Esara 3 - Ma Jou ai Demo-demo o Totobelohoka

Ona yodiai ma hungi o haharongo ma huhuba ma ngi

¹ De o Isiraele ma nyawa yomahiadonoka o Yehuda ma tonakika de adono o taongo ma mede tumidoka de ona yoriidoka to ona manga kapo-kapongoka abe ma dihiraino manga totofora yogogere genangoka. De ahao ona ka ma moi yoiki yomatoomuino o Yerusaleeme ma kotaka.

² De manga hidemo Ma Jouika, o Yesua, abe ai baba o Yosadaka, una de ai dodiawo abe onangoo o Isiraele ma nyawa manga hidemo Ma Jouika yomulaenge yodiai manga Jou ai huhuba ma haharongo ma ngi la ka idadi manga huhuba iharo-harongo yahihuba itiai. De naga abe yomakuduhunu de manga karajaanga gea o Seatiele ai ngofaka o Serubabele de to una ai gogianongoru. De ma hitararono naga abe hokokia kiani yodiai o huhuba ma haharongo ma ngi gea. Abe ma dihira o Musa abe duru winiiki Ma Jou, una Ma Jou wipake la ai behehongo wahidoaka o Isiraele ma nyawaika de o Musa wotulihuku o Behehongo ma Bukuoka. De o buku gea ma goronakaoo naga ma titi manga huhuba ma haharongo ma ngi abe hokokia yodiai de ma hiaturu abe kiani yaniiki ma oraha yahihuba itiai manga huhuba iharo-harongo manga huhuba ma ngioka gea.

³ De ngaro naga manga hawana abe ma titi o nyawa arihonongaino yalawana masara ka yodiai dika. De o haharongo ma huhuba ma ngi ka nagahi to ena ma lifunu abe ma dingii ma dihiraino, ho yodiai yaniiki ma lifunu ihira-hira gea. De ka de yodiai ibooto de o wange-wangeiye o ngorumino de o bimaowa manga huhuba iharo-harongo yahihuba Ma Jou o Yaweiye.

⁴ De ma oraha ona ihirame-rame o Hijai-jai ma Tau ma rame-rame de duru yaniiki o rame-rame ma hiaturu Ma Jou ai Bukuino. Abe ma bukuoka gea naga ma hiaturu ihitulihuku abe o wange moi kiani manga huhuba hokokia ma ngoe abe yomahihuba. De hokogea yaniiki la manga rame-rame ma wange-wangeiye manga huhuba imakadaene de abe ma dihiraino itulihukuoka Ma Jou ai Behehongo ma Bukuoka gea.

⁵ De ngaro manga rame-rame gea ipaha ma, ka ihikaika yogila-gila yaniiki Ma Jou ai pareta ma hiaturu mata-mata la yahihuba manga huhuba iharo-harongo o wange-wangeiye. De ma oraha adono o Mede ma Hungi de manga huhuba enangoo yahihuba iharo-harongo. De manga rame-rame mata-mata abe Ma Jou o Yawe wahidoaka onangika naga de ma hiaturoka abe kiani yaniiki. De naga ma hiaturoo abe yaniiki ma oraha manga huhuba iharo-harongo yahihuba Unangika. De nagaoo o nyawa abe to ona manga hininga ma owaino ato yoigo yomahihuba manga huhuba iharo-harongo ho yao Ma Jou ai Tauino la manga huhuba gea manga hidemo Ma Jouiye ona yaduhunu yahihuba Ma Jou o Yaweiye.

⁶ De ma oraha yomulaenge manga huhuba iharo-harongo yahihuba de gea adaene duru o mede tumiduku abe duru to ena ma wange ihira de manga huhuba ihira yatufuku genangoka ngaro doka Ma Jou o Yawe ai Tau ma lifunu ko yomulaenguahi yodiai.

⁷ De o Isiraele ma nyawa yomahidiaioka yomulaenge Ma Jou ai Tau ihigoko ma hungi ho yahidoaka o hewa ma tiwi onangika abe yososawaro o gotaino o tau yodiai, de o hewa ma tiwi yahidoakoo onangika abe yososawaro o dadaduhu ma hakaru ihidemehele itiai. De ona yoperelu abe o gota o semara ho yomagahoko o duduhunu o Sidono de o Tirusu ma nyawaino. De ona ka idadi yaduhunu abe naga manga kapa la ka idadi o semara ma gota gea yale o Libanono ma tonakino de yao o Isiraele ma tonakika de manga kapa gea. De o Sidono de o Tirusu ma nyawa manga duduhunu gea yabalaha abe de manga inomo, de manga akere, de manga minya yahidailako. De mata-mata gea o koano o Korese wohiaturu ka hiadono ma gota gea yao o Isiraele ma nyawa manga kota o Yopaika abe naga o gahi ma ngigoroka.

⁸ De o Isiraele ma nyawa yogogere o Yehuda ma tonakoka o taongo moi ma dekana de ahao manga taongo ma hinooto ma mede hinootoka de yomulaenge yokarajaanga Ma Jou o Yawe ai Tau yodiaiokali hoka ma dihiraino. De o Lewi ma nyawa yomatoomuino la yokarajaanga de ona mata-mata abe ma dihira manga musu yaoka o tonaka utuikali masara naa ona yolioka o Yerusaleemino. De onangoka naga manga hidimono o Serubabele de o Yesua. De manga gogianongoru o Lewi ma nyawa o nau-nauru utu yodadioka manga hidemo Ma Jouika. De o Lewi ma nyawa o nau-nauru abe manga ngumuru yadono o taongo monaoko de imahikaiye ona gea yahitagongo la yahiaturu manga karajaanga ma goronaka.

⁹ De o Lewi ma nyawa manga doomuoka abe yoigo yokarajaanga yomakuduhunu naga o Yesua de ai ngofa-ngofaka de to una ai ria-dodoto idodutu de o Kadiele de to una ai ngofa-ngofaka. Abe ona mata-mata o Yesua ai tauoka de o Kadiele ai tauoka manga tofora o Hodawia. De nagaoo manga doomuoka o Henadada de to una ai ngofa-ngofaka de ai dano-danongo. De ona mata-mata manga hininga moi la yokarajaanga yomakuduhunu de manga gogianongoru o Lewi ma nyawa utu la yahiaturu manga karajaanga ma goronaka.

¹⁰ Ka de yodiai Ma Jou o Yawe ai Tau ma lifunu ibooto de ahao yomahiaini manga karajaangino la iwihigiriiri Ma Jouiye. Ho ona abe manga tagongo yahidemo manga gogianongoru Ma Jouiye yapake manga hidemo ma pakeanga o baju ma guru-gurutuku. De ona gea yaleino manga guguli abe yodiai o tabaagaino la ena gea ahao yapake iwihigiriiri manga Jouika. De o Lewi ma nyawa abe yomahitofora o Asafika, ona yapake manga gogereenge o tabaagaino abe manga biaha ihikokaboha manga higiriiri ma goronaka. Hokogea yomahidiai ibooto de ahao ma oraha iwihigiriiri Ma Jou o Yawe yaniiki manga datoro ma hiaturu homoi-homoi abe ma dihira o Isiraele ma nyawa manga koano o Dautu wodiai ma hiaturu gea.

¹¹ De ahao ona o Lewi ma nyawa mata-mata yonya-nyanyi Ma Jou o Yaweiye manga higiriiri ma titi to Una ai Tau ma lifunu yabootoka yodiai. De manga higiriiri ma demo itemo hokonaa: “Mata-mata Ma Jouoka de aino ma owa; De to Una ai dora o Isiraele ma nyawaika ka ihikaika itagi, De ngaro ka hiado-adonika, ko iwa ma bobaha.” Hokogea yonyanyi de ahao o nyawa mata-mata abe naga genangoka duru de manga garago manga higiriiri ihiboaka Ma Jou o Yaweiye.

¹² De ngaro hokogea iwihigiriiri Ma Jou masara naga ona yaperekioka abe o hidemo Ma Jouika, de manga fam ma dutu, de o Lewi ma nyawa utuoli de ona gea duru yoari angamoi yohininga ma dihiraino abe duru Ma Jou ai Tau ma rorahai. Ho ka de yolega Ma Jou ai Tau ma lifunu ma hungika, abe gea ahao naa yodiai, de yoari. Masara duru ko manga ngoe genangoka abe de manga garago ihiboa-boaka manga higiriiri.

¹³ Ho imahikasapuru manga ilingi abe ona yoari de ona abe de manga garago ihiboa-boaka manga higiriiri ka hiadono ko idadiokaua o nyawa utu yahikohowono manga ilingi duru kohaamokiye. De manga higiriiri ma gigoro gea ka idadi o nyawa yoihene ngaro yomakitingaka ma gurutika.