Filiipi 1 - Ma Jou ai Demo-demo o Totobelohoka

O Paulusu ai demo ihira-hira o Filiipi ma garejaika

¹ Mia gogianongoru o Yesusu Kristusoka abe o Filiipi ma kapongoka nimanoa. Ngomi naa o Paulusu de o Timotiusu, to Yesusu Kristusu ai huhuloko. Abe o Kristusu, Una gea nanga Koano Ma Jou wonahibehehongoka. De naa mia hurata mihidingoto ngini mata-mataika abe Ma Jou winihidadioka to Una ai nyawa. De ngaro ngini abe o gareja ma hihira de nginioo abe nitobaduhu-duhunu o garejaka, ma, to ngomi mia horomati mihidingoto ngini mata-mataika.

² De ngohi naa tinigahoko nanga Baba Ma Jou de nanga Baluhu idodutu o Yesusu Kristusika, la ahao ma owa de o hininga ma miriidi, abe Ma Jouoka de aino, ahao winihidoaka nginika.

O Paulusu ai gogianongoru wagahoko Ma Jouika

³ Ahi gogianongoru, marai ahi hiningaka ma ngoe ngohi tinihohininga, de tinihininga ma getongo, gea totarimakase Ma Jouika ma titi ngini.

⁴ De ma getongo tomaniata ma tinigahoko nginioo mata-mata, de gea tomaniata de ahi garago,

⁵ angamoi ngini de ngohi ka nengokadauinohi de o Abari ma Rorahai homakuduhunu abe hahingahu-ngahu o nyawa utuika. Abe nengokadau de ahao niihene o Abari ma Rorahai ka hiadono ma oraha naa de ka homakuduhunohi.

⁶ De ngohi tohioriki abe Ma Jou winitila la wato ngini nihiduhunu ngohi, de genangoka tohioriki ngini niwihingounu Unangika. De tohioriki gea nihiduhunu mangale ma titi Ma Jou ma hirete wokarajaanga ti ngini nia kokihiningaka. De ko watogu-togumua wokarajaanga ka hiadono ma bahaika abe ma wange gea o Yesusu Kristusu woboali nenanguku. De nako ma baha gea adonoka, ahao gea ingodumoka ai karajaanga nia wowangoka.

⁷ Ngini naa duru de ahi dora tiningano-nganono, gea ho itiai ahi hininga itagi nginika hokogea. De gea tinidora angamoi ngini mata-mata nihidununoka ahi karajaanga ma goronaka naa abe Ma Jou wohihiowa de wohihitagongino. De abe ma titi ahi karajaanga, gea ena duru ma titi hiadono ihibuika nenangoka, angamoi o nyawa utu yatae o Abari ma Rorahaiika ato ko igoungua. Ho ngaro ngohi o bui ma tauoka dika togogere eko ngaro ahao ma oraha ihiurusu o nyawa manga himangoka abe kiani o Abari ma Rorahai toodemo de tahitararono ma titi onangika, ma, ngini duru ma ngoe nihiduhunoka ngohi naa.

⁸ De ngaro Ma Jou ma hirete, ma Una wohioriki ahi hininga ma dola, abe duru tinihininga de duru tinidora, abe ahi dora nginika itagi gea o Yesusu Kristusu ai dora tapake.

⁹ De abe hoka kangano totemo tato ngini tinigahoko Ma Jouika, gea tinigahoko hokonaa. Tinigahoko la nginioka nia dora ka idogo-dogo hiadono nia tobahiorikoo idogo ilamoko, abe ma titi ka idogoli niwihioriki Unangika. De nako nia dora gea idogo-dogo, de ahao nia hiakunu moioli naa idogo ilamoko, abe nia hiakunu la o kia dika naga ipuda nia hiningaka ma, Ma Jou ai hininga duru niataana. Ho ma titi hange gea tinigahoko Ma Jouiye la idogo ilamoko nia wowangoka.

¹⁰ De gea tinigahoko la ngaro hokokia dika naga nia wowangoka, ma ngini ka niakunu niairiki o kiahi duru itiai. De tinigahokoo la nia wowango ka ihikaika itebini de ko iwa nia datoroka abe ka idadi inihohowono o nyawa. Abe ahi gogahoko gea ma dumutu la tato nia wowango itebini ma oraha naa de ka hiadono o wange gea o Kristusu woboali.

¹¹ De nako hokogea nianiiki, ka ihikaika o totiai ma hofoko naga nia kokiwowangoka abe gea ma hofoko o Yesusu Kristusoka de aino. Ho ahao o nyawa inimake nia wowangoka ma totiai ma hofoko gea de hiadono ma bahaika o nyawa iwihoromati de iwihigiriiri Ma Jouika.

Ngaro iwibuioka o Paulusu ma idadi ma utumu

¹² Ahi gogianongoru, naa duru toigo tinihingahu, abe ngaro ma kangela abe naa idadioka ngohino, ma tanu ahi kangelaino naa duru idadi ma utumu. Abe ngohi tohiromanga tato ma utumu, gea o Abari ma Rorahai naa, utuohi iwoe ihikabarihi o nyawa manga ngoe-ngoeika nenangoka, de gea ma titi ahi kangelaino.

¹³ Abe ona yotobagoa-goana o tau ma amo-amoko naa, de o nyawa utuoo manga ngoe o kotaka naa, ona mata-mata ihikokiorikoka abe ngohi naa ihibuioka ma titi o Kristusu tiniiki.

¹⁴ De nagali abe ma titi nanga gogianongoru o Yesusoka. Abe nanga gogianongoru manga ngoe nenangoka ihimake ngohi abe ngaro ihibuioka, ma, ka ihimoroinohi o Abari ma Rorahai tohingahu-ngahu. Ho ona gea ma oraha naa de yotomoroinoli Ma Jou ai Demo-demo yahingahu-ngahu o nyawa utuika, abe ko yohawanokaua. Ho abeika hokokia ma amoko o Abari ma Rorahai iutumu ma titi ngohi ahi kangelaino.

¹⁵ De igoungu, o nyawa utu naga nenangoka abe yahingahu-ngahu ma titi o Kristusu, masara yahingahu-ngahu gea ma titi ngohino ihitaleana eko ma titi ona ato yomagoraka. Masara o nyawa utuoli naga abe yahingahu-ngahu de manga hininga ma rorahai dika,

¹⁶ de gea ma titi manga dora. Angamoi ona gea ihioriki abe Ma Jou wohiaturu de wohihitagongo ngohi la o Abari ma Rorahai toodemo o nyawa manga hima-himangoka, ho ona gea ato ihiduhunu.

¹⁷ Masara ona utu gea abe yahingahu-ngahu masara ko mangaleua ma titi de manga hininga ma rorahai, ona ato yomahikurutiye angamoi yomatemo ato, “Nako o nyawa inahikurutiye, gea imaketero hoka o Paulusu hihitipokouku de hiadono ai kangela ma goronaka naa de ai hiningaka hihitubuho.”

¹⁸ Masara gea ko adodoaua. Tanu gea ko kia-kiaua ngohino, de ka idadiohi togarago, angamoi ngaro yahingahu-ngahu de manga hininga ma rorahai eko koua, ma, iti yahingahu-ngahu o Kristusu ai ade-ade. Ho ngaro hokokia dika o Abari ma Rorahai itagi, ma, ka idadiohi ngohi togarago. De ahi garago gea ko itoa-toakua,

¹⁹ angamoi duru tonganono ahao ihihiluasa o bui ma tauino naa, de gea ma titi ti ngini nia niniatino de o duduhunu tamake Ma Jou o Womahoka de aino, abe Una gea o Yesusu Kristusu wonahidoakoka ngoneino.

²⁰ De naa moi duru toigo de tonganono, la ufa tohawana ma oraha o Abari ma Rorahai toodemo. Angamoi nako tohawana de ko tohidemoua abe tanu kiani gea ena totemo, gea de ahao tamao hoka ihihimaleke. De gea duru tonganono la imakawalimi, abe ma oraha o Abari ma Rorahai toodemo de duru ihimoroini, abe hoka ma dihirainoli, la ka idadi ngohi naa o Kristusu tigorakiye. De gea ahi nganganono, ngaro tohonenge eko ka towangohi, ma, iti abe o Kristusu o nyawa iwihoromati Unangika ma titi to ngohi ahi wowango ma datorino.

²¹ Abe nako ngohi, ahi wowango ma titi duru o Kristusoka dika. De abe nako tohonenge ma gea toutumoka angamoi gea ngohi naga de de Una.

²² De nako ko tohonenguahi, gea ka idadiohi ahi karajaangino ma hasili tamake. Ho ka towangohi ekola tohonenge; done sarakia tomangiriki?

²³ De gea duru tokangela tomaputuhu, abe tanu daku o Kristusiye toigo tosobo la Una tidodiawo, angamoi enangohi ihailoa.

²⁴ Masara nako ngini, ka nihipereluohi la ngohi ko tininoauahi la ka idadiohi tiniduhunu.

²⁵ Ho, mangale duru tamao abe ngini nihiperelu ngohi, hiadono naa duru tongaku ko tohonenguahi, ma masara ka tinidodiawohi o dunia ma lokuoka naa. De naa ka idadiohi tiniduhunu la utuohi yoaguru nia ngongaku de gea nia ngongakuoka ka ihikaika ihiboa o gogarago nginika.

²⁶ De ahao ma oraha nginika toboali, de gea idadioka o higiriiri ma titi ma amoko, abe ngini ahao duru niwihigiriiri o Yesusu Kristusika de ma titi ngini de ngohi homakamakeokali.

O Paulusu wahigaro la yotomoroini manga kangela ma goronaka

²⁷ Masara ngaro hokokia dika idadi ngohino, ma iti ti ngini nia wowango niao irahai abe imakiniiki de o Kristusu ai Abari ma Rorahai. De nako hokogea nidiai, ngaro ngohi toboa tinitutumu eko ko toboaua, ma iti toihene abe nagahi nia dongohono nia ngongakuino, de abe nia hininga nimaketehiningamoi dika. De iti nimakokuduhunu de nia hininga ma dumutu moiika dika la nia ngongaku imahilaku ti ngini nia wowangoka, abe nia ngongaku gea o Abari ma Rorahaiino.

²⁸ De toigo toihenoo abe ma hohutuloo de ko nihawanua ma oraha nia musu niahimanga. De gea mata-mata inihitaana nginika abe ahao ko nibinaahakaua masara nimahitunguu abe ngini niamakeoka o wowango ma ngango Ma Jouoka de aino, de Unangika duru nimahinganono. De masara nia musuikali ena gea mata-mata yahitaana abe ma titi ona ahao Ma Jou wahibinaaha angamoi ona ko iwa manga nganganono Unangika.

²⁹ Ho naa marai ngone homaleha hato, “Ma titi o kia hiadono nanga musu naga inahikangela?” Gea ngohi tato enangoo ma taetongo tato Ma Jou ai owa ngoneuku. Abe ngini naa ma owa winihidoakoka abe ma titi Ma Jou winihigunoa la niwingaku Unangika. De gea marai ko niherangua, masara naga ai owa moioli winihidoaka, de ena gea bote ka idadi niheranga. Abe to Una ai owa naa moioli winihidoaka, la ngini ka idadi o kokangela niamake nia wowangoka ma titi nia ngongakuino. De igoungu, ngaro nia ngongakuoo eko ngaro nia kangelaoo, masara gea mata-mata ka ma moi tohidefetongo tato Ma Jou ai owa abe winihidoakoka ma titi nia gogere o Kristusoka.

³⁰ Abeika, ma dihira abe ngohi nagahi nginioka o Filiipi ma kapongoka, de ngini nihimake de nia lako abe ma oraha ihihikangela nia dodiawo. De ma oraha naa niihenokali ma titi ahi kangela naga ka idadiokali. Ho naa marai ti nginioli nia kokangela iboa abe imaketero hoka to ngohioli.