Esara 1 - Ma Jou ai Demo-demo o Totobelohoka

Ma koano o Korese waduhunu o Isiraele ma nyawa la ka idadi yolio manga tonakika

¹ De ma oraha o Korese womulaenge wahikoano o Peresia ma nyawa manga tonaka ma propinsi mata-mataika de Ma Jou o Yawe wohiaturu la gea to Una ai behehongo wohingodumu abe ma dihira wihidoaka ai uru ma dodofanga o Yeremiaika. Abe ma taongo gea o Korese duru ka de womulaenge wohikoano, de Ma Jou wihigaro unangika la moi wodiai ai pareta ma hungi. De o Korese ai pareta gea wohitulihuku la idadi o hurata ma ngoe de ahao wahuloko ai hidingoto ma nyawaika la ma hurata gea ona mata-mata yao manga propinsi ma tonaka mata-mataika. De manga kota de manga kapongo kiani homoi-homoiika yakegetongo la ka idadi manga kokawaaha mata-mataika yabasa ai pareta ma hungi gea.

² De hokonaa ai pareta ma hurata itemo. “Ngohi o koano o Korese, abe ngohi togogere o Peresia ma tonakoka angamoi Ma Jou o Yawe, abe Ma Jou wogogere o Horogaka, Una gea wohihidadi la ngohi o koano abe de ahi kuaha o dunia ma amokika. De Una wohihitagongo la to Una ai Tau tohigokokali o Yerusaleeme ma kota ma goronaka abe o Yehuda ma tonakoka.

³ De tonganono la Una ahao wahihira-hira to Una ai nyawa mata-mataika, abe ma titi o Isiraele ma nyawa abe naga nia hidogoronaka. Abe hokonaa Ma Jou ai mau, adonoka ma oraha ka idadi to Una ai nyawa yolio to ona manga tonakika. Angamoi ma oraha naa abe ahao ona ihigokoli Ma Jou o Yawe ai Tau, abe Una gea o Isiraele ma nyawa manga Jou de ona kiani yomatobahuba-huba Unangika o Yerusaleeme ma kotaka.

⁴ De ngini o Isiraele ma nyawa abe nigogere ahi kokawaaha utu manga hidogoronaka, ngaro o kiaka dika nigogere de kiani ona abe yogogere nia date-datekoka iniduhunu de nia perelu ma oraha nilio nia tonakika. Ho de o pareta naa tinihuloko ngini mata-mataika abe ko o Isiraele ma nyawaua la ngini kiani niaduhunu onangika gea la ka idadi yolio to ona manga tonakika. Ho kiani niaduhunu hiadono niahidoaka onangika o haaka, de o gurasi, de manga bilaono, de manga aewani abe ka idadi ihibarene manga kiahonanga o aewani ma poretuku. De ko genangua dika niahidoaka angamoi enangoo yoperelu abe ahao yapake la Ma Jou ai Tau o Yerusaleeme ma kotaka ihigokoli. Ho kiani niaduhunu de nia hidoaka o kiahonanga abe ka idadi yapake yodiai Ma Jou ai Tau ma hungi. Hokonaa ahi pareta ahi kokawaaha mata-mataika abe kiani ngini nihikokingounu.”

⁵ De Ma Jou wokarajaanga o Isiraele ma nyawa manga hiningaka de o Yehuda ma dutu de o Benyamini ma dutu manga dimo-dimono to onangoo manga hiningaka. De onangoo ato kiani yolio ka hiadono manga fam ma doomu manga dimo-dimono yahigaro manga nyawaika la kiani yomahidiai la yoiki yolio manga tonakika. De o Lewi ma nyawa abe yodadioka manga hidemo Ma Jouika, de o Lewi ma nyawa utuoli onangoo yomahidiai yosobo. De abe o Isiraele ma nyawa onagona dika abe Ma Jou wokarajaanga manga hiningaka ka hiadono yoigo yolio manga tonakika. De to onangoo manga mau la yaduhunu abe Ma Jou o Yawe ai Tau yodiai ma hungi o Yerusaleemoka, ho onangoo yomahidiai yoiki.

⁶ De manga dodiawo abe yogogere manga datekoka, de ngaro ona o Isiraele ma nyawa eko ko o Isiraele ma nyawaua, masara ona mata-mata yaduhunu de manga hidoaka onangika. Abe manga kiahonanga o haakaino eko o gurasino ena gea yahidoaka o Isiraele ma nyawaika abe yolio manga tonakika. De onangika yahidoakoo o bilaono irupa-rupa, de o aewani, de o kiahonanga utuoli abe duru ihali-hali de manga hidoaka mata-mata gea yahidoaka manga hininga ma owaino dika. De ahao naga manga hidoaka utuoli abe yahidoaka onangika.

⁷ Ma dihira abe ma oraha o Babele ma nyawa manga koano o Nebukanesara o Isiraele ma nyawa wahikalaka de ahao manga huhuba ma kiahonanga wakokile Ma Jou ai Tauino o Yerusaleeme ma kotaka. De manga huhuba ma kiahonanga mata-mata wao o Babele ma tonakika de wakelenga to ona manga popangao ma tau ma goronaka. Masara ma oraha naa de o koano o Korese wohigilio manga huhuba ma kiahonanga gea o Isiraele ma nyawaika.

⁸ De naga womatengo o koano ai duduhunu ai romanga o Miredata abe una o koano ai tiwi ma gogogono ma tau ma haeke. Ho ka de ma kiahonanga duru ma hali-hali gea mata-mata watoomuino de ahao o Miredata ai tagongo la una kiani wogoana de wapaliara. Ho una Ma Jou ai Tau ma kiahonanga ma hali-hali gea waetongo de wohitulihuku de to ena ma roma-romanga. De ahao ma kiahonanga de ma huratoka gea wihidoaka o Isiraele ma nyawa womatengoika ai romanga o Sebasara. De una hokogea wihitagongo angamoi o Sebasara gea una o Yehuda ma nyawa manga dimono abe wahihira-hira ona mata-mata ma oraha yolio o Yehuda ma tonakika.

^9-10 De Ma Jou ai Tau ma kiahonanga hokonaa abe o Miredata waetongoka de wohitulihuku: O hidoaka ma udo-udomo o gurasino ma gahumu gea moruange. O hidoaka ma udo-udomo o haakaino ma gahumu gea o sana moi. O udo-udomo utu ma gahumu gea monaoko de hiwo. O udo-udomo ma eteteke abe o gurasino ma gahumu gea moruange. O udo-udomo ma eteteke abe o haakaino ma gahumu gea o ratuhu iata de ngimoi. O leleani ma kiahonanga utu ma gahumu o sana moi.

¹¹ De ma oraha adonoka yosobo de utuohi iwoe o leleani ma kiahonanga abe o Sebasara watoomuinoka abe wao o Yerusaleeme ma kotaika ma oraha yoiki. Abe ka de yaetongo ma udo-udomo de ma kiahonanga hoka o mangko, de o dodai, de o leleani ma kiahonanga utu abe yodiai o gurasino de o haakaino de mata-mata adonoka o sana motoa de o ratuhu iata ma ngoe.