Filiipi 2 - Ma Jou ai Demo-demo o Totobelohoka

O Paulusu wahigaro la ona yomahitipokouku

¹ Naa tinileha, sarakia, abe ma titi nia gogere o Kristusoka, ko iwa moi la ko niamakeua genangino abe inihiputurungu? Eko o lalaru ko iwa nginioka abe ai doraka de aino? Sarakia, Ma Jou o Womaha ko wogogerua nginioka? De bote ko iwa nginioka o dora ma amoko la hiadono itagi o nyawa utuika abe niaduhunu? Koua, marai gea mata-mata naga nginioka, e?

² Ho mangale mata-mata gea igoungu naga nia kokiwowangoka, ho naa ahi behehongo de duru togahoko nianiiki la ka idadi ngohi naa tinidogarago idogoli ka hiadono ahi garago duru ihingodumoka ma titi ngini. De tinihibehehongo hokonaa. Kiani ngini duru nimaketerimoi, abe nimakodora de nimaketehiningamoi. De abe nia kokihiningaka ma dumutu, duru ka moi dika.

³ De ufa nitaleana de ufa o sade inihihira la hiadono nimagorakiye, masara koaho nimahitipokouku la nako o nyawa utu de ngini ma hirete, ma ka onangohi niahayanga.

⁴ Abe ufa ti ngini dika nia perelu nimahidailako, ma kiani nialegaika o nyawa utu abe to onangoo manga perelu niahidailako. Ho nako hiadono ahi behehongo gea nianiiki, gea de ahao duru togarago. Abe nengokadauino de tinidogarago nginika, masara nako ahi demo gea nianiiki, gea de ahao duru ifoloioli ahi garago nginika.

⁵ Abeika o Yesusu Kristusu ai hininga ma dodipokouku. Kiani nginioo nimaaduru hoka to Una ai hiningali la imatoteroino abe ti nginioo nia hininga ma dodipokouku.

⁶ De ngaro o Yesusu de Ma Jou duru hoimoi de duru yomatoteroino, ma o Yesusu womaputuhu wato to Ma Jou ai medebini ma dararono gea wanoaikahi.

⁷ Ho ai medebini ma dararono gea wahuputokahi de ahao o huhuloko manga hapa womahinoauku, abe o nyawa manga hapa de to Yesusu ai hapa, duru hoimoi manga hapa.

⁸ De hiadono o nyawa iwimake to Una ai rupa imaketero hoka to onangoli manga rupa. De Una gea duru womahitipokouku de ai Babaika duru wihingounu abe hiadono o duniaka womaboa ka hiadono ai ngomaha itoaka, ma, ai hingounu ai Babaika ko itoa-toakua. Abe ngaro ai honenge gea imakadaene hoka o nyawa ma dorou manga honenge abe o gota isosalioaika iwihidapakuika, ma, Una ka wihingounohi ai Babaika.

⁹ De mangale ma titi Una duru womahitipokouku hokogea ho hiadono Ma Jou duru wigorakiye, abe wihidadi o Yesusu la ngaro mata-mataika, ma, ka o Yesusohi duru wokokurutiye.

¹⁰ De gea Ma Jou wodiai la mata-mata, ngaro abe yomanoa daku o Horogaka, eko o dunia ma lokuokahi naa yomanoa, eko ngaro o dunia naa ma goronaka yomanoa, ma, ona mata-mataika ahao ka yomataitilabukika o Yesusu ai himangoka

¹¹ de yomakokutuono yomangaku ato, “O Yesusu Kristusu, Una gea igoungu nanga Baluhu wokokurutiye.” De manga demoino gea Ma Jou o Baba wamake o higiriiri.

Ma Jou ai mau nginika kiani nianiiki

¹² Ahi gogianongoru abe duru tinidora, nengokadau abe ma oraha ngohi nagahi nginioka de ti ngini nia hingounu Ma Jou ai mauika ka ihikaika naga. Masara ma oraha naa ngohi ko ihiwa nginioka. Ho togahoko ngaro ngohi ko ihiwa nginioka, masara kiani ka ma oraha nenangohi de ti ngini nia hingounu Ma Jou ai mauika idogo duru ko iwa ma hoana. Kiani duru ka ihikaika ngini homoi-homoi Ma Jou ai mau nianiiki ka hiadono ma bahaika, la o wowango ma ngango imahilaku nia kokiwowangoka. De gea Ma Jou ai mau nianiiki, kiani duru nimahinganono Ma Jouika dika, de kiani naga nia horomati ma gou-goungu Unangika.

¹³ Abe ngini ka niakunu Ma Jou ai mau nianiiki mangale ma titi Una ma hirete wokarajaanga nia kokihiningaka la hiadono nioigo nianiiki ai mau. De Una wokarajaanga nia kokibadangokaoo la nia buturungu naga. Ho ma titi duru Ma Jouoka de aino hiadono ka idadi niakunu Ma Jou niwihisanangi.

¹⁴ De ngaro o kia dika nidiai, ma ufa nikurubungu de ufa nimaketeribuutu.

¹⁵ Abe hokogea ma ngekomo la ngini nidadi o debi-debini ma nyawa, la ka nia hininga ma rorahai ireeika. Abe ngini nidadiokau Ma Jou ai ngofa-ngofaka ma gou-goungu. Ho ngaro ngini ka nigogerohi o duniaka naa, abe o dunia ma nyawa manga hininga yotula-tulaka de ma dorou dika yanii-niiki, ma kiani ngini niwango abe hoka itaana o debi-debini ma nyawa yowango. Ho abe ma oraha o dunia ma nyawa yamake ti ngini nia wowango, gea imaketero hoka o muru-murumu ihitararono o fufutuoka, abe ngini niahitararono o dunia ma fufutuika.

¹⁶ De hokogea ngini niahimatoko ma dararono eko Ma Jou ai Demo-demo o dunia ma nyawaika, abe ai demo-demo gea o wowango ma ngango ma titi. De ngaro ngohioo ma, ka idadi tamake ma utumu nia wowango ma datoro ma hofokino. Abe nako ahi behehongo mata-mata gea nianiiki, gea ahao ma wange woboali o Kristusu o duniauku naa de ngohi naa duru tomorene abe ma titi ko parahajaua ahi gahauku de ahi karajaanga nginika.

¹⁷ De naa moi tinihingahu ma titi ahi karajaanga gea nginioka. Abe ngaro ahi wowango kiani tomahidoaka la idadi hoka o huhuba Ma Jouika, abe ngohi tohonenge ma titi ahi karajaanga nginika, ma gea ka idadiohi togarago. Angamoi nagau nia ngongaku de nagau nia leleani Ma Jouika hiadono nginioo nia wowango nimahidoaka hoka o huhuba ma ngango nanga Baluhu idodutuika, de gea duru iwihisanangi. Ho ngaro ngohi tohonenge ma ka idadiohi togarago, de ahi garago gea ka idadi tinihikodoku ngini mata-mataika.

¹⁸ De tanu nginioo duru tinihigaro la ka idadi nigarago, de nia garago gea nihikodokuoli ngohino la ngone ka idadi homahiketehigogarago.

O abari abe ma titi o Timotiusu de o Epafroditusu

¹⁹ De masara angamoi ko hohiorikua itigioka tohonenge eko kouahi, ho ngohi duru toigo, iya, iti nanga Baluhu idodutu o Yesusu ai mau, ma, tonganono ko itedekanokaua de o Timotiusu ka idadi tihidingoto nginika. Una tihidingoto la ahao ma oraha una wolio ngohino de ngohi toihene o abari nginino la ka idadi tosanangi.

²⁰ Duru o nyawa moioo de ko iwa abe yomatoteroino de o Timotiusu, abe una de ngohi duru mia hininga ka moi dika, de una duru winingano-nganono ngini.

²¹ O nyawa utu abe naga nenangoka, homoi-homoiika ona mata-mata to ona dika manga mau yolegaika, de o Yesusu Kristusu ai mau ko yamagaweua yolega enangika.

²² Masara naa o Timotiusu, una gea ngini niwihiorikoka abe ai hininga Ma Jouika womahitaanoka ma titi una de ngohi mimakutuono miahingahu-ngahu o Abari ma Rorahai o nyawaika, de una ka ihikaika naga ahi datekoka wohiduhunu, abe imaketero hoka o ngofaka abe woigo ai baba widuhunu la wihisanangi.

²³ Ho una gea tonganono ka idadi nginika tihidingoto, masara ma oraha naa naga ihiurusu ngohi ho todamaahi to ona manga putuhu ngohino de ahao o Timotiusu tihidingoto nginika.

²⁴ De duru tomahinganono nanga Baluhu idodutuika la ko itedekanokaua de ngohioo ka idadi toboa tinitutumu.

²⁵ Masara nako o Epafroditusu, nanga gianongoru o Yesusoka abe nengokadau ngini niwihidingoto la nia hidoaka wao ngohino, una nagahi ngohioka. Masara naa tomaputuhoka tato tihigilio nginika. Naa ma duru una wodadi hoka ahi dodoto ma dutu, de ma ngoe wohiduhunu de wohidodiawo abe una de ngohi o Abari ma Rorahai mimakuduhunu mioodemo.

²⁶ De masara ngaro hokogea ma amoko ai duduhunu ngohino, ma ngohi tomatemo tato tihigilio angamoi duru ka ihikaika winihohininga ngini mata-mata. De nagali ma oraha gea una wopanyake de ngini niihenoka ma abari gea. De ahao ma oraha naga iwihingahu unangika ato bari ti ngini nia hininga ihuha abe ngini niwingano-nganono, de gea unangoli ai hininga ma huha naga.

²⁷ De igoungu ma oraha gea una duru wokangela hiadono ngade-ngade wohonenge, masara Ma Jou womihimatoko ai dora ngomino ho hiadono wihimomiki una la ko wohonengua, done ngohi naa ihilutu de ahi hininga ma huha.

²⁸ Ho mangale una duru winihohininga ho hiadono ma oraha naa duru toigo la o Epafroditusu tihigilio nginika la ka idadi nimakamakeoli de ahao nigogarago. De gea la ahi hiningaoo hatoli iuwini.

²⁹ De togahoko ka de una womahiadono nginika de niwidafongo nia hininga de ma garagoka, angamoi una gea nanga Baluhu idodutu ai huhuloko. Kiani naga nia horomati ma gou-goungu unangika, de ngaro onagona dika abe manga hininga hoka to unangoli ai hininga, onangika kiani naga nia horomati ma gou-goungu,

³⁰ angamoi ngade-ngade una wohonenge ma titi o Kristusu ai karajaanga waniiki. De ai wowango wato ka idadi womahidoaka iti ka idadi wao ngohino nia duduhunu abe ngini ma hirete ko idadiua niao. Ho naa o Epafroditusu ngohi tihigilio nginika.