Efesusu 2 - Ma Jou ai Demo-demo o Totobelohoka

Ma Jou wonahiwango de o wowango ma hungi

¹ De abeika Ma Jou ai owa de ai kuaha abe wodiai ti ngini nia wowangoka ka ma dodihirainohi. Abe gea ma dihiraino de ngini ko iwahi nia wowango Ma Jou ai himangoka ma titi nia howo-howono Unangika de abe niatotilakuru to Una ai mauika.

² De ngini ma oraha gea nia wowango ma goronaka de gea nimaaduru dika abe hoka o dunia ma nyawa utu yowango manga howo-howono ma goronaka. De gea ngini nianiiki dika o Ibilihi ma haeke ma hininga, abe ena gea hohiromanga hato daku ma hoanino ma hidimono ikokurutiye ena gea. De o toka-tokata ma haeke gea ena abe ma oraha naa ka ikarajaangohi o nyawa manga hiningaka la ona duru yoluku iwihingounu Ma Jouika ho hiadono yahowo-howono Unangika.

³ De igoungu, nako ma dihiraino gea ngone mata-mata nanga wowango ka imaketero dika abe hoka onangoli, angamoi gea hatobaniiki nanga hininga ma dorou. Ho gea ngaro abe nanga hiningaka ma horoodo eko nanga badanga ma hafini ma dorouika, masara gea haniiki dika la hato homahisosanangi. Ho abe igoungu ngone ma oraha gea ka homaketero dika hoka o nyawa utuoli mata-mataika, ho gea tanu itiai nako ma oraha gea de Ma Jou ai ngamo inakokidaene ngoneoo ma titi nanga howo-howono to Una ai himangoka.

^4-5 De ngaro ngone hokogea ma dihiraino hoka hohonengoka to Una ai himangoka, masara Ma Jou Una ka wonahidawango ka ma moi de o Kristusoli. De gea wonaduhunu ma titi to Una ai hininga ma dora kohaamoko ngoneino. Ho ngaro ngone nanga howono ma goronakahi de nanga honenge ma goronakahi, masara Una ai hininga ma dora nagahi ngoneino, ho wonahiwango genangino. De gea ma titi Ma Jou ai hininga ma owaka dika de aino hiadono wato wonaduhunu.

⁶ Angamoi ngone gea hohonengoka to Una ai himangoka, ho Ma Jou wonahidomomiki ka ma moi de o Kristusu, de ahao Una wonahidogogere moi o Yesusu Kristusoka abe o Horogaka la ngone ka idadi o dunia hohipareta angamoi ngone to Una ai datekoka. De abe ma titi ngone wonahidomomikoka de Una de hiadono wonahidogogere moi Unangoka, gea mata-mata ma titi abe ngone hoimoi de o Yesusu Kristusu.

⁷ De abe Ma Jou wonaduhunu, gea ai hininga ma dumutu wato ka idadi wohimatoko o dunia mata-mataika abe hokokia ma amoko ai hininga ma owa ngoneino. Ho ma oraha genangoka de imahikaika de ahao o dunia mata-mataika ka idadi yamake ai hininga ma owa ngoneino, abe gea ko moiua yakunu yaetongo eko yatuga angamoi duru ilamokoholi ai hininga ma owa ngoneino. De gea ai owa wohimatoko o Yesusu Kristusu ai datorino abe gea wodiai la wonaduhunu ngone.

⁸ De abe Una winiduhunoka nia howo-howonino, gea Una winiduhunu ma oraha niwingaku Unangika mangale ma titi to Una ai hininga ma owaka dika de aino hiadono winiduhunoka. De gea duru ko nginiua abe nimaduhunu la niato nia howo-howonino nimangofi, masara gea to Ma Jou dika ai hidoaka ma owaka de aino nginika.

⁹ De gea duru ko ma titiua la ti ngini ma hirete nia karajaanga eko nia datoro ma hasili de hiadono nimaduhunu, ho done o nyawa onagona dika de yomasade ma titi genangino.

¹⁰ Angamoi ngone naa to Ma Jou ai giama ma hasili, abe Una gea wonatulaada de gea wonahidoaka o wowango ma hungioli o Yesusu Kristusoka. De abe wonahihungi, hokogea wonadiai ngoneino angamoi to Una ai hininga la wato ka idadi ngone o datoro ma rorahai hodiai nanga wowangoka. Ho gea ma dodihirainohi de Una wonahideeoka wato kiani nanga wowango ma hungi gea hapake la ma datoro ma rorahai ngone hotobadiai.

Ngone o nyawa mata-mata o Kristusu wonahiketerimoi abe Unangoka

¹¹ De abe ngini ko o Yahudi ma nyawaua, abeika nimahohininga abe ngini hokokia ma dihiraino. Abe ma oraha gea o Yahudi ma nyawa iniemono nginika angamoi ngini inietongo ko o huhuna ma nyawaua. De nako ona o Yahudi ma nyawa, ona gea yomagoraka abe ma titi ona yomahunaka ho yamao abe ona yororahai dika Ma Jou ai himangoka. De gea ngone hohioriki abe o huhuna gea o nyawa manga giama dika ma karajaanga abe yodiai manga badanga ma poretino de gea ko yaduhunua manga hiningaika. Masara ona gea ato bote yaduhunu ona Ma Jou ai himangoka la wasanangi onangika, de gea ho hiadono ona yomagoraka.

¹² De masara ngini kiani nimahohininga abe ma dihiraino gea de ngini igoungu nimakitingakoka de o Kristusu. De nako Ma Jou ai nyawa abe ma titi o Isiraele ma nyawa, ona gea inietongo o nyawa ma homoa dika, abe ngini ko niamakeua o behehongo ma owa muruono naga abe Ma Jou ma dihiraino wahibehehongo o Isiraele ma nyawaika wato ahao wahidoaka onangika. Ho ma oraha gea ngini nimanoa ka o duniakahi dika de gea duru ko iwa nia gogao Ma Jouika, ho nia nganganono abe ahao ma rorahai niamake, gea enangoo duru ko iwa.

¹³ De ngaro ma dihiraino ngini hokogea, masara ma oraha naa ngini ko hokogenangokaua ma titi ngini naga o Yesusu Kristusoka. De igoungu ngini ma dihiraino ko nia gurutika abe ngomi o Yahudi ma nyawaino, masara ma oraha naa de ngini winihiboaino Unangino la gea ka idadi nginioo naga nia gogao de Una abe imaketero hoka ngomioli mia gogao naga Unangoka. Ho ngaro nia nganganono abe ahao ma rorahai niamake, de ngaro Ma Jou ai behehongo ma owa, ma ena gea mata-mata ma oraha naa itagi nginika, de ko inietongokaua o homoa ma nyawa. De hokogea idadi ma titi o Kristusu wohonengoka de ai awunu iuihi la genangino winihigagao Ma Jouika.

^14-15 Angamoi o Yesusu Una gea igoungu nanga dame ma titi, abe Una gea wonahikadameoka ngomi de abe ngini ko o Yahudi ma nyawaua la gea hodadi o badanga moi. De naa tonaleha, sarakia o Yesusu Kristusu wodiai la wonahikadame ngini de ngomi de hiadono hodadi moi Unangoka? De gea ka idadi wonahikadame abe ma titi wohibobaha o Musa ai Pareta abe to ena ma hiaturu de ma huhuloko naga kohangoe. De ma Pareta gea Una wohibobaha abe ma oraha ai badanga womahidoaka la wonahihupu to ena ma kuahaino. Angamoi mangale ma titi ma Pareta gea ma dodihiraino ho hiadono ngone ka ihikaika homakodohata, de nanga dohata gea idadi hoka o hikatingaka ma dadatoko. Masara gea nanga dohata Una wohibinaahaka la wonahikadame ngone. De gea ka idadi hohiketero hato Una gea hoka wohiwederoka ma dadatoko abe nengokadauino gea inahikatingaka ngomi de ngini. De gea wohibobaha angamoi ai hininga ma dumutu la ngaro ngini abe ko o Yahudi ma nyawaua de ngaro ngomi o Yahudi ma nyawa, masara Una woigo la nanga doomu hinooto de naa wonahidadi ka o doomu moi dika abe ngone homoi-homoi nanga gogere ma hungi de gea hokokigogere Unangoka dika. Abe Una wato ko idadiua ngone to Una ai nyawa o doomu hinooto abe to ngone nanga nganganono de nanga hininga imaketemomomoi, masara ai hidee la ngone mata-mata duru hoimoi dika nanga hininga ma dumutu. Ho duru ma titi Unangoka hiadono ngini de ngomi wonahikadameoka.

¹⁶ De gea wonahikadame ma titi ai hohonenge o gotaino de gea waofioka to ngone nanga dohata abe nengokadauino ka homakodohatohi ngini de ngomi. Ho gea wonahikadameokahi ngone naa o doomu moioka, de ahao Ma Jou wonahiketerimoi ngone de Unangoli la ka idadi nanga gogao Unangika naga.

¹⁷ Ho Una gea woboa de o Abari ma Rorahai wohingahu-ngahu ngone mata-mataino. De ngaro ngini abe ko o Yahudi ma nyawaua ho ma dihiraino nimakitingaka ma gurutika de Ma Jou, de ngaro ngomi o Yahudi ma nyawa abe wiwihiorikoka Unangika ho hiadono ngomi hatoli mitigi Unangika, masara gea ngone mata-mataino wonahingahu ai Abari ma Rorahai la wonahikadameoka ngone de Ma Jou hiadono ka idadi nanga rimoi naga ngone de Una.

¹⁸ Angamoi gea ma titi to Kristusu ai datorino hiadono ngone mata-mata, ngaro ngone o Yahudi ma nyawa eko koua, masara ngone mata-mataika ka idadi hoboa Ma Jou nanga Baba ai himangino. De abe ngone hoboa ai himangino, gea hoboa ma titi Ma Jou o Womahoka de aino, abe gea Una womatengo dika, masara ngone homoi-homoi hiborimakeoka nanga kokihiningaka.

¹⁹ Ho mangale Una winihikadameoka ho hiadono ngini abe ko o Yahudi ma nyawaua, ngini naa ko o homoa ma nyawakaua de ko iniolukokaua. De gea inidafongoka angamoi Una wonahiketehirimoioka ngini de ngomi o dutu moi, abe ngomi ma dodihirainohi de imihiromanga abe Ma Jou ai nyawa. Ho ma oraha naa ngini de ngomi hodadioka hoka o tau moi abe ngone o ria-dodoto moi de hokokibaba Unangika angamoi ngone hodadioka to Una ai ngofa-ngofaka.

²⁰ De naa ka idadi tonahiketero ngone mata-mata tato ngone hoka o tau moi abe Ma Jou Una ma hirete womaatau la wato idadi to Una ai ngi abe watingakoka Unangino. De gea ka idadi hohiketero hato nako Ma Jou ai tau ma lifunu abe duru ihira yakelengauku dau ma tonakuku, de gea o Yesusu Kristusu Una ma hirete wodadi hoka ma tau ma lifunu ihira. De nako ma tau ma lifunu utu, nagali ona o hidingoto ma nyawa abe yahingahu-ngahu ai Abari ma Rorahai o nyawa utuika, de ona utu naga abe ihitobademo Ma Jou ai Demo-demo manga gogianongoruika. De ona o doomu hinooto gea ka idadi hahiketero abe hoka Ma Jou ai tau ma lifunu abe ihitoturuino yakelengauku, angamoi ona gea iwihidoduruino nanga Baluhu.

²¹ De abe ngini utu niwingaku-ngaku, nginioo hoka o tau ma kiahonanga de Una winipake ai tauoka. De gea duru wohidodiai winihikodofanga ngini de ngomi la hiadono hodogo-dogo howoe de gea hodadi to nanga Baluhu ai tau ma gahumu abe duru ihailoa de itebini.

²² Ho ngini abe ko o Yahudi ma nyawaua, nginioo o Kristusu winihikodofanga de nanga gogianongoru utuika la ngone mata-mata hodadi o ngi moi abe Ma Jou duru wosanangi watingaka Unangino, de hiadono hodadi o ngi moi abe o kiaka Ma Jou o Womaha ka idadi womanoa ngoneoka.