Galatia 6 - Ma Jou ai Demo-demo o Totobelohoka

Abe hokokia hiduhunu womatengo abe worubaka o howonika

^1-2 Ahi gogianongoru, nako hoka naga womatengo nginioka abe worubaka o howonuku, gea ngini abe niwinii-niiki Ma Jou o Womaha ai mau, ngini kiani niwiduhunu womatengo gea la una wolioli o totiai ma ngekomino. De gea niwiduhunu ma kiani de nia hininga ma bole-bole unangika, de kiani nimakokuduhunu abe ma titi nia hininga ma dubuho, done naga utu abe itubuhoholi manga hiningaka. De nako hokogea nimakokuduhunu, gea ngini nianiikoka o Kristusu ai behehongo nginika. Masara ma oraha niwiduhunu unangika gea de kiani nimahitiarioo de nimahidodiai done ahao nginioo inihiata-atara de niahowono abe imaketero hoka unangoli.

³ De gea nako naga onagona dika nginioka abe yomagoraka de yomatemo ato ona hatoli yokurutiye nia doomuoka ho gea ngaro ufa dika de manga gogianongoruika yaduhunu, ona gea duru yomabudioka. Angamoi ona manga hiningaka ato yokurutiye, masara ona gea tanu yomahitaanoka abe ona duru ko kia-kiaua.

⁴ De nako o wowango ma datoro, gea koaho to ngone ma hirete dika nanga datoro hatailako la nako irahai eko koua, de gea ufa hatailako nanga gogianongoru manga datoro. Masara nako to ngone ma hirete dika nanga datoro hatailakoka de irahai, gea ka idadi nanga hininga isanangi ma titi nanga datorino. De gea masara ufa hohikohowono to ngone nanga datoro de to nanga gogianongoru manga datoro done ahao homagoraka hato ka to ngoneohi dika nanga wowango ma datoro irahai.

⁵ Angamoi ngone homoi-homoi kiani nanga tagongo imaketemomomoi haborimoku.

O Paulusu wohiketero nanga datoro de o bibiti

⁶ De nako naga o nyawa abe inidoto-dotoko nginika Ma Jou ai Demo-demoino, gea kiani ngini niahibalaha de nia dora onangika, de gea kiani niahikodoku ma owa onangika la manga perelu niahidailako.

⁷ De ufa hiadono ngone homaabudi la hato nanga datoro ka idadi hagogono la ufa wamake Ma Jou, angamoi Una gea duru ko idadiua iwibudi-budi. De abe nako nanga bibiti o kia dika hodatomo, ahao ena gea ma hofoko hamake, de ko utuinoua ma hofoko hamake.

⁸ Ho ngone onagona dika abe nanga badanga ma hafini ma dorou hodatomuku de hapaliara, de gea ma hofoko o honenge de o gorofu nanga wowangoka. Masara nako hodatomo gea abe imakiniiki de Ma Jou o Womaha ai mau ngoneino, de gea ma hofoko ahao o wowango ka hiado-adonika.

⁹ De ngone ufa hodebeturu hodiai ma rorahai, ma kiani ngone hogila-gila dika ma rorahai hotobadiai. Angamoi ahao naga ma oraha iboa abe genangoka de ma hasili ma owa hamake to ngone nanga datoro ma rorahaiino, ma iti abe ufa nanga hininga itubuhoholi de hiadono homahipipidili genangino.

¹⁰ Ho ahao nako naga ma oraha la ka idadi haduhunu o nyawaika, gea ma oraha ma getongo kiani hale de hapake la o nyawa mata-mataika haduhunu. De hongoli nako nanga gogianongoruika abe ngone o ngongaku moi, abe onangika kiani duru inamagawe haduhunu.

O Paulusu ma moioli wahitiari wato ufa yomahuna

¹¹ DE ABEIKA NAA AHI DULIHI MA AGO-AGOMO TOTULIHI NGINIKA, ANGAMOI NAA AHI HURATA TOHIBOBAHA NAA DE TO NGOHI MA HIRETE AHI GIAMA.

¹² De nako ona gea nginioka iniroribuutu la ato nimahuna, tanu ona gea manga hininga la ato ufa hiadono manga dodiawo o Yahudi ma nyawa abe yomahunaka, ufa hiadono manga dodiawo gea ko yasanangiua onangika. Angamoi ona gea ihiorikoka abe nako yaniiki to ngone nanga dodotoko gea abe homahinganono o Kristusu ai gotaika dika de Ma Jou wonadafongo, de gea ahao to ona manga dodiawo yangamo de yahikangela onangika. Masara nako hoka ona inidotoko nginika hiadono ngini nianiiki hoka onangoli de nimahuna, gea de ahao to ona manga dodiawo yasanangi onangika, angamoi gea ngini nianiikoka to ona o Yahudi ma nyawa manga pareta. Ho duru gea ena ma titi hiadono ona iniribuutu ato nimahuna.

¹³ De ngaro ona abe yomahunaka, ma ona yaniiki o Musa ai Pareta ka ma hononga dika de ko mata-mataikaua! Masara ona gea yoigo la nginioo nimahuna abe hoka onangoli! De gea manga hininga ato nako hoka ngini nimahunaka, gea ahao ka idadi yoade-ade de yomagoraka manga dodiawoika. De bote ahao manga demo ato, “Ngomi naa ma titi hiadono ona gea yomahunaka ho ona yodadioka to ngomi mia nyawa.” De manga demoino gea ahao yomalingiri o higiriiri manga dodiawo o Yahudi ma nyawaino.

¹⁴ Masara nako ngohi naa, ngaro ahi datoro o kia dika naga ma ngohi duru toluku tomahigiriiri ma titi genangino. Masara abe ngohi tohigiriiri, gea nanga Baluhu o Yesusu Kristusu dika ai datoro o gota isosalioaika, genangika dika abe ngohi tohigiriiri. Ho mangale ma titi abe Una wodiaioka ai gotaka, ho naa imaketero hoka o dunia naa ma hiaturu ihonengoka ngohino, angamoi ahi hininga duru ko itagiokaua genangika. De hokogenangoo o dunia naa ihietongo ngohino ato ngohi duru ko kia-kiaua, ho hiadono ngade-ngade hoka ngohi tohonengoka o duniaika.

¹⁵ Abe ngaro ngone homahunaka eko ko homahunauahi, ma gea duru ko kia-kiaua Ma Jou ai himangoka. Masara iti abe ngone homoi-homoi de Una wonahidoakoka o wowango ma hungi ho wonahidadioka ai nyawa ma hungioli. De ena gea abe duru ikurutiye Ma Jou ai himangoka.

¹⁶ De naa ahi demo ma dumutu ka nginikaua dika abe ngini ko o Yahudi ma nyawaikaua, masara naa tinihidumutu nginikaoo abe o Yahudi ma nyawa abe ngini niagou-goungu nidadioka to Ma Jou ai nyawa idodutu. De hokonaa ahi demo. De ngini onagona dika abe nia wowangoka de nianiiki de ahi behehongo gea ma demo nginika, de gea ngini ahao niamake ai hininga ma miriidi de ai hininga ma dora Unangino.

O Paulusu ai hurata wohibobaha

¹⁷ De naa tinihibehehongo nginika tato ma oraha nenangoka de imahikaika o nyawa onagona dika de ibootohi ihihikangela ngohino ma titi ahi dodotoko. De gea ibootohi o nyawa ihingelo ato Ma Jou ko wohihitagongua ho ahi dodotoko ko to Unangua ai abari. Angamoi to ngohi ahi badangoka naa igoungu naga ma dodunguu ahi nabo ma boke-bokeke de gea ihihitaana ngohino abe ngohi naa igoungu wohihitagongino de to Una ai Abari ma Rorahai. Ho gea ngohi tato kiani o nyawa yodafongo ahi demo naa.

¹⁸ De naa, ahi gogianongoru, ngohi tinigahoko nanga Baluhu idodutu o Yesusu Kristusika la to Una ai owa winihidoaka ti ngini nia kokihiningaika. Amin.