Estere 5 - Ma Jou ai Demo-demo o Totobelohoka

O Yahudi ma nyawa yopuaha la duru imihininga de iminiata o ngo Estere de ahao muna moiki mitutumu o koano

¹ O wange hange ko yolomua de ko yokerua gea ipaha abe o ngo Estere de o Yahudi ma nyawa o Susana ma kotaka yaniiki ami behehongo itiai de ahao o ngo Estere momahidiai mitutumu o koano ho momahinoauku ami pakeanga abe o koano ngoi fekata dika ka idadi mapake de moiki o koano ai tau ma goronaika la mitutumu. De ma oraha gea ami rokata o Ahasi-weroso wogogeruku ai kaderaka. Ho o ngo Estere moiki ai tau ma goronaika de mogila-gila hiadono mowohamika ai ngoranika abe genangoka una wogogeruku ai kaderaka.

² De o koano womalega ai ngoranika de genangoka o ngo Estere momaokoino abe ai kadera ma ngi duru ma rahai mawohama de ka wosanangi dika womimake genangoka ho ai tutukunu o gurasino gea wohidoakiye de womihitumutu munangika. Ka de wohitunguu ai hininga ma sanangi de muna mogila-gila mowohama o koanoika de maso ai tutukunu ma barenika.

³ De ahao o koano womileha munangika wato, “O kia ma titi ho hiadono ngona ngohi fekata noboa nohitutumu? Estere, marai naga ani perelu hiadono noboa ngohino la o duduhunu nomagahoko e? De ka idadi ngona nomagahoko o kia dika noigo de abeika nako ko tonihidoakua. Angamoi ngaro noigo la ahi tonaka de ahi kiahonanga mata-mata abe ngohi tohikoano kiani taregu hinooto la o regu moi idadi to ngona, de o regu moi to ngohi, ma, ngohi ka tosanangi dika tonihidoaka.” Hokogea o Ahasi-weroso womihibehehongo o ngo Esterika.

⁴ De o ngo Estere mopaluhu mato, “Nako ngona ahi koano nosanangi ahi demoika naa, ngohi togahoko la duru o wange naa noboa naniiki o ngolo-ngolomo abe ngohi tonihidiaioka. De toigo la o Hamanoo woboa woniniiki.” Hokogea o ngo Estere ami gogahoko o koanoika.

⁵ De o ngo Estere ami gogahoko gea ka de woihene de o koano wahuloko onangika abe naga ai datekoka wato, “Ngini niwibehehongo o Hamana la womataiti woboa la ka idadi ngomi mianiiki o ngo Estere ami behehongo ngomino.” Hokogea wahuloko onangika ho o Hamana iwile de ahao winiiki o koano de yoiki o koano ngoi fekata ami ngolo-ngolomika.

⁶ De ona yahange yolomo de ma oraha o angguru ma gohaka yaokere de o koano ma moioli womileha o ngo Esterika, wato, “Sarakia Estere, naa toboaka ani ngiino ho marai ka idadi ani gogahoko nohihingahu ngohino e? De ngaro o kia dika ngona noigo nomagahoko de ngohi tonihidoaka. Ho ani gogahoko o kia? Angamoi ngaro noigo la ahi tonaka de ahi kiahonanga mata-mata abe ngohi tohikoano kiani taregu hinooto la o regu moi to ngona de o regu moi to ngohi, ma, ngohi ka tosanangi dika tonihidoaka.” Hokogea o Ahasi-weroso ai behehongo wohigalioli o ngo Esterika.

⁷ De o ngo Estere mopaluhu mato, “Igoungu, naga ahi gogahoko ma ko ma orahuahi naa ho hokonaa la ka idadi tonihingahu o koanoika,

⁸ ngohi tato nako ngona ahi koano nohisanangi ngohino hiadono noigo noihene ahi gogahoko de nohihidoaka abe tohibehehongo, gea irahai itebini ngona de o Hamana niboali. Ngohi ahao tinihidiai o ngolo-ngolomo moioli ho naa tiniahokoli la itebini niboali de ma oraha gea ka idadi ahi gogahoko ahao tonihingahu ngona ahi koanoika.” Hokogea o ngo Estere de ami horomati ilamoko mihingahu ami rokatika.

O Hamana duru womagoraka de womahidiai la o Modekai wihohonenge

⁹ O ngo Estere ami ngolo-ngolomino yohupuoka de o Hamana duru wogarago de ai hininga iuwinoka masara ka de woboa o koano ai tau ma ngoranino de wimake o Modekai de ka itodokanino ai garago ihihanga. De gea angamoi o Modekai waniiki hoka ai biaha abe duru ko wohitunguua ai horomati o Hamanika de ko wimodongua. Abe ngaro o Hamana duru widamaanika masara o Modekai ko wofafarua ho o Hamana duru itaiti ai ngamo ipuda.

¹⁰ Masara ngaro duru widohata o Modekaiika ma womatongohono de wogila-gila dika wolio ai tauika. De ka de o Hamana womahiadono ai tauoka de wahidingoto ai huhuloko la womataiti wahoko ai dodiawo la ona yokokiboa ai tauino. De o Hamana womihingahu ngoi fekatika o ngo Seresika, wato, “Seresi, bootino naga ahi dodiawo yamuruono naga yoboa la ka idadi ona de ngonaoo nikokiihene ahi ade-ade abe hokokia ilamoko o koano ai horomati ngohino.” Hokogea o Hamana wahiaturu.

¹¹ Ho ka de yomatoomuino de o Hamana womulaenge woade-ade womagorakiye. Wadefetongo onangika ai kiahonanga de ai tiwi ilamoko hiadono duru wokaya. De abeika to una ai ngofaka o nau-nauru duru yowoe de o koano ka ihikaika wigorakiye. De o Hamana womahingahuoli abe ka ihikaika ai kuaha idogo hiadono nako una de o koano ai popareta utu, ma, ka o Hamanohi abe duru wigorakiye.

¹² Hokogea duru o Hamana womagorakiye de ahao wato, “De ngaro hokogea o koano ai horomati ngohino masara naga o horomati ka utuohi irahai abe tamakeoka o wange naa! Abeika naa idadi kangano! O koano ngoi fekata o ngo Estere modiai o ngolo-ngolomo duru irahai o wange naa de miahoko o koano de ai dodiawo ka womatengo dika, de gea ngohi! De itebini modiaioli o ngolo-ngolomo ma rahai de ngohioli mohiahoko! Ho itebini o koano tiniikoli ami ngolo-ngolomika!” Hokogea o Hamana womahiade-ade womahigiriiri.

¹³ De ahao womahingahuoo abe ai hininga ma kangela, wato, “Masara ngaro hokogea ihigorakiye ma, ahi garago ko ilakua angamoi ka de timake o Yahudi ma nyawa o Modekai gea naga o koano ai tau ma ngoranoka de to ngohi ahi utumu ko tamaokaua.” Ho naa o Hamana wahingahuoka abe ai kangelaoo naga.

¹⁴ De ngoi fekata o ngo Seresi de ai dodiawo, ona iwihingahu unangika, ato, “Hamana, ngaro ufa nihigunoa o Modekai wonihikangela hokogea. Abeika o koano ai hininga ngonaika, ngona nohiaturu dika la o Modekai wohonenge. Ngona nahuloko o nyawaika la ihigoko o panakini la idadi o hohowono ma didide de ahao o Modekai iwiliko ai tomarino de iwidide genangoka ka hiadono wohonenge. De kiani o panakini ikurutiye ho nahuloko yodiai o hohowono ma didide gea o metere monaoko de hange ma gurutiye! De ahao itebini o ngorumino noiki o koanoika de nomagahoko la una wahuloko ai nyawaika la o Modekai iwile de iwidide o hohowono ma didideoka gea. Hokogea ngona nodiai la wodohonenge genangoka de abe ma titi inihikangela ko iwaka. Abe ka de nohiaturu hokogea de ahao ka idadi o koano niniiki o ngo Estere ami ngolo-ngolomika de ngona duru nososanangi dika.” Hokogea ngoi fekata de ai dodiawo iwihigaro o Hamanika. De o Hamana duru wosanangi de manga higaro ma demo gea ho wohiaturu la duru ma oraha gea dika de o hohowono ma didide gea yodiai.