Estere 10 - Ma Jou ai Demo-demo o Totobelohoka

O Modekai ai kuaha ilamoko de o Yahudi ma nyawa wahihira-hira irahai

¹ De ipahaino manga koano o Ahasi-weroso wahipareta ai kokawaaha mata-mataika abe kiani ona yofangu unangika de o pajaka ma tiwi eko ona ka idadi yofangu de manga redi ma hasilino. Ho ngaro yogogere dai o gahi ma ngigoroka eko dina kohagurutiha masara ona wahikoano mata-mataika de gea kiani yofangu o koanoika.

² Duru ma dodihiraino o Peresia de o Media ma tonakoka gea yomulaenge yotulihuku manga kokoano manga ade-ade o hohininga ma bukuoka. Ho ngaro abe ma oraha manga koano duru wohira wahikoano de mata-mata wodiai abe yoigo la ko yawohangua ena gea ma titi yotulihuku o bukuoka. De ka de o koano womatengo gea wohonengoka de ahao naga ai duruuru o koano womatengoli ho unangoo kiani ai ade-ade ihitulihuku o bukuoka de manga buku-buku gea ihiromanga o kokoano manga buku. De ma oraha o Ahasi-weroso wodadi o Peresia ma nyawa de o Media ma nyawa manga koano de ai duduhunu abe yotobatuli-tulihi ona ihitulihuku o kokoano manga bukuoka gea abe hokokia ma titi mata-mata abe o koano o Ahasi-weroso unangoo wodiai de ai kuaha de ai buturungu. Ho ka de womulaenge wohikoano ka hiadono ma bobaha ai nyawa wahikoano, naga ai ade-ade ma ngoe abe ihitulihuku. De o Modekai to unangoo ai ade-ade ona ihitulihuku o kokoano manga bukuoka abe hokokia o koano wigorakiye hiadono o Modekai duru de ai kuahaka de o nyawa manga horomati duru ilamoko unangika.

³ Abe manga koano o Ahasi-weroso wihikuaha o Modekaiika hiadono una wodadi o popareta manga haeke mata-mataika ho hiadono ka o Ahasi-weroso dika abe to unangohi ai kuaha ilamoko. De o Modekai o Yahudi ma nyawa abe wodadi o Yahudi ma nyawa manga dimono wokokurutiye ho ona mata-mataika duru de manga horomati unangika. De ona iwisanangi unangika angamoi duru wokarajaanga waduhunu ai gogianongoru o Yahudi ma nyawa de ka ihikaika nako naga manga musu de manga hidee yaruwaeoli, una waademo hiadono manga hidee ko idadiuali. De hokogea o Modekai waduhunu la ka idadi o Yahudi ma nyawa yogogere yoriidi o tonakoka gea.