Galatia 5 - Ma Jou ai Demo-demo o Totobelohoka

¹ De mangale ma titi o Kristusu wonahihoheoka o Pareta ma papakitino, ho ngini naa kiani ka ihikaika nimaagoana de nimatongohono done ahao nilioli ma Paretaika gea de inihidapakitokali de done ahao nidadioli to ena ma gogilaongo.

Nako ngini nianiiki ma Pareta de inihunaka, gea nioporetoka Ma Jou ai hidoaka ma owa nginika de nirehenoka ma gou-goungino

² Abeika naa nitotoihene ngohi o Paulusu ahi demoika. De naa ngohi tinihitiari nginika tato nako hoka inihuna de nimahinganono o huhunaika gea la niato Ma Jou winidafongo ma titi o huhunaino, de gea o Kristusu ai duduhunu nginika, gea ka parahaja dika.

³ De naa ma moioli tinihitiari nginika tato nako hiadono nimahigunoa la inihunaka, gea kiani o Musa ai Pareta gea iahumu kiani ka ihikaika nianiiki, angamoi nako ka ma dobiki dika nianiiki, gea ko idadiuahi iniduhunu.

⁴ De nako nihitaili ka ihikaika nianiiki ma Pareta gea la niato nimahitotiai Ma Jou ai himangoka, genangoka de aino de ngini nimakitingakoka de o Kristusu, angamoi gea nioporetoka Ma Jou ai hidoaka ma owa nginika.

⁵ Masara nako ngone onagona dika abe homahinganono Ma Jou ai owaika de hingaku o Kristusika, de gea ngone duru honganono ahao Ma Jou wonafetongo wato ngone hototiai to Una ai himangoka. De nanga nganganono gea iboa Ma Jou o Womahino, ho gea duru hododamaa de nanga magawe la ma wange gea adonoka de nanga totiai naga ingodumoka ma titi nanga ngongakuino.

⁶ De gea nako ngone nagau o Yesusu Kristusoka, ngaro homahunaka eko ko homahunauahi, ma gea duru ko kia-kiaua Ma Jou ai himangoka. Masara abe duru iperelu, gea kiani naga nanga ngongaku Unangika. De nanga ngongaku gea ahao hahimatoko o nyawaika abe ma oraha ngone homakodora.

⁷ De ngini ma dihiraino nioaguru duru irahai nia ngongakuoka, masara ma oraha naa naga de ngini hadongoo de nirehenoka ma gou-goungino! De gea done ma titi onagonaino hiadono initatoko de inihirehene hokogea?

⁸ De gea itararonoka ko Ma Jouua winihigaro de winihirehene ho hiadono nimahinganono o Musa ai Paretaika, angamoi to Una ai hininga la ngini ka idadi niwingaku ai Ngofakika dika.

⁹ De ngini genangoka kiani duru nimahidodiai, angamoi o rerehene ma dodotoko gea duru de ma bihaka de igapanga imahora ngini mata-mataika. De gea imaketero abe hoka nanga demo ma dulu itemo ato, “O tarigu o pupuka moi de o ragi ma hohutulu gea ihifero mata-mataika.” Hokogea nanga demo ma dulu.

¹⁰ De nako ngohi, naga ahi nganganono nanga Baluhika ma titi ngini. De gea ngohi duru tonganono ahao ngini ko nianiikua o nyawa utu manga hininga de manga dodotoko ma rerehene, masara abe ka ma gou-goungu dika ngini ahao nianiiki. De onagona dika naga abe iniruwae de inihipusingi doka nia hiningaka la ato inihirehene ma gou-goungino, de ona gea duru tonganono ahao kiani ona yamake manga hohowono.

¹¹ Ahi gogianongoru, ngohi ma oraha naa de o nyawa utu ka ihingamohi de ka ihihikangelahi ma titi ahi dodotoko ma demoino. Ho naa moi tonaleha, sarakia, nako hoka ngohi tohibehehongo o nyawaika tato kiani yomahuna la ahao ka idadi Ma Jou wadafongo, gea de o nyawa utu gea ka ihihikangelahi? Koua, hokogenangua, angamoi nako hokogea ahi dodotoko, gea ona ahao duru yoigo ahi demoika de gea ko ihidungonua. Masara hokogenangua ahi dodotoko. De igoungu ona gea manga hininga ieteke ngohino ma titi abe ngohi tadotoko o nyawaika tato kiani homahinganono nanga Baluhu ai gota isosalioaika dika la ahao Ma Jou wonadafongo, de ona manga hidungono gea ihititi ai gota isosalioainoka.

¹² De nako ngohi ahi hininga onangika gea abe iniruwae la ato nimahuna, iya, ngohi tanu toigo la ona gea ufa ka yomahuna dika, masara koaho ona yomakabiirioka dika!

Ngaro Una wonahihoheoka o pareta ma papakitino, ma ufa genangino hohititi la ma dorou haniiki

¹³ Ahi gogianongoru, ahi demo nginika hokogea ma buturungu angamoi ngini winiahokoka Ma Jou la gea winihihohe ngini o pareta ma papakitino. Ho gea ibootohi nimahinganono genangika la niato genangino de Ma Jou winidafongo. Masara gea ngaro winihihoheoka nia papakitino ma ufa genangino nihititi hiadono nimahigunoa la nia badanga ma hafini ma dorou nianiiki de hiadono niahowono. Masara koaho ngini mata-mataika nimaketeleleani de nimakokuduhunu ma titi nia doraino.

¹⁴ Angamoi nako ngone ka ihikaika homakodora, gea tanu haniikoka Ma Jou ai Pareta mata-mataika. De gea igoungu angamoi nako Ma Jou ai Pareta mata-mataika gea ka idadi hohidotoomuino de ka ma moi hohidefetongo de ma demo moi dika, gea hokonaa, abe itemo ato, “O nyawa utuika kiani niadora abe imaketero hoka ti ngini ma hirete nia roehe niodora.”

¹⁵ De masara nako ngini ka nimakangamo de nimahiketehikangela abe imaketero hoka o aewani o fuhuku imakokogoli, gea kiani nimatogumohi de nimahidodiai done ahao ngini nimahiketehibinaaha ka hiadono nimamataka!

Nako Ma Jou o Womaha wonahihira-hira, gea ma dorouika ko haniikua

¹⁶ De naa ngohi tinihigaro nginika tato koaho nimahigunoa la Ma Jou o Womaha winihihira-hira ti ngini nia kokiwowangoka. De nako hokogea niwinii-niiki Unangika, gea ahao ngini nia wowango ma hafini ma dorouika gea ko nianiikua.

¹⁷ Angamoi nako to ngone nanga hafini ma dorou, gea duru yoigo yaniiki o kia dika abe imakalawana de Ma Jou o Womaha ai hininga. De hokogenangoo Ma Jou o Womaha wonahigaro la hohafini ma rorahaiika abe imakalawana de to ngone nanga badanga ma hafini ma dorou. Ho ena gea hinootoo duru imakokalawana nanga hininga ma goronaka, ho hiadono nanga hidee utu yaruwae de atatoko la ma bahaika de nanga hidee gea ko idadiua ihofoko.

¹⁸ Masara nako ngone abe Ma Jou o Womaha wonahihira-hira de hitobaniiki, gea ngone ko homahinganonokaua o Musa ai Paretaika la ena gea inahihira-hira, angamoi Ma Jou o Womaha nagau ngoneoka ho Unangoli ka idadi wonahihira-hira nanga hiningaka.

O badanga ma hafini ma dorou ma gegetongo

¹⁹ De nako o nyawa ka yaniiki manga badanga ma hafini ma dorou, de gea ahao manga datoro duru yahitaana de itararono abe ona manga hafini ma dorou ona gea yahihira-hira. De gea manga datoro hamake hokonaa. Abe hoka o nyawa yomatengo de yomakitigi de abe ko manga fekatua eko manga rokatua, eko hoka o nyawa yomahitorou, eko hoka o nyawa abe manga gimono ma dorou duru yahipareta onangika.

²⁰ De utu manga datoro naga abe hoka yomahijou de o kiahonangika, eko naga utuoli yomakowokuhu eko manga dodiai yotobadiai. De naga utu abe manga wowangoka manga dohata de hiadono yahiningagogono o nyawa utuika, de naga utuoli yomaketeloliliara, eko yomaketetaleana, eko duru yomakangamo. De naga utu hoka duru yoigo yomahilaku ho to ona ma hirete dika manga mau yolegaika. De naga utu abe hoka manga doomuoka de manga hininga la yahikangamo de yahikeregu ma doomu gea ka hiadono ma reguino gea ahao yomakokalawana.

²¹ De gea naga manga hiningaka ma daleana ma hofoko o nyawa utuika. De utuoli manga datoro naga abe hoka yatobadaluku, de duru yoigo yaniiki o rame-rame abe genangoka o nyawa yadalu-daluku de gea hiadono manga badanga ma hafini ho ona ko yomahiparetakaua. De gea naga utuohi ma datoro manga badanga ma hafini ma dorouino abe naa ngohi ko tafetonguahi. De igoungu abe ma dihirainohi de ngohi tinihitiarioka ma titi naa ena, masara naa de tinihitiarioli tato onagona dika abe manga wowangoka hokogea ma datoro biaha yanii-niiki, ona gea ahao duru ko yamakeua manga utumu Ma Jouoka de aino abe ahao ma oraha Una wonahikoano ngone mata-mataika ai nyawa.

Ma Jou o Womaha ai hofoko nanga wowangoka ma gegetongo

²² Masara nako hoka naga o nyawa yomatengo de yomahigunoa la Ma Jou o Womaha wahihira-hira ona manga wowangoka, gea ka idadi hamake onangoka ma hofoko abe iboa Ma Jou o Womahino. De gea ma hofoko hamake hokonaa manga wowangoka. Abe naga manga dora, de manga garago, de manga hininga ma miriidi, de manga dongohono, de manga hininga la yahidoaka o nyawaika, de o nyawa utuika yao irahai, de manga demo yatobagou-goungu,

²³ de manga hininga ibole-bole o nyawaika, de yomatongohono ma dorouino. De hokogea ma hofoko abe ka idadi hamake o nyawa manga wowangoka abe nako iwinii-niiki Ma Jou o Womaha. De gea nako ma paretaka, gea moioo de ko iwa ma pareta abe imakalawana de ma rorahai gea abe naga nanga wowangoka. Ho nako ngone duru hiniiki Ma Jou o Womahika, gea ngaro ufa dika de hohawana abe ma paretaino hatilakuru, angamoi gea ka imakiniiki dika.

²⁴ De ngone onagona dika abe hodadioka to Yesusu Kristusu ai nyawa, ngone nanga badanga ma hafini ma dorou de nanga badanga ma horoodo ma dorou mata-mata gea hoka ihidapakuikaka to Una ai gotaika.

²⁵ Ho mangale ma titi nanga wowango ma hungi Ma Jou o Womahoka de aino iboa, ho kiani ngone homakiniiki de Una.

²⁶ De gea ufa hiadono ngone homasade de homakokangamo de ufa homaketetaleana ngone de nanga gogianongoru o Yesusoka.