Efesusu 1 - Ma Jou ai Demo-demo o Totobelohoka

O Paulusu ai demo ihira-hira onangika

¹ Ahi gogianongoru o Yesusu Kristusoka abe o Efesusu ma kotaka nimanoa. Ngohi naa o Paulusu, abe Ma Jou wohiirikoka ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De o hurata naa tohidingoto abe ngini niwingaku-ngaku o Yesusu Kristusika abe Ma Jou winitinga-tingakoka ngini Unangika.

² De ngini mata-mata tinigahoko Ma Jou nanga Baba de o Yesusu Kristusu nanga Baluhiye la ai owa de ai hininga ma miriidi winihidoaka nginika.

Abe hokokia Ma Jou wonahiowa ngoneino ma titi nanga gogao o Yesusu Kristusoka

³ Ahi gogianongoru, naa ngohi tinihigaro ma titi ma hidoaka ma owa mata-mata abe ngone hamakeoka. De nanga hidoaka ma owa gea ikokiboa Ma Jouoka de aino, abe Una gea to nanga Baluhu idodutu o Yesusu Kristusu ai Baba. De ai owa gea o Horogaka de auku iboa ngoneuku. De gea wonahiowa ma titi abe ngone hodadioka o Kristusu ai nyawa. Ho mangale ma titi Ma Jou wonahiowaka ngoneino de to Una ai owa mata-mata ho duru itiai abe ngone ka ihikaika hihigiriiri Unangika.

⁴ Ho naa tonahihohininga ma titi ai hidoaka ma owa duru ma hohailoa abe Ma Jou wonahidoakoka. De abe ai owa ihira-hira, duru ma dodihiraka abe o dunia naa ko wotulaadauahi de Una wonairikoka ngone abe ahao hingaku Unangika la ahao hodadi to Una ma hirete ai nyawa duru ma hohailoa. Abe Una wonahideeoka wato womadingaka ngone mata-mata la homakohowono de o nyawa utu. De gea ihititi ai hininga ma doraka ngoneino ho hiadono wonahidadi la ngone hotebi-tebini de ko iwaka nanga howono to Una ai himangoka.

⁵ Ho gea duru ma dodihirakahi de Una wonahideeokau wato ahao ngone hodadi to Una ma hirete ai ngofa-ngofaka! De gea ma titi to Una ai mau de ai hininga ma rorahai dika ngoneino hiadono wipake to Una ai Ngofaka o Yesusu Kristusu ai datorino la ai hidee gea idadioka. Ho gea igoungu abe o Kristusu ai datoro o gotaka dika ma titi hiadono ngone hodadi Ma Jou ai ngofa-ngofaka.

⁶ Abe Una wipake ai Ngofaka gea abe duru widora Unangika la ma titi Unangino de duru wonahiowa hiadono ngoneoo hodadioka ai ngofa-ngofaka. Ho mangale ma titi ai hidoaka ma owa duru ihohailoa gea hiadono ngone naa koaho hotarimakase de hihigiriiri Unangika ka hiado-adonika!

⁷ De naga ai hidoaka ma owa moioli hamake Unangino ho hiadono ngone koaho hihigiriiri Unangika. Abe igoungu ma dihiraino de ngone hodadi hoka o howono ma gogilaongo angamoi ka hatobahowo-howono, masara ipahaino de o Kristusu wonabanguoka la ko iwaka nanga papakiti o howonika, ho ngone naa wonahiluasoka. De o Kristusu ai bobangu gea tanu ai awunu abe iuihi ma oraha wohonenge o gotaka. De gea ma titi wonabanguoka de ai awunu hiadono nanga howono Ma Jouika wakokiofioka. De abe Una waofi nanga howo-howono, ai datorino gea de duru itaana abe to Una ai hininga ma owa duru ilamokoholi de iwoeholi abe itagi ngoneino!

^8-10 De mangale ma titi ai hininga ma owa ngoneino gea hiadono nagali nanga utumu moioli, abe Una wonahingahuoka ai hidee abe ma dihiraino de o nyawa ko moiua ihioriki. Abe naa ma duru wonahimatoko ngoneino ai hininga ma hidee abe hokokia wipake ai Ngofaka ai datorino la ai hidee gea ingodumoka. De gea wonahimatoko la ngone duru hososawaro ma titi ai hidee gea. Abe wonahingahuoka wato ahao nako ma oraha adonoka, gea de ahao Ma Jou wahiaturu mata-mata o duniaka la ka idadi ai Ngofaka o Yesusu Kristusu wahikokipareta mata-mataika. Abe o kia-kia dika naga, ngaro daku ma dihangoka de ngaro abe naga o duniauku naa, masara o Kristusu wodadi mata-mataika ma Baluhu idodutu. De hokogea Ma Jou ai hidee abe ma titi hokokia ahao idadi ma oraha nanga himangoka, de ai hidee gea wonahingahuoka ngoneino ma titi ai hininga ma owaka de aino ngoneino.

^11-12 De moioli naga Ma Jou ai hidoaka ma owa ngoneino abe de nanga gogaooka o Kristusika, de gea abe wonahidadi ngone to Una ma hirete ai nyawa, ho ka idadi hobaluhu ka Unangika dika! De ma hidoaka ma owa gea Una wonahideeoka ka ma dodihirakahi. De gea wonahidee wato ngone abe hohira homahinganono o Kristusika, ngone naa hodadi to Ma Jou ai nyawa. De mata-mata gea Una wohikaaturu de wodiai la hiadono idadi abe duru imakiniiki de to Una ai hininga ma dumutu. Ho mangale ma titi Una wonahiowa de ai hidoaka ma owa mata-mata gea ngoneino, ho koaho ngone ka ihikaika hihigiriiri de hotarimakase Unangika ma titi ai hininga ma rorahai gea!

^13-14 De ai hidoaka ma owa ngoneino ko hokogenangua dika! Nagali abe wonahidoaka to Una ai Womaha ngoneino! Abe naa ma duruika de ngini niihene o hingahu ma gou-goungu ma titi o Kristusu, de gea o Abari ma Rorahai abe hokokia Ma Jou ka idadi winiduhunu nia howo-howonino. De gea niihene ibooto de nginioo niwingaku o Kristusika. De ma oraha gea niwingaku de Una wihidingoto Ma Jou o Womaha nginika la wogogere nia borihiningaka, abe gea idadi imaketero hoka Ma Jou ma dodihiraino wohibehehongoka wato ahao wihidoaka Ma Jou o Womaha ai nyawa homoi-homoiika. De mangale ma titi ai Womaha womanoa nginioka ho gea inihitaana abe nidadioka to Ma Jou ai nyawa. De nagali abe Ma Jou o Womaha nginioka wodadi nia hingaku ma dodunguu, abe mangale ma titi Una naga womanoa nia kokihiningaka ho ahao ngini niamake nia utumu abe ma dodihiraino de Ma Jou wonahibehehongoka ngone ai nyawa mata-mataino. Ho ahao naga ma oraha adonoka abe Ma Jou wonahidoaka ngoneino nanga utumu, de ma oraha gea ahao ti nginioo nia utumu duru ingodumu Unangoka de aino nginino. De ai hidoaka ma owa mata-mata ngoneino gea duru ihohailoaholi, de gea duru tosanangi tonahihohininga la ngone naa ka idadi duru hotarimakase de hihigiriiri Unangika ma titi ai hininga ma hohailoa ngoneino!

O Paulusu wagahoko Ma Jouiye ma titi ona abe yabasa ai hurata naa

^15-16 Ho mangale ma titi to Ma Jou ai owa gea mata-mata ngoneuku ho hiadono ngohi naa duru ka ihikaika totarimakase Unangiye ma titi ngini mata-mata, angamoi nginioo niamakeoka to Una ai owa abe imaketero hoka ngohioli tamakeoka. Abe nengokadau toihene ma titi nia ngongaku nanga Baluhu idodutu o Yesusika de abe nia doraoo itagi Ma Jou ai nyawa mata-mataika. Ho genangoka de aino ka hiadono ma oraha naa naga ngohi duru ko tomatogu-togumua totarimakase Unangiye ma titi ngini abe ma oraha tomaniata.

¹⁷ De gea tinigahoko nanga Baluhu idodutu o Yesusu Kristusu ai Jouiye, abe Una gea nanga Baba duru de ai medebini ma dararonoka. De gea Unangiye tinigahoko la winihisawaro ngini nia hiningaika, de o tobahioriki winihimatoko la utuohi itararono ngini niwihioriki Unangika.

¹⁸ De gea tinigahoko Unangika la winihitararono ti ngini nia hiningaika la hiadono ngini niakunu niataoko itararono abe hokokia nanga utumu ma owa hamake ahao ma oraha nanga bobaha adonoka. Abe gea Ma Jou wonaahoko nanga ngongakuino de wonahideeokau wato ahao nanga utumu ma owa wonahidoaka ngoneino. De ngohi toigo la Una winiduhunu hiadono ngini nihioriki abe nanga utumu ma owa gea duru ihohailoa de duru ikokurutiye de abe gea ka wonahidoaka dika ngoneino abe wonatinga-tingakoka. De ma titi gea ena hiadono ngohi tinigahoko Ma Jouiye la tato ngini ka idadi duru niataoko itararono nanga utumu ma owa gea.

¹⁹ De naa moiohi tinigahoko Unangiye ma titi ngini, la ka idadi niakunu nihioriki abe to Una ai kuaha ngone hingaku-ngakuino hokokia ma amoko de hokokia ma hohailoa. De ma kuaha gea ena abe Una wapake la wonaduhunu ngone. Abe tanu ai kuaha gea duru ilamokoholi hiadono nanga hininga ko aboaikaua genangika. Masara ngohi ka idadiohi tinigahoko Ma Jouika la winiduhunu nginika hiadono utuohi itararono niataoko ai kuaha hokokia ma amoko de hokokia ma hohailoa.

²⁰ De genangoo ma kuaha kohabuturungu abe Una wapake ma oraha o Kristusu wihimomiki ai honengino de wihigogere ai nirakoka. De abe ka genangokahi duru ikurutiye ma horomati ma ngi, ho genangoka ma Baba wihigogere o Kristusu o Horogaka.

²¹ De ai gogere ka enangohi duru ikurutiye nako de o kuaha utu mata-mataika. De ngaro o momalaekata de ngaro o toka-tokata o kia dika naga de ma kuahaka, de ngaro hokokia dika utu abe ihiromanga enangika ato de ma kuahaka, masara ka Unangohi duru wokurutiye de to Unangohi ai kuaha duru ipoputurungu. De ngaro ma oraha naa de ngaro ma oraha ahao dokengika, masara mata-mataika de ka Unangohi duru wokokurutiye.

²² De gea Ma Jou wihidoaka mata-mataika o Kristusika la wato o Kristusu mata-mataika wahikoano. Ho Una gea abe mata-mataika de ka to Unangohi ai kuaha duru ikurutiye, ho gea Unangoo Ma Jou wihidadi nanga haeke o garejaka la wato ngone o garejaka ma utumu hamake Unangoka.

²³ Ho ngone naa hoka to Una ai badanga, angamoi gea Una nanga haeke. Angamoi Una wohingodu-ngodumoka ai garejaika ho ngoneinoo naa duru ingodu-ngodumoka, de ko iwaka ma kuranga. Abe gea Una watobangodu-ngodumu o kia-kiaka dika naga mata-mataika la gea ena ingodumoka, ho ngoneoo abe ai garejaka wonahingodumu. Hokogea tinigahoko Unangiye ma titi ngini, la ngini nia hiningaka duru itararono niataoko ai owa de ai kuaha mata-mata gea abe ngone hingaku-ngakuino.