Dodadi 8 - Ma Jou ai Demo-demo o Totobelohoka

O nguihi iowaha

¹ De Ma Jou duru ko wawohangua o Nuhi de ai dodiawo ngaro o nyawa de o aewani mata-mata abe imanoa unangoka o kapa ma goronaka. De Ma Jou wohiboa o hidaloko la iwuwu o akere ma lokuino de o nguihi imulaenge iowaha.

² O kiaka naga o akere ibubungiye o tonakino gea ma biono imakahumokali. De gea daku o lobioka o awanoo abe ipuraraha koharikimi enangoo naa iogoroka.

^3-4 De iowaha o nguihi ma ngooto abe o dunia alufungoka de ka uku-uku iowaha. Ho ka de o nguihi imulaenge de genangoka de aino yaetongo ma wange, ho adonoka o wange o ratuhu moi de moritoa ma dekanino. Ho o mede motoaino de ahao ma akere iowaha hiadono ma kapa gea itiriioka o Ararata ma loku-lokuoka.

⁵ De ma akere ka uku-ukuohi iowaha ho ahao o mede hinooto de o wange ngimoi de hangeino ipahaika de ahao ona o kapaka ka idadi yamake o loku-loku ma tubu ikokipudaka o akerino abe o nguihi iowaha.

⁶ O loku-loku gea yamakeoka de ahao o mede moi de o wange ngimoiohi ipahaika de o Nuhi woigo watailako nako o tonaka yodudungu eko ko yodudunguahi. De naga o kapa ma jendela moi abe ma dihira o Nuhi wodiaiokau abe naa de ahao wafelenga ma jendela gea.

⁷ De waoino o jendelaino o totaleo o koyo-koyo de ena wahoho ma hoanika ho ihoo-hoho masara ngaro akaika akaino de ma tonaka ko yodudunguahi masara o koyo-koyo gea ko iliokaua o Nuhino.

⁸ De o koyo-koyo wahoho ibooto de o Nuhi ahao o totaleo moioli o namodaara moi waleino de enangoli wahoho ma hoanika wato, “Abeika, nako o akere iuti hiadono o namodaara naa ka idadi amake ma ngi abe genanguku ka idadi itangi.”

⁹ Masara o namodaara gea ka ilio o Nuhino o kapaino angamoi o dunia ka alufungohi de o nguihi ma akere, ho ko amakeuahi ma ngi abe ena ka idadi itangi genangoka. De o Nuhi wohidoakika ai giama la o namodaara gea iwidangi ai giamika de wohingohaminoli o kapa ma goronaino.

¹⁰ De o wange tumidino o Nuhi wodamaahi de ahao o namodaara gea wahoholi ho o kapaka de aino ihoho ma hoanika.

¹¹ De ahao o bobimaowaka de o namodaara gea ilioli o Nuhino de naga o saitunu ma hoka ma ngango atolokino. Ho ka de wamake o saitunu ma hoka gea de o Nuhi wato, “Naa ma dodunguu abe imulaengoka o tonaka ngade-ngade yodudungoka.”

¹² De o wange tumidohi o Nuhi wodamaa de ahao o namodaara gea wahoholi o kapaka la ihoho ma hoanika, masara naa ma namodaara gea ko iliokaua o Nuhino.

¹³ De ahao duru o wange gea o Nuhi ai ngumuru adonoka ai taongo o ratuhu butaanga de moi de ahao o akere iowaha o tonakoka mata-mataika. De o wange gea o Nuhi wafelenga o kapa ma katu de wolega-lega de wato, “Igoungu, naga o tonaka ahao naa imulaenge yodudungu.” Hokogea o Nuhi wotemo.

¹⁴ De o Nuhi wohiainohi ngade-ngade o mede hinootohi de ahao o tonaka yodudungoka hiadono itogowinokali hoka ma dihirali.

^15-16 De ahao Ma Jou wihuloko o Nuhika wato, “Nuhi, ngona naa nohupuoka o kapa ma goronaino, ngona de ngoni fekata de ani ngofa-ngofaka de manga feka-fekata ngini mata-mata nikokihupuoka.

¹⁷ De nohihupu mata-mata de ma wowangoka abe nimahidogogere moi o kapa ma goronaka ngaro o aewani eko o totaleo eko abe imalia-liara o tonakoka nohikokihupuoka. Mata-mata nohikokihupu la ka idadi ikokiwangoli o fara amomoiino la duru ifaa-faatuku o dunia ma lokuoka.” Hokogea Ma Jou ai behehongo o Nuhika.

¹⁸ Ho o Nuhi de ngoi fekata de ai ngofa-ngofaka de manga feka-fekata, ona mata-mata yokokihupu.

¹⁹ De mata-mata iwango o dunia ma lokuoka abe o totaleo, de o aewani o dofo, de o fuhuku, de o aewani mata-mata abe ikelu-kelu o tonakoka, gea o kapaino ikokihupu de o fara amomoi imahikokaaini. De o fara amomoiino ingodumu.

²⁰ Gea yokokihupu ibooto de o Nuhi womahohiningaiye wato womahuba Ma Jouiye ho wodiai manga huhuba ma ngi. Ho o huhuba ma ngi gea wodiai ibooto de ahao o aewani de o totaleo abe ka ma dihirainohi de Ma Jou o Yawe wato ka idadi yomahihuba, enangino naga wairikino o fara amomoiino. De o totaleo de o aewani mata-mata abe wairikino de gea ahao waharongo ka hiadono itinoka la ena gea womahihuba Ma Jouiye.

²¹ De o Nuhi ai huhuba ma bounu idoaiye de Ma Jou o Yawe waame de duru iwihisanangi ho hiadono womatemo ai hiningaka wato, “Ngohi ko tohipohakaua o tonakuku de o hohowono hokonaa. De ngaro o nyawa duru manga etetekinohi manga hiningaka ipuda yodiai ka itorou dika masara, mata-mata de ma wowangoka ngohi ko tahibinaahakauali de o nguihi. Abe hoka ipopahaino naa idadioka hiadono yakokilutu, masara gea duru ko todiaiokauali.”

²² De Ma Jou ka wotemohi abe wohibehehongo wato, “Ho, ngaro hokokia ma dekanika, ma Ngohi tohiaturu, La naa ena ka ihikaika naga o duniaka: Naga o nyawa manga bibiti yodatomo, De naga manga datomo ma hasili yaleino. Abe ka ihikaika naga o hauku de o maata, Naga ma oraha o hiwara de o awana, De naga ma oraha o fufutu de itawange, Ena mata-mata ko itogu-togumokaua, Hiadono o dunia ma bobahaika.” Hokogea Ma Jou wohibehehongo.