Filiipi 3 - Ma Jou ai Demo-demo o Totobelohoka

O Pareta ma totiai de o ngongaku ma totiai hohidotelega

¹ Ho naa, ahi gogianongoru o Yesusoka, ko tohibobahauahi ahi hurata naa de tinihigaro tato, ngaro ngini ka nigaragoka ma titi nanga Baluhu idodutuoka! De naa ahi hitiari nginika naa marai tohigali-galioli, masara gea irahai, abe ko itubuhoua ngohino tinihingahuoli, angamoi ahi hitiari nginika naa idadi nia duduhunu.

² Ho hokonaa ahi hitiari. Kiani nihidodiai ona abe o nyawa yotobadiai itorou, abe ona ato ngini kiani nimahunakahi de ahao ka idadi winidafongo Ma Jou. Gea ona yoeluku dika, angamoi ko enangua ma titi hiadono Ma Jou wonadafongo.

³ Ona gea Ma Jou iwiniiki ko igou-goungua, masara ngone naa abe duru hiniiki igou-goungu. Abe ngone naa tonahiromanga tato ngone o huhuna ma nyawa ma gou-goungu. De gea ma romanga ma titi o kia? De gea ma titi abe ngone naa hihigiriiri Ma Jou de gea ihititi abe nanga gogao Ma Jou o Womahino de ko ma titiua to ngone nanga kuahaino. Abe Ma Jou o Womaha, Una gea naga de de ngone. De ngone naa duru hidogarago o Yesusu Kristusika ma titi ai duduhunu ngoneino, de ko ma titiua to ngone nanga nganganono o dodunguuika dika abe nanga badangoka de hiadono wonadafongo Ma Jou. Ngone naa ko hokogenangua nanga nganganono. Ho gea tonahiromanga tato ngone o huhuna ma nyawa ma gou-goungu. Hokogea ma titi o huhuna ma gou-goungu, abe ngone naa haniiki.

⁴ Masara abeika, nako o nyawa ka idadi yomahinganono manga wowangoika dika la hiadono yohapongo daku o Horogaiye, tanu ngohioo ka idadi. Abe ngohi naa tanu duru ka idadi tomahinganono ahi wowangoika dika, abe ngaro o nyawa onagona dika ato naga manga wowango ma totiai la hiadono yomahinganono genangika dika, ma, ka ngohiohi ahi wowango itotiai.

⁵ Abeika niatailako ahi wowango ma ade-ade. Ngohi naa tomaboa o Isiraele ma nyawaino, duru genangino ma nyawa abe ma dodihiraka de Ma Jou womiirikoka la midadi to Una ai nyawa. Abe to ngohi ahi tofora gea o Benyamini abe una mia tofora o Isiraele ai ngofaka womatengo. Ho gea ihihitaana abe ngohi naa duru o Yahudi ma nyawa ma dutu, de o awunu moi dika ma hirete ngohioka, abe o homoaino ma nyawa manga awunu ko iwa ihisapuru ngohino. De ngaro ahi huhuna, masara gea ihihunaka duru ahi wange tufangeoka la imakiniiki de to Musa ai Pareta. De abe ma titi o Musa ai Pareta taniiki, gea duru tatobagou-goungu taniiki, abe ngohi duru o Farisi ma nyawa, ho ka ngomiohi miato mianiiki duru itiai Ma Jou ai Pareta.

⁶ De ahi hininga ma dora o paretaika duru ilamoko hiadono o nyawa abe o gareja yanii-niiki, ona gea ka ihikaika tahikangela. O nyawa ko moiua la ato ihihohowono ma titi tahowono o Musa ai Paretaika.

⁷ Masara gea mata-mata abe ma dihira genangika tomahinganono de taetongo ahi utumu, abe genangoka de aino, nako tohidotelega de ma oraha naa ma titi o Kristusoka, gea ena ko kia-kiaua.

⁸ De igoungu, ngaro o kia dika naga, ma nako ahi Baluhu idodutu o Yesusu Kristusu duru tihioriki, gea ka enangohi duru de ma utumoka. De o kia dika abe naga utuoli, gea enangoo taetongo ko kia-kiaua. De Una gea ma titi hiadono gea mata-mata abe ahi wowango ma dihira tanoaka, de gea ena tohiromanga ka o wale-wale dika, la ka idadi o Kristusoli tomahitongohi,

⁹ la hiadono ngohi naa duru Unangoka dika tomanoa. De abe ngohi naga Unangoka, gea ko mangaleua ma titi to ngohi ahi wowango ma totiai naga abe o pareta tanii-niiki, masara ma titi tingaku Unangika hiadono wohihitiaioka, angamoi gea ihititi de o ngongaku dika hiadono Ma Jou wonahidoaka ai totiai gea.

¹⁰ De ma oraha naa ahi hininga duru ka ihikaika itagi o Kristusika, la tato utuohi itararono Una tihioriki, abe ma titi ai momomiki ma kuaha duru toigo tamake ahi wowangoka. De ngaro ai kokangela ka hiadono ai honenge ma enangoo duru toigo tamao ahi wowangoka, ngaro ihihohonenge abe imaketero hoka Unangoli iwihohonenge, ma, gea toigo.

¹¹ Abe ngaro hokokia dika idadi ngohino, ma gea ko topusingua, abe gea mata-mata ngohioo duru toigo tamao ahi wowangoka abe imaketero hoka Unangoli wamao. Angamoi duru ka tonganonohi abe ahao ngohioo wohihimomiki ahi honengino imaketero abe hoka to Unangoli ai momomiki.

O Paulusu womaribuutu la wato womaaduru hoka o Kristusoli

¹² De gea ufa niataoko ihowono, angamoi ngohi tomangaku genangika ko tomahiadonuahi, abe ko ma titiua ahi wowango ma datoroka ka ihikaika tomaaduru hoka o Kristusoli. Masara hokogenangua, ma, ngohi ka togila-gilahi la hiadono genangika tomahiadono de tomahitongohi. Angamoi o Yesusu Kristusu womahitounakau ngohi naa, ho itiai to Una ai mau ngohino taniiki.

¹³ Ahi gogianongoru o Yesusoka, duru ko totemoua tato o Kristusu ai wowango duru tomaaduru itiaioka eko gea tomahitongohiokau, masara naa moi todiai, o kia dika ipahaka, gea ipahaka de ko topusingokaua de ena, ma, abe naga ahi himangoka duru tolegaika de tomaribuutu la genangika tomahiadono la ka idadi ahi wowango ma hadia taso. De gea abe tohiromanga tato ahi hadia, gea la ahi wowangoka ka ihikaika tomaaduru hoka o Kristusoli.

¹⁴ Abe ngohi naa tomahiketero abe hoka ona yomaketejai-jai yomapopaata, de duru yomaribuutu de manga buturungu ma gahumu ka hiadono ma batingika yomahiadono de yolaku de yamake ma hadia genangino. De ngohioo naa tomaribuutu la ka idadi ma bahaika tomahiadono de ma utumu tamake Ma Jouino. Abe genangika tomahiadonoka de ahao Una wohiahokino de ma utumu gea wohihidoaka ngohino. De genangoka ahi hadia eko ahi utumu o kia tamake Unangino? Abe ahi utumu gea to ngohioo ahi hininga ma totiai idadioka duru imakadaene de to Unangoli ai hininga ma totiai ireeika la ngohioka ko iwakau ahi howono. Ho genangoka de ahao Una de ngohi ka idadi duru mimaketerimoi, de ena gea ahi utumu abe duru toigo. De gea ma utumu ka idadi tamake mangale ma titi ngohi naga de de o Yesusu Kristusu.

¹⁵ De ngone abe naa hobaluhoka o Kristusoka de nanga ngongaku ibitumoka, ngone mata-mata nanga hininga ma dumutu kiani imakiniiki abe ngone hato homaribuutu la haniiki itiai Ma Jou ai mau ngoneino hiadono ma utumu gea wonahidoaka. Masara nako naga nanga gogianongoru utu nginioka abe manga hininga ko imakiniikua de to Ma Jou ai hininga, genangoo ma tongaku ahao Ma Jou wahitararono onangika.

¹⁶ Iti ma dodotoko abe ma titi hataokoka, iti ena gea ka ihikaika haniiki la ka idadi nanga hininga imakataana de to Unangoli ai hininga.

¹⁷ Ahi gogianongoru, togahoko la ngini mata-mata nimaaduru abe hoka ngohioli ma titi Ma Jou ai mau tatobaniiki. De gea ka ngohinoua dika ka idadi nimaaduru, ma naga nginioka yamuruono naga abe to ona manga wowango ma dumutu de gea to ngomi imaketero, ho onangoo ka idadi niamake ona gea manga wowango ma datoroka nimaaduru.

¹⁸ Abe kiani nihidodiai done naga o nyawa abe yomakohowono de ngomi de ona gea manga wowango nimaaduru abe hoka onangoli. Angamoi hoka ma dihiraino ma ngoe tinihingahuoka, de naa ma moioli tinihingahu de tohuha hiadono ahi koongo itifa, abe naga o nyawa manga ngoe yomahingahu ato, “Ngone naa hingaku Ma Jouika.” Masara, tanu gea ona yodadioka to Una ai musu angamoi yalawana o Abari ma Rorahaiika.

¹⁹ De ona gea ahao kiani manga bobaha yamake, abe yahohowono ka hiado-adonika. To ona manga badanga ma hafini, genangika yomahijou, abe ka ihikaika manga horoodo yomahidailako. De o dorou o kia dika abe o nyawa utu yodiai de ka yomahimaleke, ma masara ona gea yodiai de ona ka yomahigiriiri dika, angamoi ona ko yamaokaua o maleke. De manga hininga ma dumutu duru itagi o kiaika naga o duniaka naa. Ho ona gea hokogea dika manga wowango.

²⁰ Masara ngone naa hokogenangua, abe ngone hodadioka o Horoga ma nyawa, de naa duru de nanga magaweoka hingano-nganono nanga Duduhunu ahao woboa o Horogaka de wauku. Abe nanga Duduhunu gea o Yesusu Kristusu nanga Baluhu idodutu.

²¹ De Una gea woboaka de ahao nanga badanga duru ilolamaana naa wakokituruuruoka la hiadono to ngone nanga badanga de to Una ai badanga, abe de ma dararonoka, duru idadi hoimoi. De gea ka wakunu wodiai angamoi Una de ai kuahaka la mata-mataika ka idadi wohipareta. Ho ngone duru de nanga magaweoka hingano-nganono nanga Duduhunu.