Efesusu 5 - Ma Jou ai Demo-demo o Totobelohoka

Kiani o dora inahihira-hira nanga wowangoka

¹ Ho mangale ma titi ti ngini nia howo-howono Ma Jou waofioka, ho ngini nia wowango ma goronaka kiani nimaaduru abe hoka to Unangoli ai hininga. Angamoi ngini nidadioka to Una ai ngofa-ngofaka idodutu de duru winidora nginika, ho kiani to Una ai hininga nimaaduru nia wowangoka.

² De gea nia wowangoka kiani o dora inihihira-hira la hiadono nia dora itagi o nyawaika, de gea nimaaduru abe hoka o Kristusoli wadora o nyawaika. Abe Una gea duru wonadora ngone o nyawaino ho hiadono ai wowango womahidoaka de ai badangoo womahidoaka la idadi hoka o huhuba Ma Jouiye la wato genangino to ngone nanga howono waofi. De ai huhuba gea Ma Jou wodafongo angamoi wamake duru irahai de iwihisanangi to Una ai himangoka. Ho ngoneoo kiani o dora inahihira-hira nanga wowangoka.

³ Ho mangale ngini nidadioka to Ma Jou ai debi-debini ma nyawa, ho ufa hiadono naga nginioka ma dorou abe hoka o nyawa yomatengo de yomakitigi de abe ko manga fekatua eko manga rokatua. De ufa hiadono naga nginioka nimahitorou, eko naga nia horoodo o kiahonangika. Masara gea mata-mata ma hohutuloo de ufa nihigunoa nia hidogoronaka.

⁴ De nako nia demo nia uruoka, enangoo kiani niogoana la ufa ihupu o demo ma pese-peseke eko o demo abe ko iwa ma titi eko o hawaliti ma demo ma dorou abe nia uruino. De gea ena ko itiaiua nihidemo-demo, masara koaho nihidemoiye de ti ngini nia tarimakase Unangiye.

⁵ De angamoi naa duru itararonoka ngoneino de duru hohiorikoka abe onagona dika yatobahowono de yomakitigi de abe ko manga fekatua eko manga rokatua, eko onagona dika yomahitobahitorou, ona gea ahao ko yamakeua manga gogere o Kristusu ai kuaha ma goronaka, abe ma oraha gea Ma Jou wonahigogere de to Una ai kuahaka la Una de o Kristusu wonahikoano ngone. De abe ona ka ihikaika naga manga horoodo o kiahonangika, gea onangoo ko yamakeua manga gogere o Kristusu ai kuaha ma goronaka. Ko yamakeua angamoi manga horoodo gea imaketero hoka yomahijou o kiahonangika de ko Ma Jouikaua.

⁶ Ho mangale ma titi gea ma dorou duru Ma Jou wodohata, ho ahao naga ma oraha abe Una kiani wahohowono o nyawaika abe ona iwilawana de ona abe yotobadiai ma dorou gea. De masara igoungu naga utu o nyawa abe yoigo inibudi nginika de manga demo abe ko iwa ma titi, de gea hoka yotemo ato, “Ufa hopusingi abe hokokia nanga wowango ma datoro, angamoi nako Ma Jou Una duru ko wonahohowonua ngoneino.” De ngaro hokogea manga higaro ma demo nginika, ma ufa hiadono inibudi.

⁷ Ho ufa hiadono nginioo nianiiki abe hoka onangoli manga datoro yatobaniiki hokogea.

Ngini kiani niwango to Una ai dararonoka

⁸ De igoungu ma dihiraino de ti ngini nia hininga ma dola ka o fufutuokahi dika, masara naa de ti ngini nia hininga nanga Baluhu idodutu wohitawangeoka la ma titi nia gogao Unangika ho gea ka idadi ngini niwihioriki itararono. Ho naa ngini nia wowangoka kiani o dawange ma wowango nimaaduru.

⁹ De ahi demo gea ma titi nako ngini niwango ai dawangeoka, ahao nia wowangoka naga ma hofoko mata-mata abe ma rorahai de ma totiai de abe ma gou-goungu.

¹⁰ De abe nia wowango ma dodagi ma goronaka gea kiani ngini nihidodiai niairiki la hokokia nia wowangoka niwihisanangi nanga Baluhu idodutuika, de gea ena kiani nianiiki.

¹¹ Masara ngini ufa ko nianiiki o fufutuoka ma datoro, angamoi gea ma datoro itorou de ka parahaja dika. Ma koaho ngini niahitawange o nyawa manga datoro gea la ka idadi ihioriki abe gea ena ma datoro de ko itiaiua.

¹² Angamoi nako ona abe ko iwingaku-ngakuahi Ma Jouika, ona gea manga datoro naga abe yoiki yomatohi-tohiki yodiai la yato ufa o nyawa yahioriki. De manga datoro gea duru o himaleke ma amoko, abe nako ngone hofetongo dika ma titi ena gea de inahimalekoka.

¹³ De ngaro o kia-kia dika abe naga o fufutuoka, ma nako hiadono ihitawangeoka de Ma Jou ai dararono, gea de ahao idadi duru itararono abe to ena ma rupa hamake tanu ahao hokokia. De gea ena mata-mata abe ngone hamake itararono, gea ena idadioka hoka o dararono. Ho gea ngini kiani niahitawange Ma Jou ai dararono abe o nyawa manga fufutu ma datorika.

¹⁴ De gea imakiniiki de o demo ma dulu moi abe itemo ato, “De ngini abe nia giooko ma goronakahi de gea kiani nimomikiye! De abe ngini nihonengoka kiani ngini nimomikiye nia honengino! La gea ka idadi o Kristusu ai dararono inihitawange nginika.” Hokogea o demo ma dulu. Ho gea ma titi hiadono ngini nia wowangoka kiani o dawange ma wowango nimaaduru.

Ngini kiani nihidodiai nimangiriki nia wowango ma ngekomo

¹⁵ De mangale ngini nidadioka to Una ai dararono ma nyawa, ho kiani ngini nihidodiai nimangiriki nia wowango ma datoroka. Abe ma titi ngini ufa niwango hoka o bodoli ma nyawa, angamoi ona ka yosabaranga dika yowango, masara koaho nihidodiai niapake nia sosawaro abe hokokia la ka idadi ngini niwihisanangi Unangika.

¹⁶ De abe nako naga ma oraha la ka idadi o datoro ma rorahai nidiai, de gea ma oraha ufa niaumo masara kiani niale de niapake la ma rorahai gea nidiaioka, angamoi ma oraha naa naga o nyawa nanga wowango ma datoro ka idogo-dogo itorou.

¹⁷ De ngini ufa nimaaduru hoka onangoli abe ko kia-kiauahi ihioriki Ma Jou ai hiningaino, masara koaho nihidodiai la niataoko itiai nanga Baluhu idodutu ai mau nginika.

¹⁸ De ufa ngini inidaluku, angamoi ma daluku gea ka idadi nia wowangoka ka ihikapusaka. Masara koaho nimahigunoa la ka ihikaika Ma Jou o Womaha winihilufungu ai kuahaka de winihihira-hira ngini homoi-homoi nia boriwowangoka.

¹⁹ De gea ahao ma oraha ma getongo nimatoomuino de ka idadi nimahikokagaro nia ngongakuoka de o higiriiri ma bukuino abe ma dihira ihitulihukuoka, de o nyanyianga utuino naga abe niwihigiriiri Ma Jouika. De gea ka idadi ninyanyi de niwihigiriiri nanga Baluhu idodutuika de duru nia hininga ma gahumino.

²⁰ De ngini kiani ka ihikaika nitarimakase Ma Jou nia Babaika abe ma titi o kia dika idadi nia wowangoka. De gea nitarimakase de niafetongo nanga Baluhu idodutu o Yesusu Kristusu ai romanga. De nako nimahigunoa la Ma Jou o Womaha winihihira-hira nia wowangoka, mata-mata gea ahao idadi nginioka ma oraha nimatoomuino.

O Paulusu wahibehehongo abe ona o gogiaberekika

²¹ De ngini genangoka mata-mata nimahikokigihene nia gogianongoruika, de nia higihene gea ihititi nia borihoromati o Kristusika.

²² De ngini o feka-fekata, niahigihene nia rokatika, angamoi hokogea nanga Baluhu idodutu ai mau nginika.

²³ Angamoi nako o rokata womatengoani, gea ngoi fekata ami haeke, de gea ka imaketero dika abe hoka ngone o garejaka hodadioka to Una ai badanga ho o Kristusu Una gea to ngone nanga haeke. De nako Una gea, Una womahidoaka ai wowango la wodadi to ngone nanga Duduhunu o garejaka.

²⁴ Ho gea imaketero hoka ngone o garejaka hihigihene o Kristusika, ho ngini o feka-fekatoo ngaro hokokia dika naga, ma koaho naga nia higihene nia roka-rokatika.

²⁵ De ngini o roka-rokata, kiani nginioo niadora nia fekatika abe gea imaketero hoka o Kristusu wonadora ngone ai garejaino ho hiadono to Una ai wowango womahidoaka la wonaduhunu.

²⁶ De gea womahidoaka la ngone wonahitebini nanga howo-howonino. De gea ngade-ngade imaketero abe hoka momatengo o ngofeka mato moilaka. Muna gea ko moilakuahi de kiani imiohikohi la ma oraha imiao ami darunika de muna duru motebinoka. Masara nako ngone o Kristusu ai garejaka, ngone wonahitebini ko de o akerinoua masara Una wonahitebini de to Una ai Demo-demoino abe to ngone nanga howonino.

²⁷ De gea wonahitebini la ahao dokengika ma oraha wonaao ngone to Una ai himangino de gea duru hotebi-tebinoka, ho duru ko iwaka nanga peseke eko nanga howono ma rupa hokokia dika ngoneoka. De ma oraha gea ngone to Una ai gareja duru homaketero hoka muna o ngofeka gea moila-ilaka, abe ma titi ngaro muna eko ngaro ngone masara gea duru de nanga debi-debinoka ma oraha hodadi to Una ma hirete ai debi-debini ma nyawa. De hokogea ma amoko o Kristusu ai dora abe ngone ai garejaino hiadono wato wonaduhunu de wonahingodumu ho hiadono duru ko iwaka nanga howono.

²⁸ Ho nako ngini o roka-rokata, nginioo kiani duru niadora nia fekatika abe imaketero hoka o Kristusu wonadora to Una ai garejaino. De gea ma titi kiani ngini niaduhunu manga wowangoka hiadono ona utuohi yotebini to Una ai himangoka. De abe imaketero hoka ngone hoodora de hoolega to ngone ma hirete nanga badanga ma pereluika, hokogenangoo ngini o roka-rokata kiani nia fekatika niadora. De o nauru onaguna dika abe womidora ngoi fekatika, gea tanu to una ma hirete ai badangika woodora, angamoi ona gea yahinooto yodadioka o badanga moi.

²⁹ De ngaro ma dodihirainohi ka hiadono ma oraha naa, masara gea duru ko iwa o nyawa abe to ona ma hirete manga badangika yoodohata. Masara ngone o nyawa mata-mata homahidailako de homapaliara nanga badanga homoi-homoi, abe gea imaketero hoka o Kristusoli wonahidailako de wonapaliara to Una ai garejaino,

³⁰ angamoi ngone homoi-homoi hodadioka hoka to Una gea ai badanga ma kiahonanga.

³¹ De ahi dodotoko naa duru imakiniiki de abe hoka ma dihirainohi de ihitulihukuoka Ma Jou ai Demo-demoka abe itemo ato, “De gea ma titi ho hiadono o nauru yomatingaka manga baba de manga memeino la gea yogogere moi de manga fekata la gea ona yodadioka moi.” Hokogea itemo Ma Jou ai Demo-demoka.

³² De naa to Una ai demo ma goronaka naa naga Ma Jou ai dogogono moi abe to ena ma titi duru ma lukuku, masara ngohi tapake la gea idadi o hiketero abe ma titi o Kristusu de abe ngone ai gareja. Angamoi ngone naa hodadioka to Una ai badanga ma kiahonanga, ho gea ngone de Una hodadioka moi, de gea duru imaketero hoka o rokata womatengoani de ngoi fekata onangoo yodadioka moi.

³³ De masara naga ma titi moioli abe Ma Jou ai demo naa ma goronaka. De gea inadotoko abe nako o rokata homoi-homoi, gea ngini kiani nia fekatika niadora abe imaketero hoka ti ngini ma hirete nia badangika nioodora. De abe nako ngini o feka-fekata, gea ngini kiani naga nia horomati nia rokatika. De hokogea Ma Jou ai hininga abe ma titi ngini o gogiaberekika.