Estere 2 - Ma Jou ai Demo-demo o Totobelohoka

O koano ngoi fekata ma hungioli womalingiri

¹ De ma dekanoka ipahaika hiadono ma koano ai ngamo ko itagiokaua de duru womihininga o ngo Wasiti de wohuha abe gea una ma hirete womihohowono ma titi muna modiai ko itiaiua abe ma oraha ai ngolo-ngolomoka ma amoko gea.

² De ona ai duduhunu ai datekoka iwimake manga koano abe duru womihininga o ngo Wasiti de iwihigaro unangika ato, “Mia koano, irahai ngona nomilingiri momatengoli abe ka idadi muna modadi ngoni fekata. De hokonaa ma ngekomo, ngona nahikarajaanga ani popareta ma nyawa ani tonaka ma amokika la yalingiri o momoholehe abe duru yorahai de ko ma moiuahi yomakitigi de o nauru. De ona gea ahao yatoomu nenangoka de ahao ngona nomangiriki onangino la abe muna momatengo nomihidadi ngoni fekata.

³ Ho ngona kiani nairiki o popareta ma nyawaino ona o propinsi homoi-homoiika abe ona ka idadi yalingiri o momoholehe hokogea o tonaka mata-mataika. De o momoholehe duru yorahai abe ahao yairiki kiani yahidingoto nenangino ani tauino o Susana ma kotaka nenanga la ka yodadi o doomu moi. De nenangoka o Hegai, ani duduhunu iwikabiirioka abe nengokadauino ai karajaanga nagau wagoana ngoni feka-fekata ma doomu, una gea ka idadi wahiaturu o momoholehe ma doomu ma hungioli. O Hegai wohioriki waduhunu o momoholehe gea la utuohi yorahai de wahidoaka onangika o minya o fara amomoiino la ihiehe manga kaiika de ena gea.

⁴ De ahao mia koano, ngona ma hirete nomiiriki momatengo onangino la nomihidadi ngoni fekata ma gou-goungu. Ho ngona nomilingiri la abe duru monihisanangi ngonaika la gea muna modadi o ngo Wasiti ami duruuru.” Hokogea manga higaro ma demo o Ahasi-werosika. De o koano wosanangi manga demoika ho wahuloko ai duduhunika la yaniiki o higaro ma demo gea hiadono idadi imaketero abe hoka ona ai datekoka yotemoka.

O ngo Estere ami dutu abe yolape-lapeuku hiadono o ngo Esteruku

⁵ De ma oraha gea naga o Isiraele ma nyawa womatengo ai romanga o Modekai wogogere o Susana ma kota ma honongaka abe o koano ai tau naga genangoka. O Modekai gea ai baba o Jairi, de ai ete o Simei, de ai kuwewete o Kisi de manga tofora o Isiraele ai ngofaka o Benyamini ho ona yomahiromanga o Benyamini ma nyawa.

⁶ Ma dihira o Modekai ai kuwewete o Kisi gea wogogere o Yerusaleeme ma kotaka masara o Babele manga koano o Nebukanesara de ai tentara yaparangi hiadono ona o Isiraele ma tonaka ma hononga, abe ma romanga o Yehuda, yahikala. Ho o Nebukanesara de ai tentara yataoko o Yehuda ma nyawa manga koano o Yekonia de ai nyawa ko manga ngoe abe yogogere o Yerusaleemoka. De o Babele ma nyawa yahidadi manga huhuloko ho o Modekai ai kuwewete o Kisi naga o Isiraele ma nyawa manga doomuoka ma oraha yakokiao o Babele ma kotaika.

⁷ De o Modekai naga ai dofo o ngofeka ami romanga o ngo Hadaasa abe ami romanga hinooto ho ami romangoli o ngo Estere. Muna gea ami baba o Modekai ai ama ho muna imiahoko o Modekai ngoi firanga. Masara ami baba de ngomi meme yokokihonengoka ho una womipaliara imaketero hoka muna ngoi ora idodutu. De o ngo Estere gea o moholehe abe o nyawa mata-mata imihigiriiri ma titi ami hailoa de ami badanga ma rupa angamoi muna duru morahai.

⁸ De ma oraha ma koano gea wahuloko ai duduhunika la yalingiri o momoholehe ai kokawaahaino mata-mataika ona iwihigihene ho yahingahu-ngahu ai pareta o kokawaahaika de yaniiki ai hiaturu hiadono yaoino o moholehe manga ngoe o Susana ma kotaino de yatoomuino o koano ai tauoka. Genangoka o Hegai wagoana de wahiaturu ona mata-mataika angamoi hokogea o koano wihitagongo. De o ngo Estere munangoo imiao o Hegaiika ho muna naga o momoholehe manga doomuoka gea.

⁹ De o Hegai duru womisanangi o ngo Esterika hiadono nako muna de o ngofeka utu ka munangohi womilegaika de ai dora. Abe una womihiolomo de o inomo duru irahai de womihidoaka o minya abe ka idadi momahiehe ami kaiika de o duduhunu utuoli hoka o semengke de o pupuru womihidoaka la ami rahai duru idogo. De ahao o Hegai womihidoaka o ngo Esterika o duduhunu o ngofeka yatumidi la ona ka ihikaika imileleani. De o Hegai wairiki o ngo Estere ami ngi abe ka enangohi irahai o momoholehe manga doomuoka de ahao o ngo Estere de ami duduhunu yatumidi wahigogere o ngi ma rorahaioka gea.

¹⁰ Naa o ngo Estere ko momahingahua onangika abe naga o koano ai tauoka abe ma titi ami dutu. Muna ko moigoua la ona yahioriki onagona honanga yadaene ami dutu done imihioriki abe muna o Yahudi ma nyawa angamoi o Modekai ami baba o dofo duru womihitiari la ufa momahingahu ma titi hokogea.

¹¹ De o Modekai duru o ngo Estere womihininga ho o wange-wangeiye woboa womitailako o koano ai tau ma hononga ma datekika abe doka naga ma goronaka o koano ngoi feka-fekata yogogere de o momoholehe manga ngioo naga genangoka. De waika waino o bunga-bunga ma redioka abe imakadateke de manga ngi gea angamoi duru woigo woihene abe hokokia imipaliara ngoi ora o ngo Esterika de o kia idadi abe munangika.

¹² De hokonaa o hiaturu ma pareta abe kiani yaniiki de o moholehe ma hungi homoi-homoiika la yapaliara hiadono momatengo onangino yodadi o koano ngoi fekata. Kiani o taongo moi ma dekana o koano ai duduhunu yapaliara o momoholehe gea o koano ai tau ma honongaka gea abe o momoholehe manga doomu ma ngioka de ahao ka idadi yowohama yomaidu de manga koano. De o mede butaanga ihira kiani homoi-homoiika o wange-wangeiye o moholehe manga kai yomahikokihiehe de o minya abe ihisapuru de o muuru. De ahao ma minya yaturuuru de enangoo kiani o wange-wangeiye o mede butaanga ma dekana yapake o minya utuoli gea abe enangoo ma bounu duru irahai. De yapakeoo o pupuru de o semengke de ma kiahonanga utuoo la hiadono duru yohailoa. Hokogea yaniiki o moholehe ma hiaturu ma pareta ka hiadono homoi-homoiika manga taongo moiino ibooto.

¹³ De nako o moholehe momatengo ami gahe adonoka imingotaka la yomakamake de o koano la ma futu gea yomaidu de naga ma hiaturu hokonaa. Muna kiani momahidiaiohi la o momoholehe manga doomu ma ngi manoaika angamoi ka de momaidu de o koano de ko idadiokaua molio manga ngiino gea. De muna momahidiai ka idadi momangiriki o pakeanga o kia dika moigo mapake, de ka idadi mapakeoo ma kiahonanga abe hoka o ali-ali, o gogoli, o rante, de o ngaukuku. De ngaro o minya abe ma bounu ma hohailoa, eko o semengke, eko o pupuru iti abe o kia dika moigo mapake de ena gea imihidoaka la momahidiai mowohama o koano ai ngiika.

¹⁴ De o futu gea muna imingotaka o koanoika de momaidu unangoka de ahao ma dawangeino imiao o koano ai tau ma honongaika abe o ngo-ngofeka yogogere genangoka. Masara, muna ko idadiokaua mogogere o momoholehe manga ngioka ho naa kiani imihigogere to ona manga ngi o ngo-ngofeka abe yodadioka hoka o koano ngoi feka-fekata angamoi muna yomakitigioka de o koano. De genangoka manga gogoana womatengoli ai romanga o Saagasa abe unangoo o koano ai duduhunu ma doomuino abe yakabiirioka. De abe nako o koano womisanangi munangika muna ahao womibehehongoli de gea ami romanga womifetongo. Masara nako o ngofeka gea o koano ko womibehehongua de ko idadiokaua moiki unangika. Hokogea ma hiaturu o ngo-ngofekaika abe yao o koanoika la una ka idadi womiiriki ngoi fekata ma gou-goungu onangino.

O ngo Estere modadi o koano ngoi fekata ma gou-goungu

¹⁵ De naa adonoka o momoholehe yomaketetoturuuruoka yangotaka o koanoika ka hiadono o ngo Esteroo ami gahe yadono la munangoo imingotaka o koanoika. Naa muna o ngo Estere abe o Modekai ai dofo masara womietongo to una ngoi ora idodutu ngaro muna ngoi firanga abe ai ama o Abihaili ngoi ora masara ma oraha o Abihaili de ngoi fekata yohonengoka o ngo Estere ka o ngofakohi ho o Modekai womipaliara. De naa adonoka ma oraha o ngo Estere gea momahidiai la imingotaka o koanoika de muna momahinganono o Hegai ai sosawaroika dika abe hokokia momahidiai. Ho naa adonoka o ngo Estere kiani momahidiai mowohama o koanoika de muna mato mosanangi dika mapake o pakeanga de o kiahonanga abe o Hegai wairiki wato ena gea dika mapake. De o nyawa mata-mata genangoka abe imimake o ngo Estere ami hailoa ona ato muna duru morahai.

¹⁶ Ho o ngo Estere imingotaka o Ahasi-werosika ai tau ma goronaka de gea idadi o mede ngimoioka abe ona ihiromanga o mede Tebete ho ma oraha gea una wahikoano ai kokawaaha ngade-ngade ai taongo tumidino ma dekana.

¹⁷ De o Ahasi-weroso duru womisanangi o ngo Esterika abe ngaro o ngo-ngofeka mata-mataino ka o ngo Esterohi ai hininga adaene munangika. De ngaro o momoholehe yokokirahai masara o koano wato ka munangohi mihisanangi unangika. Ho gea wale o koano ngoi fekata ma gou-goungu ami sapeo abe duru irorahai de ma sapeo gea womihinoa o ngo Estere ami peauku la wohitunguu womihidadi ngoi fekata ma gou-goungu ho naa de ahao idadi o ngo Wasiti ami duruuru naga.

¹⁸ De o Ahasi-weroso ai garago hokogea ma amoko hiadono o rame-rame wodiai la wohitunguu ai horomati o ngo Esterika. De wabehehongo ai popareta ma hae-haekika de o nau-nauru utuoo abe yokokurutiye la yokokiboa yaniiki ai rame-rame. De o koano wohidingoto ai garago ma hingahu ai nyawa mata-mataika abe naga o rame-rame ma wange abe enangoo idadi o Hiaini ma wange ho ka idadi ai kokawaaha mata-mataika yomahikokiaini. De una woigo wahidoaka o hadia onangika ho wahidingoto ai huhuloko la yahikokodoaka manga hadia kohangoe la yahikodoku ai kokawaahaika.

O Modekai wahioriki ona abe manga hidee la ato iwitoma o koano

¹⁹ De ipaha o momoholehe abe yomaiduoka o koanoka yogogere manga doomu ma ngi moioli de ma oraha gea o Modekai iwihikarajaanga o koano ai tauoka de ai karajaanga o koano ai tau ma ngoranoka.

²⁰ Naa ngaro o ngo Estere modadioka o koano ngoi fekata ma gou-goungu masara muna ko ma moiuahi momahingahu onangika o koano ai tauoka abe onagona honanga yadaene ami dutu-dutu de abe muna o Yahudi ma nyawa. De ko momahingahua angamoi muna mohingounu o Modekai ai demo munangika imaketero hoka ma dihiraino abe ami etetekino de duru mihingounu abe ma oraha womipaliara ai tauoka.

²¹ De o wange moiuku o Modekai naga o koano ai tau ma ngoranoka hoka ai biaha o wange-wangeiye de naga genangoka yahinooto, o Bigatana de o Teresi, o koano ai duduhunu abe yakabiirioka. De onangoo naga genangoka angamoi to ona manga karajaanga la yogoana o koano ai tau ma ngorana gea. De o wange gea o Bigatana de o Teresi iwingamo o koanoika de hiadono iwihidee ato ma koano o Ahasi-weroso iwitoma.

²² Masara ko idadiuahi iwitoma o koano de o Modekai woihene manga hidee gea abe ato ahao iwitoma o koano. Ho una womihitiari o koano ngoi fekata o ngo Esterika, wato, “Estere, kiani ngona nohioriki o koano ai duduhunu o Bigatana de o Teresi naga manga hidee ato o koano iwitoma.” Ho ka de o ngo Estere moihene abe manga hidee gea de mihingahu ami rokatika, de mihingahuoli mato, “De abe una wahioriki manga hidee de woigo wonahitiari la ufa o koano wohonenge, una gea ai romanga o Modekai.” Hokogea mihitiari o koanoika.

²³ De o koano wahuloko ai duduhunika la yatailako nako igoungu eko ko igoungua de ona yolio unangika de ato, “Mia koano, o Modekai ai hingahu gea duru itaana.” Ho ka de woihene gea de o koano o Ahasi-weroso wahuloko la o panakini ma didide yodiai de ahao o Bigatana de o Teresi homoi-homoi yaliko manga tomarino de yadideuku o panakinoka ka hiadono yodohonengika. De o ade-ade naa ihitulihuku o popareta manga hohininga ma bukuoka. Abe naga womatengo o popareta ma nyawa abe to una ai karajaanga la wotobatulihi mata-mata idadi manga tonakoka o hohininga ma bukuoka gea la ko ihihangua ena gea abe kiani ka ihikaika o popareta ma nyawa ihioriki. De gea wohitulihuku duru ma koano ai himangoka.