Efesusu 3 - Ma Jou ai Demo-demo o Totobelohoka

Abe naa ma titi to Kristusu ai dogogono o Paulusu wahimatoko o nyawaika

¹ Ho mangale ma titi abe ngini nidadioka to Ma Jou ai nyawa ho gea ngohi o Paulusu ka ihikaika tininiata ngini genangoka. De naa ngohi ihibuioka ma titi o Yesusu Kristusu tileleani abe o Abari ma Rorahai tinihingahu-ngahu abe ngini ko o Yahudi ma nyawaikaua.

² De marai ngini niihenoka ma titi ahi karajaanga gea Ma Jou wohihitagongino ngohino la gea to Una ai owa ngohi ka idadi tinihingahu abe ngini ko o Yahudi ma nyawaikaua.

³ De ai owa gea Ma Jou ai hidee ma dogogono, abe gea ena ma hohutulu tinihitararonoka de ahi demo kangano.

⁴ De nako ngini nitotoihene ahi demoika abe ma oraha yobasa, gea ahao ka idadi nihioriki abe ngohi naa tagou-goungu tataoko itiai to Kristusu ai hidee ma dogogono gea.

⁵ De gea ena ma dodihiraino o nyawa ko ihiorikua angamoi Ma Jou ka wagogonohi o nyawaino la ufa ihioriki. Masara ma oraha naa Una womihimatokoka ma dogogono gea ngomino abe womihitago-tagongino ai garejaka. Abe ngomi utu womitinga-tingakoka Unangino de womihidadi ai hidingoto ma nyawa, de naga utuoli womihitagongo la wato ngomi mihidemoiye to Una ai Demo-demo o nyawaika abe o gogareja ma goronaka. Ho ngomi mia doomu hinootoino naa womihimatoko ai hidee ma dogogono gea, de gea womihimatoko de wipake Ma Jou o Womahino. De gea ai hininga ma dumutu wato ngomi ahao ka idadi miodofanga ai hidee ma dogogono nginikali la nginioo nihioriki.

⁶ De gea ma dogogono abe ma dihiraino de wagogonohi itemo hokonaa, ato, “Abe ngini ko o Yahudi ma nyawaua, ngini naa nidadioka o badanga moi de ngomi la ngone naa ka hoimoi dika. Ho gea o hidoaka ma owa o kia dika naga mata-mata abe ma dodihiraino Ma Jou womihibehehongoka wato ahao womihidoaka ngomi o Yahudi ma nyawaino, naa ma hidoaka ma owa gea mata-mata nginioo niamake angamoi ngone ko homakohowonokaua. De ngaro nanga nganganono abe hokokia ma hidoaka ma owa ahao hamake o Yesusu Kristusino, ma enangoo ngone mata-mata nanga nganganono ka moi dika. De gea ma titi ngone haboringakuoka o Abari ma Rorahaiika hiadono nginioo niamake ma hidoaka ma owa abe imaketero dika de ma owa abe ngomi naa miamake Ma Jouino.” Hokogea itemo Ma Jou ai dogogono abe naa wonahimatokoka.

⁷ De abe ma titi Ma Jou wohihitagongo ai Abari ma Rorahai ngohino, de gea tanu ko tafetongua o tagongo, masara ena gea tohiromanga o hidoaka moi ma owa wohihidoaka ngohino, la gea ka idadi o Abari ma Rorahai tahingahu-ngahu o nyawaika. De ma tagongo gea wohihidoaka ngohino de gea ma titi to Una ai kuaha abe ikarajaanga ahi badangoka.

⁸ De gea ngohi duru toheranga abe ma tagongo ma hohailoa gea wohihidoaka ngohino, angamoi nako ngohi de o nyawa utu mata-mata iwingaku-ngakuoka, ma ka ngohiohi tanu duru ko kia-kiaua ihidaene. Masara ngaro hokogea ngohi, ma Una wohihitagongo de ma karajaanga ma hohailoa gea la wato ngohi tahingahu-ngahu abe ko o Yahudi ma nyawaikaua ma titi to Kristusu ai owa abe ngone ai nyawaino. De gea ai owa duru ma amoko de duru ka irahaiholi hiadono ko hakunua ngone hatuga, de nanga hiningaka enangoo ko aboaikaua genangika.

⁹ De gea Ma Jou ai mauoo la gea ngohi tahitararono o nyawa mata-mataika abe ma titi hokokia wodiai ai hidee ma dogogono gea abe ma dodihiraino de ka wagogonohi o nyawaino. Angamoi Ma Jou, Una mata-mataika wotobatulaada, de ngaro duru ma dodihirakahi gea, masara nagau ai hiningaka ai hidee naa abe wato ahao wodiai. Masara gea duru ma deka-dekanuku wagogono ai hidee ma dogogono gea ka Unangoka dika.

¹⁰ De gea ai hininga wato ma oraha naa de wahimatoko ma dogogono gea, abe ai dogogono wato ngaro o Yahudi ma nyawa de ngaro abe ko o Yahudi ma nyawauaoo, masara o nyawa mata-mataino de wonahidadi ngone o badanga moi, ho gea hodadi to Una ai gareja. De gea ai hininga ma dumutu la wahimatoko mata-mataika abe naga de ma kuahaka, ho ngaro daku ma hoanino eko daku o Horogaka, ma gea mata-mata ka idadi yolega Ma Jou ai gareja ma nyawaino. De gea yolega de ahao ihioriki itararono abe hokokia ai sosawaro ma amoko de hokokia ma ngoe ai tobahioriki ma lako hiadono Una wonahidadi ngone o badanga moi abe ai garejaka.

¹¹ De gea ai hidee duru ma dodihirakahi de hokogea wonahideeokau wato ahao wodiai. De naa ai hidee wohingodumoka de gea ma titi nanga Baluhu o Yesusu Kristusu ai datorino.

¹² Ho mangale ma titi nanga rimoi de de o Yesusu Kristusu de abe nanga ngongaku Unangika ho gea hiadono ngone ka idadi hoboa Ma Jou ai himangino de ko himodongua angamoi gea ngone hohioriki abe Una wonadafongoka. Ho gea hiadono ngone hotomoroini hotemo Unangika.

¹³ Ho naa ngohi duru togahoko nginika la ufa nia hininga ihuhaholi ma titi ihihikangela ngohino. Angamoi ngaro ahi kangela naa ma titi nginioka, abe o Abari ma Rorahai tinihingahu-ngahu abe ngini ko o Yahudi ma nyawaikaua, masara gea ufa iniruwae nia hiningaka. Angamoi ahi kangelaino gea de idadiokau ti ngini nia utumu hidutu Ma Jou ai hidoaka ma owa itagi nginikaoo!

O Paulusu wagahoko Ma Jouiye ma titi ona abe ahao yabasa ai hurata naa

¹⁴ Ho mangale ma titi abe to Una ai owa duru kohaamoko wonahidoakoka ngoneino la hodadi moi ai himangoka, ho naa ngohi tatilabukuku de tomaniata nanga Babaiye.

¹⁵ Abe Una gea nanga wowango ma titi, angamoi ngone mata-mata Unangoka de aino wonatulaada, de ngaro naa o duniaka de ngaro daku o Horogaka, masara ngone mata-mata hokokiboa Unangoka.

¹⁶ Ho naa ngohi tatilabukuku de tomaniata nanga Babaiye de naa tinigahoko Unangiye la ahao winihiputurungu nia hiningaika abe de ai kuaha duru kohaamoko Ma Jou o Womahino. De ma buturungu gea ka idadi winihidoaka angamoi Unangoka naga itou-touniye de ai medebini ma dararono, de gea ena duru ko iwa ma baha Unangoka.

¹⁷ De gea tinigahoko la o Kristusu ka idadi womanoa ngini homoi-homoi nia hiningaka ma titi nia ngongakuino, de abe tato la ngini nia ngongaku utuohi idogo Unangika, la utuohi nimaketebiaha de Una nia borihiningaka. De gea ngohi toigo la ngini duru nimahingutukuku Ma Jou ai dorauku la ufa genangoka de nikelu-kelu.

¹⁸ De hokogea tinigahoko Unangiye kangano la to Una ai buturungu gea nia kokihiningaka ka idadi inihiakunu hiadono duru niataoko itiai abe Ma Jou ai dora gea hokokia ma ngoata, de hokokia ma gurutika, de hokokia ma lukuku, de hokokia ma gurutiye abe ai dora gea ngoneino. De gea tanu to Una ai nyawa mata-mataika koaho onangoo yataoko itiai abe hokokia ma amoko to Una ai dora onangika.

¹⁹ De gea ngohi toigo la ngini duru nihioriki abe o Kristusu ai dora gea abe tanu ngone o nyawa ko hakunua hohioriki angamoi duru ilamokoholi de ko haboaikaua genangika. Masara tanu koaho ai dora gea niataokoka, angamoi gea de ahao nia wowangoka duru aomangoka de Ma Jou ai hininga la hiadono ka idadi nimaaduru abe hoka to Unangoli ai hininga. Hokogea ngohi tinigahoko Unangiye ma titi ngini.

²⁰ Ho naa koaho ngone hihigiriiri Ma Jouiye! Angamoi Una gea ka wakunu wodiai mata-mataika abe ngone homagahoko eko hafikiri. De gea ngaro o kia dika abe ngone ko homagahokuahi eko nanga hininga ko akunua afikiri genangika, masara Una ka wakunu mata-mataika wodiai. De gea wodiai de wapake de to Una ai kuaha abe itobakarajaanga to ngone nanga hiningaka.

²¹ Ho gea duru itiai ngone hihigiriiri de hihoromati Unangiye ma titi ngone naa hodadioka to Una ai gareja ma nyawa de gea ma titi to ngone nanga gogao o Yesusu Kristusika. De gea ai horomati kiani ka ihikaika wamake naa de ka hiado-adonika. Amin.