Estere 9 - Ma Jou ai Demo-demo o Totobelohoka

Abe hokokia idadi o Yahudi ma nyawa manga bobinaaha ma wangeoka

¹ Ho naa adonoka o mede Adara abe o mede ngimoi de hinootoka de ma tanggala ngimoi de hangeoka de o koano ai pareta hinooto duru o wange gea iborilaku. O koano ai pareta ihira abe o Hamana wohitulihi ena gea ihisanangi ona abe yadohata o Yahudi ma nyawaika de ona yonganono ka idadi o Yahudi ma nyawa yahibinaaha. Masara duru imakawalimi idadi de o Yahudi ma nyawahi yolaku ho manga musu yahikala.

² De gea angamoi o propinsi mata-mataika abe manga koano o Ahasi-weroso wahikoano o Yahudi ma nyawa yomahidiaiokau. Abe ngaro o kota o kiaka dika naga o Yahudi ma nyawa yogogere genangoka ona yomatoo-toomuino la ka idadi yomakuduhunu yaparangi onangika abe ona yohira yoparangi. Masara manga musu manga domoroini ko iwaka ho ko moiua ka idadi yalawana o Yahudi ma nyawaika de yolaku angamoi ma oraha naa o nyawa utu mata-mataika yamodongo o Yahudi ma nyawaika.

^3-4 De o Yahudi ma nyawa yamake o duduhunu o poparetaino angamoi ma oraha naa o Modekai wokurutiyeoka o koano ai datekoka de ka ihikaika ai kuaha ka idogo-dogo. Ho o nyawa o tonaka ma amokika yomaketeade-ade ma titi o Modekai ai kuaha ilamoko de ma ade-ade gea imahora hiadono o nyawa mata-mataika abe o Ahasi-weroso wahikoano ona yokokiihenoka o Modekai ai ade-ade. De angamoi o Modekai o Yahudi ma nyawa ho o popareta ma nyawa mata-mataika duru ihidodiai o Yahudi ma nyawaika. Ho ngaro ona o tentara ma dimo-dimono yokokurutiye, eko o propinsi ma gubernuuru, eko o kimalaa, eko ona o koano ai datekoka abe iwiduhu-duhunu, ma ona gea mata-mata yaduhunu o Yahudi ma nyawa ma titi iwimodongo o Modekaiika abe naa una wodadioka o koano ai duduhunu wokokurutiye.

⁵ Ho o Yahudi ma nyawa de manga humaranga ma doto arihononga yakokitoma manga musu de yahohonenge hiadono ko manga ngoe yahibinaaha. De ko iwa manga dora ma hiokoo onangika abe manga dohata o Yahudi ma nyawaika hiadono ka yaparangiohi.

⁶ De o Susana ma kota ma hononga, abe akurunga de o dadaduhu angamoi o koano ai tau naga genangoka, o kota ma honongaka gea dika de naga o Yahudi ma nyawa manga musu o nau-nauru yaratuhu motoa abe yohonenge genangoka.

⁷ De o Hamana ai ngofaka o nau-nauru yangimoi onangoo yakokitoma de manga romanga o Pasandata, o Dafono, o Asapata,

⁸ o Porata, o Adaliya, o Aridata,

⁹ o Pamasata, o Arisai, o Aridai, de o Waisata.

¹⁰ O nauru yangimoi gea manga ete o Hamedata de manga baba o Hamana abe una gea duru wamusu o Yahudi ma nyawaika. De ngaro ai ngofaka yangimoi gea yatoma ibooto masara manga kiahonanga o Yahudi ma nyawa ko yomaleua.

¹¹ De o wange gea ma futuku naga o nyawa yoboa o koanoino de iwihingahu abe manga ngoe yohonenge o wange gea o Susana ma kota ma honongaka abe akurunga de o dadaduhu.

¹² Gea o koano woihene de womiahoko ngoi fekata o ngo Estere de womihingahu wato, “Ngaro o Susana ma honongaka naa dika de naga o nyawa yaratuhu motoa yohonengoka o wange naa abe o Yahudi ma nyawa yatomaka. De o Hamana ai ngofaka o nau-nauru yangimoi onangoo yatomaka. Barikua nako hokonaa manga ngoe yahohonenge nenangoka dika marai hongoli duru ko manga ngoe ahi kokawaaha abe yohonengoka ahi tonaka ma propinsi utuoka! Masara ngaro hokogea ngohi naa tonileha Estere, o kiali ngona noigo la ngohi todiai? O kia dika ngona nomagahoko ma ka idadi, ho nohihingahu dika de ngohi tosanangi ani gogahoko tonihidoaka dika.” Hokogea o koano womileha ngoi fekatika.

¹³ De o ngo Estere mopaluhu mato, “Nako ngona ahi koano nosanangi noihene ahi gogahoko, ngohi tohibehehongo la ngona nahigunoa o Yahudi ma nyawa o Susana ma kotaka la ka idadi itebini manga musu yatoma imaketero abe hoka ani pareta ma hurata yahigunoa yodiaioka o wange naa. De togahokoli la o Hamana ai ngofaka yangimoi manga honenge ngona nahuloko la ona homoi-homoiika yadide o panakini ma didideoka la o nyawa ka idadi yamake manga honenge gea.” Hokogea o ngo Estere ami gogahoko o koanoika.

¹⁴ De o koano wohihupu o huhuloko ma hurata de ma titi duru imaketero abe o ngo Estere mogahoko. De o koano ai hidingoto ma nyawa yomataiti yoiki la o koano ai huhuloko ma demo yahingahu-ngahu o Susana ma kota ma amokika. De o Hamana ai ngofa-ngofaka yangimoi manga honenge yakokidide o hohonenge ma didideoka la yahimatoko o nyawaika abe yakokihonengoka.

¹⁵ De ma dawangeinoli abe ma tanggala ngimoi de iata naga o Yahudi ma nyawa o Susana ma kota ma amokika yomatoo-toomuino de yomaduhunu hiadono naga manga musu yaratuhu hange yatoma o Susana ma kota ma honongaka abe ko akurungaua. Masara manga kiahonanga ko yomaleua ngaro manga ngoe gea yakokitomaka de ngaro o koano ai pareta ma hurata yahigunoa yomahitoona manga kiahonanga ma ko yomaleua.

¹⁶ De ona o Yahudi ma nyawa utu abe yogogere o ngi-ngi utuokali onangoo manga musu ko manga ngoe yatoma hiadono yasana moritumidi de yasana motoa yahohonengoka! Abe o doma ma wange o tanggala ngimoi de hange gea onangoo yodiai imaketero hoka manga gogianongoruoli o Susana ma kotaka. Ho o tonaka ma propinsi ma amokika, abe o kiaka naga o Yahudi ma nyawa yogogere, onangoo yomatoo-toomuino la ka idadi yomadatoko manga musuino de yomaaduhunu ma oraha ona yadohata yaparangi onangika. De duru o Yahudi ma nyawahi yolaku hiadono manga musu yasana moritumidi de motoa yahibinaahaka. De ngaro ka de ona yatomaka de ka idadi o Yahudi ma nyawa yahigunoa yomale manga kiahonanga masara ko yomaleua.

¹⁷ Mata-mata gea idadi o mede ngimoi de hinootoka abe ma romanga o mede Adara ma tanggala ngimoi de hangeoka. De ahao ma dawangeino abe o tanggala ngimoi de iata, o Yahudi ma nyawa ko yoparangiokaua ho yomahiaini de ihirame-rame manga gogarago ma titi manga lolaku de ihirame-rame de o ngolo-ngolomo.

¹⁸ Masara o tanggala ngimoi de iatuku gea o Yahudi ma nyawa abe yogogere o Susana ma kotaka, ona yomatoo-toomuinoli la yaparangioli manga musuika angamoi o wange hinooto ma dekanino ka idadi ona yomaaduhunu. Ho o wange hinooto gea ipaha de ahao onangoo yomahiaini de yorame-rame o tanggala ngimoi de motoaka. De onangoo duru de manga gogaragoka abe o lolaku ihirame-rame de o ngolo-ngolomo.

¹⁹ De ka hiadono ma oraha naa nako adonoka o mede Adara ma tanggala ngimoi de iatoka de o Yahudi ma nyawa o kapo-kapongo ma etetekoka onangoo yodiai o lolaku ma hohininga ma rame-rame angamoi ngaro ko iwa manga dadatoko hoka o kota abe akurungaka de ma dadaduhu, masara ngaro hokogea onangoo yolaku. Ho manga hohininga ma wangeoka yodiai o rame-rame de manga gogarago de yomahiketehikokodoaka o inomo ma hidokuino abe duru ma rorahai. Hokogea yodiai o hohininga ma rame-rame la ka ihikaika ufa yawohanga o wange gea abe manga totofora o Yahudi ma nyawa ko yobinaahaua masara ona yolaku manga musuika.

²⁰ De o Modekai wotulihuku mata-mata abe idadioka o wange gea de wotulihi o huratoo ma ngoe abe wohidingoto o Yahudi ma nyawa mata-mataika o tonakoka gea abe yomanoa ma koano ai kuahaka. Ho ngaro yogogere ma gogurutika eko ko ma gurutikaua de ngaro yogogere o kotaka eko o kapongo ma etetekoka kiani yamake o Modekai ai hurata gea.

²¹ De manga huratoka o Modekai wahingahu kiani o tao-taongiye ka de adonoka o mede ngimoi de hinootoka abe ma romanga o mede Adara ma tanggala ngimoi de iatoka, de kiani o wange hinootoino ma dekana ihirame-rame manga lolaku.

²² Angamoi gea o hohininga ma wange abe yomahikokihohininga ma oraha o Yahudi ma nyawa yahihihanga manga musu. Angamoi o mede ngimoi de hinootoka gea manga hininga ma huha aturuuruoka de manga hininga ma garago. Abe ma oraha gea duru o Yahudi ma nyawa yoari-ari masara ahao adonoka ma wange abe ko yoari-ariokaua de yomulaenge yogogarago. Ho o Modekai wahurata onangika abe o tao-taongiye kiani o wange hinooto gea yomadingakoka la ihirame-rame de o ngolo-ngolomo de yomahiketehihohininga de manga inomo ma hidoku. De kiani o wange hinooto gea duru yaduhunu de manga hidoaka manga gogianongoruika abe ona naga manga kokangela ma goronaka.

²³ Hokogea o Modekai wahibehehongo onangika de ai hura-hurata de o Yahudi ma nyawa mata-mataika yosanangi ai behehongika gea hiadono ona ato ahao o tao-taongiye yodiai o rame-rame o hohininga ma wangeoka gea.

²⁴ De hokonaa manga rame-rame ma titi abe kiani ka ihikaika yomahihohininga: Ma dihira naga o Yahudi ma nyawa mata-mataika manga musu womatengo ai romanga o Hamana, una o Hamedata ai ngofaka abe yomahitofora o Agagika abe ma dihiraino de wodadi wokoano. O Hamana gea wahidee o Yahudi ma nyawaika la wahikokibinaaha de una wapake o mai-maihi abe ihiromanga o purimi la genangino wairiki ma wange abe ai hidee duru de ma utumoka abe ka idadi wakokitoma o Yahudi ma nyawaika ka hiadono yahikokibinaahaka.

²⁵ Masara o koano abe wahikoano o nyawa mata-mata o tonakoka gea, una woihene o ngo Esterino o abari ma titi o Hamana ai hidee ma dorou o Yahudi ma nyawaika. De ahao o koano gea wohipareta de o hurata ai kokawaahaika la o Hamana ai hidee ma dorou gea wohikawalimi hiadono ko yadaenua o Yahudi ma nyawaika masara iwidaene o Hamanika dika. De o koano wohuloko la o Hamana de ai ngofaka o nau-nauru mata-mata manga honenge yakokidide o hohonenge ma didideoka.

²⁶ De angamoi o Hamana wapake o mai-maihi ma romanga o purimi la wairiki ma wange abe ai hidee ka idadi de ma utumoka ho o Yahudi ma nyawa manga hohininga ma wange-wange ona ihiromanga o Purimi. De gea ma titi hiadono manga rame-rameoo ihiromanga o Purimi ma rame-rame. De hokogea o doma ma wange ihikawalimi hiadono idadi o rame-rame ma wange. De o Modekai wohitulihi ai huratoka de wahidingoto onangika abe manga rame-rame ma titi. De duru yoluku yawohanga mata-mata abe ona ma hirete yamake de manga lako de ena gea abe idadi o wangeoka gea.

²⁷ Ho hiadono o Yahudi ma nyawa yomaputuhu ato yaniiki duru imaketero hoka o Modekai wotulihi ai hurata ma goronaka ho o tao-taongiye yodiai manga hohininga ma rame-rame gea. De o nyawa abe ko o Yahudi ma nyawaua masara ahao onangoo duru yoigo yodadi o Yahudi ma nyawa hiadono yaturuuru manga agama de ka yaniiki dika o Yahudi ma nyawa manga agama, onangoo kiani ka ihikaika yaniiki o hohininga ma rame-rame ma hiaturu gea ka hiadono manga totofora yolape-lapeuku. De o Purimi ma rame-rame ma hiaturu gea ena abe o Modekai wotulihuku o huratoka de wohidingoto onangika la ona ihioriki ma rame-rame ma oraha o mede Adara ma tanggala ngimoi de iatoka de o wange hinootoino ma dekana yorame-rame.

²⁸ Ho o Yahudi ma nyawa mata-mata manga tau homoi-homoiika o tao-taongiye kiani yaniiki o Purimi ma rame-rame de to ena ma hiaturu ma ngekomo abe kiani ka ihikaika ona mata-mata yaniiki ka hiadono manga totofora yolape-lapeuku de ngaro ahao o kiaka dika o Yahudi ma nyawa yogogere ma kiani yaniiki.

²⁹ De o koano ngoi fekata, o ngo Estere abe to muna ami baba idodutu o Abihaili, munangoo o hurata motulihi o Yahudi ma nyawa mata-mataika abe enangoo ma titi o Purimi ma rame-rame ma hiaturu de ami hurata gea mohitunguu de ami kuaha ma dodunguu. O Modekai womiduhunu ma oraha motulihi la to munangoli ami hurata ma titi imakiniiki de to una ai hurata ma titi ho imakataana manga hurata hinooto.

³⁰ De o Modekai wohiaturu la manga hurata hinooto gea ihidingoto o Yahudi ma nyawaika abe yogogere o propinsi o ratuhu moi de monaoko de tumidoka abe ona mata-mataika yomahikoano o Ahasi-werosika. De ngaro manga hurata ma dola ma ngoe ma titi o Purimi ma rame-rame masara nagaoo manga hiowa ma demo manga gogianongoruika abe yagahoko la manga wowangoka yososanangi dika. De nagaoo manga higaro ma demo manga gogianongoruika la manga datoro itiai de ka ihikaika yomakao irahai.

³¹ De ma dodihirainohi o Yahudi ma nyawa naga manga hohininga abe o tao-taongiye kiani yaniiki de enangoo yogelenga ma tanggala de o wange muruono ma dekana yaniiki. Abe naga manga oraha abe o inomo ko yolomua o wange muruonino ma dekana de utuoli naga ma oraha abe o tao-taongiye yohohininga manga huha moi abe idadi onangika ma dodihiraka de enangoo yogelenga ma tanggala abe o tao-taongiye kiani yaniiki. Ho naa yodogo manga hohininga ma rame-rame moioli de enangoo yogelenga ma tanggala de ma hiaturu mata-mata abe yaniiki la o tao-taongiye o Purimi ma rame-rame yodiai de ihirame-rame itiai. De gea ena manga behehongo abe o ngo Estere de o Modekai ihitulihuku manga hura-huratoka la manga gogianongoru ihikokioriki o Purimi ma rame-rame ma tanggala de ma hiaturu.

³² Hokogea o ngo Estere mahuloko ona yotobatuli-tulihika la to muna ami hurata ma dulihi duru ihitaana o Purimi ma rame-rame ma hiaturu abe enangoo ona ihitulihuku o popareta ma bukuoka.