilolitino.

²⁵ De ahao Ma Jou o Yawe wouti de womahihawo de ma lobi abe ma dihiraino de womahitobahihawo-hawo de ma lobi gea de witemo o Musaika. De ai Womaha abe naga o Musaka gea ena abe ma Womaha ahao wahinoa o dimo-dimonukuoo yamoritumidi gea. Ho ka de Ma Jou o Womaha yahiakunu de yamoritumidi gea yomulaenge yotemo-temo de Ma Jou ai Demo-demo, de o higiriiri ma demo abe ngaro ma dihiraino de ko ma moiuahi yomadotoko la ihioriki ma demo gea. Masara naa ka idadi yotemo de o higiriiri ma demo gea. Masara gea ka ma moi dika hokogea Ma Jou wahiakunu onangika hokogea. De gea Ma Jou wodiai la o Isiraele ma nyawa ka idadi yoihene manga demo gea de ihioriki gea o dodunguu abe ona yamoritumidi gea Ma Jou duru wahiakunu la yodadi to Una ai nyawa manga hihira. Abe itiai manga gogianongoru yangaku onangika imaketero hoka o Musaika iwingaku.

²⁶ Masara naga manga hihira yahinooto abe ngaro yaetongoka yamoritumidino gea masara ko yaiwa manga doomu ma goronaka Ma Jou ai Tauoka ho genangoka yamoritumidi ko yongodumuahi. Yahinooto gea manga romanga o Elada de o Medada de ona gea ka dokahi manga tauoka. Masara ma oraha manga dodiawo Ma Jou wahiakunu de ai Womaha de o Elada de o Medada onangoo yotemo-temo de Ma Jou ai Demo-demo, de o higiriiri ma demo imakadaene de manga dodiawo ngaro yomakitingaka ma gurutika to ona manga tau de Ma Jou ai Tau.

²⁷ De naga womatengo o goohi womataiti womapopaata o Musaika wihingahu wato, “Ahi baluhu, doka nanga tau ma doomuoka, naga o Elada de o Medada yotemo-temo de Ma Jou ai Demo-demo de o higiriiri ma demo abe hoka de manga kuaha Ma Jouino.” Hokogea wihingahu o Musaika.

²⁸ De o Yosua, abe o Nuunu ai ngofaka, gea una abe ka o gooinohi wodadi o Musa ai duduhunu, de unangoo woihene womatengo ai hingahu ma titi o Elada de o Medada. Ho gea woihenino de o Yosua wofikiri ko itiaiua hokogea yodiai ho wotemo o Musaika wato, “Ahi baluhu, kiani nahuloko ona yahinootoika gea la yomatogumu.”

²⁹ Masara o Musa wipaluhu wato, “Yosua, ngaro ufa dika de ngona nataere onangika! Sarakia, ngona ko noigoua la onangoo yamake ma kuaha hoka to ngohioli? Ngohi duru toigo la Ma Jou o Yawe ai nyawa mata-mataika wahiakunu la ka idadi yapake Ma Jou ai Demo-demo abe hoka onangoli naa. Abe naa idadi ma titi Ma Jou o Yawe wahinoa ai Womaha onangukuoo.” Hokogea o Musa ai hingahu o Yosuaika.

³⁰ Gea ibooto de ahao o Musa de o Isiraele ma nyawa manga dimo-dimono gea yokokilio manga tau-tauika.

Ma Jou ai heheranga de o totaleo o puyu

³¹ De naa Ma Jou wohiboa o hidaloko dai o gahiha de iwuwu de ma buturungu. De o hidaloko gea ihihaili o totaleo o puyu duru kohangoe la hiadono iboaiha o Isiraele ma nyawa manga doomu ma ngiiha. De o totaleo gea ngaro ihoho masara ma gurutiye o metere moiiye dika de genangiha yakaiha hiadono duru yahioluiha hiadono yakokitamunu manga dodogumu ma ngiuku. De o puyu gea ihua ma gurutika hiadono manga ngi arihononga hoka o nyawa manga dodagi o wange moi ma gurutika abe genangoka aika ihuaika. Hokogea o Isiraele ma nyawa yahioluino de o totaleo o puyu gea.

³² Ho o Isiraele ma nyawa yokokisoboka yomakokidoma o puyu gea! De duru yamagawe hiadono yomadoma ma totaleo o wange moi de o futu moiino yomadoma ka hiadono yahidetebiniye! De ngaro hokogea ma ngoe yomadoma masara ko yomatogumuahi ho yodogoli o wange moioli o puyu gea yomadoma. Ho o wange hinootoino de o futu moiino ma dekana yomadoma de ahao yomatogumu. De gea o nyawa homoi-homoiika yomale, nako to ona manga duduga, o homere ngimoi ma ngoe eko nako o nyawa moi abe yamake hatoli ihutulu gea o kilo o sana moi o totaleo ma roehe. Ho o kilo o sana moi eko ifoloi o nyawa moi dika de hokogea ona mata-mataika abe yomadoma. De ahao manga puyu yatetoro de yawoere o tonaka ma lokuoka ma hoanoka.

³³ De Ma Jou ai ngamo itagi onangika ma titi manga horoodo itagi ma roehika abe yaolomo o Mesiiri ma tonakoka. De gea yomahitaana ko yosanangiua Ma Jou ai hidailako o manaika hiadono yaemono enangika. De Una wongamo manga gemonika gea de wahihohowono de o panyake abe wohiboa o roehino gea. Ho ma oraha ona ka yaolomohi ma puyu gea de manga horoodo de o panyake gea duru itubuho yadaene hiadono o nyawa manga ngoe ihihonenge.

³⁴ De manga ngi gea ahao ihiromanga, “o Horoodoino ma Lungunu,” abe nako de to ona manga demo, “o Kiboto-Taawa,” angamoi genangoka yalungunu manga gogianongoru manga honenge ma ngoe ma titi manga horoodo ilamoko itagi o roehika gea.

³⁵ De manga ngi o Horoodoino ma Lungunu gea ahao o Isiraele ma nyawa yanoaka de yotagi-tagi o ngi moiikali ma romanga o Haseroto de genangoka yogogere.