Galatia 1 - Ma Jou ai Demo-demo o Totobelohoka

O Paulusu ai demo ihira-hira o Galatia ma gogarejaika

¹ Ahi gogianongoru o Yesusoka. Ngohi naa o Paulusu, abe Ma Jou wohiiriki ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou o Baba wonahibehehongoka. De naa tomahingahu tato ko o nyawakaua de aino ihigoraka ngohi la toiki tahingahu-ngahu o nyawaika, de ko o nyawa biahainoua abe ihihitagongo ngohino de ahi karajaanga naa. Masara gea o Yesusu Kristusu dika de Ma Jou o Baba abe wihimomikoka ai honengino, ma titi Unangoka de aino dika ahi kuaha wohihidoaka ngohino la ai Demo-demo tahingahu-ngahu o nyawaika.

² De ngohioka naga nanga gogianongoru manga ngoe, ho ngomi nenangoka mata-mata o hurata naa mihidingoto nginika abe naga nimatoo-toomuino o gogarejaka o Galatia ma tonakoka gea.

³ De ngomi naa minigahoko nanga Baba Ma Jouika de nanga Baluhu idodutu o Yesusu Kristusika, la ahao ma owa de o hininga ma miriidi abe Ma Jouoka de aino ahao winihidoaka nginika.

⁴ Abe nanga Baluhu gea womahidoaka de wohonenge ma titi to ngone nanga howo-howono, la gea ka idadi wonaduhunu ngone o nyawa nanga hininga ma dorouino abe ma oraha naa naga o hininga ma dorou ihipareta o duniaka naa. De gea wohonenge la wonaduhunu, gea nanga Baluhu wodiai mangale ma titi hokogea Ma Jou o Baba ai mau ngoneino wodiai.

⁵ Ho mangale ma titi to Una ai hininga ma owa ngoneino gea ho ngone mata-mata kiani hihigiriiri naa de ka hiado-adonika, de igoungu kiani hokogea.

O Paulusu woheranga ma titi ona yorehenoka

⁶ De naa ngohi duru toheranga de hiadono ngade-ngade de ko tongakua ma abari abe naa toihenino ma titi ngini genangoka. Angamoi naa ko itedekanuahi abe Ma Jou winiahokoka la ngini ka idadi niwango to Una ai owa ma goronaka. De masara naga ihihingahuoka ngohino ato bari ngini nimataiti nirehenoka Unangino de naa o dodotoko moioli nianiiki abe o nyawa utu gea ma dodotoko enangoo ihiromanga ato bari o abari ma rorahai.

⁷ Masara tanu o Abari ma Rorahai gea moi dika, de nako utu gea duru ko iwa. De abe ma dodotoko moioli gea, igoungu naga o nyawa utu abe manga dodotoko ma titi utu yale o Kristusu ai Abari ma Rorahaiino, masara gea de ahao ihikawalimoka ma titi hiadono yaturuuruoka. De ma dodotoko moioli gea abe inidotoko nginika hiadono duru inihikangela de inihipusingi nia hiningaka.

⁸ Ho gea ngohi tato nako o nyawa onagona dika de yahingahu-ngahu ma dodotoko o fara moi abe imakohowonoka de gea abe nengokadau minihingahuoka masara gea ihiromanga ato o abari ma rorahai, ona gea kiani Ma Jou wahikoboto de o hohowono ka hiado-adonika. De ngaro ngomi naa ma hirete hokogea miahingahu-ngahu ma kiani womihikoboto de o hohowono. Eko ngaro o Horogaka o malaekata de yahingahu-ngahu hokogea, ma gea ahao kiani Ma Jou wahikoboto de o hohowono.

⁹ De ahi demo naa ka imaketero dika de abe ma dihiraino mia demo nginika, masara ngohi ka idadi tohigalioli ma moioli tato, ngaro onagona dika naga abe inihingahu-ngahu o abari ma rorahai o fara moi de gea imakohowono de o Abari ma Rorahai ma gou-goungu abe nengokadau niodafongoka, ona gea kiani Ma Jou wahikoboto de o hohowono onangika ka hiado-adonika.

¹⁰ De naa abe ma titi ahi demo kangano de ma buturungu nginika, de ahi demo gea duru ihihitaana ngohino de itararono abe ahi hiningaka ma dumutu hokokia. De ngohi tonganono la ma titi ahi demo ma buturungino gea de ngini genangoka ka idadi nihihioriki abe ngohi naa duru toigo la Ma Jouika dika tihisanangi, de ufa hiadono ka o nyawaika dika tahisanangi. De ngaro igoungu naga o nyawa utu ihitae ngohino abe ona ato ahi hininga la tahisanangi o nyawaika, ma ngohi tohioriki abe ko idadiua to Kristusu ai huhuloko todadi nako hoka ka tohitailohi o nyawaika tahisanangi. Ho gea ngohi tomaputuhoka tato ngaro o nyawa utu ko ihisanangiokaua ma titi ahi demoino, masara ngohi kiani tileleani Unangika dika la Una gea wohisanangi ngohino. De ena gea ma titi hiadono ngini ka idadi duru niangaku ahi demoika, ho gea kiani ngini nimahigagaoika o Abari ma Rorahaiika abe ma dihiraino tinihingahuoka.

O Paulusu womademo abe ai kuaha Ma Jouino la ai Abari ma Rorahai wahingahu-ngahu o nyawaika

¹¹ Ahi gogianongoru, abe naa ahi demo tinihingahu nginika, gea ena ngohi duru toigo la nihioriki de niataoko itiai. De hokonaa ahi demo. O Abari ma Rorahai gea abe ngohi tatobahingahu-ngahu o nyawaika, gea ko o nyawakaua de aino iboa.

¹² Abe ma dodihiraka de ma abari ngohi tamake gea ko o nyawainoua de ko o nyawaua abe gea ma abari ihidotoko ngohino. Masara o Abari ma Rorahai gea tamake ka o Yesusu Kristusoka dika de aino.

¹³ De gea marai ngini niihenoka ahi wowango ma dihira ma ade-ade abe ka taniikohi ngomi o Yahudi ma nyawa mia agama, masara abe hokokia Ma Jou wohikaaturu la hiadono ngohi naa wohihitagongino de to Una ai Abari ma Rorahai. De ma dihiraino gea ngohi duru tahikangela Ma Jou ai nyawaika hiadono tato Ma Jou ai gareja ma nyawa tahibinaaha.

¹⁴ De gea ngohi duru taniiki de toaguru ma titi ngomi o Yahudi mia agamaika. De nako ngomi mata-mataika abe mimahikumuru moi de ngohi, gea ngohi hatoli toaguru ma titi mia agamaika. De ma oraha gea ngohi duru de ahi magaweoka taniiki to ngomi mia totofora manga hirahi de manga demo abe onangoka de auku imahora ngomiuku.

¹⁵ Ma ngaro ngohi ahi hiningaka hokogea, masara ka ma dihirainohi de Ma Jou wohihideeoka ngohino wato ahao wohipake. De gea ngohi ko tomaboauahi de Una wohiirikokau de wohitingakokau Unangino la wato ngohi tileleani Unangika. De gea wohiiriki ma titi to Una ai hininga ma owaka dika de aino ngohino.

¹⁶ De ma oraha gea wohihimatoko ngohino to Una ai Ngofaka la gea ka idadi tahingahu-ngahu o Abari ma Rorahai ma titi o Yesusu abe onangika ko o Yahudi ma nyawaua. De gea wohihitagongino ngohino de gea ngohi o duduhunu ko tomagahokua o nyawaino ma titi abe ma abari ma demo hokokia ahao tahingahu-ngahu, angamoi ma demo gea tamake Ma Jouoka de aino dika.

¹⁷ De ma oraha gea igoungu naga o Yerusaleeme ma kotaka nanga gogianongoru yamuruono naga abe ona yohira yahingahu-ngahu o Abari ma Rorahai o nyawaika. Abe ona gea ma dodihiraino abe Una ko wohihitagonguahi ai Abari ma Rorahai ngohino de gea wahitagongokau onangika, ho ona gea yohira yahingahu-ngahu. Masara gea tingakuoka de ngohi o Yerusaleemika ko toikua de ko mimakoketemoua ona de ngohi ma titi ma abari gea, ho ko moiua ka idadi ihitae ngohino ato ahi abari ma demo tamake onangoka. Masara ai karajaanga gea ka de wohihitagongino ngohino de tosobo toiki o Araba ma tonaka ma kakaahaika. De ipaha genangoka de ngohi tolioli o Damasiki ma kotaikali.

¹⁸ De o taongo hange ma dekanino ipahaikali de ahao ngohi daku o Yerusaleemiye toiki la tato ka idadi titutumu o Peturusu la ka idadi mimahikoriki. De gea ahi futu ngimoi de motoa dika tomanoa unangoka.

¹⁹ De genangoka ngohi de o Yakobusu mimakamake, abe una gea nanga Baluhu ai dodoto womatengo. De ngaro ona utu abe naga de manga kuahaka la yoiki yahingahu-ngahu, ona gea ko tamakeua abe ma oraha tomahidodogumohi o Yerusaleeme ma kotaka. Ho gea ngaro igoungu ma dihiraino gea de ngohi toiki o Yerusaleemiye, masara ko ihitedekanua genangoka, de o gareja ma hihira yamuruono dika tatutumu, ho ko yowoeua.

²⁰ Ho naa Ma Jou ai himangoka de duru tomahingahu tato ahi demo naa nginika tagou-goungu tinihingahu. De ahi ade-ade ma demo naa tinihitararono nginika la ka idadi nihioriki abe ahi Abari ma Rorahai ngohi tatobahingahu-ngahu, gea ko o nyawakaua de aino iboa, masara ka Ma Jouoka dika de aino wohihidoaka.

²¹ De ma oraha o Yerusaleemoka de tosobo de toiki o Siria de o Kilikia ma propinsika.

²² De hiadono ma oraha gea de nanga gogianongoru o Kristusoka abe yomatoo-toomuino o Yudea ma gogarejaka, ona gea duru ko ma moiuahi mimakamake de ngohi ho duru ko mimahikorikuahi.

²³ Masara ona gea ka yoihenino dika ma ade-ade ma titi ngohi abe yotemo ato, “Gea una abe ma dodihiraino de duru wonahikangela ngoneino, de ma oraha naa de unangoli nanga ngongaku ma abari wahingahu-ngahu o nyawa utuika. De gea ma dihiraino abe una ai hininga wato wohibinaaha nanga ngongaku gea. Ho naa abeika duru idadi o fara moioli ai hininga.” Hokogea ma ade-ade abe ona ka ihikaika yoihe-ihene ma titi ngohi.

²⁴ Ho nanga gogianongoru o Yudea ma tonakoka gea ona duru iwihigiriiri Unangiye ma titi ngohi abe hokokia wodiaioka ahi hiningaka ngohino. De gea ahi ade-ade tinihingahu la ngini ka idadi nihioriki abe o nyawa ko moiua ihidotoko ngohino ma titi o Abari ma Rorahai, masara gea ena Ma Jou dika wohihidoaka.