Efesusu 4 - Ma Jou ai Demo-demo o Totobelohoka

Ngone homaketerimoioka abe ngone homoi-homoi homanoa o Kristusu ai badangoka

¹ De naa ngohi duru tinihigaro nginika la ti ngini nia wowango ma goronaka de niataana abe Ma Jou ai mau nginika. De tinihigaro hokogea ma titi hinooto. Abe ihira-hira gea ma titi abe ngohi naa ihibuika ma titi tileleani nanga Baluhika. De nagali ma titi abe Ma Jou ai hidoaka ma owa mata-mata ngone ai nyawaino abe tofetongoka ahi hurata ma demoino naa. Angamoi gea Ma Jou winiahoko nia ngongakuino, ho koaho to Una dika ai hininga ngini nianiiki.

² Ho gea ngohi toigo la ngini ka ihikaika nimahitipokouku nia hiningaka, de niabole-bole o nyawaika. De ngohi toigo ngaro ahao idadi abe naga o kangela eko o howono nia hidogoronaka, ma gea kiani nimatongohono de nimakao irahai dika de ufa hiadono nia hininga kuranga o nyawa utuika. De hokogea ngini niakunu nidiai ma titi nia doraino.

³ De kiani nihidodiai niogoana ti ngini nia rimoi abe Ma Jou o Womahoka de aino iboa. Abe gea Una winihidoaka o dame nginika la ma titi genangino hiadono nimaketerimoi abe o badanga moioka, ho gea nia rimoi ngini kiani nihidodiai niogoana. De nako hokogea mata-mata nianiiki nia wowango ma goronaka, gea ahao ngini niataana to Una ai mau nginika.

⁴ Angamoi ngone naa mata-mata igoungu hodadioka hoka o badanga moi Unangoka, de abe Ma Jou o Womaha, Una gea ka womatengo dika, masara Una naga womanoa ngone homoi-homoi nanga badangoka. De ngone mata-mata nanga nganganono gea ka moi dika abe ahao dokengoka nanga utumu hakokimake.

⁵ De abe to ngone nanga Baluhu, Unangoo ma ka womatengo dika. De nako nanga ngongaku nanga Baluhika, enangoo ka moi dika. De ngaro ngone homaohiki abe ma titi hohitunguu nanga ngongaku gea, ma enangoo ma dumutu ka moi dika.

⁶ De gea to ngone nanga Jou de nanga Baba, Unangoo ma ka womatengo dika, abe Una gea ngone mata-mataika wonahipareta, de gea Una womanoa nanga kokibadangoka, de abe wokarajaangoo nanga kokiwowangoka. Ho gea ma titi hiadono nanga rimoi kiani hohidodiai hoogoana angamoi ngone naa igoungu hodadioka o badanga moi.

⁷ De masara ngaro ngone mata-mata duru hoimoi Unangoka masara to ngone nanga hidoaka ma owa Unangino, gea imaketemomomoi ngoneino. De abe ma titi o Kristusu wonahidoaka ngoneino nanga hiakunu homoi-homoi, de gea wonahikokodoku abe hokokia imakiniiki de to Una ai mau ngoneino homoi-homoioka.

⁸ De gea imakiniiki de abe ma dihiraino ihitulihukuoka Ma Jou ai Demo-demoka ma titi ma Mesia. De gea itemo ato, “De Una wahikalaka ai musuika de ahao to Una ai musu gea wao de wolioiye abe ma ngi duru ikokurutiyeoka, la genangoka mata-mataika, ngaro abe yomanoa o Horogaka eko o dihangoka eko o kiaka dika yomanoa, ma mata-mata ka idadi yomalega-lega de ihioriki abe ma titi Una wolakuoka. De genangoka de Una wahidoaka ma owa abe to Una ai nyawaika.” Hokogea itemo Ma Jou ai Demo-demoka, de igoungu hokogea o Kristusu nanga Mesia wodiai abe ma oraha wonahidoaka ma owa abe ngone ai garejaino.

⁹ De abeika gea ai Demo-demo ma goronaino itemo ato, “Una wolioiye.” De gea ma titi hokokia? De gea ma titi abe ma dihirainohi de o Kristusu Una woutiokau naa o duniauku abe nenangohi duru itipokouku. Angamoi nako hoka Una ko woutiua, gea tanu ko itemoua ato Una gea wolioiye, eko sarakia?

¹⁰ Ho Una gea abe ma dihiraino wouti nenanguku, gea Una ma hirete wolio de wodoa dakengiye hiadono ma ngi abe ka enangohi ikurutiye. De gea ngaro o Horoga ma goronaka mata-mataika masara ka to Unangohi ai gogere duru ikokurutiye o Horogaka. De gea wolioiye la ka idadi wahingodumu abe o kia dika naga mata-mataika hiadono gea duru ingodu-ngodumoka. De abe ma titi Una wolakuoka, gea ma titi ho hiadono Una ka idadi ai hidoaka ma owa mata-mata gea wonahidoaka ngone ai garejaino.

¹¹ De gea ai hidoaka ma owa abe wonahidoaka ngone ai garejaino, gea o nyawa wahidoaka ngoneino abe ona gea de manga hiakunoka. Abe ona utu o Kristusu wairiki la ona yodadi to Una ai hidingoto ma nyawa. De naga utu Una wonahidoaka o garejaka ona abe yatobadofanga Ma Jou ai hingahu ma demo manga gogianongoru utuikali. Abe Una ka wobawili dika ai hingahu ma demo to ona manga hiningaika la ahao yadofanga. De naga utuoli wahidingo-dingoto la o Abari ma Rorahai yatobahingahu-ngahu o nyawa utuika. De naga utu Una wonahidoaka la ona inatobagoana de inatobadotoko ngone ai gareja ma nyawaino.

¹² De ona gea mata-mata wahidoaka ngoneino la ona ka idadi inahidiai de inahiakunu hiadono ngone Ma Jou ai nyawa ka hakunu hileleani ma titi nanga karajaanga Unangoka. De gea ahao ngone abe to Una ai badangoka homanoa, gea ngone hodogo hoputurungu

¹³ ka hiadono ngone mata-mata duru homaketerimoioka nanga ngongakuoka de nanga tobahiorikoka abe ma titi Ma Jou ai Ngofakika. De nako hokogea idadioka nanga rimoi, gea ma titi ngone duru hobaluhoka o Kristusika, abe ka ihikaika hoaguru la homaaduru abe hoka to Unangoli ai hininga.

¹⁴ De hokogea tonahigaro la tato ibootohi homaaduru abe hoka o ngofa-ngofakoli manga hininga abe ona gea imaketero hoka o lulu ho ka ihikaika manga hininga yao aika aino. Abe nako o ngofa-ngofaka, ona gea ngaro ma dihiraino de hadotokokau onangika, masara nako o dodotoko o fara moioli ahao yoihene, de gea hatoli igapanga manga hininga aturuuruoli de aniikoli ma dodotoko ma hungi gea. Ho naa ngohi tonahitiari tato naga o nyawa utu abe yososawaro yodoto-dotoko, masara gea yotobaelu-eluku de manga dodotoko ma rerehene la ato inabudi la onangikali haniiki. Ho ngone naa ufa inabudi de ufa o dodotoko o fara moioli haniiki.

¹⁵ Masara koaho ngone ka ihikaika hoaguru de hobaluhu Unangika, de kiani ka o demo ma gou-goungu dika hotemo ka ihikaika, de gea kiani hotemo abe hokokia imakiniiki de o hininga ma dora. De nako ngone hokogea, ahao ngone abe to Una ai badangoka ka idadi hobaluhu Unangika. Abe ma titi nanga datoro de nanga hiningaoo duru imakiniiki abe hoka to ngone nanga haekoli o Kristusu ai hininga de ai datoro.

¹⁶ De abe ma titi ngone o gareja ma nyawa nanga haeke gea o Kristusu, Una gea ka idadi tihiketero hoka o nyawa manga pea. Abe nako womatengoani ai pea, gea ihiaturu ai badanga ma kiahonanga mata-mataika. De nako ai badanga ma kiahonanga imaniiki de ma pea ma hiaturu, gea ahao ma kiahonanga ka idadi imakokuduhunu de imakokiniiki. De gea hokogenangoo de ngone abe ai garejaka, angamoi ngone homoi-homoi hodadioka ai badanga ma kiahonanga. De Una gea wonahikaaturu ngone ai badangoka la nanga gogere homoi-homoi itiai. De gea ngone mata-mata homahiborigagao nanga gogianongoruika abe imaketero hoka o badanga ma kiahonanga mata-mata imahigagao utuika abe ma date-datekika. Ho iti abe ngone homoi-homoi hodiai nanga borikarajaanga abe Una wonahitagongoka la genangino homakokuduhunu. De gea ahao ngone homakokuduhunu nanga gogianongoruika la ka idadi hokokiaguru de hokokibaluhu Unangika abe ma titi hapake nanga doraino. De hokogea o Kristusu ai hidee ma dodihiraino hiadono o hiakunu wonahikokodoku ngone homoi-homoiino la wato genangino wonahingodumu ngone ai gareja ma nyawa hiadono ai gareja gea duru ingodu-ngodumoka.

Abe kiani hatingakoka nanga wowango ma dihira la o wowango ma hungioli o Kristusoka haniiki

¹⁷ Ho naa ngohi tinitemo de tinihitiari nginika abe ahi demo naa ihititi de nanga Baluhu ai kuahaka de aino ngohioka. Ho naa tinihitiari tato ibootohi niwango imaketero hoka ona yowango abe ko iwihiorikua Ma Jou, angamoi ona gea manga hininga ma dolaka gea duru ko kia-kiaua ma titi.

¹⁸ De ona gea manga hininga duru ifufutuoka, de ona hoka o homoa ma nyawa Ma Jouika, ho gea duru yomakitingaka ma gurutika de o wowango abe iboa Unangoka de aino. De gea yomakitingaka ma titi abe ona ma hirete yoluku iwihigihene Unangika angamoi to ona manga hininga ihitogowinoka ona ma hirete.

¹⁹ De ona gea ngaro o dorou yodiaioka masara o maleke duru ko ihiorikokaua manga hiningaka, ho ka yomahigunoa dika la gea ka ihikaika yaniiki yodiai o howono manga badangoka. Ho ona gea manga wowango ma datoroka duru ko yomatogu-togumua yodiai manga badanga ma hafini ma dorou irupa-rupa.

²⁰ Masara nako ti ngini nia dadaoko o dodotokino hokogenangua. Abe ma oraha inidotoko nginika ma titi o Kristusu, de gea duru itararono abe ko idadiua nianiiki nia badanga ma hafini ma dorou abe hoka onangoli yodiai.

²¹ De gea ngohi duru tohioriki abe ngini nengokadau inidotokoka ma gou-goungu abe naga o Yesusoka. De abe ma oraha gea niihene ma titi Una de abe niwingaku Unangika, de gea ahao inidotoko nginika to Una ai dodotoko ma gou-goungu.

²² Ho gea abe inidotokoka nginika, gea ena kiani nianiiki. Ho naa ngohi tinihibehehongo nginika abe imaketero de ma dodotoko ihira-hira gea. De gea ngohi tato kiani nia hininga ma dihiraino niatingakoka hiadono nia datoro ma dihiraino ibootohi nianiiki. Abe nia hininga ma dihiraino, duru hoka o gorofu dika mata-mata, de gea ma titi nia gimono ma dorou inihirehene o howonika de inibudi la doka nia hiningaka niato ma datoro gea nidiai de ahao ma sosanangi dika niamake. Masara gea ena ma hofoko ka ma dorou dika, ho tanu nia hininga ma dihiraino gea duru hoka o gorofu dika.

²³ Ho gea ufa nia hininga ma dihiraino gea nianiikoli, masara kiani ka ihikaika nimahigunoa la Ma Jou waturuuru ti ngini nia hininga ma dumutu la hiadono idadioka ma hungioli.

²⁴ De kiani o hininga ma hungioli nimahinoaukuoka la nia wowango ma datoro gea iwihisanangi Ma Jouika. Angamoi ngone wonatulaada la to ngone nanga hininga de to Una ai hininga ka homaketehiningamoi nanga hininga. Ho ngone kiani howango itiai la to Una ai himangoka ngone duru hotebini.

²⁵ Ho gea ngone kiani hatingakoka o ngelu-ngeluku nanga uruino la “ma gou-goungoli homahikangahu nanga gogianongoru mata-mataika.” Angamoi ngone homoi-homoi to Una ai badanga ma kiahonanga, de gea naga to ngone nanga borigogao nanga gogianongoru mata-mataika. Ho gea ufa homakeluku nanga gogianongoruika.

²⁶ De nagali to Una ai Demo-demoino abe inahingahu ato, “De nako naga nia ngamo ipuda, gea ufa nimahigunoa la ma titi gea dika de hiadono niahowono.” Masara koaho ma wange gea ko itumunuahi de gea nia ngamo kiani niapidilokau la ufa idadi o hiningagogono nginioka.

²⁷ Angamoi nako hoka nia ngamo gea ka niapaliarohi nia hiningaka, gea o ngekomo moi niobelenga o Ibilihi ma haekika la ena gea inihirehene o howonika.

²⁸ De abe naga utu nginioka nitobatohiki o nyawa utu manga kiahonanga, gea ibootohi nitohiki, masara koaho nimakarajaanga irahai de ti ngini nia giama la ka idadi nimahidailako nia perelu. De gea ahao ka idadi niaduhunu abe ona yohu-huhaika, abe naga nia karajaanga ma hasilino abe gea ka idadi niahikodoku onangika.

²⁹ De nako nimakoketemo, ufa nihigunoa la o demo ma pese-peseke ihupu nia uruoka de aino. Masara nia demo mata-mataika abe nitemo, gea kiani nia demo ka idadi yaduhunu o nyawaika la hiadono ona yoaguru manga ngongakuika. De nia demo gea kiani imakiniiki de abe ona yototoihene manga perelu hokokia la nia demo idadioka o duduhunu de abe yahiutumu onangika.

³⁰ De ufa hiadono Ma Jou o Womaha ai hiningaka niwihihuha ma titi nia demo abe nia uruoka de aino ihupu, angamoi Una gea duru wotebi-tebini. De gea Una abe wonahitunguuoka la ka idadi hohioriki abe hodadioka to Una ai nyawa, de hohiorikoo abe ahao naga ma wange adono de genangoka ahao wonahihupu o howono ma badangino la nanga wowango ma ngango gea duru ingodu-ngodumoka.

³¹ De ngini kiani niatingakoka ma dorou mata-mata naa, abe o hininga kuranga niapaliara ma deka-dekanuku, de o ngamo, de o dohata, de o ribuutu, de o hiade-ade, de o hininga ma dorou abe nia dodiawo niato niahikangela. Gea mata-mata ibootohi ngini nidiai.

³² Masara koaho ngini nimakao irahai de nia hininga ma mobole, de nia hininga ma dora itagi nia gogianongoruika. De ngaro nia gogianongoru yahowono nginika, ma, gea kiani manga howono nimahikokinginioo nimahikokoofi. Angamoi Ma Jou waofioka ti ngini nia howono Unangika ma titi o Kristusino, ho gea ngini kiani nimaaduru hoka Unangoli la nginioo nia gogianongoru manga howono nginika niaofioka.