Galatia 3 - Ma Jou ai Demo-demo o Totobelohoka

O Abari ma Rorahai de o Musa ai Pareta gea o Paulusu wohikohowono

¹ De naa ngohi kiani duru tinihiree-reeika abe ngini o Galatia ma nyawaika, angamoi naa ma duruika de ngini duru nibodo abe hokokia nimangiriki ti ngini nia hiningaka. De gea tinimake hoka bote naga nia hiningaka de ma gogorobitoka hiadono nirehenoka ma gou-goungino. Angamoi ngini ma dihirainohi de niataoko duru itararono abe ma titi o Yesusu Kristusu ai hohonenge ma gota isosalioainoka la hokokia winiduhunu ai hohonengino. De gea ngini hadongoo de niwingakuoka masara naa de ai hiningaino nirehenoka ma homoaika! Abe ma dihiraino gea de ngade-ngade imaketero abe hoka ngini de nia lako hinooto ma hirete niwimake nanga Baluhu. Masara naa naga de nia hiningaka hoka inihirafioka.

² De ngohi tinihioriki nia hininga ma dihiraino gea, abe ngini niagou-goungu niwingaku Unangika. De abeika Ma Jou ai owa ma amoko de ma ngoe abe winihiowaka nginiuku, de gea ngaro hiadono Ma Jou o Womaha, ma Unangoo Ma Jou winihidoakoka nginika! Ho naa moi tinileha la abeika hokokia ngini nipaluhu. Ho sarakia, ngini ma dihiraino hokokia ma titi ho hiadono niwimake Ma Jou o Womaha? De gea niwimake bote ma titi abe o Musa ai Pareta niatobanii-niiki? Koua, marai hokogenangua, e? Angamoi gea niihenino o Abari ma Rorahai abe ma titi o Kristusino, de gea ngini nitoihene ipaha de niangaku genangika, de gea ena ma titi hiadono niwimake nia wowangoka Ma Jou o Womaha, ho gea ko ma titiua ma Paretaino.

³ Ho done adodoa ho de ma oraha naa nia hiningaka duru ifufutuoka hiadono ngini nibodo? Abe ma dodihiraka ka de niwingakuoka Unangika de igoungu Ma Jou o Womaha winihihira-hira nia wowangoka. Masara naa ngini ko niwihigihenokaua Unangika angamoi nianiikoli ti ngini ma hirete nia hininga, de gea ngini niato ka idadi ma Paretali inihihira-hira nia wowangoka. Ho mode ma oraha naa de nia wowango ma hungi abe gea ihititi nia ngongakuoka, de gea mode ngini niato bote ka idadi ena gea nihigila-gila de ti ngini dika ma hirete nia buturungino, abe gea niato ma Pareta nianii-niiki ka hiadono ko niahowonokaua? Gea nia hininga done sarakia?

⁴ De done sarakia hiadono ngini ma oraha naa de hatoli nirehenoka? Angamoi ngini nengokadauinohi de idadioka ma ngoe abe inihikangela nginika abe ma titi o Abari ma Rorahaiika niangaku. Masara nako ma oraha naa de nimahipipidili nia ngongakuino, gea de ahao nia kangela ma hasili ma dihira gea ka parahaja dika. Ho ngohi tonganono ufa nia ngongaku gea niaumo!

⁵ Ho naa tohigalioli abe ahi leleha kangano tinileha nginika tato, Ho sarakia, gea Ma Jou ka ihikaika winihiowa nia wowangoka de Ma Jou o Womaha ai kuaha, gea bote winihiowa ma titi nianiiki o Musa ai Pareta? De sarakia, Una ka ihikaika wodiai ai heheranga nia hidogoronaka de bote enangoo ma titi ma Paretaika nihingounu? Masara gea duru hokogenangua ma titi, masara gea niamake mangale ma titi abe ngini niangaku ma abarika abe niihenino ma titi o Kristusu. Ho ngohi tinihitiari nginika tato ufa nirehene ai abarioka de aino la nianiikoli o Musa ai Pareta. Masara kiani nigila-gila dika nioaguru nia ngongakuika, angamoi ti ngini nia wowango ma hungi, gea ihititi o ngongakuoka dika.

O Abarahaama una wototiai Ma Jou ai himangoka ma titi ai ngongakuino

⁶ De ahi higaro ma demo gea duru imakiniiki de nanga tofora o Abarahaama ai ade-ade abe Ma Jou ai Demo-demoka hamake. Abe ma demo gea itemo ato, “De gea o Abarahaama wingaku Ma Jouika ho Una wietongo wato una duru wototiai Ma Jou ai himangoka.”

⁷ De genangino itararonoka de kiani hohioriki abe ngone onagona dika de nanga ngongakuoka Ma Jouika, gea to ngone nanga ngongaku Unangika imaketero dika de hoka o Abarahaamoli ai ngongaku Unangika, ho ka idadi inahiromanga ato ngone o Abarahaama ai ngofa-ngofaka idodutu abe ma titi nanga ngongakuino. Ho gea Ma Jou wonadafongo ngoneoo abe imaketero hoka ma dihiraino Una widafongo nanga tofora o ngongakuino o Abarahaama.

⁸ De gea igoungu abe ngaro ngini ko o Yahudi ma nyawaua, ma nginioo ka idadi Ma Jou winidafongo de winihitotiai ma titi nia ngongakuino. Abe duru ma dodihiraka de Ma Jou wohibehehongokau ma titi ai hidee abe ngini ko o Yahudi ma nyawaikaua. De ma abari ma rorahai gea abe ma dihiraino wihibehehongoka o Abarahaamika wato, “O dutu homoi-homoi mata-mataika o duniaka ahao yakokimake ma owa de gea ma titi ngonaino.” Hokogea ma dihira wihibehehongo o Abarahaamika.

⁹ De ma owa gea o Abarahaama wamake de gea ma titi unangoo o ngongaku ma nyawa. Ho gea ngone onagona dika abe hongaku-ngakuoka Ma Jouika, gea ngone hakokimake ma owa moi abe hoka ma dodihirainohi o Abarahaamoli wamakeoka ma titi Ma Jou wonasanangi ngoneino.

O Kristusu Una wonahihoheoka ma hohowonino gea abe ma Paretaka de aino iboa

^10-12 Masara nako nanga ngongaku de o Musa ai Pareta, gea duru ko imakiniikua. Angamoi nako ma Pareta o nyawa yaniiki, gea ma Pareta yahigaro onangika la ka ihikaika gea dika yanii-niiki. Abe o Musa ai Paretaka naga itulihukuoka ato, “Onagona dika abe yaniikoka ma Pareta, ona gea kiani yomanoa ka genangoka dika ma Pareta ma goronaka.” Hokogea ma Pareta ma demo ma dihira. De gea igoungu abe nako ma Pareta ka ihikaikaua o nyawa yatobanii-niiki, gea ko idadiua Ma Jou waetongo yototiai ho o wowango ma ngango ko amakeua genangino. Masara gea ma dodihirainohi de duru ko moiua abe Ma Jou waetongo onangika wato yototiaioka ai himangoka ma titi yaniiki itiai o Musa ai Pareta. De gea itararono ngoneino de hohioriki igoungu ma titi abe naga Ma Jou ai Demo-demoka moioli abe ma dihiraino ihitulihoka. De ai Demo-demoka gea itemo ato, “O nyawa abe Ma Jou waetongoka wato yototiai ai himangoka ma titi manga ngongakuino, ona gea abe yamakeoka o wowango ma ngango.” Hokogea itemo Ma Jou ai Demo-demoka. Masara nako o nyawa mata-mata abe yomahinganono ma Paretaika la ato duru itiai yaniiki, ona gea Ma Jou ko waetongua wato yototiai ai himangoka, angamoi ona gea duru ko apoaua yaniiki itiai. Ho gea hiadono tanu Ma Jou ahao kiani wahikoboto de o hohowono onangika. Angamoi naga ihitulihukuoka Ma Jou ai Demo-demoka itemo ato, “De onagona dika abe ka ihikaikaua duru yaniiki Ma Jou ai Pareta mata-mataika abe naga ihitulihukuoka ma Pareta ma Bukuoka, de ona gea manga hingounu ko ingodumua o Paretaika. Ho ahao Una kiani wahikokikoboto de o hohowono ona mata-mataika.” Hokogea itemo Ma Jou ai Demo-demoka.

¹³ Masara o Kristusu Una wonabangu ibooto ho wonahihoheoka ma koboto ma hohowonino gea abe ma Paretaka de aino iboa. De gea wonaturuuru la wato ka idadi to ngone nanga koboto ma hohowono iwidaene Unangikali la ngone ko hamakeua. Abe gea nanga koboto ma hohowono Una womahimoku ma oraha abe iwihidapakuika o gotaka. De gea ka idadi hohioriki abe Unangika ma koboto ma hohowono iwidaenoka angamoi hokogea ihitulihukuoka Ma Jou ai Demo-demoka ato, “Onagona dika abe yahidapakuika o gotaika, ona gea yadaenoka Ma Jou ai koboto ma hohowono.” Hokogea itemo Ma Jou ai Demo-demoka. Ho mangale ma titi to Una ai badanga ihidapakuika o gotaka, ho ma dodunguu gea inahingahu ngoneino de ka idadi hohioriki abe ma koboto ma hohowono iwidaenoka.

¹⁴ De abe ma titi o Yesusu Kristusu wonabanguoka de wonahihoheoka nanga hohowonino, gea wodiai la ahao ngini abe ko o Yahudi ma nyawaua ka idadi Ma Jou winihiowa la hiadono nginioo naa niamake ma owa abe imaketero hoka ma dodihiraino de o Abarahaamoli wamakeoka, abe ma owa gea ma titi Ma Jou winisanangi nginikaoo. De nagali moi ai hiningaka abe wato ka idadi ngone hingaku-ngakuoka himake Ma Jou o Womaha nanga wowangoka abe ka ma dihirainohi de wonahibehehongoka. De Una gea ka idadi himake ma titi nanga ngongakuino.

Ngaro o Musa ai Pareta wohidogo, masara Ma Jou ai behehongo ma owa ka ilakuohi

¹⁵ Ahi gogianongoru, ngone naa abe hingaku-ngakuoka, ngone hamakeoka Ma Jou ai hidoaka ma owa ma titi nanga ngongakuino. De gea ai owa hamake abe imaketero hoka ma dodihiraino o Abarahaamoli wamakeoka, abe unangoo wamake ma owa Ma Jouino de mangale gea ma titi to una ai ngongakuino. De ngaro una eko ngaro ngone, ma gea to Ma Jou ai hidoaka ma owa haborimake ma titi ma dodihirainohi de wonahibehehongoka wato onagona dika iwingaku Unangika, ona gea ahao yamake ma owa Unangoka. Ho gea ka idadi hohioriki abe ai behehongo gea duru ko wawohangua. Ho naa moi o hiketero tagoraka abe ngone o nyawa nanga biahaino la gea tinihitararono abe Ma Jou ai hidoaka ma owa o Abarahaamino, gea ko hamakeua nako abe ma titi hatobaniiki dika o Musa ai Paretaika, masara gea hamake ma titi nanga ngongakuino, angamoi hokogea Ma Jou wonahibehehongoka wato wonahiowa ma titi nanga ngongakuino. De hokonaa tohiketero. Abe nako moi ngone de nanga dodiawo homahiketehibehehongoka de nanga behehongo gea hoboridafongoka, de gea nanga behehongo ibootokau. Ho ngaro ngone eko ngaro o nyawa utu, ma ko moiua de ka idadi ihidogo eko aturuuru ma behehongo gea hiadono haboriwohanga. De gea ka o nyawa de o nyawa dika homahiketehibehehongo, masara igoungu nanga behehongo gea duru itiai de naga de ma buturungoka. Ho nako ngone o nyawa de o nyawa dika nanga behehongo de gea ena ko hawohangua, hongoli nako Ma Jou ai behehongo ngone o nyawaino, de gea ena Una duru ko wawohangua, angamoi Una gea ka watobagou-goungu dika ai behehongika.

¹⁶ De naga ma titi moioli hiadono ngohi tato ngaro ma Pareta iboaka masara Ma Jou ai hidoaka ma owa ena gea ka ilakuohi. De gea ma titi abe Ma Jou ma dihirainohi de wihibehehongoka o Abarahaamika wato ai hidoaka ma owa gea itagi o nyawaika ma titi o Abarahaama ai tofora womatengoino, de ko ma titiua o Musa ai Paretaino iboa. Ho abeika hongano-nganono Ma Jou ai behehongo ma dihirainohi abe Una wahibehehongoka ma owa o Abarahaama de ai toforaika. De abeika ma titi moi tinihitararono abe Ma Jou ai behehongo ma demo gea ma dodihiraka witemoka o Abarahaamika. De ma oraha gea de Una ko wahibehehongua abe ona o Abarahaama ai totofora yowoe-woeika. Ko hokogenangua ai demo, masara gea wotemo wato, “ani toforaika,” abe ma demo gea ma dumutu ka womatengoika dika, de gea ngohi tato o Kristusika ma dumutu. De mangale ma titi Ma Jou wahibehehongo o Abarahaamikaoo de ai toforaikaoo abe gea ma titi o Kristusika, gea nako ma oraha o Kristusu ko womaboauahi de duru ko idadiuahi Ma Jou wohingodumu eko wohibobaha ai behehongo gea. Masara kiani o Kristusu womaboaka la gea Unangikaoo ma behehongo itagi. De nako ma dodihiraka abe ma oraha Ma Jou wahibehehongo ai Pareta ai nyawaika, gea de o Kristusu ko womaboauahi, ho duru itararono abe Ma Jou ai behehongo ma owa ihira-hiraika gea ka ilakuohi hiadono ma oraha o Kristusu womaboa naa o duniauku, angamoi ma behehongo gea wihibehehongo o Kristusikaoo.

¹⁷ De naa marai utuohi tinihitararono ma titi Ma Jou ai behehongo gea. De ma dodihiraka ma oraha gea abe Ma Jou wahibehehongo ma owa o Abarahaama de ai toforaika, genangoka de o taongo o ratuhu iata de moruange ipahaika de ahao o Musa ai Pareta Ma Jou wahibehehongo to Una ai nyawaika. Ho genangoka hamake abe nako o Musa ai Pareta gea itoturuino, de abe Ma Jou wahibehehongoka ma owa o Abarahaama de ai toforaika, ka enangohi duru ihira. De gea hohiorikoka abe to Una ai behehongo ihira-hira gea duru ko idadiua wawohanga ngaro naga moioli ma behehongo itoturuino. Angamoi ai behehongo ihira-hira gea Una de o Abarahaama yomahiketehibehehongokau ho ko idadiokaua aturuuru manga behehongo. Hokogea ahi hitararono nginika abe ma titi Ma Jou ai behehongo ma owa gea ka ilakuohi ho o Musa ai Pareta gea ena ko aturuurua.

¹⁸ De nako hoka Ma Jou ai hidoaka ma owa ka idadi hamake ma titi ka ihikaika hatobaniiki o Musa ai Paretaika dika, gea de ahao ko ma titiua to Una ai hiningaka de aino abe wonahibehehongo wato wonahidoaka ma owa ngoneino. Masara gea ai hidoaka ma owa Una wonahidoaka ngoneino ko ma titiua ma Pareta haniiki. De enangoo gea duru imaketero abe hoka ma dodihiraka de nanga tofora o Abarahaama. Angamoi unangoo ma oraha gea wamake ai hidoaka ma owa Ma Jouino de gea ko ma titiua ma Pareta waniiki, masara gea wamake mangale ma titi Ma Jou ai hiningaka de aino abe ma dihirainohi de wihibehehongokau wato ahao wihidoaka unangika. Ho ngaro o Musa ai Pareta wohidogo, masara Ma Jou ai behehongo ma owa abe ma dodihiraino gea ka ilakuohi, abe gea wonahibehehongoka wato wonahiowa ngone ma titi nanga ngongakuino, de gea ena duru ko waturuurua de ko wawohangua.

Adodoa ho hiadono ma dihiraino de Ma Jou wonahidoaka ma Pareta gea ngone o nyawaino?

¹⁹ De naa moi tonaleha. Nako Ma Jou ai hidoaka ma owa, gea hamake ko ma titiua ma Paretaino, masara ma titi abe hingaku Unangika abe imaketero hoka o Abarahaamoli wingaku. Ho gea nako to Una ai hidoaka ma owa ko idadiua hamake ma Paretaino, adodoa ho hiadono ma dihiraino de Una wonahidoakoka ma Pareta gea ngone o nyawaino? De gea ma Pareta wonahidogo ngoneino la genangino de ahao ka idadi hohioriki de itararono abe ngone hatotilakuroka ai mau ngoneino la ufa hogila-gilahi genangika. Masara to Una ai hidee wato ngone o nyawa haniikohi ma Pareta ma oraha genangoka de imahikaino ka hiadono ma oraha o Abarahaama ai toforauku womatengo gea woboaka abe ma behehongo gea ma dihiraino iwihidumutu Unangika. De nako hiadono Una gea woboaka, gea Ma Jou ai hidee wato ngone o nyawa ngaro ufa dika de haniikohi ma Pareta gea. De naga ma titi moioli abe ma Pareta de Ma Jou ai behehongo ma owa o Abarahaamika de gea imakohowono. Gea ma dihiraino de Ma Jou wahidoaka ai Pareta gea ai momalaekatika, la onangoli yadofanga o Musaika, angamoi o Musa una gea hoka womatengo Ma Jou ai demo watobadofanga o nyawaika.

²⁰ De gea ngone hohiorikoka abe nako nanga hininga hato homahiketehibehehongo ngone de nanga dodiawo, de gea nanga biaha hairikoka o nyawa la yodadi nanga demo ma dodofanga. De igoungu hokogea idadi abe ma dihiraino ma oraha Ma Jou de o Isiraele ma nyawa yomahiketehibehehongoka, de ma oraha gea o Musa wodadi to ona manga demo ma dodofanga Ma Jouika. Masara nako naa Ma Jou ai behehongo ma owa o Abarahaamika, gea Ma Jou ko wapakeua o nyawa la ai demo yadofanga masara Una ma hirete wotemo de wihibehehongo ma owa o Abarahaamika. De ahao Una dika ma hirete abe wohingodumu ma behehongo, ho Una ko woperelua o nyawa la ai demo yadofanga.

²¹ De naa hamakeoka abe nako Ma Jou ai Pareta de Ma Jou ai behehongo ma owa, gea igoungu imakohowono. Ho naa tonaleha, sarakia, gea ma Pareta de ai behehongo ma owa gea imakalawana? Duru ma titi hokogenangua! De masara nako ma Pareta ma hidumutu de ma behehongo ma owa, gea ma hidumutu imaketemomomoi. De nako ma behehongo ma owa, gea ena ma hidumutu la ngone ka idadi hamake o wowango genangino, masara ma Pareta ma hidumutu gea la ato ngone duru homahioriki abe ngone naga de nanga howonoka. Ho nako hoka naga o pareta abe genangino ngone hamake o wowango, de genangino ahao bote Ma Jou wonafetongo wato ngone hototiai mangale ma titi duru haniiki itiai gea ma pareta.

²² Masara duru ko iwa o pareta abe gea ma paretaino de ngone hamake o wowango. De tanu to Una ai Pareta hamake ai Demo-demoka, ai pareta gea ena abe inahitararono ato ngone o dunia ma nyawa mata-mataika homanoa o howono ma kuahaka, abe gea imaketero hoka inahidubuika o howono ma goronaka ho ko idadiua hohupu ma kuahaino. Ho ai Pareta wonahidoaka la wato ngone duru homahioriki abe ngone naga de nanga howonoka. De nako hiadono ena gea hohiorikoka, gea ahao homahidiaioka de hodafongo ai behehongo ma owa abe ma dihiraino wohibehehongoka. De onagona dika abe iwingaku o Yesusu Kristusika, ona gea yamakeoka ma owa Ma Jouino abe ma titi Ma Jou wakokiofioka manga howono.

²³ Masara igoungu ma dihira naga ma oraha abe ko idadiuahi hingaku o Yesusu Kristusika angamoi Una ko womahimatokuahi o duniauku. De ma oraha gea imaketero hoka o Musa ai Pareta gea ka inagoanohi de inahigilolitino ho ko idadiuahi hohupu o Pareta ma kuahaino. De gea ena hogila-gila ka hiadono ma oraha Una womahimatoko la ka idadi hingaku Unangika.

²⁴ Ho gea ka idadi hotemo hato ma Pareta gea imaketero hoka nanga gogoana womatengo abe ma titi inatobagoana ka hiadono o Kristusu woboa. De ahao ma oraha Una woboaka de hingaku Unangika, de gea ahao Ma Jou ka idadi wonafetongo wato ngone hototiai ai himangoka de gea ma titi nanga ngongaku Unangika.

²⁵ Ho naa ma oraha adonoka abe ngone ka idadi hingaku o Kristusika, ho naa ngone homanoa ko o gogoana ma kuahakaua, abe nanga gogoana o Musa ai Pareta gea ko inahiparetakaua.

Ngone o Yesusu Kristusoka ho hodadioka o Abarahaama ai totoforauku

²⁶ De gea ngini mata-mataika nidadioka Ma Jou ai ngofa-ngofaka idodutu abe ma titi nia ngongakuino, ho ma oraha naa nia rimoi naga o Yesusu Kristusoka.

²⁷ De nia rimoi gea ka idadi hohiketero de o gogohiki. Angamoi nako hoka inaohiki, gea inahidumunu o akeruku la ma akere gea inakorobitoka. De hokogea tinihiketero ngini tato abe ngini mata-mata hoka iniohikoka Unangika angamoi inihingohamoka o Kristusika la Unangokali ngini mata-mata nimanoa. De gea ngini mata-mata inihinoauku de o Kristusu ai hininga la gea ka idadi nimaaduru abe hoka Unangoli.

²⁸ Ho mangale ma titi nanga rimoi o Yesusu Kristusoka, ho hiadono naa duru ko iwaka ma hikohowono nanga hidogoronaka. De gea ngaro ngone utu o Yahudi ma nyawa de utu ko o Yahudi ma nyawaua, ma ngone naa ko homakohowonua. Eko ngaro ngone utu o nyawa manga huhuloko de utu ko o nyawa manga huhulokua, ma gea ngone hoimoi dika. Eko ngaro ngone utu o nauru de utu o ngofeka, masara gea Ma Jou wonalega wato ko iwaka ma hikohowono ngoneoka angamoi ngone mata-mataika ka hoimoi dika o Yesusu Kristusoka.

²⁹ De mangale ma titi ngone homanoa o Kristusoka ho hiadono ngone hodadioka o Abarahaama ai totoforauku. Angamoi o Kristusu Una gea o Abarahaama ai toforaino womaboa, de ngone naa naga Unangoka, ho ngone hodadioka o Abarahaama ai totoforauku mangale ma titi homanoa o Kristusoka. De gea nanga tofora o Abarahaama to una ai oara igila-gila ka hiadono ngoneuku, ho ngoneoo hamakeoka ma owa abe Ma Jou ma dihiraino wihibehehongoka nanga tofora o Abarahaamika.