Dodadi 9 - Ma Jou ai Demo-demo o Totobelohoka

Ma Jou ai behehongo o Nuhika

¹ De ahao Ma Jou wahiowa o Nuhi de ai ngofa-ngofaka abe wahibehehongo onangika wato, “Ngohi toigo la ngini naa ningofa-ngofakuku de nidano-danonguku la nidogo-dogo hiadono duru niwoe o dunia ma amokika.

² De o aewani de o totaleo mata-mata de ma wowangoka o dunia ma lokuoka ahao naa imulaenge inimodongo. Ho ngaro o aewani o tonakoka, de mata-mata de ma gafuufuoka abe ihoho ma hoanoka, de o aewani abe imalia-liara, de o nawoko o gahioka ma, mata-mata ahao de ma hawanoka nginika. Ho ena mata-mata ngohi tinihidoaka nginika la ti ngini nia kuahaka la ka idadi nihiaturu.

³ De mata-mata de ma wowangoka gea ahao naa enangoo tinihidoaka ho ka idadi ti ngini nia inomo. Abe hoka ma dodihiraka tinihidoakoka o kia dika iwangoiye o tonakino de ma hofokoka abe o joroino de o lubenganino la idadi gea ti ngini nia inomo. De naa tinihidoakoli o aewani la ngaro o aewani ma roehe eko to ena ma hofoko abe o tonakino iwangoiye ma, ena mata-mataino idadi nia inomo.”

⁴ De Ma Jou ka wohigila-gilahi ai demo o Nuhika wato, “Abe o aewani ma roehe ka idadi naa niaolomo masara ko tinihigunoaua ma roehe gea niaolomo nako de ma awunokahi. Angamoi abe ihiwango o aewani gea ma awunino ho hiadono nako ma roehe de ma awunokahi ko idadiua niaolomo.

⁵ Ho ngini o nyawa ka idadi o aewani dika nimaadoma masara nako o nyawa duru ko idadiua niatoma mangale nginioo o nyawa. Ho ngaro o nyawa eko o aewani ma nako inihikangela hiadono nihonenge gea Ngohi tato kiani naga ma hibalaha. De hokonaa Ngohi tahohowono de ti ngini nia giamino ngaro o aewani eko ngaro ti ngini nia dutu adaene:

⁶ Onagona dika abe o nyawa utu manga awunu yakopoa, To onangoo manga awunu kiani ahao o nyawa utuoli yakopoa, Mangale o nyawa ngade-ngade hoka Ngohi Ma Jouoli, De angamoi hokogea Ma Jou wahidadi o nyawa, Ho hiadono ko idadiua o nyawa niatoma.

⁷ Abe to Ngohi ahi mau nginika la gea ningofa-ngofakuku de nidano-danonguku la nidogo-dogo o dunia ma amokika. Ho kiani nifaa-faatuku o dunia ma lokuoka la hiadono niwoe.” Hokogea Ma Jou wihibehehongo o Nuhika.

Ma Jou ai behehongo ma dodunguu o ngawatoro

⁸ De ahao naga ma titi moiohi Ma Jou woigo wahingahu o Nuhika de ai ngofa-ngofakika.

⁹ Ho wahibehehongo onangika wato, “Naa Ngohi tinihidoaka ahi behehongo nenanga nginika de hiadono ti ngini nia totoforaukuoo tahidoaka ahi behehongo naa.

¹⁰ De ahi behehongo naa adaene mata-mataikaoo abe o kapaino ikokihupuoka. Ho ngaro o totaleo, de o aewani o dofo de o fuhuku, ma titi mata-mataika de ma wowangoka o dunia ma lokuoka tohidoaka ahi behehongo naa.

¹¹ Hokonaa ahi behehongo ngini mata-mataika: o nguihi ma amoko gea ko iwaka o duniaka abe ihidulufungu mata-mataika de ma wowangoka. Ho ka hiado-adonika de mata-mata igogere o dunia ma lokuoka ko tohibinaahakauali de o nguihi.”

¹² De Ma Jou ka wohigila-gilahi ai demo o Nuhika wato, “De ahi behehongo ma dodunguu naga la ngini de nia totoforauku de mata-mata de ma wowangoka o duniaka ka ihikaika ka idadi yamake.

¹³ O dodunguu gea Ngohi tohidadi o lobioka de gea ahi ngawatoro abe ka de o nyawa yamake de yomahohininga ato, ‘Igoungu, gea Ma Jou ai behehongo ma dodunguu abe ko wonahibinaahakaua de o nguihi.’

^14-15 Abe ma oraha Ngohi Ma Jou o lobi tohiboaino o dihangoka de ahao o ngawatoro tohiboa de Ngohioo tohohininga ahi behehongo nginika de mata-mataika abe de ma wowangoka. Mangale Ngohi ko tohigunoakauali la o akere yanguihi hiadono o nyawa de mata-mata de ma wowangoka yahibinaaha.

¹⁶ Abe ka de o ngawatoro gea idadi o dihangoka de Ngohi tomalega enangika, abe ihitunguu ahi behehongo ka hiado-adonika gea. De Ngohi duru ko tawohangua o behehongo gea Ngohino, Ma Jouino, abe tohibehehongoka mata-mataika de ma wowangoka o dunia ma lokuoka.”

¹⁷ Hokogea Ma Jou ai behehongo wihitararono ma titi o Nuhika abe wohitunguu ai behehongo de o ngawatoro mata-mataika abe iwango o dunia ma lokuoka.

^18-19 O Nuhi ai ngofa-ngofaka abe youti o kapaino ka ma moi de manga baba, yahange dika de manga romanga o Seeme, o Haama, de o Yafete. Ho o dunia ma nyawa mata-mataika yomaboa o Nuhi ai ngofa-ngofakino ngaro o dunia ma amokika o nyawa yomahikokabarihika ma, yahangeino gea to ona manga tofora mata-mata. De o Haama to una ai ngofaka womatengo ai romanga o Kanani ho o Kanani ma nyawa manga tofora o Haama.

O Kanani wamake o hohowono de o Seeme wamake ma owa

²⁰ De o Nuhi woigo womaredi ho ahao o angguru wodatomo ai redioka.

²¹ De o wange moi ai angguru ma teongo ma gohaka waokere ilamoko hiadono iwidaluku. De una naga womatengoka ai tau o ngoerino ma goronaka iwikiookoka. De ai giooko ma goronaka womaidu ka ai bululunoka de ko wohiorikua.

²² De ahao o Kanani ai baba o Haama wowohama o Nuhi ai tau ma goronaika de wimake ai baba ka ai bululunoka. Ho ka de wohupuino de wihiade-ade ai ria-riakika.

²³ Masara o Seeme de o Yafete ona duru ko yoietua masara yale dika o ngoere moi de yoaridobiki ihilake-laketuku manga belekauku. De ahao yowohama yomadoo-dohuku manga porete yaika la ufa manga baba iwimake ka ai bululunoka. Ho manga himanga o ngoranika de ko yomalegaua manga poretika. Ho manga baba iwitamunu ibooto de yohupu ma ngoranika ho duru ko iwimakeua abe manga baba ka ai bululunoka gea.

²⁴ De gea o Nuhi ahao ko iwidalukokaua angamoi wowangoroka de naga iwihingahu abe kangano o Haama wihiade-ade ai baba, ho ai hiade-ade ma demo gea woihene.

²⁵ De gea o Nuhi woihene de duru ko wosanangiua ho ma titi o Haama ai howono gea hiadono o Nuhi ahao ai ngofaka gea wigahoko Ma Jouika wato, “Ma Jou nihohowono o Haamika, Hiadono ai hohowono gea ahao iwihidotadaene ai ngofaka o Kananika, De to una ai totoforaukuoo yahidotadaene, Ona yokokidadi manga ria-riaka manga huhuloko yahitipokouku.”

²⁶ De ahao o Nuhi wagahokoli o Haama ai ria-riakoli de una ai romanga o Seeme wato, “Hihigiriiri Ma Jou o Yawe abe o Seeme womahibaluhu Ma Jouika, De Ma Jou ahao o Kanani ma nyawa abe o Haama ai totoforauku, Ahao wahidadi to Seeme de ai totoforauku manga huhuloko.”

²⁷ De ahao o Yafete unangoo ai baba wigahoko wato, “O Yafete de to una ai totoforauku manga tonaka Ma Jou wohiwoata, De hiadono ona de o Seeme ai totoforauku yomakuduhunu, De to onangoo manga huhuloko o Kanani ma nyawa, Abe manga huhuloko o Haama ai totoforauku gea.” Hokogea o Nuhi ai ngofa-ngofaka wagahoko Ma Jouiye.

²⁸ De o nguihi ipaha de ahao o Nuhi ai dekanohi wowango ai taongo o ratuhu hange de moritoa ma dekanino.

²⁹ Ho ai wowango ma dekana o duniaka ai taongo o ratuhu hiwo de moritoa de ahao wohonenge o Nuhi.