Estere 3 - Ma Jou ai Demo-demo o Totobelohoka

O Hamana o koano wihikuaha la ka unangohi wokurutiye ai popareta ma dimo-dimonoka

¹ Gea o Modekai widuhunu ma koano la ufa wohonenge de ahao o taongo muruono ipaha de o koano wigorakiye womatengo ai popareta ma nyawaino ai romanga o Hamana. De o Hamana gea to una ai baba o Hamedata de manga tofora ma dihira o Agaga. Ho naa o Ahasi-weroso wihikuaha o Hamanika hiadono nako una de o popareta ma nyawa utu ka o Hamanohi wokurutiye masara ngaro hokogea o koanohi wokurutiye.

² Ho o koano ai popareta ma nyawa mata-mata ka de yomakamake de o Hamana eko ngaro watilakuru dika ma kiani ona yomaponuku de yatilabukuku la ihitunguu manga horomati o Hamanika angamoi hokogea o koano wahibehehongo kiani yodiai. Masara o Modekai una woluku wohitunguu o horomati o Hamanika ho ko watilabukukua ma oraha o Hamana naga.

³ De o Modekai ka ihikaika naga o koano ai tau ma ngoranoka de nagali o koano ai popareta ma nyawa abe onangoo naga o wange-wangeiye o koano ai tau ma ngoranoka, de ona iwileha o Modekaiika ato, “Dodiawo, adodoa ho ngona ko nohingounua o koano ai behehongo abe kiani ngone homahuba o Hamanika?”

⁴ De hokogea ona iwileha o Modekaiika o wange-wangeiye de una wapaluhu de ai hingahu, wato, “Angamoi ngohi o Yahudi ma nyawa ho ko idadiua tomahuba hokogea o nyawaika.” Hokogea woluku waniiki manga higaro ma demo ho ona yomakoketemo ato, “Abeika ngone hihingahu o Hamanika abe o Modekai gea woluku wihoromati. De abeika nako o Hamana ka wihigunoahi hokogea wodiai.” Ho ona ahao o Modekai iwikalaki o Hamanika.

⁵ De ahao o Hamana ma oraha woboaino eko o ngorana gea watilakuru de duru wilega-lega o Modekaiika de igoungu, o Modekai ko watilabukukua de moioo de duru ko iwa ai horomati ma dodunguu unangika ho o Hamana duru wongamo de ai dohata ifae hiadono wato o Modekai wihohonenge.

⁶ Masara angamoi iwihingahuokau abe o Modekai o Yahudi ma nyawa ho o Hamana wato ufa womahibalaha o Modekaiika dika ma kiani womahibalaha o Yahudi ma nyawaikaoo! Ho o Hamana ai hidee wato wolingiri ma ngekomo la ka idadi o Yahudi ma nyawa wahibinaaha ka hiadono ona mata-mataika abe o Ahasi-weroso wahikoano kiani wahibinaahaka.

⁷ De naa ngade-ngade ai taongo ngimoi de hinooto ma dekana abe o Ahasi-weroso wahikoano ai kokawaaha de ahao adonoka ma oraha o Hamana womadiai ma ngekomo la ka idadi wahibinaaha o Yahudi ma nyawa. De ihira o Hamana wolingiri ma tanggala abe o hibinaaha ma hidee gea ka idadi de ma hasiloka. Ho o taongo ma mede ihira abe ihiromanga o mede Nisana de o Hamana wohiaturu la duru ai himangoka ona yotobamai-maihi ihitai-taili o tanggal-tanggaliye ka hiadono yamake abe gea ena ma wange abe ato ka idadi youtumu o Yahudi ma nyawa yahibinaaha. De o wange gea yogelenga ma tanggala ngimoi de hange o mede ngimoi de hinootoka abe ma romanga o mede Adara.

⁸ Ho gea o Hamana wamake ma tanggala abe o mamaihi ma dodunguu adaene de ahao woiki o Koanoika de wihingahu, wato, “Ahi koano, ngohi tohioriki ngona duru noigo la ani nyawa mata-mataika inihingounu la duru noutumu. Masara naga o homoaino ma nyawa nanga tonaka ma propinsi mata-mataika yomahikabarihoka ho hiadono ona naga nanga kokawaaha manga hidogoronaka. De o homoaino ma nyawa gea to ona manga pareta imakokohowono de o nyawa utu manga pareta. Ho ngaro to ngona ani pareta de ani behehongo itiai masara ona yoluku ihingounu ani paretaika gea, abe ona ato yaniiki dika to ona manga pareta. Ho nako naga ani kokawaaha abe ona yoluku ani pareta ihingounu, ngaro ufa nahigunoahi ona gea yowango angamoi ko iwa ani utumu onangino.

⁹ Ho nako nosanangi ahi demo ma owaika naa, koaho nohitulihuku ani putuhu ma hurata abe ma dumutu ani kokawaaha mata-mataika abe ngona naputuhoka o homoaino ma nyawa gea ahao kiani yahibinaahaka. De ahi koano, nako nodiai hokogea de ahao ngohi o Hamana ahi hidoaka naga o koanoika. Abe ngohi ahao o haaka o kilo o sana o ratuhu hange de moritumidi de motoa tahidoaka ani popareta ma nyawa manga giamika abe to ona manga tagongo yaso o popareta manga hiaturu ma tiwi. Ho o haaka gea ahao ihingohamika o koano ai tiwi ma gogogono ma ngioka.” Hokogea o Hamana wihigaro ma koanoika.

¹⁰ Ka de o Hamana hokogea wotemo ibooto de ahao o koano ai ali-ali, abe ena to una ai kuaha ma dodunguu, wihuputu ma ali-ali gea de wihidoaka o Hamanika la ka idadi ma ali-ali gea wapake wohitunguu o pareta ma huratoka la ihitaana abe ma hurata gea igoungu to ma koano ai hurata. De naa abeika una o Hamana duru womahitaana abe una o Yahudi ma nyawa manga musu de una gea o Hamedata ai ngofaka de o Agaga ai toforauku, abe ma dihiraino o Agaga gea wodadi ai nyawa manga koano.

¹¹ De o koano wihingahu o Hamanika wato, “De ani hidoaka o tiwi ilamoko gea ngaro ufa e dika. De nako o homoaino ma nyawa gea abe nahiade-ade ngohino onangoo tahidoaka ani giamika. Ho o kia ngona nofikiri irahai idadi onangika enangoo ma hiaturu to ngona o Hamana ani putuhu.” Hokogea o koano wihikuaha o Hamanika.

^12-14 Ho o mede moioka de ma tanggala ngimoi de hangeoka o Hamana wahoko o koano ai duduhunu yotobatulihi ai hura-hurata de wahingahu onangika o hurata ma titi abe o Yahudi ma nyawa kiani yokokihonenge ngaro manga tonaka ma amokika. De o Hamana wato o koano ai behehongo ma hurata kiani ona ihitulihuku de o demo imaketemomoi abe o nyawa yapake o Media de o Peresia ma tonakoka ho ngaro o demo ma dulihi imakokohowono ma kiani ihitulihuku de manga demo homoi-homoiika. De ma hurata gea ahao idadi o pareta ma hungi o koano ai kokawaaha mata-mataika ho yahidingoto o popareta ma nyawaika naa onangika: Ona yokokurutiye abe manga kuaha o kokawaaha mata-mataika, O propinsi ma gubernuuru yaratuhu moi de yamonaoko de yatumidika, O dimo-dimono hoka o kimalaa abe yahipareta o nyawa ma doomu homoi-homoiika abe yomahitoomu manga tofora manga romangika. Ho o popareta ma dimo-dimono mata-mataika gea ona abe kiani yakokimake o hurata homoi-homoiika. De manga hurata abe ahao yamake ihitulihika de to ona manga nyawa manga demo. De ngaro ma dulihi imaketemomoi masara o hurata ma titi duru ka moi dika. De hokonaa ma titi abe kiani yotulihi o huratoka: “Nia koano o Ahasi-weroso winihibehehongo ngini ai kokawaahaika hokonaa: O Yahudi ma nyawa mata-mata to ngone nanga tonakoka kiani yokokihonenge. O Yahudi ma nyawa niahikokiofi nanga tonakino ka ma moi o wange moi dika. O doma ma wange gea o mede o Adara abe o mede ngimoi de hinooto ma tanggala ngimoi de hangeuku. Ngaro o nauru eko o ngofeka de ngaro ma gilau hiadono ona yaperekioka ma, kiani ka ma moi niahikokihibinaahaka. De ngini abe niatoma o Yahudi ma nyawa ka idadi niale de nimahitingini manga kiahonanga.” Hokogea ma titi abe kiani naga o Hamana ai hurata ma goronaka gea. Ho o koano ai duduhunu yotobatulihi ai hura-hurata, ona yaniiki o Hamana ai hingahu gea de yapake ma koano o Ahasi-weroso ai romanga de ahao o hurata amomoi ihidatataulu de ihitunguu de o koano ai ali-ali abe o koano ai kuaha ma dodunguu. De o koano ai hidingoto ma nyawa yomahidiai yomataiti yototaka o pareta ma hurata mata-mataika gea. De ngaro ngade-ngade o taongo moiohi ma dekana de ahao adono o doma ma wange masara ona abe ko o Yahudi ma nyawaua kiani yomahidiaiohi la yatoma o Yahudi ma nyawa abe naga to ona manga tonakoka. De manga tonaka ma propinsi utu duru kohagurutika ho o hidingoto ma nyawa manga dodagi kohadekanino.

¹⁵ De adonoka ma wange abe kiani yoiki yototaka o koano ai hurata gea, de ma koano o Ahasi-weroso ai hidingoto ma nyawa wahitataiti, wato, “Nisobo!” Ho yoikoka de duru o wange genangoo ai behehongo ma hurata gea yabasa o nyawa mata-mataika abe naga o Susana ma kota ma honongaka abe yakurunga de ma dadaduhu ma gurutiye de o koano ai tauoo naga genangoka. Mata-mata gea yodiai ibooto de ahao o Hamana de ma koano yogogeruku o ngolo-ngolomoka de yokere o angguru ma gohaka. Masara manga kokawaaha o Susana ma kotaka ka de yoihenoka o pareta ma hurata gea de duru yopusingi manga kokihiningaka angamoi ko yomangaratiiua hoka manga hiningaka ato, “Adodoa ho hokonaa idadi?”