Estere 6 - Ma Jou ai Demo-demo o Totobelohoka

Ma koano ai horomati ilamoko o Modekaiika

¹ De o futu gea abe o Hamana wihidiai o Modekai ai hone-honenge ma ngi, duru o futu gea o koano ko wamakeua ai giooko ho wihuloko ai duduhunu womatengoika la waleino o kokoano manga hohininga ma buku de wibasa. Gea ena ma buku abe ka ihikaika nako naga abe duru kiani ma titi ihitulihuku gea yotulihi la ufa yawohanga. Ho o futu gea o koano ko iwikiookua de ai duduhunu waleino ma buku gea de womulaenge wabasa o koanoika hoka wihibehehongo.

² De ma oraha wibasa o koanoika ika-ika wadono ona yahinooto manga ade-ade abe iwigoa-goana o koano ai ngoranoka manga romanga o Bigatana de o Teresi de ona iwingamo o koanoika. De yahinooto gea iwihidee hiadono ngade-ngade o koano iwitoma masara o Modekai woihene manga hidee gea de wakalaki ho hiadono ko idadiuali manga koano iwitoma. De ihitulihuku o koano ai bukuoka gea abe o Ahasi-weroso ka wowangohi duru ma titi o Modekai ai duduhunino gea.

³ Ho ka de woihene ma ade-ade gea de o koano iwihihohininga abe idadi ma oraha gea de woleha unangika abe wabasa, wato, “De sarakia, ngohi ahao totarimakase de o hadia abe tihidoaka o Modekaiika? Eko hokokia todiai la ahi horomati unangika tahimatoko ahi kokawaahaika?” Hokogea o koano woleha ai duduhunika yamuruono naga ai datekoka de ona yopaluhu, ato, “Mia koano, mimahilooa masara ko ma moiuahi ani tarimakase ma hidoaka naga o Modekaiika.”

⁴ Gea woihene de o koano walehali onangika, wato, “Abeika naa inahidetebiniyeoka ho sarakia, naa adonoka o ngorumino de naga ahi popareta ma nyawa yoboaka ahi tau ma goronaino eko ko yaiwahi?” Hokogea o koano woleha de igoungu naga ai popareta ma nyawa womatengo woboaka abe kanganoinohi abe duru ma oraha o koano woihene ma ade-ade gea de o Hamana gea una abe wowohama o koano ai tau ma goronaika de naa una naga o koano ai kamara ma poretoka. Naa o Hamana woboa duru ma titi ai hidee o Modekaiika abe wonganono ka idadi witemo o koanoika la o koano wihigunoa wohiaturu la o Modekai iwiliko ai tomarino de iwidide o hohowono ma didideoka gea abe o Hamana wohigokokau ai tau ma loaka. Una duru wonganono la o Modekai genangoka wohonenge de gea ma titi hiadono una naa woboaka.

⁵ De o koano ai duduhunu abe naga ai datekoka ai kamara ma goronaka, ona iwihiorikoka o Hamana naga ho ka de o koano woleha nako naga ai popareta ma nyawa ai tau ma goronaka de ona yopaluhu, ato, “Naga o Hamana gea wonidamaa ani kadera ma ngi ma poretoka.” Ka de gea woihene de o koano wahuloko, wato, “Ngini o Hamana ka idadi niwingotakino ngaro ahi kamarino naa.” Ho ona yohupu o Hamana iwile.

⁶ Ho gea o Hamana wowohama de ko ma orahuahi wotemo de o koano wohira wileha unangika, wato, “Hamana, naga womatengo abe ngohi duru tisanangi hiadono ahi horomati unangika toigo tahimatoko ahi kokawaahaika. Ho naa ngohi tonileha, sarakia ani hininga abe totokia ngohi o koano todiai la tohitunguu ahi horomati unangika gea?” Ka de o Hamana woihene o koano ai leleha gea de womafikiri, doka ai hiningaka ipuda wato, “Ho abeika ahi utumu ngohi naa! De angamoi womatengo gea abe o koano wato duru wisanangi, marai gea ngohi! Ko yaiwa o nauru utu abe o koano ai horomati unangika imaketero hoka ai horomati ngohino naa!” Hokogea o Hamana womatemo doka ai hiningaka.

⁷ Ho wopaluhu o koanoika wato, “Ahi koano, nako naga womatengo abe ngona duru noigo nodiai la nohitunguu ani horomati duru ilamoko unangika, hokonaa ahi koano nodiai:

⁸ Ihira irahai o koano nahuloko ani duduhunika la yale o koano ma baju ma guru-gurutu abe duru ma rorahai de ena gea kiani o baju abe ngona o koano napakeoka. De ahao yaleoli o koano ai kuda abe o nyawa inimake ngona o koano ma oraha nofarene ai kuda ma poretoka gea. De o koano nahuloko la ani duduhunu utu yale o koano ma dodunguu abe biaha ihipasi ani kuda ma peauku la duru o nyawa ihioriki gea duru to ngona ani kuda.

⁹ Hokogea ani duduhunu yomahidiaiokahi de ahao ona iwile o koano ai poparetaino ma haeke womatengo abe una duru wokurutiye la una ahao wotagongo o horomati ma himatoko ma hiaturu. Ho duru to una ai giamika o koano ai duduhunu iwihidoaka o koano ai baju ma guru-gurutu gea de o koano ai kudaoo waso la una ma hirete o koano ma baju ma rorahai gea wihinoauku womatengoika gea abe ngona o koano duru noigo la ani horomati unangika nohimatoko. Hokogea una iwihitunguu de o koano ani baju ibooto de ahao una abe nihoromati gea wihibarene to ngona ani kuda ma poretoka de ahao una wokurutiye o poparetaino kiani waso o kuda ma talika de watauru o kota ma ngeko-ngekomika la wihidagi-dagi. Hokogea wihihira-hira de ka ihikaika wohigali-gali waamo-amokiye wahingahu ona mata-mataika abe yowuni-wuningi, wato, ‘Abeika o nauru nenanga angamoi hokonaa nanga koano woigo wohitunguu ai horomati onangika abe duru iwihisanangi!’ Hokogea o koano irahai ngona nodiai la nahimatoko ani kokawaahaika ani horomati unangika abe duru noigo nigorakiye.”

¹⁰ Ka de o koano woihene o Hamana ai demo gea de wato, “Irahai ani demo, Hamana! Irahai ngona ma hirete nodiai mata-mata gea! Nomataiti nale ahi baju ma guru-gurutu gea de ahi kudaoo ngona naleino. Gea nohidiai ibooto de ahao nile o Modekai, o Yahudi ma nyawa gea abe naga ahi tau ma ngoranoka de nodiai o Modekaiika gea mata-mata abe naa ngona noade-adeoka ngohino. De ko moiua nakuranga abe nohihingahu nato kiani ngone hodiai unangika la ahi horomati o Modekaiika duru itararono o nyawa mata-mataika!” Hokogea o koano wihibehehongo o Hamanika.

¹¹ Ho o Hamana kiani wale o koano ai baju ma guru-gurutu abe duru ma rorahai gea de wihinoa o Modekaiuku de ahao wihibarene o koano ai kuda ma poretoka de wihidagi-dagi o ngeko-ngekomika o kota ma goronaka. De manga dodagi ma goronaka o Hamana kiani waamo-amokiye wopoa-poaka, wato, “Abeika o nauru nenanga angamoi hokonaa nanga koano woigo wohitunguu ai horomati onangika abe duru iwihisanangi!” Hokogea kiani o Hamana wodiai la wihingounu ai koanoika.

¹² Gea yotagi-tagi ibooto de ahao o Modekai wolio o koano ai tau ma ngoranika masara o Hamana ai peauku womahidatamunoka de o ngoere angamoi ai hininga ma huha duru ilamoko de iwimalekeholi ho womataiti wolio dika ai tauika.

¹³ De ahao abe idadi unangika o Hamana womahingahu ngoi fekata o ngo Seresika de ai dodiawo mata-mataika abe naga ai tau ma goronaka. Ka de mata-mata gea woade-ade ibooto de ona abe manga biaha iwiduhunu o tobahioriki, ona de o Hamana ngoi fekata yotemo unangika ato, “Hiokoo ngona! Ka de o Modekai nanga koano wigorakiye de imulaenge ngona inihitipokouku. De abeika, una o Yahudi ma nyawa ho done sarakia ani hidee unangika ilaku ma oraha naa? Una ko iwiotakokaua ani himangoka masara imakawalimi idadi hiadono ngona ahao nokala nako nilawanohi unangika.” Hokogea manga demo o Hamanika.

¹⁴ De ma oraha ka yomakoketemohi ma titi abe naa idadioka de naga o koano ai duduhunu yakabiirioka gea yoboa iwiahoko ato, “Mia baluhu o Hamana, ngomi miboa miningotaka o ngolo-ngolomika abe o koano ngoi fekata, o ngo Estere minihidiaioka.” Hokogea iwiahoko ho kiani ona gea o Hamana waniiki o ngo Estere ami ngiika.