Galatia 2 - Ma Jou ai Demo-demo o Totobelohoka

Ngaro o Gareja ma hihira o Yerusaleemoka, ma ona yodafongo o Abari ma Rorahai abe o Paulusu wadotaka o nyawaika

¹ De gea o taongo ngimoi de iata ipahaikali de ahao ngohi tosobo toikoli o Yerusaleemiye ngohi de o Baranabasa. De nanga gianongoru o Titusu, unangoo wominiiki dakuiye.

² De ahi dodagi gea abe o Yerusaleemiye toiki, genangiye toiki mangale hokogea Ma Jou wohihingahu ahi hiningaino wato kiani genangiye toikohi. Ho duru ko ma titiua abe ona o gareja ma hihira ihibehehongo ngohino la toboa tatutumu. Hokogenangua, masara igoungu abe ngohi ma oraha gea duru toigo tahioriki to ona manga hininga ma titi ahi abari ma demoino, la nako mimaketehiningamoi ngohi de ona eko koua. Masara nako ngohi ma hirete ahi hiningaka gea tohiorikoka abe Ma Jou dika wohihitagongoka ngohino de to Una ai abari ma gou-goungu. Ho ma oraha gea ngomi miloiki de mimahiadoniyeoka o Yerusaleemiye de ngohi ahao toiki tatutumu onangika abe nanga gogianongoru genangoka yahiromanga ato manga gareja ma hihira. De gea tatutumu o gareja ma hihiraika de gea ngohi de ona dika mimakoketemo abe ma titi o Abari ma Rorahai ma demo abe nengokadauinohi de gea ena tahingahu-ngahuoka abe ona ko o Yahudi ma nyawaikaua. De gea ka o gareja ma hihira dika de ngohi mimatoomuino, angamoi hokogea ngohi tohiaturu tato done naga o ribuutu. Angamoi ngohi ahi hiningaka tato nako hiadono o nyawa manga ngoe manga himangoka de mimakoketemo ma titi o Abari ma Rorahai, done ona utu ko o gareja ma hihiraua de ona gea yomahisapurino de done utu naga ihipudaiye manga rerehene ma hininga de gea hiadono ngomi o doomu moi mimaketeribuutu. De done gea ahi karajaanga ma dodihiraino de ka hiadono ma oraha naga genangoka ahi karajaanga, gea done ka parahaja dika mata-mata.

^3-4 Masara gea mimakoketemo de ngohi tamake abe ona o gareja ma hihira manga hininga de to ngohi ahi hininga gea ka mimaketehiningamoi dika abe ma titi ma Abari ma Rorahai ma demo hokokia tahingahu-ngahu abe ona ko o Yahudi ma nyawaikaua. Angamoi ma oraha gea ngohi naga de nanga gianongoru o Titusu, abe una gea ko o Yahudi ma nyawaua de ko womahunaua. De gea ngaro naga o Yahudi ma nyawa utu genangoka abe manga hininga ato iwiribuutu o Titusika la ato kiani womahuna, masara ona o gareja ma hihira yaputuhu ato ngaro ufa dika de womahuna, ma ka idadi hokogea de wogila-gila. De genangino yomahitaana abe ona de ngohi mia hininga ka moi dika abe ma titi o Abari ma Rorahai abe ko o Yahudi ma nyawaikaua. De naga utu o Yahudi ma nyawa genangoka abe ko iwingaku-ngakua masara ona gea yomahingahu o nyawaika ato iwingaku nanga Baluhika. De ona gea ko yosanangiua ma titi o gareja ma hihiraika manga putuhu ho hiadono o garejaka naga idadi o ribuutu. De ona gea yowohama ma doomuika de yomahikasapurika o gareja ma goronaka la ato inatailako la ihioriki o kia ma titi naga ngoneoka hiadono ko haniikokaua o Musa ai Pareta. De gea to ona manga hininga la ato kiani inahigilioli ma Paretaika la hiadono hodadiokali hoka o Pareta ma gilaongo. Masara ona gea ko ihiorikuahi abe ngone naa o Yesusu Kristusu wonahihoheoka o Pareta ma papakitino ma titi nanga gogao Unangika.

⁵ Ho ngomi naa ma hohutuloo de ko miahigihenua onangika gea, angamoi ngomi miato duru miogoana o Abari ma Rorahai ma gou-goungu, done ahao ihikasapuru de o ngelu-ngelukino. De nako hoka o nyawa inahigaro de inaribuutu ato kiani homahunakahi la ka idadi Ma Jou wonadafongo, ma ngeluku genangino dika de ihikasapuroka hiadono ko ingodumokaua o Abari ma Rorahai ma gou-goungu. Ho ma oraha gea mia hininga la ngini ahao ka idadi niihene de niaso genangika abe ko iwa ma hikasapuru masara ka ireeika dika ma gou-goungu. De hokogea idadi o Yerusaleemoka abe ona o gareja ma hihira manga hininga imakomoteke de to ngohi, ho hiadono o Titusu ngaro ufa de womahuna.

⁶ De abe ma titi o Abari ma Rorahai ngohi tahingahu-ngahu, ngaro ona gea o Yerusaleemoka abe yahiromanga onangika ato manga gareja ma hihira, ma ona gea ko yodogoua ahi demoika angamoi ona yatailakoka ahi demo gea tahiabari, de ato bari ko iwa ma kuranga ahi demoino. De gea ngohi tosanangi abe ona de ngohi mimaketehiningamoi abe ma titi ahi abari ma demoino. De masara nako ngohi, ko topusingua ona gea yahiromanga onangika ato o gareja ma hihira eko koua, angamoi ngohi tohioriki nako Ma Jou Una gea ko wairikua o nyawa de ko womalegaua abe o nyawa manga gogere ikurutiye o dunia ma lokuoka. De tanu ngaro hoka ma oraha gea de o gareja ma hihira manga hininga ko isanangiua de ahi demo gea tahiabari, ma gea ko topusingua angamoi tohiorikoka abe ahi kuaha de ahi demo gea Ma Jouoka dika de aino.

⁷ De ona o gareja ma hihira ihiorikoka abe gea Ma Jou wohihitagongokau la wato ngohi o Abari ma Rorahai tahiabari ona ko o Yahudi ma nyawaikaua. De gea imakadaene hoka o Peturusoli abe unangika gea Ma Jou wihitagongoka la wato o Yahudi ma nyawaika una wahingahu-ngahu.

⁸ De gea Una abe wokarajaanga o Peturusika la hiadono naga ai tagongo de wahingahu-ngahu o Yahudi ma nyawaika, gea Unangoo abe wokarajaanga ngohioka la ona ko o Yahudi ma nyawaikaua wohihitagongo ngohino.

⁹ De ona gea abe nanga gogianongoru yahiromanga onangika ato manga gareja ma hihira abe onangohi yokurutiye o garejaka, ona gea o Yakobusu, o Peturusu, de o Yohanese. De ona yaruange gea yamake de yangaku abe Ma Jou igoungu wohihitagongoka ngohino ahi karajaanga naa, de gea mangale ma titi ai owa ngohino. Ho gea ma titi hiadono ona imidafongo ngohi de o Baranabasa angamoi ona ato ngomi de ona midadi mimaketedodiawoka de mimahikarajaanga moi ona de ngomi. De genangoka ngomi de ona mimakokadahi la gea ihitunguu abe ngomi imidafongoka. Ho ngomi de ona yaruange mimahininga moi ma titi mia borikarajaangoka, de ona gea imihigaro la ato ngomi ka migila-gilahi o Abari ma Rorahai miahingahu-ngahu ona abe ko o Yahudi ma nyawaikaua, masara onangoo gea to ona manga karajaanga o Yahudi ma nyawaika ona ihigila-gila.

¹⁰ Ho ona o gareja ma hihira genangoka duru ko yodogoua ahi abari ma demoino. Masara naga moi dika manga behehongo ngomino, de gea la ngomi duru miolegaika de ufa miawohanga nanga gogianongoru yohu-huha manga pereluika abe ona o Yahudi ma nyawa de abe yogogere o Yerusaleeme ma kotaka. De gea manga behehongo duru ko itubuhoua ngohino, angamoi ngohioo nengokadauinohi de todiaioka ho tosanangi enangika de ihimagawe hokogea todiai.

O Paulusu witaere o Peturusika wato ufa hogilio o Musa ai Paretaika

¹¹ De ngaro ngomi de ona o gareja ma hihira o Yerusaleemoka igoungu mimahikarajaanga moi, masara naga ma moiuku idadi abe kiani ngohi de o Peturusu mimarihimanga. De gea ngohi titaere angamoi gea ai datorino wodiai de duru wahowono. Abe gea idadi nengokadau ma oraha o Peturusu naga woboa womitutumu ngomi o Antiokia ma kotaino.

¹² De ihira-hira woboaino de una de nanga gogianongoru o Yesusoka abe ona ko o Yahudi ma nyawaua, ona ma ngoe yomakokutuono yolomo de una. De o Peturusu wosanangi dika wolomo de ona, ngaro ma dihiraino ngomi o Yahudi ma nyawa ko idadiua mimahikasapuru abe ngini ko o Yahudi ma nyawaikaua. De gea ma titi mia Pareta o Musaino imihitiari ato ufa hiadono ti ngini nia howono imahora ngomino, angamoi ngini ko nianiikua to Musa ai Pareta. Ho abe ma titi o Peturusu wolomo de ona ma oraha gea, ngohi tato irahai ai hininga la hokogea womahisapuru onangika abe ko o Yahudi ma nyawaikaua, angamoi gea duru itararono o nyawa mata-mataika abe ko waniikokaua o Musa ai Pareta. Masara ipaha de ahao naga o Yahudi ma nyawa yamuruono naga yoboa abe ona gea to Yakobusu ai dodiawo. De nako o Yahudi ma nyawa ma oraha gea, nagahi manga ngoeohi abe manga hininga ato ngaro o nyawa iwingakuoka nanga Baluhika, ma kiani yomahunakahi la gea ahao Ma Jou ka idadi wadafongo. De nako ko yomahunauahi, gea ngaro ufa dika de o Yahudi ma nyawa yadodiawo onangika. Hokogea to ona manga hininga. Ho ka de ona o Yahudi ma nyawa yoboaino de una o Peturusu womulaenge womatingaka onangino abe ko o Yahudi ma nyawainoua, de hiadono ko wolomokaua onangoka. De gea ai datorino duru imaketero hoka wogilioka o Musa ai Paretaika de ena gea waniikoli. De hokogea wodiai angamoi wamodongo ai gogianongoru o Yahudi ma nyawaika. De gea una doka ai hiningaka wato, “Done ahao ona ihihioriki abe naa ma duruika de ngohi tomahisapuroka onangika abe ona ko yomahunauahi. De gea ahao duru ihitaere ngohino.” Hokogea womatemo ai hiningaka o Peturusu.

¹³ Ho mangale ma titi o Peturusu ai datoro gea ho hiadono nanga gogianongoru utu abe ona o Yahudi ma nyawa, onangoo ka yomakokiduruoka yomahihawo-hawo dika abe hoka o Peturusoli ai hininga hinooto. Ho onangoo imaketero hoka o Musa ai Pareta ma dihiraino gea yaniikoli. De gea ngaro o Baranabasoo, ma unangoo iwihirehenoka de womaaduru abe hoka onangoli yomatingaka manga gogianongoruino abe ko o Yahudi ma nyawaua ma titi ona gea ko yomahunauahi.

¹⁴ De ngohi tamake abe ona gea ko yaniikokaua ma gou-goungu abe gea iboa o Abari ma Rorahaiino. Ho ka de gea tamake de o Peturusika titemo abe o nyawa gea mata-mata manga himangoka tato, “Ho done ngona gea sarakia? Angamoi ngohi tonimake abe ngaro ngona duru o Yahudi ma nyawa masara naa ma duruika de ngona norehenoka ngone o Yahudi ma nyawa nanga paretaino de gea nowango imaketero hoka onangoli abe ko o Yahudi ma nyawaua, abe ma titi nolomo de abe nadodiawoika onangoka, de gea ani hininga duru irahai. Ma masara ma oraha naa tonimake ani datoro abe hoka nato nahigaro nanga gogianongoruika abe ko o Yahudi ma nyawaua la hiadono onangoo yaniikoli to ngone nanga Pareta. De hokogea nahigaro abe ma oraha nomatingaka onangino ho hiadono ona yamao abe ngona ko naigoua ma titi ona ko yaniikua nanga pareta gea. Ho gea done sarakia de ngona ani datoro hokogea? Angamoi ani datorino gea de ngona nahigaro nanga gogianongoru abe ko o Yahudi ma nyawaua la nato onangoo kiani yaniiki to ngomi mia Pareta la ngona ka idadi nadodiawo onangika. Gea ani hininga done sarakia?”

¹⁵ “De nako ngona de ngohi, ngone naa homaboa o Yahudi ma nyawaino, de ko onanginoua abe ma dihiraino hahiromanga onangika hato bari ona gea o howo-howono ma nyawa angamoi ona ko o Yahudi ma nyawaua. De gea ma dihiraino ngone hato bote ka ngone dika abe hororahai Ma Jou ai himangoka ma titi ngone haniiki to Una ai Pareta.

¹⁶ De masara ma oraha naa de ngone hohiorikoka abe Ma Jou wonahitotiai ngone o nyawa gea ko ma titiua la ma Pareta haniiki, masara ma titi abe hingaku o Yesusu Kristusika. De ngaro ngone naa o Yahudi ma nyawa masara ngoneoo kiani naga nanga ngongaku o Kristusika. De gea ma titi hiadono ngone hingakuoka Unangika, la ka idadi Ma Jou wonahitotiai ma titi nanga ngongaku o Kristusika dika de ko ma titiua ma Pareta hatobanii-niiki. Angamoi gea hohiorikoka duru ko moiua abe Ma Jou wahitotiai ma titi yaniiki ma paretaino.”

¹⁷ “Masara abeika. Ngone naa o Yahudioka ma nyawa abe ko homahinganonokaua o Musa ai Paretaika ho homahinganonoli o Kristusika la gea hato Ma Jou wonahitotiai ma titi o Kristusino dika. Ho nako gea marai ka idadi nanga gogianongoru abe onangoo o Yahudi ma nyawa inataere ngoneino ato ngone hodadioka o howo-howono ma nyawa angamoi ma pareta ko haniikokaua. Angamoi ona gea yataoko ato bote ngone naa ka idadi o howono o kia dika ipuda nanga hiningaka de gea ka idadi hodiai dika angamoi ngone ko haniikokaua nanga pareta abe ma dihiraino gea hatobanii-niiki. Masara gea yataoko ihowono to ngone nanga hininga ma dumutu. Ho naa tonaleha, ho sarakia, o Kristusu ai hininga la wato ngone hahowono abe ma titi halawana Ma Jou ai Paretaika? Koua! Duru hokogenangua ma titi! Una duru ko woigoua la ngone hahowono. Masara tanu gea ko hahowonua nako o Musa ai Pareta hanoa la homahinganonoli ka o Yesusika dika, angamoi nanga nganganono o Yesusika enangoo gea inahidumutu o datoro ma totiaiika ho inatatoko la ufa ma dorouika haniiki.

¹⁸ De nako o Musa ai Pareta, genangika ko haniikokaua angamoi hohiorikoka ko enangua ma titi hiadono Una wonadafongo, ho ma Pareta gea imaketero hoka o tau moi hakiliangoka de ko genangokauali homanoa. De masara nako ngone hato ma Pareta gea hohigokoli la genangikali hogilio de homanoa, genangoka de ngone duru hahowono.”

¹⁹ “De gea ngohi tato ko idadiua hogilio ma Paretaika angamoi ma oraha gea abe ngohi ma Paretaka ka tomanoahi de ka tatobaniikohi, genangoka de ahao tamake de tohioriki abe ngaro ena gea tatobanii-niiki, ma duru ko idadiua Ma Jou ai totiai tamake genangino. Ho naa imaketero hoka ngohi tohonengoka ma Paretaika abe ma titi ena gea ko ihihiparetakaua ngohino. De genangika tohonengoka la naa ka idadi towangoli Ma Jouika dika. Ho gea imaketero hoka ngohi ihihidohonengoka ka ma moi de o Kristusu abe ai gota isosalioaika.

²⁰ De igoungu ma oraha naa ngohi ka towangohi, masara gea tanu ko ngohinoua abe ngohi towango masara gea o Kristusu abe Una wowango ahi badanga ma goronaka. Abe ngaro ngohi towango de ahi badangokahi, masara ahi badanga gea ko ihiparetakaua ngohino, angamoi naa tatobaniiki ahi ngongakuikali, de gea ngohi tingaku Ma Jou ai Ngofakika. Abe Ma Jou ai Ngofaka gea Una duru wohidora ngohino de hiadono ai wowango womahidoaka ma titi ngohi.

²¹ De ngohi naa duru toluku la Ma Jou ai owa toporete. Angamoi to Una ai owa wohihidoakoka ngohino abe ma oraha wohihitotiai ma titi ahi ngongakuino gea Unangika dika.” “Masara nako hoka tohitaili la ngohi ma hirete tomahitotiai ma titi ma Paretaino duru tatobaniiki, gea imaketero hoka to Una ai owa o totiaiino taoluku la ka idadi ngohi dika ma hirete tomahidailako ahi totiai. Ho gea ngohi duru ko toigoua la Ma Jou ai owa o totiaiino gea toporete. Abe nako hoka o totiai ka idadi hamake ma titi ma Paretaino hatobaniiki, gea de ahao ngaro ufa de o Kristusu wohonenge la wonahitotiai. Masara gea ko ma titiua ma Paretaino, masara abe ma titi ka o Kristusu ai hohonengino dika la ngone hamake o totiai. De abe Una wohonenge, gea mangale ma titi Ma Jou ai owaka dika de aino ngoneino, de to Una ai owa o totiaiino gea ngohi duru ko toporetua masara gea ka todafongo dika.” De hokogea ahi dodaere ma demo abe tahiree-reeika tatemo o Peturusu de ai dodiawoika ma oraha gea abe una de ngohi mimarihimanga o Antiokia ma kotaka.