Dodadi 7 - Ma Jou ai Demo-demo o Totobelohoka

O nguihi imulaenge

¹ De mata-mata o Nuhi wohidiai ibooto de ahao Ma Jou o Yawe wihingahu o Nuhika wato, “Nuhi, naa ma oraha adonoka abe kiani ngini nikokiwohama ngona de ngoni fekata de ani ngofa-ngofaka de manga feka-fekata. De gea ka idadi ani kapaika niwohama mangale abe nako o nyawa mata-mataika ahi himangoka ma ka to ngonahi ani datoro itiai.

² De gea ngini niwohama de kiani ininiiki o aewani o fara amomoi. Abe o aewani o regu moioka abe ka idadi nimahihuba gea ena kiani nimagao o fara amomoiino atumi-tumidi utu ma nauru utu ma beka. De o aewani ma regu moioli abe ko idadiua nimahihuba gea ena niao o fara amomoiino ahohinooto dika la naga ma nauru de naga ma beka.

³ Masara o totaleo o fara amomoiino enangoo atumi-tumidi nao utu ma nauru de utu ma beka. Hokogea nodiai la o aewani de ma rupa amomoi ka iwangohi de ka idadi ahao ifaa-faatukuoli o dunia naa ma amokika.

⁴ Naa o futu tumidohi de ahao Ngohi o awana tohiguti o duniauku. De Ngohi tohiaturu la o wange moruatino ho o futuoo moruatino ma dekanino tohiguti o awana de ka hiadono ko iwa ma ngogoro. De ahao mata-mata o dunia ma lokuoka de ma wowangoka abe tatulaadaukuoka, ngaro o kia dika naga de ma womahoka, masara kiani tohiofi mata-mataika de o nguihi naa.” Hokogea Ma Jou wihingahu o Nuhika.

⁵ De o Nuhi, abe mata-mata Ma Jou o Yawe wihibehehongoka, gea ko moiua abe ko wodiaiua, masara mata-mataika wodiai duru imaketero de abe wihibehehongoka.

⁶ De o Nuhi ai ngumuru adonoka ai taongo o ratuhu butaanga ma oraha Ma Jou o dunia wohidulufungu de o nguihi gea.

⁷ De o Nuhi de ngoi fekata de manga ngofa-ngofaka de manga hunungu yahange gea yokokiwohamika o kapa ma goronaika. Yowohama la ufa hiadono onangoo yalutu o nguihoka.

^8-9 De nagali o aewani irupa-rupa enangoo ikokiwohamika o kapa ma goronaika ka ma moi de o Nuhi de ona abe ai tauoka. Abe naga iboaino o Nuhino ma nauru de ma beka o aewanino abe o dofoino de o fuhukino o fara amomoi. De ngaro o aewani o reguino abe ka idadi yomahihuba eko o reguino abe ko idadiua yomahihuba, ma enangoo kiani o pasanga amomoi iwohamika o kapa ma goronaka. De nagali o totaleo irupa-rupa de o aewani imalia-liara o tonakoka enangoo ma nauru de ma beka iboaino o Nuhino imaketero hoka Ma Jou wihibehehongoka o Nuhika wato kiani wao.

^10-12 De o futu tumidi adonoka de o wange gea o Nuhi ai ngumuru adonoka ai taongo o ratuhu butaanga. Ho abe ma mede ma hinooto de ma wange ngimoi de tumidoka de o awana imulaenge. De duru aniiki abe hoka Ma Jou wihibehehongoka o minggu ipopaha gea, ho naga dakuku o awana ipuraraha koharikimi de kohagiria. De duru o wange genangoo nagali o akere duru ibubungu o tonakiye abe ka ma dihirainohi o akere kohaamoko itoomuino o tonaka ma timiuku de naa enangoo ikokipootekiye. Ho imaribalaha abe dakukuoo de daukiyeoo o akere hiadono aomanga o dunia ma lokuoka. De o awana koharikimi gea hiadono o wange moruatino ho o futuoo moruatino ma dekanino abe ko itogu-togumua o awana gea.

¹³ Masara o Nuhi ko wohidodokanua de o awana gea abe o wange gea imulaenge, de ona nagau o kapa ma goronaka. De ona yowohamikaka o Nuhi de ngoi fekata de ai ngofa-ngofaka, o Seeme, de o Haama de o Yafete, de to ona manga feka-fekata.

¹⁴ De mata-mata abe ituonoka de o Nuhi enangoo ikokiwohamoka abe o aewani o dofo o fara amomoiino, de o aewani o fuhuku o fara amomoiino. De nagaoo o aewani abe imalia-liara o tonakoka ma ago-agomo de ma hohumuduru o fara amomoiino. De nagaoo o totaleo mata-mata abe de ma gafuufuoka o fara amomoiino, gea mata-mata ikokiwohamoka.

¹⁵ Abe o aewani mata-mata de ma womahoka o pasanga amomoi ikokiboaino o Nuhino de yomahikokaaini yokokiwohama o kapa ma goronaika.

¹⁶ De mata-mata gea iboa ma nauru de ma beka duru imaketero hoka Ma Jou ai behehongo o Nuhika. De ipaha mata-mataika yokokiwohamoka o kapa ma goronaika de ahao Ma Jou o Yawe ma hirete wahidatatoko o kapa ma ngorana gea.

^17-18 De o wange moruatinohi o nguihi ka idogo-dogo ma lukuiye o dunia ma lokuoka ho hiadono o kapa apudaka ho o tonaka atingaka ma gurutiye. De o nguihi ka idogo-dogo ma lukuiye hiadono duru ka ingoo-ngootika.

¹⁹ De gea ka iferohi hiadono o tonaka mata-mata awoongoka. Genangoo de ka iferohi hiadono o lokuoo ma, enangoo mata-mata yakokilufungoka.

²⁰ Ma genangoo de ka idogohi ifero ho hiadono ngaro naga abe o loku ma tubu-tubu ma gogurutiye masara enangoo yakokilufungu ka hiadono atilakuriye o mongoo iatiye.

²¹ De ikokihonenge mata-mata de ma wowangoka o dunia ma lokuoka. Abe o totaleo, de o aewani o dofo, de o fuhuku, de o aewani abe iwango o tonakoka ma hohumuduru de ma ago-agomo o duduono amomoiino, de o nyawa mata-mataoo, ma, ka ma moi yokokibinaahaka.

²² Abe mata-mata igogere o tonakoka de ma wowangoka, abe iti ka iwoma-womaha, gea ikokihonengoka.

²³ Duru ko moiua abe iwango o dunia ma lokuoka de ko ihonengua, ngaro o nyawa de ngaro o aewani. De ngaro imalia-liara dau o tonakoka eko daku ma hoanino ihoo-hoho ma enangoo ka ma moi iofioka o dunia ma lokuino. Ma hou yowangohi o Nuhiokahi de ngoi fekata de ai ngofa-ngofaka de manga feka-fekata de o aewani mata-mata abe naga o kapa ma goronaka.

²⁴ De ma dekanino o nguihi o dunia duru alufunguku adono o wange ratuhu moi de moritoaino ma dekana.