Estere 4 - Ma Jou ai Demo-demo o Totobelohoka

O Modekai de o Yahudi ma nyawa duru yohuhaholi

¹ O Modekai duru wohuha ma oraha wobasa o koano ai hurata gea abe kiani o Yahudi ma nyawa ahao yahikokihibinaaha. De woihenoo ma ade-ade abe mata-mata o Hamana wodiai la hiadono naga o koano ai putuhu hokogea. De ka de wohioriki mata-mata gea de o Modekai ai hininga ma huha hiadono ai pakeanga wakakihoka de womaturuuru de o pakeanga ma kokekekere abe o karongino yodiai womahinoauku de wale o uku ma kafo de wodopurarahuku ai peauku la de ena gea wohitunguu ai hininga duru ma huha. De waika waino o Susana ma kota ma ngeko-ngekomika ko womatogu-togumua woari-ari de ai gari kohaamokiye.

² De gea woboa o koano ai tau ma ngoranino de ko idadiua wowohama ho una womaokoino o ngorana ma himangoka dika angamoi ko moiua yowohama nako yapake o pakeanga ma kokekekere dika abe ihitunguu manga huha.

³ De o abari ma titi o koano ai hurata yahingahu-ngahu manga tonaka ma propinsi mata-mataika ho ka ihikaika yodogo manga ngoe o Yahudi ma nyawa ihioriki o kokangela abe ahao yadaene onangika. De ona yoari-ari de yopoaka de manga hininga ma huha hiadono yoluku yolomo de ona utu ko manga ngoe yomahinoauku o pakeanga ma kokekekere abe o karongino yodiai de yogogeruku de yomaidu o uku ma kafoka la yomahitunguu manga hininga duru ma huha.

⁴ De o koano ngoi fekata o ngo Estere ko mohiorikuahi de ahao naga ami duduhunu o ngo-ngofeka de o nauru abe yakabiirioka yoboa imiade-ade munangika gea abe ami baba o dofo o Modekai wodiai hiadono ai pakeanga ma kokekekere dika de duru woari-ari. Ka de gea moihene de o ngo Esteroo duru ami hininga ihuha de mato milaru ho mohidingoto o pakeanga o Modekaiika la ka idadi womaturuuru masara ka de ami duduhunu yoboa de woluku ami hidoaka o pakeanga gea.

⁵ Masara o ngo Estere ko mohiorikuahi ma titi o kia naga hiadono una wohuha ho mato kiani molingiri ai huha ma titi. De naga womatengo ami duduhunu o nau-naurino yakabiirioka abe o koano wahuloko la imileleani ai romanga o Hata abe duru iwihikarajaanga la o ngo Estere womileleani ami datekoka de una gea miahokino de mihibehehongo unangika, mato, “Hata, ngona noiki o Modekaiika de nileha o kia idadi hidutu naga iwihikangela ka hiadono to una ai hininga duru ma huha.” Hokogea o ngo Estere mihibehehongo.

⁶ Ho o Hata wohupu ma loaika abe naga o koano ai tau ma ngorana ma himangoka de genangoka wimake o Modekai de womulaenge wileha unangika hoka o ngo Estere moigo.

O Modekai wogahoko o ngo Esterika la ami gogianongoru maademo o koanoika

⁷ De o Modekai wiade-ade o Hataika mata-mata gea abe o Hamana wodiai ka hiadono ai hidoaka o tiwi o koanoika iti o Yahudi ma nyawa yahikokibinaaha. Abe o Hamana wihibehehongo o koanoika wato, “Ngohi o Hamana ahao o haaka o kilo o sana o ratuhu hange de moritumidi de motoa tahidoaka ani popareta ma nyawa manga giamika la ihingohamika o koano ai tiwi ma gogogono ma ngioka.”

⁸ Gea mata-mata o Modekai wihingahu o Hataika de ahao wihidoaka o hurata moi abe yodiai imakadaene ma dulihi de o koano ai behehongo ma hurata o Susana ma kota ma nyawaika abe yahingahu onangika abe nako ka de o doma ma wange adonoka de o Yahudi ma nyawa mata-mata kiani yakokitoma. Ma hurata gea wihidoaka o Hataika de wato, “Kiani o hurata nenanga nomihitararono o ngo Esterika ma titi de ahao nomihigaro la moiki o koanoika de duru mogahoko unangika la ai dora ma hiokoo itagi ai kokawaahaika abe to muna ami gogianongoruika.” Hokogea o Modekai wihuloko o Hataika.

⁹ Ho o Hata wolio o ngo Esterika de wadofanga o Modekai ai demo mata-mata o ngo Esterika.

¹⁰ De o ngo Estere mihulokoli o Hataika la woikoli widotaka ami babaluhu o Modekaiika, mato,

¹¹ “Ama, ngohi titutumu o koano tokangela angamoi hokonaa, ngona de o koano ai duduhunu de ai kokawaaha o propinsi mata-mataika nihioriki ngaro onagona dika ato iwitutumu o koano kiani o hiaturu ma pareta moi yaniiki done yohonenge. Abe naga o hiaturu ma pareta abe kiani o nyawa mata-mata, ngaro o nau-nauru, ngaro o ngo-ngofeka abe kiani yaniiki ma pareta gea nako iwitutumu o koano done yohonenge. Angamoi ma pareta gea itemo ngaro onagona dika yowohama o koano ai ngiika abe genangoka wogogeruku ai kaderaka kiani ona wahibehehongohi de ahao ka idadi yowohama yomakoketemo de una. Ho ngaro onagona dika yowohama o koano iwitutumu, abe ona ko wahibehehonguahi, ona hokogea yahowonoka ho kiani yohonenge. Masara nagahi ma ngekomo abe nako yahowono hokogea de o koano wato ngaro yahowonoka ma ka wadafongo gea wohidoakiye ai tutukunu o gurasino de wahitumutu onangika la gea wohitunguu abe wahigunoa yotemo de ko yohonengua. Masara done o koano ko wohisanangiua ngohino nako toboa unangino hokogea angamoi naa o mede moi ifoloi ma dekana abe ko mimakamakeuahi de una. Hokogea ma dekana ko wohibehehonguahi la toboa unangino ho done ai tutukunu o gurasino ko wagorakua de ko wohidoakiyeua ngohino?” Hokogea o ngo Estere ami babaluhu o Modekaiika.

¹² Ho o Hata woikoli de wadofanga ami demo o Modekaiika.

¹³ De o Modekai wato, “Hata, hokonaa ahi hitiari ngoni baluhu o koano ngoi fekatika, ‘Ahi baluhu, ngaro ngona o koano ngoi fekata de nogogere ai tau ma goronaka masara naga o nyawa abe inihioriki abe ngonaoo o Yahudi ma nyawa. Ho ufa ngona nafikiri ko nohonengua ma oraha adonoka o Yahudi ma nyawa yakokitoma angamoi enangoo o pareta abe ko iwa o rerehene ma ngekomo.

¹⁴ Nako ngona nomarii-riidoka dika de ko nonademoua ngone o Yahudi ma nyawa ahao naga o duduhunu ma ngekomo utu abe inahidailako la ko inahikokibinaahaua masara ngona de ani dutu ona yohonenge. De done ngona naa ma ngekomo abe inahidailakoka de gea ma titi hiadono nodadioka o koano ngoi fekata la ka idadi nonakokiduhunu, ngone o Yahudi ma nyawa eko sarakia?’” Hokogea o Modekai ai hitiari ma demo o ngo Esterika abe o Hata womidotaka.

¹⁵ Ho wototakokali munangika de ahao o ngo Estere ami babaluholi ma demo abe o Hata wadofanga o Modekaiika hokonaa:

¹⁶ Muna mato, “Ama, kiani ngini nihiniata ho o Yahudi ma nyawa mata-mata abe yogogere o Susana ma kotaka naa natoo-toomuino la ngini mata-mata ko niolomua de ko niokerua o wange hange ma dekana ngaro o futu, ngaro o wange, ngini nihikokihininga ngohi. De ngohi de ahi duduhunu o ngo-ngofeka mata-mata ngomioo hokogea o wange hange ma dekanino ngaro o futu, de ngaro o wange ma ngomioo ko miolomua de ko miokerua. De o wange hange gea ipaha de ahao ngohi toiki o koano ai ngi duru womadingakoka de towohama titutumu ma oraha wogogeruku ai kaderaka. De nako idadi ngohi tohonenge tomahidiaioka tohonenge!” Hokogea ami demo ami amaika.

¹⁷ Ho o Modekai woiki de wodiai duru imaketero hoka o ngo Estere mihibehehongoka unangika.