Estere 7 - Ma Jou ai Demo-demo o Totobelohoka

O koano de o Hamana ma hinootoka yaniiki o ngo Estere ami ngolo-ngolomo

¹ Ho o koano de o Hamana yomakiniiki yowohama o ngo Estere ami ngolo-ngolomo ma ngiika de naa ma hinooto o koano ngoi fekata mahoko la yolomo munangoka.

² De imaketero hoka kanugono ami ngolo-ngolomo ma goronaka abe adonoka ma oraha ona yahange o angguru ma gohaka yaokere de o koano ma moioli womileha o ngo Esterika, wato, “Sarakia Estere, naa ka idadi ani gogahoko nohihingahu ngohino? De ngaro o kia dika ngona noigo nomagahoko de ngohi tonihidoaka. Ho ani gogahoko o kia? Angamoi ngaro noigo la mata-mata abe ngohi tohikoano kiani taregu hinooto la ma regu moi idadi to ngona de o regu moi to ngohi ma tosanangi tonihidoaka dika.” Hokogea o Ahasi-weroso ai behehongo o ngo Esterika wohigalioli.

³ De o ngo Estere, o koano ngoi fekata mopaluhu, mato, “Ahi koano, nako ngona nohisanangi ngohino hiadono noigo noihene ahi gogahoko de nohihidoaka abe tohibehehongo, ngohi tomagahoko ahi wowango! Nohihigunoa la ka towangohi de to ngohi ahi dutu mata-mataika abe nahikoano, onangoo ufa nahigunoa yahibinaaha masara onangoo nahigunoa la ka idadi yowango. Hokogea o koano tomagahoko.

⁴ De hokogea kiani tomagahoko angamoi ngohi de ahi dutu mata-mata imifukunoka o bobinaahaika. Ho naa ko itedekanokaua de ngohi de ahi gogianongoru abe mimahidutu moi, o hone-honenge ma dorou imidaene ngomi mata-mataika angamoi imikokitoma hiadono imihikokiofioka! Hokonenangua tomagahoko nako manga hidee imifukunu la imihidadi o nyawa manga huhuloko, ngaro ngomi o nau-nauru, de ngaro o ngo-ngofekaoo ma ngohi ko tomidemoua ngomi. Abe nako imifukunu hokogea dika de ngohi tomarii-riidoka dika done tonihikangela ngona o koano masara ko hokogenangua imifukunu abe naa imifukunu o bobinaahaika.” Hokogea o ngo Estere ami gogahoko ma demo.

⁵ De ma koano de ai huha womileha ngoi fekata o ngo Esterika, wato, “Onaguna winifukunu? O kiaka una ma nauru abe ai domoroini ma dorou ka hiadono winihidee wato hokogea wodiai itorou nginika?” Hokogea o koano womileha de ai hininga ma huha.

⁶ De o ngo Estere mihingahu mato, “Una gea abe ai hiningaka womitomaka hiadono wodadioka mia musu naga nenangoka! Una naa o Hamana, o nyawa ma dorou nenanga!” Ka de hokogea o ngo Estere motemo de o Hamana duru wohawanokaholi manga himangoka.

⁷ De o koano ai ngamo duru ifae hiadono ngade-ngade ko womatongohonua ho womaokoino ai angguru ma gohaka wanoaika o inomo ma ngioka de woiki o tau ma ngoranika de wohupu ma hoanika o bunga-bunga ma redioka abe o koano ai tau ma loaka. Masara o Hamana ai hiningaka wihiorikoka abe o koano wingamo de marai ahao wihohowono ho ai koano ko winii-niikua ma oraha wohupu o bunga-bunga ma redika. De naa o Hamana una ka idadi womahingano-nganono ka o ngo Esterika dika ho duru womagahoko munangika, wato, “O koano ngoi fekata, duru ahi wowango to ngona ani giamoka ho tomagahoko nohidemo ngohi o koanoika la ufa tohonenge!” Hokogea ai gari ma demo o Hamana.

O koano wohuloko la o Hamana iwidide hiadono wohonenge

⁸ Naa kanganoinohi ona yahange yolomo yomahiduiye de ma oraha naa o Hamana duru womagaho-gahoko hokogea o ngo Esterika, muna ka momahiduiyeohi o hiaini ma ngioka de una womangumo ami hiaini ma ngiuku gea. Ka de hokogea wodiai de o koano o bunga-bunga ma redi wanoa de wowohamoli o ngolo-ngolomo ma ngiika de wimake o Hamana hokogea womangumo o ngo Esteruku. De o koano duru iwitodokana angamoi ka de wimake hokogea o Hamana womangumo munanguku de wataoko ihowono hiadono wofikiri o ngo Estere womiribuutu ho wopoaka wato, “Abeika una ai dorou naa! Ngaro ngohi o koano naga ahi tau ma goronaka de una wato womihidadidorou ngohi fekata!” Ka de o koano ai demo gea yoihene de ona o koano ai duduhunu abe naga genangoka yomataiti o Hamana ai himanga yatamunu abe hokogea iwihitunguu o Hamana imaketero hoka wohonengoka.

⁹ De o duduhunu iwikabiirioka ai romanga o Habona, una wihingahu o koanoika, wato, “Ahi koano, o Hamana naa to una ai tau ma loaka wohigokoka o hohowono ma didide o panakini ma gurutiye o metere monaoko de hange. Ena gea wodiai angamoi wihidee la o panakini ma didideoka gea wihohonenge o Modekai. De gea una o Modekai abe woniduhunu la ona ma dihira ko initomaua ho hiadono ngona o koano ka nowangohi o wange naa.” Ka de hokogea o Habona wihingahu, de o koano wahuloko ai duduhunika wato, “Nako hokogea o Hamana gea niwiaoka de duru to una ai didide o panakini ma gurutiye gea niapake la genangoka ngini niwidide o Hamana naa!”

¹⁰ Ho o Hamana iwiliko ai tomarino de iwidide genangoka hiadono wohonenge duru ma didideoka abe una ma hirete wohidiai la ka idadi o Modekai wihohonenge genangoka. Masara naa imakawalimi idadi ho hiadono o Modekai ko wohonengua ma ka wowangohi. De gea o Hamana wohonengoka de ahao o koano ai ngamo ipahaka.