Estere 1 - Ma Jou ai Demo-demo o Totobelohoka

O ngo Estere ami ade-ade ma lifunu ma hingahu

¹ Abe o ngo Estere ami ade-ade imulaenge ma oraha o koano ai romanga o Ahasi-weroso. De una gea wahipareta ai tonaka duru ma amoko abe iregu-reguoka la idadi o propinsi o ratuhu moi de monaoko de tumidi. Abe o nyawa mata-mata o Hindia ma tonakoka ka hiadono o Etiopia ma tonakika, ona mata-mata yokokigogere o Ahasi-weroso ai kuahaka. De o tonaka amomoi gea o Ahasi-weroso wohiromanga ai tonaka ma propinsi. Ho to una ai kuaha ma batingi ma dobikoka o Hindia ma propinsioka ka hiadono o tonaka ma dobikika ma romanga o Etiopia ma propinsi.

^2-3 Ma dodihiraka o tonaka ma propinsi mata-mata gea o Ahasi-weroso ko womahitoomuahi de ena o tonaka ma doomu hinooto de o doomu homoi-homoi naga manga koano. De o tonaka ma doomu moi ma romanga o Peresia de o tonaka ma doomu moioli ma romanga o Media. Masara ma oraha ma ade-ade nenanga o tonaka ma doomu hinooto gea idadioka o tonaka moi abe o Koano Ahasi-weroso womahitoomuoka wahikoano mata-mataika. Ma ngaro hokogea ka yapakeohi o tonaka ma doomu ma romanga ma dodihiraka abe o Peresia de o Media. De o Ahasi-weroso wogogere o tonaka ma honongaka abe ihiromanga o Peresia. De o Peresia ma tonaka ma kota ma amoko abe duru de ma buturungoka ma romanga o Susana. De o Susana ma kota ma honongaka yahigilolitino de ma dadaduhu ma gurutiye de o kota ma honongaka gea naga o koano ai tau ma rorahai abe ma goronaka naga to una o koano ai kadera abe kiani ka o koano dika ka idadi wapake. De ma oraha gea o Ahasi-weroso naga wogogeruku ai kadera ma rorahaioka la wahipareta ai nyawaika. De o Ahasi-weroso wahikoano ai kokawaaha o taongo hinooto de ma hononga ibooto de ahao wodiai o rame-rame duru ma amoko ho wahoko ai popareta ma nyawa mata-mata la yokokiboa o Susana ma kotaino. Ho ngaro ai tonaka ma hononga o Peresiaino eko ma hononga o Mediaino ma kiani yokokiboa o nau-nauru abe manga popareta ma haeke de manga tentara manga haeke mata-mata abe yahitobahiatu-aturu o nyawa. De naga o nau-nauru utuoo yokokurutiye kiani onangoo yokokiboa la ona mata-mata yaniiki manga koano ai rame-rame ma amoko gea.

O Ahasi-weroso ai rame-rame ma amoko wodiai

⁴ De o rame-rame gea duru ma dekana hiadono o mede butaangaino ihirame-rame. De ai rame-rame ma goronaka manga koano ka ihikaika wahimatoko onangika ai kiahonanga ma hali-hali kohangoe la yokokiheranga. De ai kiahonanga mata-mata duru ihohailoa de ma rorahaiholi de enanga wahikokimatoko ai popareta ma nyawaika la womahitaana onangika abe ka unangohi o koano duru wokokurutiye.

⁵ De ahao o mede butaanga ipaha ho manga rame-rame ngade-ngade ibooto de ahao o Ahasi-weroso wato wodiai moiohi o ngolo-ngolomo kohaamoko de wahoko o nau-nauru mata-mata abe yogogere o Susana ma kota ma dobikiye, abe duru de ma buturungoka gea, la onangoo wahikokiolomo. De ngaro o nau-nauru yokokurutiye abe yokaya eko ona abe yogoa-goana eko o huhuloko, abe duru ka onangohi yotipokouku o Susana ma kota ma dobikiye gea, masara ona mata-mata o Ahasi-weroso wahoko la yorame-rame ai ngolo-ngolomo ma hinootoka. De o koano wato o ngolo-ngolomo ma amoko gea ihirame-rame o wange tumidi ma dekana to una ai bunga-bunga ma redi-redioka abe ihidukurungaino ka ma moi de to una ai tau abe duru ma rorahai.

⁶ De o bunga-bunga ma redi-redioka naga ma ngi-ngi ma ngoe yamehele de o hakaru ma leto-letongo abe yapelaka de yatatorika ihidongoatika. De naga ihidemeheloka o hakaru utu abe duru ma leto-letongo de o bia-bianga ma kai abe enangoo duru ma leto-letongo. De naga o liate ma ngoe o bunga-bunga ma redi-redi ma goronaka de enangoo yodiai o hakaru ma rorahaiino. De o loliate ma hidogoronaka yadide o ngoere ma amoko hoka o ngorana ma dadatoko ma ngoere abe yodiai o lawe ma alu-aluhino de o ngoere gea utu ma gare-garehe de utu ma bihi-bihi. De o liate amomoiika naga ma didide o haakaino ma rupa o gogoli de genangika o dadatoko ma ngoere ihidiliko de o liliko abe yodiai o ngoere ma gare-garehino de ma wuu-wuuino. De naga o hiaini ma ngi ma ngoe ma rupa o kuruhii ma guru-gurutu ma dodipokouku abe yakelenga o mehele ma rorahaioka la o nau-nauru ka idadi yolomo yomahiduiye o hiaini ma ngi-ngioka gea. De o kuruhii ma guru-gurutu mata-mata yodiai o haaka de o gurasi ma dutuino masara daku ma lokuino ihidalape de ma bole-bole hoka o babangini.

⁷ De o ngolo-ngolomo ma goronaka o koano ai huhuloko manga ngoe yaleleani de o angguru ma gohaka de manga mokolo o gurasi ma dutuino mata-mata. De ngaro o mokolo o gurasino gea kohangoe masara ma hapa de ma dimo-dimo ma poretoka imaketemomomoi. De o koano ai hiningaka woigo wahidoaka ona mata-mataika o inomo de o ngokere iwoe la yososanangi ho wahidailako o angguru ma gohaka ilamoko abe iwidingakoka o koanoika.

⁸ De angamoi o koano womaputuhoka wato manga ngokere ko iwa ma batingi ho una wahuloko ai duduhunika wato, “Nako o angguru ngini kiani nianiiki to ona manga mau homoi-homoiika ho ka ihikaika nihidagi ma angguru homoi-homoiika de ko idadiua niaribuutu la yokere de ko idadiua niakuranga ma angguru abe yogahoko la niaguhe onangika.”

⁹ De ma oraha o ngolo-ngolomo ma amoko gea, o Ahasi-weroso ngoi fekata ami romanga o ngo Wasiti, munangoo modiai o ngolo-ngolomo ma amoko abe o ngo-ngofeka ka idadi yaniiki. De muna modiai o ngo-ngofeka manga ngolo-ngolomo doka o Ahasi-weroso ai tau ma hononga ma goronaka.

O koano ngoi fekata o ngo Wasiti ko mihingounua unangika ho womioluku

¹⁰ Adonoka o wange ma tumidi o ngolo-ngolomoka gea de o koano o Ahasi-weroso iwidaluku angamoi wokere o angguru ma gohaka ilamoko masara iwidaluku ka hiadono wososanangi dika. De wahoko ai duduhunu o nau-nauru yatumidi abe yakabiirioka de wangaku onangika hiadono ka ihikaika manga tagongo la iwileleani manga koanoika ho ka ihikaika naga ai datekoka. Yatumidi gea manga roma-romanga o Mehumana, o Bisata, o Habona, o Bigata, o Abagata, o Setara, de o Kakasa. De naa manga koano naga ai behehongo onangika ho wakokiahokino.

¹¹ De wahibehehongo ona yatumidika, wato, “Ngini naa niloiki ngohi fekata o ngo Wasitika de nimihingahu ngohi tomibehehongo ho ngini kiani nimingotaka ngohino la ka idadi ami rahai tahikokimatoko ahi popareta ma nyawaika de o kokawaahaika abe naga nenangoka ahi ngolo-ngolomoka. Ngohi o koano de toigo la ka idadi o nau-nauru mata-mata imimake ngohi fekata abe muna duru morahaiholi. De kiani muna momahisapeouku de ami sapeo ma rorahai abe imihitunguu ngohi fekata ma gou-goungu naa muna. Ho ngini niloiki nimile la nimiao ngohino!” Hokogea manga koano wahuloko ho yosobo yoiki ngoi fekatika.

¹² Masara ka de yatumidi gea imihingahu o koano ai behehongo o ngo Wasitika de muna ko mosanangiua de mato, “Ngini nilio niwihingahu o koanoika ngohi toluku wohihimatoko o nau-nauru manga hima-himangoka hokogea ho ko toboaua.” Hokogea to muna ami hininga hiadono ko mihingounua ami rokatika. Ho ka de o koano o Ahasi-weroso woihene ngoi fekata ami demo gea de duru ai ngamo ifae hiadono duru wongamo.

¹³ De mangale o koano nako womaputuhu kiani waniiki manga tonaka ma pareta mata-mata ho una waniiki ai biaha abe wahokino o nau-nauru ai poparetaino abe ka onangohi duru ihioriki manga pareta mata-mata manga tonakoka. De manga pareta gea ma ngoe abe o nyawa mata-mata kiani yaniiki de ma hiaturoka abe hokokia yahohowono o nyawaika nako manga pareta yatilakuru. De waleha onangika abe hokokia kiani wodiai ma titi o ngo Wasiti ko mihingounua unangika.

¹⁴ De ona yososawaro ma titi o Media de o Peresia ma nyawa manga pareta abe ka onangohi o Ahasi-weroso wangaku, to ona manga roma-romanga o Kasena, o Setara, o Adamata, o Tarasiisi, o Merese, o Masena, de o Memukana. O hihira yatumidi gea abe ka onangohi yokokurutiye manga tonaka o Media de o Peresia ma amokika. Ho ona ka idadi ka ihikaika yoboa o koanoika de iwihingahu unangika manga hininga.

¹⁵ De onangika o koano waleha wato, “Ngohi o koano de kiani o nyawa mata-mata ihihingounu. De naa o ngo Wasiti, to ngohi ngohi fekata, moluku mohingounu ahi behehongo abe ahi duduhunu yototaka munangika. Ho tinileha nginika abe nisosawaro nanga pareta, hokokia ami hohowono la to ngone nanga pareta haniiki itiai?”

¹⁶ Ona yoihene manga koano ai leleha gea de ahao o Memukana wopaluhu la ona mata-mata ka idadi yoihene wato, “Koano, nagoungu, o ngo Wasiti o koano ngoi fekata mahowonoka. De ufa hafikiri muna mahowono ka ngonaika dika angamoi muna mahowono o nau-naurikaoo abe yokokurutiye nanga poparetaka de mahowonoo o nau-nauru mata-mataika abe ngona nahikoano nanga tonaka ma amokika.

¹⁷ Angamoi o koano ngoi fekata ami datoro itorou naa ahao o nyawa yahikabarihi hiadono o ngo-ngofeka mata-mataika abe yomahikoano ngonaika ahao to onangoo manga horomati ko yapakeokaua manga rokatika. De marai manga demo hokonaa, ato, ‘Ngaro nanga koano o Ahasi-weroso womibehehongo ngoi fekatika moboa masara abeika, muna moluku moboa ngaro ami rokata o koano! Ho nako muna ngaro ufa mihingounu ami rokatika marai ngoneoo ngaro ufa e dika hahingounu nanga roka-rokatika.’

¹⁸ Hokogea o ngo-ngofeka ahao yomademo la ka idadi manga roka-rokatika yalawana! De igoungu imulaengoka abe o wange naa nagau o nau-nauru yokokurutiye o Peresiaka de yokokurutiye o Mediaka, abe manga feka-fekata yoihenoka ma titi o ngo Wasiti ami datoro gea ho ahao onangoo yomaaduru hoka munangoli. Hokogea manga lawana imahora hiadono manga horomati manga rokatika ko iwa de ka ihikaika o giarokata mata-mataika yomaketeliliara abe yomahikoano ngonaika.”

¹⁹ “Ho ngohi naa o Memukana tato tomahilooa ahi koanoika, ma nako ngona nosanangi naniiki to ngohi ahi hininga gea irahai ani behehongo moi ngona nodiai abe o nyawa mata-mata o Mediaka de o Peresiaka kiani yaniiki. Abe ka de o behehongo naga abe ihitulihukuoka o pareta ma bukuoka de ko idadiua o nyawa ahao yahihanga o pareta ma bukuino ngaro o koano eko onagona dika masara ko idadiua yahihanga. De ani behehongo kiani ihitararono abe o tau homoi-homoiika o kuaha igogere ma rokatoka. Angamoi o ngo Wasiti ami horomati ani kuahaika ko iwa ho naa ko idadiokaua nimakamake ho kiani muna ko imihigunoakaua moboa ngona o koano ani himangika. Ho ahao o ngofeka utuino kiani nomiiriki momatengoli de nomihidadi ngoni fekata ma gou-goungu la modadi o ngo Wasiti ami duruuru. Hokogea kiani nohibehehongo la idadi o pareta ma hungi!

²⁰ De ahao ani putuhu ma behehongo gea kiani ani huhuloko nahidingoto la yahingahu-ngahu ani kokawaaha mata-mataika abe nahikoano ngaro ma gogurutika yogogere. De o feka-fekata mata-mataika ngaro ona yokokurutiye eko ona yotipokouku ma, ka de yoihene ani pareta ma hingahu gea de ihioriki o ngo Wasiti ami hohowono. Hokogea ma ngekomo la ona o feka-fekata de manga horomati yahingou-ngounu manga rokata ai kuahaika.” Hokogea o Memukana ai demo ma koanoika.

²¹ De o koano de ai duduhunu o nau-nauru yososawaro yokokurutiye gea yokokisanangi o Memukana ai demoika ho o koano wodiai duru imaketero hoka o Memukana wihingahuoka.

²² De wohuloko la ai behehongo ihitulihuku de yapake o demo imaketemomoi angamoi o Media de o Peresia ma tonakoka gea ko yomahibahasa moiua dika masara manga demo imalolihowono. De ahao o koano ai hidingoto ma nyawa ai behehongo ma hurata gea yototaka manga tonaka ma propinsi o ratuhu moi de monaoko de tumidino la yadono ona mata-mataika abe yomahikoano o Ahasi-werosika. Ho o koano ai kokawaaha mata-mataika ahao o koano ai behehongo yokokiihene de to ona manga demo abe ma kuaha o tau homoi-homoiika igogere ma rokatoka.