Esara 6 - Ma Jou ai Demo-demo o Totobelohoka

Ma Jou o Yawe ai Tau yodiai ibooto de iwidingaka Unangika

¹⁴ De o tao-taongiye o Yahudi ma nyawa manga dimo-dimono ihigila-gilahi manga karajaanga abe yodiai Ma Jou ai Tau ma hungi. De manga karajaanga duru de ma hasiloka angamoi naga Ma Jou ai uru ma dodofanga yahinooto abe ka ihikaika yahigaro onangika de o dodotoko ma hitararono Ma Jouino. Ma Jou ai uru ma dodofanga yahinooto gea womatengo ai romanga o Hagai de womatengoli o Sakaria abe ai tofora o Ido. De manga karajaanga ihigila-gila ka hiadono Ma Jou ai Tau yodiai ibooto de gea idadioka duru imaketero hoka o Isiraele ma nyawa manga Jou wahibehehongo. De nagali o koano yahange abe homoi-homoi yahuloko de o pareta o Isiraele ma nyawaika ato kiani manga Jou ai Tau gea yodiai. De ona o koano yahange gea o Peresia ma nyawa manga koano abe manga roma-romanga, o Korese, de o Ahasi-weroso, de ahao o Dariusu.

¹⁵ De Ma Jou ai Tau ma oraha yabooto yodiai de o koano o Dariusu wohikoano ngade-ngade ai taongo butaanga ma dekana. De abe yabooto yodiai, gea duru adaene o mede o Adara de ma wange hangeuku.

¹⁶ De o Isiraele ma nyawa abe ma dihira manga musu yao o tonaka utuika de ma oraha naa naga manga hou abe onangoo yokokilioka manga tonakino. Ho ona de manga gogianongoru abe yohira yolio, de manga hidemo Ma Jouika, de o Lewi ma nyawa utu yoahumu, ona mata-mata yomatoomuino. De manga doomu ma titi la gea Ma Jou ai Tau iwidingaka Unangika. Ho ona duru de manga garago ma gahumu yorame-rame.

¹⁷ De gea Ma Jou ai Tau iwidingakoka Unangika de manga huhuba ma ngoe. Abe yahihuba o hapi ma nauru ma goohi o ratuhu moi, de o domba ma nauru ma baluhu o ratuhu hinooto, de o domba ma ngofaka o ratuhu iata. De ahao naga manga huhuba la manga howono yatamunu o Isiraele ma nyawa manga dutu yangimoi de yahinooto homoi-homoiika. Ho manga huhuba o kabingi ma nauru enangoo ngimoi de hinooto la ihitamunu o Isiraele ma nyawa manga howono mata-mata abe manga dutu yangimoi de yahinooto manga howono.

¹⁸ De ahao o Lewi ma nyawa abe yodadi manga hohidemo de o Lewi ma nyawa manga nau-nauru utu ona mata-mata yaregu hiadono naga manga doomu ma ngoe. De to ona manga doomu homoi-homoiika naga manga leleani ma tagongo Ma Jou ai Tauoka o Yerusaleemoka. De yaniiki Ma Jou ai leleani ma hiaturu mata-mata abe ma dihira o Musa wohitulihukuoka o Behehongo ma Bukuoka.

¹⁹ De naa adonoka ma oraha o Isiraele ma nyawa kiani o Totilakuru ma rame-rame ihirame-rame. Abe o taongo adonoka o mede ihira de ma wange ngimoi de iatuku.

²⁰ De manga hidemo Ma Jouika de o Lewi ma nyawa utu ihira kiani yaniikohi ma hiaturu la yomahitebini Ma Jou ai himangoka de ahao yomadoma manga Totilakuru ma domba. De ma domba gea yahihuba abe imadadi to ona mata-mata manga Totilakuru ma domba abe yokokilioino o Isiraele ma nyawa manga tonakino. Ho ngaro o Isiraele ma nyawa biaha, de ngaro manga hidemo Ma Jouika, de ngaro ona o Lewi ma nyawa utu, masara idadi to ona mata-mata manga Totilakuru ma domba.

²¹ De ona mata-mata abe naa yokokilioino manga tonakino yaniiki manga Totilakuru ma rame-rame to ena ma ngolo-ngolomo. De naga onangoo genangoka abe o Isiraele ma nyawa utu abe o Babele ma nyawa ma dihira ko yaoua o homoa ma tonakika ho ona yomagoo-gogere dika to ona manga tonakoka. De ma oraha naa onangoo yotobaka manga datoro ma dorouino de onangoo yahigunoa yaniiki o Totilakuru ma rame-rame gea ho onangoo iwihigiriiri Ma Jou o Yawe, o Isiraele ma nyawa manga Jou.

²² De o wange tumidino ma dekana ihirame-rame manga rame-rame gea de o Totilakuru ma ngolo-ngolomo gea imakiniiki de manga rame-rame abe ihiromanga o Roti ko Iwa ma Ragi ma rame-rame. De manga garago ma amoko ma titi Ma Jou o Yawe wokarajaanga o Asuru ma nyawa manga koano ai hiningaka. Abe Ma Jou wokarajaanga ma koano gea ai hiningaka de wohikawalimi hiadono ai hininga ma owa o Isiraele ma nyawaika naga. De to una ai mau la o Isiraele ma nyawa ka idadi yomahuba manga Jouika. De hokogea o koano ai hininga ka hiadono ma ngoe ona waduhunu ma oraha ona ihigokoli Ma Jou ai Tau ma hungi.