Galatia 4 - Ma Jou ai Demo-demo o Totobelohoka

Womatengo o ngofaka ma eteteke ai oara ma hiketero

¹ De naa moi tinihidoaka o hiketero ma titi ahi demo gea kangano abe nanga gogere o Yesusu Kristusoka la ena gea utuohi itararono nginika. De nako naga womatengoani o ngofaka ma eteteke, una gea ahao kiani wamake ai oara ai babaka de aino, abe hoka ma baba ai tonaka de ai tau, de gea mata-mata ahao idadi to ma ngofaka ai kuaha. Masara nako ma ngofaka gea ka ai etetekohi, gea ko iwahi ai kuaha ai oarika, ho una gea duru yomaketero hoka o nyawa manga huhuloko dika abe unangoo duru ko iwa ai kuaha.

² Ho ka hiadono ai ngumuru adonoka abe ma dihirainohi de ai baba waetongoka ai taongo ma ngoe hokogea, de gea ahao naga ai kuaha ai oarika. Masara nako ma ngofaka ai ngumuru ko adonuahi, gea kiani una naga ai hingounu onangika abe ai baba wahewa-hewaika la wato ona gea iwihitobahigoa-goana. De nako ahao ai ngumuru adonoka, de gea ai gogoana manga kuaha ko iwaka ma ngofakika gea.

³ De naa tonahiketero hoka ngoneoli naa. Abe ngone ma dihiraino de homaketero hoka o ngofaka womatengo ai eteteke de gea angamoi naga utu de ma kuahaka ngoneino. De gea naga utu o pareta ma hiaturu de o duniaka naa ma hiaturu abe inahitobapareta ngoneino ma oraha gea.

⁴ De ahao naga ma oraha adonoka abe Ma Jou wihidingoto to Una ai Ngofaka naa o duniauku de gea womaboa o ngofekaino. De gea womaboa o Yahudi ma nyawaino ho wolamoko o Musa ai Pareta ma kuahaka.

⁵ De gea Una woboa la gea wato wonabangu abe ngone ma Pareta ma kuahaka homanoa, de ka idadioo ngone abe hingaku-ngaku wonagoraka la wonahidadioka to Una ai ngofa-ngofaka idodutu.

⁶ De gea mangale ma titi ngone hodadioka to Una ai ngofa-ngofaka, ho hidutu Ma Jou wihidingoto ngoneuku to Una ai Ngofaka ai Womaha la Una gea womanoa to ngone nanga kokihiningaka. De ai Ngofaka ai Womaha gea ka ihikaika wokarajaanga nanga kokihiningaka la hiadono ngone duru hohioriki de hongaku abe Ma Jou wodadioka to ngone nanga Baba. Ho gea ma titi hiadono ngone ma oraha homaniata Unangiye de hobaba Unangika de nanga hininga de ma dora.

⁷ Ho ahi gogianongoru, mangale ma titi ngini nihiorikoka abe Ma Jou wodadioka ti ngini homoi-homoi nia Baba, ho gea duru kiani nihiorikoo abe ngini ko o gogilaongokaua. Ho gea ma titi abe ngini ko o Pareta ma gogilaongokaua de ko o duniaka naa ma hiaturu enangoo ko ma gogilaongokaua, angamoi ngini naa nidadioka to Ma Jou ai ngofa-ngofaka. Ho mangale igoungu ngini naa to Una ai ngofa-ngofaka, ho de ahao nginioo niamake ai owa mata-mata abe ma dodihirainohi de wonahideeoka ngoneino, gea wato ahao wonahidoaka ngone ai ngofa-ngofakino ai owa mata-mata gea.

O Paulusu duru wogahoko la ufa yorehene ma homoaika masara kiani ka yaniikohi o Abari ma Rorahai

^8-9 Ho igoungu ngini naa nidadioka Ma Jou ai ngofa-ngofaka idodutu, ho done ma titi o kia ho hiadono nia hininga niato nimahidadioli o gogilaongo abe hoka ma dodihirainoli? De abe nako ma dihiraino, gea ngini ko niwihiorikuahi Ma Jou, ho gea ngini nidadi hoka o gogilaongo enangika abe o nyawa utu ihiromanga ato o jou, masara gea ena tanu igoungu ko o jouua. Masara ngini ma oraha naa de niwihiorikoka Ma Jou idodutu, eko, iya, koaho totemo tato gea Una abe winihioriki nginika. Ho mode gea ena de ngini niato niogilioli abe o pareta de o duniaka naa ma hiaturu! Angamoi genangino ma kuaha de ma utumu duru ko iwa, ho gea ena duru ka parahaja dika hanii-niiki. Ho bote ngini duru nioigo nidadi o gogilaongo genangika e?

¹⁰ De ngohi hokogea tinitemo nginika angamoi toihenoka abe ngini nia hiningaka nioigo nianiiki o Yahudioka manga agama ma Hiaini ma wange, de o mede ma hungi ma rame-rame, de naga ma rame-rame utuoli ma hiaturu mata-mataika, de gea ngini nioigo nianiiki. De gea nianiiki la niato niwihisanangi Ma Jouika hiadono winifetongo wato nitotiai ma titi naga nia hingounu ma hiaturika gea.

¹¹ De gea ma titi ngini nia hininga irehe-rehenoka hiadono ngohi ahi hininga ihawanoka tato done ahi karajaanga ma amoko abe nginioka, gea done ka parahaja dika. Angamoi nako ngini ko nianiikokaua o Abari ma Rorahai, gea ka parahaja dika ahi karajaanga abe ma dihiraino genangoka.

¹² Ho naa ahi gogianongoru, ngohi duru togahoko la tato ufa ngini nirehene ma homoaika, masara koaho ngini nimaaduru abe hoka ngohioli. Angamoi ngohi ko tomahinganonokaua o Musa ai Paretaika. De ngohi igoungu o Yahudioka ma nyawa, masara naa todadioka abe hoka nginioli ko o Yahudi ma nyawaua, abe gea ngini ma dihiraino de duru ko iwa nia nganganono o Musa ai Paretaika, de nako ngohi ma oraha naa de ngohioo ko iwaka ahi nganganono genangika. Ho ngohi duru togahoko la ngini de ngohi homakokutuono homahinganono o Kristusika dika de gea ibootohi ma Paretaika homahinganono. De ngohi ahi hiningaka ko totemoua tato homakalawana ma titi nanga hininga imaketemomomoi. Angamoi ngini ma oraha ngohi nagahi nginioka de ngini duru ko iwa nia howono ngohino de gea ngini duru nihiao irahai.

¹³ De marai ngini ka niohiningahi abe ma oraha toboa nginika de gea ahi badanga duru ko isanangiua. De tanu ma titi ahi badanga ma kangela gea hiadono ngohi tomahiainohi nginioka de ma oraha gea tapake la ka idadi tinihingahu-ngahu o Abari ma Rorahai nginika.

¹⁴ De ngaro ahi badanga ma kangela gea inihitubuho nginika, ma ngini ko nihidebeturua de ko nihiolukua. De nako ngini hokogenangua nia hininga, masara ma oraha gea de ngini duru nihidafongo irahai abe ngade-ngade hoka womatengo Ma Jou ai malaekata niwidafongo. Eko ka idadi totemo tato ngini nihidafongo ngohi, gea duru imaketero hoka o Yesusu Kristusu ma hirete niwidafongo.

¹⁵ Abe ma oraha gea ngohi duru tohioriki abe ngini nia hininga duru de ma garagoka ngohino de hiadono ti ngini nia magawe naga la niato nihiduhunu. De nako hoka ka idadi ngini nia lako ma gomono niahuputu de nihihidoaka ngohino la niato nihiduhunu ngohi, de gea ngohi duru tohioriki abe ngini hokogea nidiaioka ma oraha gea. Ho naa mode nia hininga ma garago gea o kiaikaka? De bote naga ma titi o kia hiadono nia hininga ngohino yaturuuruoka?

¹⁶ Angamoi bote ngohi naa todadioka ti ngini nia musu abe ngohi ahi demo ma gou-goungu naa tinihiree-reeika nginika? Tonganono la nia hininga hokogenangua.

¹⁷ De naa ngohi tinihitiari nginika abe ma titi ona genangoka abe duru yoigo de yomagawe inidotoko la ato inihigaro hiadono o Musa ai Pareta nianiikoli. Angamoi igoungu ona gea duru yamagawe la ato yomahitoona ngini genangoka la onangoli ngini nianiiki, masara gea manga hininga ma dumutu gea ko irahaiua. Abe ona gea manga hininga la inahikatingaka ngini de ngohi la hiadono ngini nidadi to onangoli manga nyawa de duru inimagawe nianiiki ka ona dika.

¹⁸ De nako o magawe, gea duru irahai inamagawe iti abe nanga magawe ma hidumutu gea ma rorahaiika. Masara iti ufa ma oraha abe ngohi naga nginioka de ma oraha gea dika abe nia magawe naga ma rorahaiika. Koaho ka ihikaika ma rorahaiika niodomagawe nianiiki. De iti ufa ma titi ngohi ko ihiwa nginioka de gea ma titi hiadono nimahipipidili ma rorahaiino abe ma dihiraino tinihingahu-ngahuoka nginika.

¹⁹ De ahi ngofa-ngofaka abe duru tinidora, ngohi ahi hiningaka duru itubuho de ihuha ma titi ngini genangoka! De naangoli tomamao abe imaketero hoka o ngofeka momatengo itigioka momagerewoto ho ami kangela imulaengoka. Abe ma dihiraino de ngohi ma kangela tomamao angamoi ngini ko nimaboauahi o Kristusino. Ho naa ma moioli tomamao tokangela abe ma titi nia ngongaku ko ibaluhuahi o Kristusika. De ahi hininga ma kangela naa igila-gila hiadono ngini nimaaduru abe hoka o Kristusoli ai hininga la gea nimaketehiningamoi de Una.

²⁰ De naa ngohi tanu duru toigo la ma oraha naa dika de ngohi naga nginioka la homarihimanga. Angamoi nako hoka homarihimangino de homakoketemo, gea de ahi demo nginika ahao bote hatoli utuohi inihitaana ti ngini nia hiningaka. Masara nako nenangoka ahi hiningaka ililifanga ho done o kia todiai eko o kiali totemo?

Abe o dodotoko moi o Paulusu wagoraka ma titi o ngo Hagara de o ngo Sara

²¹ De naa ahi demo tinihidumutu nginika abe ngini duru nioigo nimahingahu abe ka ihikaika nimahinganono o Musa ai demo mata-mataika. Angamoi naa o ade-ade moi tagoraka o Musa ma hirete ai demoino, ho abeika niongano-nganono ma ade-ade naa moi la nako nihiorikoka ma titi genangino eko kouahi, done nagahi ma kuranga ti ngini nia hiningaka ma titi to Musa ai demoino.

²² Angamoi Ma Jou ai Bukuoka inahingahu ato nanga tofora o Abarahaama naga ai ngofaka yahinooto. De gea ai ngofaka ma riaka womaboa o ngo Sara ami gilaongino abe muna gea o ngo Hagara. De nako ai ngofaka ma dodoto una gea womaboa o ngo Saraino, abe muna gea ko o nyawa manga gilaongua.

²³ De ai ngofaka ma riaka abe o gilaongino womaboa, una o nyawa manga hideeoka de aino womaboa. Masara ai ngofaka ma dodoto, una gea womaboa ma titi ma dodihirainohi de Ma Jou wihibehegongoka o Abarahaamika wato ahao o ngofaka wihidoaka unangika.

²⁴ De ma ngofeka yahinooto gea, ona gea ngohi ka idadi tahiketero de Ma Jou ai behehongo hinooto. De gea o gilaongo o ngo Hagara, muna gea tomihiketero hoka Ma Jou ai behehongo abe ma dihiraino wahidoaka ai nyawaika o Musaika o Sinai ma lokuoka. De ai behehongo onangika gea o Pareta, de ona ma oraha gea yodadioka o Pareta ma gilaongo. De nako ona o gogilaongo manga ngofa-ngofaka onangoo yodadioka o gilaongo, ho gea hohioriki abe o ngo Hagara ami ngofa-ngofaka ka de yomaboa de gea ona yodadioka o gilaongo. Ho gea tohiketero tato abe onagona dika ma oraha gea eko ngaro ma oraha naa naga, ma onagona dika abe yomahingano-nganono ma Paretaika, de ona gea yodadioka hoka to ena ma gilaongo.

²⁵ De gea igoungu abe o ngo Hagara de ami totoforauku ona yomanoa o Sinai ma tonakoka, de ma Pareta enangoo iboa o Sinai ma lokuino abe o Araba ma tonakoka imanoa. Ho ngaro muna eko ngaro ma Pareta, masara gea mata-mata yoboa o Sinai ma tonakoka de aino. Ho gea o ngo Hagara de ma Pareta hatoli yomaketero dika angamoi ngaro to muna ami ngofa-ngofaka eko ngaro ona abe yanii-niiki ma Paretaika, ma ona gea mata-mataika yodadioka o gogilaongo, de to ona mata-mata manga tonaka gea ka moi dika. De masara ngaro ona o Yerusaleeme ma kotaka de ngaro ona o Yahudi ma nyawa mata-mata abe ma oraha naa ka yomahinganonohi ma Paretaika ho ka yanii-niikohi enangika la gea ato Ma Jou ka idadi wadafongo, masara gea onangoo mata-mata yodadioka yomaketero hoka to o ngo Hagaroli ami ngofa-ngofaka, angamoi ona gea yodadioka to ma Pareta ma gogilaongo. De gea hokogea tohikoketero o ngo Hagara de ma Pareta de ona mata-mata abe ma oraha naa ka yanii-niikohi o Musa ai Pareta, angamoi gea ma ngofaka mata-mataika ka yomakoketero dika ho yodadioka o gogilaongo.

²⁶ De masara nako o ngo Sara, muna gea ko o nyawa manga gilaongua, de muna gea monahihohininga ma titi Ma Jou ai behehongo ma dihirainohi abe wihibehehongo o Abarahaamika, angamoi gea ai behehongoka de Ma Jou wato ahao naga ai hidoaka ma owa moi onangika. De muna gea ka idadi tomihiketero tato muna hoka o Yerusaleeme ma kota idodutu abe o Horogaka imanoa. Angamoi genangoka duru ko iwa o Musa ai Pareta, ho o Horogaka ma nyawa moioo de ko iwa abe ona o gilaongohi o Paretaika. Ho ngone naa to o ngo Sara ami totoforauku ma gou-goungu, ho ngoneoo hodadioka o Horoga ma kota ma kokawaaha ma gou-goungu.

²⁷ De gea ma dodihirainohi de ihitulihukuoka Ma Jou ai Demo-demoka o Yesaya ai demo moi abe duru imakiniiki de ihitaana de ahi hiketero ma demoino naa ma titi o ngo Sara de o ngo Hagara. De abeika ai demo gea itemo ato, “Ngona abe ma dihiraino de duru ko ma moiuahi de ani badangoka, ngona ma oraha naa ka idadi nogogaragoka. De ngaro ko ma moiuahi ngona namao abe ani pokoro igoli la nomagerewoto, masara naa ka idadi ngona nohiboa-boaka de ani garago. Angamoi ma dihiraino de igoungu ani rokata woninoaikahi de ma ngofeka moioli gea womale la gea wato ai ngofaka womamake munangino. Masara ngaro hokogea, ma nako ngona de ma ngofeka gea, de ka to ngonahi ani ngofa-ngofaka ahao duru yowoe. Ho genangino ma titi ho hiadono ngona kiani nogogaragoka.” Hokogea o Yesaya ai demo ma dihiraino.

²⁸ De ngini naa, ahi gogianongoru, ngini tinihiketero de hoka o Isaka abe una o ngo Sara ami ngofaka, angamoi una womaboa gea ma titi Ma Jou ai behehongino. De nginioo naa nidadioka Ma Jou ai behehongo ma ngofa-ngofaka, angamoi ngini niangaku to Una ai behehongika.

²⁹ De ma oraha gea abe o Abarahaama ai ngofaka abe o nyawa manga higaroka de aino womaboa, una gea duru wihikangela ai dodotika abe una womaboa Ma Jou o Womaha ai kuahaino. De gea duru imaketero dika abe hoka ma oraha nenangoli, angamoi naa naga idadioka abe ona ka yomahinganonohi o Musa ai Paretaika, de ona gea inahikangelali ngoneino abe ngone homahinganonoka Ma Jou ai behehongika.

³⁰ Ho gea koaho hokokia ngone hodiai? Abeika homalega Ma Jou ai Demo-demoika la hokokia inahidumutu. Angamoi naga ai demo moi abe ma dodihirainohi de ihitulihukuoka itemo ato, “Kiani nakiniikoka ani tauino abe muna gea ma gilaongino de ami ngofaka. Angamoi duru ko idadiua ma gilaongo ami ngofaka gea wamake ai babaino ai oara. De gea ma oara kiani ma gahumu igila-gila unanguku abe ngoi meme ko o gilaonginoua ma nyawa.” Hokogea itemo Ma Jou ai Demo-demoka.

³¹ De ahi gogianongoru, hokogea to ngohi ahi hiketero ma demo ma titi abe ona o Pareta ma gogilaongo de abe ngoneoli naa Ma Jou ai behehongo ma ngofa-ngofaka. Abe ngone naa ko ma gilaonginoua ami ngofaka, de gea ma titi ngone ko o Pareta ma gogilaongua. Masara ngone naa tonahiketero tato to ngone nanga meme gea muna abe ko o gilaonginoua, de gea homaboa Ma Jouoka abe ma titi ai behehongo ngoneino, ho gea duru ko iwa nanga papakiti o Musa ai Paretaika.