Estere 8 - Ma Jou ai Demo-demo o Totobelohoka

O koano wodiai ai behehongo ma hurata moioli wato ka idadi o Yahudi ma nyawa yomaduhunu la ufa yohonenge

¹ De duru o wange gea o Hamana, o Yahudi ma nyawa manga musu, una wohonenge de ma koano womihidoaka ngoi fekata o ngo Esterika, o Hamana ai tau de to ena ma kiahonanga mata-mata de o Hamana ai duduhunu mata-mata abe yokarajaanga ai tauoka. De o wange gea muna mihingahu o koanoika abe hokokia o Modekai iwidaene to muna ami dutu. De ahao o koano wohiaturu la o Modekai woboa wowohama ai himangino.

² De kanganoinohi o Hamana ko iwidideuahi de o koano ai dodunguu ma ali-ali wahuputu o Hamana ai hagaraaraino de womahinoaokoli to una ma hirete ai hagaraaraka. Masara naa ka de o Modekai woboaka ai himangino, de o koano ai ali-ali gea wahuputoli de wihinoa to Modekai ai hagaraaraoko abe ma ali-ali gea ma dodunguu o koano ai kuahaka de aino. De o ngo Estere mitagongo o Modekaiika la una wohiaturu to muna ami tau ma hungi naa de ma nyawa de ma kiahonanga abe mata-mata to Hamana de ahao kanganoika o koano womihidoaka munangika. Ho mata-mata abe ma dihira to Hamana naa aturuuruoka o Modekai ai giamika.

³ De ahao o ngo Estere moboali o koanoino de momaponuku duru ai lou ma himangoka de duru mohigali-gali o Yahudi ma nyawa maademo. De o ngo Estere ami koongo itifa imakiniiki de ami gogahoko la ufa o koano wahigunoa la ona yahibinaaha hoka o Hamana wahidee itorou onangika.

⁴ De naa o koano ai tutukunu o gurasino gea wohidoakiye la wohitunguu ai hininga isanangi la ona yomarihimanga ho o ngo Estere momaokoino ai himangoka.

⁵ De muna motemo, mato, “Nako o koano noigo nodiai hoka ngohi togahoko de nosanangi ahi wowango ma datorika de ngonaoo nato itiai nodiai hokogea, nako hokogea o koano nokokurutiye ani hininga de ngona nohisanangi ngohino de ahao ngohi ihimoroini tomagahoko o koanoika. De hokonaa ahi gogahoko: Irahai o koano nahuloko ani duduhunika abe yotobatulihi ani hura-hurata la o koano ani behehongo ma hurata moioli yotulihi. Abe o hurata ma hungi gea ka idadi ihikawalimi o behehongo ma hurata ma dihira abe itemo kiani o Yahudi ma nyawa mata-mataika yahibinaahaka. O Hamana gea wahidee ahi dutuika hiadono wamake ma ngekomo la ka idadi wohiaturu o hibinaaha ma hurata gea. De o hurata ma dola ihititi de o Hamana ai hidee ma dorou de wohidiai de wohidingoto o propinsi mata-mataika o hura-hurata kohangoe abe ma titi moi dika. Ho de ma hura-hurata gea o Hamana wahuloko ani kokawaaha mata-mataika la yakokitoma o Yahudi ma nyawa mata-mata hiadono yahiofi o koano ani tonakino.

⁶ De o koano, ngohi duru ko tapoaua nako ahi gogianongoru o Yahudi ma nyawa yadaene de o kokangela kohadorou gea ho duru ona tagahoko la naduhunu.” Hokogea o ngo Estere maagahoko o koanoika.

⁷ De ma koano wotemo o ngo Esterika ngoi fekatika, de o Modekaiikaoo abe unangoo ami baba o dofo naga genangoka ho ona yahinootoika wahingahu wato, “Abeika, ngohi o koano toigo tohitiai gea abe o Hamana wodiaioka. De angamoi una wahidee wahibinaaha ti ngini nia dutu o Yahudi ma nyawa ho hiadono ai tau de ai kiahonanga tonihidoaka ngonaika Estere ho mata-mata abe ma dihira to una ai kiahonanga naa idadioka to ngonali. De ahi poparetaika tahuloko la o Hamana iwiliko ai tomarino de iwidide o didideoka gea ho naa una wohonengoka.

⁸ Masara o behehongo ma hurata, abe una wotulihi, ena gea ko idadiua o nyawa ahao yahihihanga o pareta ma bukuino ngaro ngohi ma ko idadiua angamoi ihitunguuoka de o koano ai dodunguu ma ali-ali. Ho naa ngini inihinootoika tinihikuaha la o behehongo ma hurata moioli nitulihi de ma demo o kia dika ngini niato itiai de enangoo ahao nihitunguu de to ngohi ahi dodunguu ma ali-ali. De nihidodiai nia hurata ma dola angamoi enangoo ka de nihitunguu de ahi ali-ali de enangoo idadioka o pareta nanga tonaka ma amokika ho duru ko idadiua o nyawa yahihihanga. De nia hurata gea ka idadi nihidingoto o Yahudi ma nyawaika o kiaka naga ona yogogere nanga tonaka ma propinsi mata-mataika.” Hokogea o koano wahibehehongo o Modekai de o ngo Esterika.

⁹ De duru o wange gea dika, abe o mede hange abe ma romanga o mede Siwana, ma tanggala monaoko de hangeoka, de o Modekai de o ngo Estere yahokino o koano ai duduhunu yotobatulihi ai hura-hurata de ona ihidodiai yotulihuku o Modekai ai hingahu mata-mata onangika abe idadi o hurata ma dola. De wohiaturu la ma hurata gea ihidingoto o propinsi ma gubernuuru yaratuhu moi de yamonaoko de yatumidika abe o Hindia ma tonakoka ka hiadono o Etiopia ma tonakika. De o Modekai wohiaturoo la ihidingoto imaketero de o koano ai hurata utu abe kiani ihidingoto o popareta ma dimo-dimono mata-mataika o tonaka ma amokika ngaro yokurutiye eko ona abe yakimalaa o nyawa ma doomu homoi-homoiika abe yomahitoomu manga tofora manga romangika. Ho o Yahudi ma nyawa manga dimo-dimono mata-mataika onangoo yamake ma hurata gea abe yotulihi de o Yahudi ma nyawa manga demo ma dulihi. Ho o popareta ma dimo-dimono mata-mata gea kiani ahao yakokimake o hurata homoi-homoiika. De manga hurata yotulihi de o nyawa manga demo ma dulihi imaketemomomoi masara o hurata ma dola imakadaene mata-mataika.

¹⁰ De o Modekai ai hiaturu la ihidingoto de o koano ai kuaha ho o hurata amomoiika yapake manga koano o Ahasi-weroso ai romanga. De yomahidiai la ka de o hurata kohangoe gea yotulihi ibooto de ahao o hurata amomoi ihidatataulu ibooto de ahao ihitunguu de o koano ai ali-ali abe o koano ai kuaha ma dodunguu. De o koano ai hidingoto ma nyawa onangoo yomahidiai la ka idadi ahao yomataiti yototaka o behehongo ma hurata mata-mata gea. De o Modekai wohiaturu la ona yomaketemomoi ahao yapake o kuda abe duru ipalesa imapopaata. De o koano ai hidingoto ma nyawa homoi-homoi yomale o kuda abe o koano ai kuda ma duduonino abe yapaliara la duru itongohono imapopaata. Hokogea manga hidiai yabootokahi de ahao ona ka idadi yokokisobo.

^11-12 De hokonaa o hurata gea ma dola: O koano o Ahasi-weroso wohiaturu de ai kuaha hokonaa: “Ma dihira o koano ai behehongo ma hurata niodafongo abe itemo ato, ka de adonoka o mede Adara abe o mede ngimoi de hinooto ma tanggala ngimoi de hangeoka de o Yahudi ma nyawa mata-mataika kiani yohonenge abe yogogere o tonaka mata-mataika abe nanga koano o Ahasi-weroso ai kuahaka. Masara naa nanga koano ai pareta ma hungioli naga, abe una woigo wahigunoa o Yahudi ma nyawaika la ka de adonoka o doma ma wange gea de ona ka idadi yomaduhunu la ufa yohonenge. Ho o Yahudi ma nyawa ngaro o propinsi mata-mataika ka hiadono o kota mata-mataika ma o koano wahigunoa la yomatoo-toomuino de yomaduhunu nako o nyawa yaparangi onangika. Ho ngaro naga o tentara yaparangi ma ka idadi onangoo o Yahudi ma nyawa yomakuduhunu hiadono onangoo yatoma, de yatetetoro ka hiadono yahibinaaha ma tentara gea ngaro o kiaino ma nyawa. De nako o nyawa utu yamusu o Yahudi ma nyawaika de yaparangi onangika de ka idadi o Yahudi ma nyawa yomaduhunu de yakokitoma manga musu gea ka hiadono ngaro manga ngo-ngofeka de manga ngofa-ngofaka ma ka idadi yakokihohonenge. De yatoma ibooto de ahao ka idadi o Yahudi ma nyawa yomale de yomahitoona manga musu manga kiahonanga.” Hokogea o hurata ma hungi ma dola.

¹³ De o koano ai hurata gea yotulihi de o nyawa manga demo ma dulihi imaketemomomoi masara o hurata ma dola imakadaene mata-mataika. Ho ma oraha abe ahao o koano ai hidingoto ma nyawa ma hura-hurata gea yahidoaka o popareta ma dimo-dimonika de kiani ona yabasa de yahitararono ma titi manga kokawaaha mata-mataika. De angamoi o hurata ma hungioli ma demo enangoo ahao idadi o pareta ma hungi ho o nyawa mata-mata abe yomahikoano o Ahasi-werosika kiani yototoihene de yaniiki o pareta ma hungi gea. Hokogea yodiai la o Yahudi ma nyawa ka idadi yomahidiaiohi yomaduhunu la ka de adonoka o mede Adara abe o mede ngimoi de hinootoka de ma tanggala ngimoi de hangeuku de o Yahudi ma nyawa yomahidiaioka yomaduhunu nako o nyawa yaparangi onangika. Hokogea ma hiaturu abe ihidingoto o nyawa mata-mataika gea.

¹⁴ Ho naa o hurata mata-mata yodiai ibooto de yahidoaka o koano ai hidingoto ma nyawaika de ahao o koano wahuloko onangika la yomataiti yototaka. Ho ona homoi-homoi yokokifarene manga kuda ma poretuku de imaketero hoka o kuda ma roreebe yokokisobo abe duru ipalesa imapopaata manga kuda. De duru ma oraha genangoo o hurata gea yahidoaka o popareta ma nyawaika o Susana ma kota ma honongaka abe o koano ai tau naga genangoka de ona yomulaenge o pareta ma hurata gea yakokibasa o kokawaahaika o Susana ma kotaka.

¹⁵ De ahao o Modekai o koano ai tauoka wohupu de wapake o baju ilape-lape abe imaketero hoka o koano ma baju ma guru-gurutu abe utu o baju ma bihi-bihi de utu ma gare-garehe de ai peaka wapake o sapeo ma amoko abe ona yokokurutiye dika ka idadi yapake de ai sapeo gea ihidalape de o gurasi ho duru ma hohailoa. De naga o Modekai ai poretoka o ngoere duru ma ngina-ngina de ma guru-gurutu de ena gea ma wuu-wuu hoka o koano dika wapake ho enangoo duru ma rorahai. De o Susana ma kota ma nyawa duru yogigoro de manga sosanangi ma hagaaga abe ihititi o pareta ma hurata ma hungi nenanga.

¹⁶ De abe duru yososanangi gea ona o Yahudi ma nyawa hiadono yalufungoka de manga garago de yorame-rame. De ona abe ko o Yahudi ma nyawaua yahitunguu manga horomati o Yahudi ma nyawaika.

¹⁷ De o propinsi mata-mataika ma kota-kota o kiaka dika yabasa o koano ai pareta ma hurata ma hungi nenanga de o sosanangi imakiniiki. Abe ma oraha yabasa o hurata naa de o Yahudi ma nyawa ka de yoihene de duru yogarago. De ona ihirame-rame o pareta ma hungi nenanga de yodiai o ngolo-ngolomo de duru yorame-rame. De naga o nyawa abe ko o Yahudi ma nyawaua masara naa onangoo duru yoigo yodadi o Yahudi ma nyawa hiadono yomahisapuru onangika hiadono yaturuuru manga agama de ka yaniiki dika o Yahudi ma nyawa manga agama. De hokogea yodiai angamoi de o pareta ma hungi naa ona yomulaenge yamodongo o Yahudi ma nyawaika.