Filiipi 4 - Ma Jou ai Demo-demo o Totobelohoka

¹ Ho, ahi gogianongoru o Yesusoka abe duru tinidora, ahi behehongo ma ngoe abe tinihibehehongoka naa, ho ahi behehongo naa kiani niongano-nganono la duru nimatongohono nanga Baluhoka. Ngini naa duru tinidora de duru toigo la ngini de ngohi homakamakeoli, abe ma titi ngini ho togarago. De ngini tinihiromangoli tato nidadioka ahi karajaangino ma hofoko.

O Paulusu ai gogahoko ma titi o ngofeka yahinooto

² De naa ngohi fira-firanga o Yesusoka, o ngo Euodia de o ngo Sintike, nginika duru togahoko la ibootohi nimaketeliliara, de kiani nimakao irahai abe hoka itiai o gogianongoru o Yesusoka.

³ De o Susugus, ahi dodiawo abe duru ma ngoeoka nohiduhunu de ahi karajaanga, marai ngonaika togahoko yahinooto naa naduhunu la hiadono yomakao irahai. Abe nengokadau ona yahinooto gea duru ihiduhunu ma titi o Abari ma Rorahai tahingahu-ngahu. De nagali o Kalemene de utu ahi gogianongoru abe onangoo ihiduhunu ahi tagongo ma goronaka. De nagahi utuoli abe ngaro manga romanga ko tafetongua naa, ma, duru tonganono ona mata-mata to ona manga romangoo nagau o Wowango ma Bukuoka. Abe ma buku ma dolauku gea naga manga romanga abe onagona dika naga genangoka, ona gea yamakeoka o wowango ka hiado-adonika. Ho ngohi duru toigo la ona o ngo-ngofeka yahinooto gea yomakao irahai.

O Paulusu ai hitiari onangika

⁴ Ngini naa ngaro ka nigogaragoka ka ihikaika nanga Baluhu idodutu o Yesusika. De ahi higaro gea ka idadi tohigalioli, ho koaho nigogaragoka!

⁵ Angamoi irahai nako o nyawa mata-mata inihioriki nia wowango hiadono yomakoketemo ma titi ngini de ona ato, “Ona gea duru manga hininga ibole-bole abe ngaro o nyawa onagona dika, ma, yao irahai!” Irahai nako hokogea manga demo. De igoungu kiani nanga hininga hokogea, angamoi ko itedekanokaua nanga Baluhu idodutu Una woboali.

⁶ De ngaro o huha o kia dika naga idadi, ma, ufa hiadono duru nipusingi doka nia hiningaka ma titi ena gea, masara o huha o kia dika niamake de nimaniata Ma Jouika. Abe Unangika nia huha ma gogahoko niwihingahu de o duduhunu nimagahoko Unangino. Masara abe o duduhunu nimagahoko, gea iti naga nia tarimakase abe de ma oraha nimagahoko.

⁷ De nako hokogea nidiai, ahao Ma Jou ai hininga ma miriidi duru kohaamoko niamake, abe ma miriidi hokogea ma amoko hiadono nanga hininga ko apoaua genangika adono, angamoi Ma Jouoka de aino iboa. De duru ma miriidi gea itobagoana nia hininga ka hiadono iriidi ti ngini nia hininga ma titi o Yesusu Kristusoka ngini nimanoa. Ho ngaro o kia dika naga, ma kiani nimahingahu de nimagahoko Ma Jouiye ma titi ena gea.

⁸ Ho naa, ahi gogianongoru o Yesusoka, ma titi moioli tato naa tinihibehehongo. Doka nia hiningaka kiani ka ihikaika niongano-nganono o kiaka abe ma gou-goungu, de o kiaka abe naga de ma horomatioka, de o kiaka itiai, de o kiaka abe ko iwa ma howono, de o kiaka ihohailoa, de o kiaka abe ngone mata-mata hohiromanga gea irahai, gea mata-mata kiani niongano-nganono. Abe o kia dika naga hohiromanga duru ma rorahai de duru ma owa, genangika dika ka ihikaika niohohininga.

⁹ De o dodotoko o kia dika abe niamakeoka ngohioka, ngaro ahi demo-demo abe niihenoka eko ngaro ahi wowango ma datoro niamakeoka de nia lako, ma, togahoko la ngini nimaaduru hoka ngohioli. Ho ma titi o kia hiadono togahoko hokogea? Angamoi nako hokogea nianiiki, gea de ahao ka idadi ngini de Ma Jou nimaketedodiawo. De nako hiadono nimaketedodiawo de Una, gea nia hininga iriidi, angamoi Una gea nanga hininga ma miriidi ma titi.

O Tarimakase ma demo

¹⁰ De naa duru togarago nanga Baluhu idodutuika abe ma titi naa ma duru nia dora ma hidoaka ma moioli tamakeoka, abe ma titi nia hidailako gea nihidingo-dingoto ngohino. De gea tohioriki ma dekanino naa niato nihiduhunoli abe imaketero hoka ma dihira nihiduhunu, masara ma ngekomo ko niamakeuahi.

¹¹ Ma gea ko tokurubungua tato tohuha, angamoi ngaro hokokia dika idadi ngohino, ma, tomadotokoka de tolatioka la ka idadi toriidi.

¹² Abe ngaro tohuha eko tokaya, ma, hinootoo tamaoka. Ho o kia dika naga iboaino, ngaro ahi pokoro ma bunuhu eko ma hafini, ngaro ifoloi eko ikuranga, ma, ma dodotoko gea duru tohiorikoka hiadono ka tapoa toriidi genangoka.

¹³ De ma titi o kia hiadono ka idadi toriidi? Ngohi ka tapoa toriidi angamoi ma buturungu o Kristusoka de aino wohihidoaka. Ho ngaro o kia dika naga iboa ngohino, ma, ngohi ka tapoa tolaku angamoi naga ngohioka ma buturungu gea abe Una wohihidoaka ngohino.

¹⁴ Masara ngaro ma dodotoko gea tohioriki, masara naa duru tosanangi ma titi ahi kangela ma goronaka naa de ngini o duduhunu nihikodoku ngohino.

¹⁵ De igoungu nengokadau ngini nihiduhunoka abe nihihidailako ahi perelu, de gea ngohi ko tawohangua. De marai nginioo ka niohiningahi nengokadau ma oraha abe ahao gea ngini o Abari ma Rorahaiika nimahinganono, abe ma oraha gea de nimulaengoka ahi perelu nihidailako. Abe ma oraha gea nia tonaka, o Makedonia ma tonaka, gea tanoaka abe tato toiki tahingahu-ngahu o nyawa utuikali. De ngini o gareja moi o Filiipi ma kapongoka, ka ngini dika nihiduhunu, abe tanu gea homakuduhunu.

¹⁶ De ahao ma oraha ngohi ahi kuranga naga abe o Tesalonika ma kotaka togogere, de ngini ma ngoe o duduhunu nihidingotoli ngohino ma oraha gea.

¹⁷ De ahi demo naa ko ma titiua la o hidoaka utuoli tomalingiri naa, masara toigo la ti ngini nia utumu niamake Ma Jouoka ma titi nia hidoakino, de gea nia utumu ka idadi itou-touniye Ma Jouoka.

¹⁸ Masara abe ma titi ahi hidoaka nihidingo-dingoto o Epafroditusoka, gea unangino tamakeoka mata-mata, ho naa ahi perelu duru niangodumoka de tanu ifoloiholi ahi hidailako, abe ko iwa ma kuranga ngohioka. De nia hidoaka gea idadioka hoka o manyanyi ma bounu duru ma hohailoa, imaketero hoka o huhuba Ma Jouika duru itiai, abe ma titi nia hidoaka ngohino gea duru iwihisanangi Ma Jou.

¹⁹ De nako nginioka naga nia perelu eko nia kuranga o kia dika naga, ma, ngohi tonganono ahao ahi Jouoli ti ngini nia perelu gea winihingodumu nginika. De ai hidailako gea nginika, gea ko idadiua ikuranga, angamoi o Yesusu Kristusoka de aino iboa. Abe Unangoka ma hidailako naga itou-touniye hiadono ko iwa ma baha, de gea ma titi ngohi duru tonganono ahao ti nginioli nia hidailako duru ingodu-ngodumu hiadono ko iwa ti ngini nia kuranga.

²⁰ De naa nanga Baba Ma Jou hihigogiriiri naa de ka hiado-adonika. Amin.

O Paulusu ai tabea ma demo wohidingoto ai gogianongoruika

²¹ De, ahi gogianongoru o Yesusu Kristusoka, ahi tabea tohidingoto ngini mata-mataika. De ahi gogianongoru abe naga nenangoka ihidodiawo, onangoo ma manga tabea ihidingoto nginika.

²² De abe iti Ma Jou ai nyawa mata-mataika abe naga nenangoka, ma onangoo manga tabea ihidingoto, de hongoli ona gea abe o Roma ma nyawa manga koano ai tauoka yogogere.

²³ De naa ngini tinigahoko nanga Baluhu idodutu o Yesusu Kristusiye la ai owa winihidoaka ti ngini nia kokihiningaika.