Gegetongo 10 - Ma Jou ai Demo-demo o Totobelohoka

O Isiraele ma nyawa manga guguli hinooto

¹ De Ma Jou o Yawe wihibehehongo o Musaika wato,

² “Musa, o nyawa nahikarajaanga la o guguli hinooto yodiai abe yotutuku o haakaino. O guguli gea ahao o Harunu ai ngofa-ngofaka dika yapake la ka idadi o Isiraele ma nyawa niahokino ma oraha kiani naga ma titi abe ona yomatoomuino. De ma oraha nimaturuuru o ngi moiikali de ma guguli gea niapake la niahuloko de to ena ma ilingi abe ihitunguu hokokia kiani yodiai.

³ De nako o guguli hinooto gea niawuwu ka ma moi gea ma dodunguu abe kiani ona mata-mata yomatoomuino o Hikamake ma Tau ma himangoka.

⁴ Masara nako o guguli moi dika niawuwu gea ma dodunguu abe ona o hihira dika yomatoomuino ngonaka. Abe o Isiraele ma nyawa manga baluhu abe yahihira o doomu ma regu-reguino abe yomahitoomu manga dutu yangimoi de yahinootoika homoi-homoiika, gea to ona dika manga hihira kiani yomatoomuino.”

⁵ “De ahao nako o guguli ma moi dika yawuwu la ma ilingi ihailika duru de ma buturungoka de gea ma titi onangika abe to ona manga doomu o wange ma botokaiha ma honongaka. Ho ka de ona yoihene o guguli gea de ihioriki adonoka ma oraha kiani ona yokokisobo.

⁶ De ahao ma hinooto o guguli yawuwu la ma ilingi de ma buturungu ihailika hokogea de ona abe manga doomu daku o koleharaiye yodateke ihioriki adonoka ma oraha kiani onangoo yokokisobo. Hokogea nia hiaturu ma dodunguu o gugulino la ani kokawaaha manga doomu homoi-homoiika ihikokioriki abe adonoka ma oraha to ona manga doomu kiani yosobo.

⁷ Masara ma oraha ngona noigo la ani kokawaaha manga doomu mata-mataika nakokitoomuino kiani nia guguli yawuwu la ma ilingi imakohowono la ihioriki ma ilingi ma dodunguu ma titi.”

⁸ “De ona abe o guguli yawuwu kiani o hohidemo abe manga karajaanga inihidemo Ngohino ho gea o Harunu ai ngofaka de manga totoforauku ona dika ka idadi o guguli gea yatobawuwu. De nia guguli ma hiaturu ma ngekomo naa tinihidoaka la ka ihikaika ma pareta naa ngini nianiiki ka hiadono nia totofora yolape-lapeuku.”

⁹ “De abe ma oraha ngini nimahiadonoka ti ngini nia tonakoka de niaparangi nia musuika abe inihikangela de ahao nia guguli gea niapake o parangi ma goronaka. Abe ka de nia guguli yawuwu la ma ilingi ihailika de ma buturungu gea ena ihitunguu o bodito itigioka. De Ngohi Ma Jou o Yawe, ti ngini nia Jou, ka de toihene ma ilingi gea de duru tinihohininga de tinihihupu nia musu manga buturungino.”

¹⁰ “De nia guguli gea niapakeoo abe nia gogarago ma oraha ho niawuwu ti ngini nia rame-rameoka abe o tao-taongiye nihirame-rame. De o mede-medeiye abe ma oraha nia huhuba iharo-harongo nimahihuba Ngohiye de kiani niawuwuoo ma guguli hinooto gea. De o mede ma gilau ma getongo abe ma oraha nimahihuba nia hikadame ma huhuba la nia gogao Ngohino niapaliara de ma oraha genangoo nia guguli gea niawuwu. Ho ka ihikaika nia garago nihitunguu de o guguli ma ilingi. Hokogea niawuwu de Ngohi Ma Jou o Yawe, ti ngini nia Jou, toihene ma ilingi abe ena gea nihihihohininga ma titi ahi behehongo abe tinihibehehongoka nginika. Ngohi naa Ma Jou o Yawe, ti ngini nia Jou!” De hokogea Ma Jou ai hingahu abe o Musa kiani wadofanga o hohidemoika ma titi manga guguli o haakaino gea.

O Isiraele ma nyawa manga dodogumu o Sinai ma lokuoka yanoa

¹¹ Ka de o Isiraele ma nyawa yosobo o Mesiiri ma tonakino de yomagetongo manga dekana yohupuoka o Mesiirino. Ho adonoka manga taongo moi de o mede moi de ma wange monaoko manga dekana o Mesiiroka yosobo de ona yogogerohi o tonaka ma kakaahaka abe o Sinai ma loku ma timiuku. Ho nako to ona manga tanggala ma gegetongo ihiromanga ato manga taongo ma hinooto de to ena ma mede hinooto de adonoka to ena ma tanggala monaoko. De duru o wange gea ona yamake o lobi ma lou imagoraka ma dingiioka de aino abe Ma Jou ai Tau o Ngoerino ma ponatoka de imalage ho ona ihioriki kiani yosobo.

¹² Ho o Isiraele ma nyawa o Sinai ma tonaka ma kakaahaka yanoa de o lobi ma lou yahihira-hira manga ngekomika. De ona yotulu-tulu ka hiadono o lobi ma lou gea imatogumoka o Parana ma tonaka ma kakaahaka.

¹³ De naa duru ihira yoiki abe Ma Jou o Yawe wipake o Musa la wahiaturu o Isiraele ma nyawa manga dodagioka. Abe hokonaa Ma Jou o Yawe ai hiaturu onangika abe wihidoaka o Musaika la nako ma oraha adonoka o Isiraele ma nyawa yosobo de ona ihioriki manga dodagi ma datoro ma hiaturu.

¹⁴ Ona ka ihikaika yomahitoomu-toomuika manga tofora manga romangika de Ma Jou ai hiaturu la ma oraha yoiki de o Yehuda ma nyawa yohira yosobo de manga regu-reguoka. De manga hihira ai romanga o Nahasono abe o Aminadaba ai ngofaka ho una manga himangoka de wohidoakiye hoka o bendera to Yehuda ma nyawa manga dodunguu.

¹⁵ De imakadaene hokogea o Isakara ma nyawa onangoo yomahiaturu de ahao yoturu yosobo de to ona manga hihira abe manga dodunguu wohidoakiye ai romanga o Netanele abe o Suara ai ngofaka.

¹⁶ De o Sebulono ma nyawa yomahiaturoka de ahao onangoli yoturu yosobo de to ona manga hihira abe manga dodunguu ma rupa hoka o bendera de ma liateoka wohidoakiye ai romanga o Eliaba abe o Helono ai ngofaka.

¹⁷ Ho o doomu hange gea yokokisoboka de ahao Ma Jou ai Tau o Ngoerino o Lewi ma nau-nauru yakilianga de ihidiai ma tau de to ena ma kiahonanga mata-mata la ka idadi yao. Naa ona o Lewi ma nyawa de to ona manga reguino ma doomu hange abe yomahiromanga de manga tofora o Lewi ai ngofaka yahange manga romangika abe ona o Gerosono, o Kehata de o Merari. De ona o doomu hange abe yohira yosobo gea o Merari ma doomu de o Gerosono ma doomu abe to ona manga tagongo gea ma tau de to ena ma kurunga ma ngoere de ma kiahonanga abe ka ihipasi-pasika dika de gea ena mata-mataika yao de ona yohira manga dodagika. Ho naa o Sebulono ma nyawa yopahaka de ahao o Lewi ma nyawa o Merari ma doomu de o Gerosono ma doomu onangoli yotagi yahidoduruika o Sebulono ma nyawa.

¹⁸ De ahao o Rubene ma nyawa yomahiaturoka de onangoli yosobo yahidoduruika o Lewi ma nyawa abe yao Ma Jou ai Tau o Ngoerino. De una abe wahihira o Rubene ma nyawa de manga dodunguu wohidoakiye ai romanga o Elisuru abe o Sideuru ai ngofaka.

¹⁹ De ahao o Simeono ma nyawa yomahiaturoka de ahao onangoli yoturu yosobo de to ona manga hihira abe manga dodunguu wohidoakiye ai romanga o Selumele abe o Suri-sadai ai ngofaka.

²⁰ De ahao o Gaada ma nyawa yomahiaturoka de ahao onangoli yoturu yosobo de to ona manga hihira abe manga dodunguu ma rupa hoka o bendera de ma liateoka wohidoakiye ai romanga o Elasafa abe o Rehuele ai ngofaka.

²¹ Ho o doomu hangeoli gea yoikoka de ahao o Lewi ma nyawa o Kehata ma doomu ma baha yosobo yao Ma Jou ai Tau o Ngoerino ma kiahonanga abe yanoa ma goronaka. Ho ma kiahonanga abe ona de manga gogianongoru o Lewi ma nyawa yapake manga leleani ma goronaka gea ena mata-mata yamoku. De ona manga dodagi ma hiaturu la yomakitingaka ma gurutika de o Gerosono de o Merari manga doomu angamoi ona yohira yosobo yao Ma Jou ai Tau o Ngoerino. Ho ona yohira yomahiadono manga dodogumu ma ngiika de o Tau o Ngoerino ma badanga yohira ihigokoli. Ho ma oraha o Kehata ma nyawa abe yototuruino yomahiadono de ma tau ihidiai ibooto ho to ena ma kiahonanga ona ka ihigila-gila ihingohama o Tau o Ngoerino ma goronaika de ma kiahonanga amomoiika gea yakelenga to ena ma ngi homoi-homoiuku Ma Jou ai Tau ma goronaka.

²² De ka de o Kehata ma nyawa yopaha yamoku o Tau o Ngoerino ma kiahonanga de ahao o Efaraimi ma nyawa yoturu yoiki. Ho onangoo ka de yomahiaturoka de onangoli yosobo de manga regu-reguoka de manga hihira ai romanga o Elisama abe o Amihu ai ngofaka ho una manga himangoka de wohidoakiye manga dodunguu ma rupa hoka o bendera de ma liateoka abe to Efaraimi ma nyawa manga dodunguu.

²³ De ahao o Manase ma nyawa yomahiaturoka de onangoli yoturu yosobo de to ona manga hihira abe manga dodunguu ma rupa hoka o bendera wohidoakiye ai romanga o Gamiele abe o Pedasuru ai ngofaka.

²⁴ De ahao o Benyamini ma nyawa yoiki de to ona manga hihira abe manga dodunguu ma rupa hoka o bendera wohidoakiye ai romanga o Abidana abe o Gideoni ai ngofaka.

²⁵ De abe ma bahaika yosobo yahidoduruika o Benyamini ma nyawa gea o Isiraele ma nyawa manga dutu hangeino. De o dutu ma doomu abe ona yohira o doomu hangeino, gea o Daana ma nyawa. De to ona manga hihira ai romanga o Ahiesere abe o Amisadai ai ngofaka ho una manga himangoka de unangoo wohidoakiye o dodunguu hoka o bendera de ma liateoka abe to Daana ma nyawa manga dodunguu.

²⁶ De ahao o Asere ma nyawa onangoli yoturu yosobo de to ona manga hihira ai romanga o Pagiele abe o Okara ai ngofaka.

²⁷ De ahao duru ma bahaika manga doomu o Nafatali ma nyawa yototuruika yosobo de to ona manga hihira ai romanga o Ahira abe o Enana ai ngofaka. De gea manga doomu ma baha abe ko iwaka manga poretino.

²⁸ Ho ngaro hokokiahi ma dekanino o Isiraele ma nyawa yotagi-tagi de hokogea manga dodagi ma datoro ma hiaturu abe manga dodoomu yoturu de yohira ma oraha yomakiniiki yotagi-tagi.

²⁹ De ma oraha gea yomahidiai manga dodogumu ma ngi yanoa abe o Sinai ma loku ma timiuku gea, de o Musa ai geri o Hobaba wogogere onangoka, una o Midiana ma nyawa abe o Musa ai toroa o Rehuele ai ngofaka. De o Musa wihigaro ai geri o Hobabika gea la unangoo waniiki. Ho wihingahu o Hobabika, wato, “Geri, ngomi naa miloiki o behehongo ma tonakika abe Ma Jou o Yawe womihibehehongoka o Isiraele ma nyawaino wato ma tonaka gea womihidoaka ngomino. Ho irahai nako ngonaoo nominiiki! De nako ngona nomodeke nominiiki de ngomi miniao duru irahai hiadono ngonaoo namake ma owa angamoi Ma Jou o Yawe ai behehongo ma ngoe ngomino abe wato womihiowa ngomi o Isiraele ma nyawaika.”

³⁰ De o Hobaba wipaluhu o Musaika, wato, “Tarimakase ahi geri masara ngohi ko tininiikua. Ngohi toigo tolio ahi tonakika la ahi dutu-dutuika tatoomuoli genangoka.”

³¹ Gea o Musa woihene ai geri ai demo gea de wotemoli wato, “Geri, ufa nominoaika. Ngona duru nohioriki ma ngekomo o tonaka ma kakaahaika naa ho duru togahoko la ngona nomihihira mia dodagika naa. Ngona nohioriki o kiaka duru irahai o dodogumu ma ngi abe ka idadi homahiaini ho irahai ngona nonahidumutu nanga ngekomo.

³² De Geri, nako ngona noigo nodadi mia hihira hokogea de ahao ma rorahai abe Ma Jou ai hidailakoino ngomioli miniregu ngonaika.” Hokogea o Musa ai higaro ai gerika.

³³ Ho hokogea o Isiraele ma nyawa Ma Jou o Yawe ai loku yanoa de gea yoiki o wange hangeino ma dekana. De manga dodagi ma hiaturu kiani ona abe yao Ma Jou ai Behehongo ma Peti ona ma himangoka yahihira-hira manga dodagi ma ngekomika. De ona abe yatobamoku-moku Ma Jou ai Behehongo ma Peti Ma Jou o Yawe wapake ona la yahidumutu onangika abe o kiaka ma ngi yomatogumu la yomahiaini.

³⁴ De gea ka idadi angamoi Ma Jou o Yawe ka ihikaika naga onangoka abe o wange-wangeiye ka de yotagioli de to Una ai lobi ma lou enangoo itagi manga lokuino yaniiki.

³⁵ De ona nako ma oraha yosoboli de ma Behehongo ma Peti yagoraka la yaokali de o Musa wotemo de ai garago wato, “De naa nomalageoli Ma Jou o Yawe! Tonganono ani musu yahikabarihi ani himangoka, De tonganono la ona inilawana ani himangoka ma, ona ka yoara.”

³⁶ De ma oraha yomahiainoli de o Behehongo ma Peti enangoo ihiguti, de o Musa waamo-amokiye wogahokoli Ma Jouika, wato, “Ngona, Ma Jou o Yawe, naa nomigilio de nomitamunuku, Ngaro ngomi o Isiraele ma nyawa duru ko mia ngoe, Hiadono mia sana iratuhu abe ko idadiua miapoa mimaetongo, Masara tomigahoko la ka ihikaika Ngona nomigoana.” Hokogea o Isiraele ma nyawa yomahiaturu manga dodagi ma goronaka.