Efesusu 6 - Ma Jou ai Demo-demo o Totobelohoka

O Paulusu ai behehongo abe o dimo-dimonika de o ngofa-ngofakika

¹ De nako ngini o ngofa-ngofaka, gea ngini niahingounu nia dimonika, angamoi hokogea to nanga Baluhu idodutu ai hininga ngoneino abe wato itiai o ngofaka yahingounu manga dimonika.

² De gea ma dodihirainohi de ai pareta naga moi itemo ato, “De ngini kiani de nia horomati nia babaika de nia memeika hiadono niahingounu de niao irahai.” Hokogea itemo Ma Jou ai Paretaka ma dihiraino. De nako Ma Jou ai Pareta, gea ko mata-mataikaua de ma behehongo de ma owaka. Masara abeika ma pareta abe ma titi o ngofa-ngofaka manga hingounu manga dimonika. Ma pareta naa ena duru ikurutiye, de nagaoo abe Ma Jou wohidogo de ma behehongo ma owa enangika, la nako onagona dika yaniiki ma pareta gea, ona ahao yamake ma owa.

³ De ma behehongo ma owa gea wonahibehehongo wato nako naga nia horomati de nia hingounu nia dimonika, gea ahao “nia wowango naga de ma hofoko ma rorahaioka de nia ngumuru enangoo ikurutu o dunia ma lokuoka naa.” Hokogea ma behehongo ma owa abe ihidumutu o ngofa-ngofakika onagona dika yahingounu manga dimonika.

⁴ De abe ngini o ba-baba, ufa nia ngofa-ngofakika niao ko itiaiua hiadono ma titi nginioka de ona yotobangamo, ma koaho niapaliara onangika de o dodotoko de o hitiari abe gea ena imakiniiki de nanga Baluhu idodutu ai hininga ngoneino.

Abe hokokia kiani yomakao o gogilaongo de manga dutu

⁵ De naa ngohi tinihibehehongo abe ngini o gogilaongika. De ngini kiani niahingounu nia dutu o duniaka naa, de nia hingounu gea kiani ma gahumu onangika, de nia horomati ma gou-goungu gea kiani naga onangika. De gea nialeleani onangika, kiani de nia hininga ma rorahai la gea imaketero hoka o Kristusika niwileleani.

^6-7 Masara iti ufa nia dutu manga himangoka dika de ahao naga nia hingounu onangika. Angamoi nako hokogea nia hininga, gea nioigo la niato ona dika inisanangi nginika, masara ko iwa nia hininga la Ma Jouika niwihisanangi. Masara ufa hokogea nia hingounu, ma ngini kiani ka ihikaika nialeleani itiai onangika de nia magawe ma gahumu, abe ngaro ona inilega-lega eko koua. Angamoi ngini naa tanu to Kristusu ai gogilaongo de ko to nyawaua dika manga gogilaongo, ho kiani nianiiki to Ma Jou ai mau nginika. De gea to Una ai mau la ngini nialeleani nia dutuika abe imaketero hoka nanga Baluhu idodutuika ma hirete niwileleani.

⁸ De nako ngini niagou-goungu niwileleani nanga Baluhu idodutuika, gea ka idadi nihioriki abe Una ahao winihibalaha de ma utumu nginika. Angamoi ngaro ngone o gilaongo de ngaro ngone ko o gilaongua ma nyawa, ma ngone mata-mata hohiorikoka abe nanga Baluhu idodutu Una ahao wonahibalaha de ma utumu ngone homoi-homoiino abe ma titi nanga datoro ma rorahaiino hodiaioka.

⁹ De ngini o gogilaongo manga dutu-dutu, nginioo ma kiani nia gogilaongo niao itiai de o hininga ma rorahai. De ufa ngini niabobanarata onangika la niato ona niahikangelaholi manga hiningaika. De ufa manga badangikaoo niahiodiri. De kiani nimahohininga abe ngaro ona eko ngaro ngini, ma gea ngini mata-mata nia Dutu o Horogaka Una ka womatengo dika, de nako Una gea o nyawa ko wairikua, ho gea ngini kiani nia gilaongo niao irahai.

Abe ma titi ngone hingaku-ngakuoka naga nanga hininga ma dae

¹⁰ De naa ahi gogianongoru, ahi dodotoko moiokahi naa abe ahi huratoka tato tinihingahu nginika. De gea ngini kiani ka ihikaika nimahiputurungu nanga Baluhu idodutuika de to Una ai kuahaino abe duru kohabuturungu ai kuaha gea.

¹¹ De gea kiani o parangi ma dae de ma dadatoko mata-mata abe Ma Jou wonahidoakoka ngoneino, gea kiani ngini nimahinoaukuoka de niapake ti ngini nia wowangoka, la ngaro o Ibilihi ma haeke ato inibudi nginika, ma ngini ka idadi niakunu nimatongohono de ko inihikalaua.

¹² Angamoi igoungu ngone naa tanu ko haparangiua o nyawaika, masara ngone haparangika abe o toka-tokata ma dorou irupa-rupa. Abe utu o tokata abe to ena ma kuaha de ma gogere hatoli ikurutiye. De utu o tokata ma hidimono de ma kuahaka abe ihipareta o fufutu o duniauku naa, de utuoli o tokata ma dorou abe imanoa daku ma hoanino.

¹³ Ho gea kiani ngini niagorakoka de nimahinoauku o parangi ma dae de ma dadatoko gea mata-mata abe Ma Jou wonahidailakoka ngoneino la ma oraha nanga musu gea iniparangi de gea ngini ka idadi nimadatoko de nimatongohono. De gea nimatongohono ka hiadono nia musu yodohuku de ko iniparangiokaua nginika, de ngini ko nidohukua.

^14-17 De gea ngini kiani nimahidubuluino nia goronaino, de nia alu kiani niodatoko de o alu ma dadatoko nimahinoauku. De nako nia lou, gea kiani nimasandaaliye. De ka ihikaika kiani niao nia dadatoko la ka idadi ma oraha nia musu ma hihiipi iboaino abe ena naga de ma ukuoka, de gea ka idadi nihihohonenge de nia dadatoko. De nia pea kiani naga ma dadatoko de gea ena nihisapeouku, de abe nia humaranga o dopo-dopoino abe ma doto arihononga gea ena kiani nimagorakino. De nako ti ngini nia dae de nia dadatoko gea mata-mata naga nginioka homoi-homoi nia badangoka, de gea ahao nimahidiaioka la ka idadi nia musu nialawana. Masara gea ahi demo nginika gea tanu o hiketero dika abe tohiketero nanga hininga ma dae de nanga hininga ma dadatoko abe gea Ma Jou wonahidailako ngoneino la gea ka idadi halawana o Ibilihi ma haeke de to ena ma toka-tokata. De abe nako o tentara yomahidubuluinoka manga goronaino, ona gea yomahidiaioka la yomataiti yoiki yoparangi. De gea tohiketero de ma gou-goungu, angamoi ngone kiani hatobagou-goungu ma titi nanga ngongakuoka. Ho gea ngini kiani ka ihikaika nimahidubuluino de ma gou-goungu la ma oraha Ma Jou woigo nisobo, gea ka idadi ngini nisoboka de nianiiki to Una ai mau nginika. De nako o alu ma dadatoko o tentara yomahinoaukuoka, de gea yodatoko done manga musu manga dae yakorona manga badangino. De gea tohiketero de o totiai, angamoi nako ngini nitotiai Ma Jou ai himangoka, gea ahao nia totiai inidatoko la ufa o Ibilihi ma dae iniruwae nginika. De nako o tentara yomahisandaaliyeoka, gea manga sandaala yaduhunu la ufa yopakoro de yoruba. Ho gea tohiketero de o Abari ma Rorahai, angamoi nako ngini nimahigagaoika genangika, gea ahao iniduhunu la ufa niruba de ufa niahowono. De abe nako manga dadatoko yasoinoka naga manga giamoka, gea ka idadi ma tentara yomahitatoko la manga musu manga hihiipi abe itoka-tokarino, gea ena yomahitatoko. De manga dadatoko gea yomahiparihi de yahohonengoo manga musu ma hihiipi de ma ukuoka. Ho gea tohiketero ma dadatoko gea de ti ngini nia ngongaku Unangika, angamoi iti nia ngongaku naga de gea ahao ka idadi inidatoko ngaro hokokia dika o Ibilihi ma haeke iniparangi nginika. De nako ona o tentara manga pea ma dadatoko ma sapeo, gea yomahinoaukuoka la ato yodatoko manga pea. De gea ena tohiketero de nia nganganono abe duru nihioriki Ma Jou winiduhunoka nia howo-howonino de winihidoakoka o wowango ka hiado-adonika. Ho nako nia nganganono gea naga nia hiningaka, gea ena inidatoko la ufa o Ibilihi ma haeke iniruwae nia hiningaka. De nako o tentara manga humaranga o dopo-dopoino, gea yapake la yalawana manga musuika. De nako ti ngini nia humaranga o dopo-dopoino, gea Ma Jou o Womahoka de aino winihidoaka la ngini niapake, de ma humaranga gea tohiketero de Ma Jou ai Demo-demo, ho gea ena kiani niapake la nialawana o Ibilihi nia musuika.

¹⁸ De abe ma oraha ti ngini nia parangi ma hidailako mata-mata gea niapake, gea kiani ngini ka ihikaika nimaniata de nimagahoko o duduhunu Unangiye, angamoi enangoo duru kiani naga nia niniata abe ma oraha nia musuika nialawana. Abe ngaro hokokia dika naga abe ngini nidiai ma goronaka, ma nako Ma Jou o Womaha winitila la nimaniata, genangoka koaho nimaniata. De gea kiani ngini nimaniata de nia hininga ma magawe de ufa hiadono nimahipipidili genangino. De abe nanga gogianongoru mata-mataika iwingaku-ngakuoka, gea kiani ka ihikaika ngini ninagahoko Unangiye ma titi ngone.

¹⁹ De gea togahoko la ngohioo ngini nihigahoko Unangiye la ma oraha ona yotobauru-urusu manga himangoka de Una ka idadi wohihidoaka ma demo abe duru itaana, de ka hiadono Una wohihitomoroini ngohino hiadono ka ihimoroini tohingahu onangika ma titi o Abari ma Rorahai. Abe ai dogogono ma Abari gea ma dihiraino de ka agogonohi masara naa ngohi tato tahitararono o Abari ma Rorahai gea la o nyawa yataoko duru itararono.

²⁰ De tanu o Abari ma Rorahai gea ena ma titi hiadono ngohi ihibuioka, angamoi Una wohihitagongino ngohino de ngohi wohihidingoto la o Abari ma Rorahai gea tahingahu-ngahu o nyawaika. Ho ngohi togahoko la nihigahoko ngohi la naga ahi domoroini abe ma oraha ma Abari tahingahu-ngahu, angamoi tanu gea kiani hokogea totemo.

O Paulusu ai hurata wohibobaha

²¹ De naa ngohi toigo la ngini nihioriki abe o abari ma hingahu ngohioka abe hokokia mata-mata idadi ngohino, ho naa nanga gianongoru o Tikiku tihidingoto la una ahao winihingahu o abari ma titi ngohino. De abe o Tikiku, una gea ngomi duru wiwidora unangika de una gea duru watobagou-goungu wileleani nanga Baluhu idodutuoka.

²² De una gea tihidingoto nginika la ngini ahao ka idadi nihioriki abe hokokia idadi ngomino de genangino ahao ka idadi nisanangi de nia hiningaoo iuwini.

²³ De naa ngohi tinigahoko Ma Jou nanga Babaika de nanga Baluhu idodutu o Yesusu Kristusika la Una ahao winihidoaka o hininga ma miriidi ngini ahi gogianongoru mata-mataika. De tinigahokoo la ngini nimakodora de niwingaku ka ihikaika Unangika.

²⁴ De ngohi tinigahoko Unangiye la ngini onagona dika abe niwidora nanga Baluhu idodutu o Yesusu Kristusika de nia dora gea ko itoa-toakua masara ka igila-gila dika ka ihikaika. De tinigahoko la Ma Jou ai owa imanoa ka ihikaika nginioka.