Filemono 1 - Ma Jou ai Demo-demo o Totobelohoka

O Paulusu ai demo ihira-hira o Filemonika

¹ Ngohi naa o Paulusu, de ngohi ihibuioka ma titi o Yesusu Kristusu tiniiki. De nanga gianongoru o Timotiusu, unangoo naga de de ngohi nenangoka. Naa ahi hurata tohidingoto ahi oloika o Filemonika, abe ngona de ngomi homakuduhunu hileleani o Kristusu nanga Koano abe Ma Jou wonahibehehongoka.

² De nginikaoo abe mia biranga o ngo Afia de mia gianongoru o Arikipusu, ahi hurata naa tohidingoto nginikaoo. Abe ngona o Arikipusu duru nokarajaanga abe imaketero hoka ngomioli mikarajaanga, la o Kristusu ai Abari ma Rorahai utuohi ilaku o nyawaika. De nanga gogianongoru o Yesusoka mata-mata abe ka ihikaika yomatoomuino to ngona o Filemono ani tauoka, onangikaoo ma tohidingoto ahi hurata naa.

³ De ngohi naa tinigahoko Ma Jou nanga Babaika de o Yesusu Kristusu nanga Baluhikaoo, la ahao Ma Jou ai owa de ai hininga ma miriidi winihidoaka nginika.

O Filemono ai ngongaku de ai dora

⁴ Ahi olo o Filemono, ngohi ma getongo toniniata de totarimakase ahi Jouiye ma titi ngona.

⁵ Abe totarimakase Unangiye angamoi naga tonigihene abe ngona ningaku nanga Baluhu idodutu o Yesusika de abe nadora Ma Jou ai nyawa mata-mataika.

⁶ De ahi olo, tonigahoko Ma Jouika la Una woniduhunu la ani tobahioriki ka idogoli hiadono ka nohioriki Ma Jou ai owa mata-mata abe wonahidoakoka ngone hingaku-ngakuino. De tonigahokoo la ani tobahioriki gea idadi ma titi hiadono ani gogao ani gogianongoruika nohiputurungu hiadono ngini nimakao hatoli irahaioli. Abe nako ngini nimakao irahai hokogea, ahao ihiboa o higiriiri o Kristusiye.

⁷ De ani dora gea Ma Jou ai nyawaika ihiboa ngohino o garago ma amoko de duru ihihiwangoro ngohi ahi hiningaka. Abe Ma Jou ai nyawa genangoka yamakeoka ani dora onangika abe ma titi ngona nalaru de nahiputurungu manga kokihiningaka. Ho ahi gianongoru, ani dora gea ma titi hiadono ngohi togarago.

O Paulusu ai gogahoko o Filemonika ma titi o Tobaparahajaua

^8-9 De naa ahi gianongoru o Filemono, naa moi toigo togahoko ngonaika. Masara ngaro tato ngonaika togahoko, ma tanu ka idadi tonihuloko, angamoi ahi kuaha naga o Kristusoka de aino la tonihuloko dika la kiani nodiai abe itiai. Masara mangale ma titi tonihioriki ani dora gea ani gogianongoruika ho ko tonihulokua, ma ngohi tato togahoko dika ngonaika. Abe ngohi tonganono ani dora gea idadi ani duduhunu hiadono ani hingounu naga ahi gogahokino. Ho naa ngohi o Paulusu, abe ihiperekioka de hongoli naga ihibuioka ma titi o Yesusu Kristusu tiniiki,

¹⁰ ngohi duru togahoko ngona ahi oloika ma titi ahi ngofaka o Tobaparahajaua. Abe una gea ma oraha ihibuioka naa de una wodadioka hoka to ngohi ma hirete ahi ngofaka, abe una womahinganono o Yesusu Kristusika ma titi ahi dodotokino.

¹¹ De igoungu abe ma dihiraino de una gea ai karajaanga parahaja ngonaka, masara una gea ma oraha naa ko hokogenangokaua abe hoka ma dihirali, angamoi naa naga de una ka idadi wohiboa ma utumu ma amoko ngonaika abe ma titi una ka idadi nihikarajaangoli ngonaka. De ko ngonaikaua dika, masara ngohioo ka idadi tamake ma utumu unangino.

¹² De una gea abe naa tihigilio ngonaika, ngaro ngohi naa tamao hoka to ngohi ahi hininga ma hirete tohidingoto ngonaika, angamoi hokogea ma amoko ahi dora abe tidora ahi ngofakika gea.

¹³ Tanu tosanangi una titumungu nenangoka de de ngohi la ka idadi ma oraha naa wohiduhunu angamoi ihibuioka ma titi o Abari ma Rorahai tahingahu-ngahu. Abe una gea wodadioka hoka ani duruuru ngohino, ho nako titumungu, ahao gea ngade-ngade imaketero hoka ngona ma hirete naga ahi datekoka nohiduhunu.

¹⁴ Tanu hokogea todiai, masara ngohi tato ufa hiadono ko tonilehauahi ani hininga de ka todiai. Masara ngohi duru toigo la ani datoro ma rorahai gea ngonaka de aino nomaputuhu done nato ka ngohioka de aino toniribuutu.

¹⁵ Ho ngohi ko titumungua una gea angamoi tato marai ma dodihiraka de Ma Jou wohideeokau hokonaa, abe wato una gea nimakitingakokahi jai-jai ngonaino la ka idadi wingaku Unangika. Ho ahao naa ka idadi wolio ngonaika de wogogere ngonaka ka hiado-adonika, abe ma titi unangoo naa wingakuoka abe imaketero hoka ngonali, ho gea ngini ko nimakitingakokauali.

¹⁶ De gea wolio ngonaika hoka ani gilaongokaua, masara naa una wodadioka ani gianongoruoo o Yesusoka, ho naa kiani nilegaika unangika de ani dora. De igoungu ngohioo duru tidora unangika gea, masara hongoli to ngona ani dora unangika, angamoi una to ngona ani gilaongo o duniaka de masara wodadioo ani gianongoru nanga Baluhu idodutuoka.

¹⁷ Ho ahi olo o Filemono, nako ngona nohietongo nato ngohi ani dodiawo o Kristusu ai karajaangoka, ho togahoko la o Tobaparahajaua nidafongo imaketero abe hoka ngohioli ma hirete nohidafongo.

¹⁸ De masara nako ngona ani hiningaka nomatemo nato una gea wahowonoka ngonaika ekola naga ai nagimi ngonaka, gea ka idadi nohihitagongo ngohino la idadi to ngohioli ahi nagimi, de gea ahao ngohi tofangu.

¹⁹ De ahi demo-demo naa ena tohitulihi de to ngohi ma hirete ahi giama. Abe ngohi naa o Paulusu tohitunguu la ngona duru nohioriki ahao ngohi tofangu ai nagimi gea. De abe ma titi o nyawa manga nagimi, tanu ngaro ufa dika de tofetongo to ngonali ani nagimi ngohino, abe ani wowango ma hungi namake ma titi ngohioka. Ho gea marai to ngonahi ani nagimi ilamoko nako de to una. Ho marai ai nagimi ngonaka ka idadi naofioka dika. Masara nako hokogenangua ani hininga, ngohi naa tonihibehehongoka tato nako naga ai nagimi ngonaka, gea ka tofanguohi.

²⁰ Ho naa, ahi gianongoru, ngohi togahoko la ahi gogahoko gea naniiki abe hoka itiai ma titi nanga gogao nanga Baluhu idodutuoka. Abe gea ahi gogahoko ngonaika, kiani o Tobaparahajaua nidafongo imaketero abe hoka ngohioli ma hirete nohidafongo. De gea ngona nohihiputurungu ngohi ahi hiningaka ma titi o Kristusoka.

²¹ De naa tonihurata angamoi duru tonganono ahao ko ahi gogahokua dika nodiai, masara utuohi ngona nodiai la nato nohiduhunu ngohino.

²² De naa moioli ahi gogahoko, la ngona ani kamar moi ani tauoka nohihidiaiokau. Angamoi ngohi tonganono ahao ihihiluasa la ka idadi tolio ngonaika, de gea ma titi ti ngini nia niniatino.

O dora ma demo ihidingoto unangika

²³ De o Epafras, ahi dodiawo o bui ma tauoka naa abe unangoo iwibuioka ma titi o Yesusu Kristusu winiiki, una wohidingoto ai dora ngonaika.

²⁴ De nagali ona abe ihitobaduhunu ngohi de o Kristusu ai karajaanga, abe manga roma-romanga o Maruku, de o Arisitarakusu de o Demasa de o Lukasa, onangoo ihidingoto manga dora ngonaika.

²⁵ Ho naa ngini tinigahoko la nanga Baluhu idodutu o Yesusu Kristusu winihidoaka to Una ai owa nia kokihiningaka.