Dodadi 50 - Ma Jou ai Demo-demo o Totobelohoka

O Yakubu iwilungunu o Kanani ma tonakoka

¹ Ka de ai baba ai ngomaha itoakoka de o Yusupu widomotumuku de wigari de wibounu.

² De ipaha de wohiaturu la o Yakubu ai behehongo waniiki abe kiani iwilungunu o Makapela ma aruku ma goronaka abe o Kanani ma tonakoka. Ho ai baba ai honenge wohidoaka ai duduhunika abe yososawaro o nyawa manga honenge yotobahidiai la ufa yowedere. Onangika wahuloko la ai baba iwihidiai ai honenge la ko wowederua.

³ De ona gea manga karajaanga ka hiadono o wange moruata ma dekana de ahao iwibooto abe biaha hokogea manga dekana o nyawa yokokurutiye manga honenge yahidiai o Mesiiri ma tonakoka. De o Mesiiri ma nyawa manga huha ihitunguu o wange moritumidino ma dekana ma titi o Yusupu ai baba wohonengoka.

⁴ De manga huha ma wange moritumidi gea ipaha de ahao o Yusupu ai behehongo naga o Firaunika ho wahingahu onangika abe iwileleani ai datekoka wato, “Nako ngini ka idadi nihiduhunu ngohi togahoko la ahi behehongo naa niwihingahuokahi o Firaunika la una wonahigunoa hoiki.

⁵ Niwihingahu abe ma oraha ahi baba ngade-ngade wohonenge de tihibehehongo unangika la tilungunu ai tonakoka abe ahi tofora manga lungunu ma arukoka. Hokonaa ahi baba ai behehongo ngohino wato, ‘Ngohi ani baba o Yakubu naa etohonenge de togahoko ngonaika la nohilungunu ahi lungunoka abe nagau ngohi tomahidiaioka o Kanani ma tonakoka.’ Hokogea ahi baba ai behehongo ho naa toigo la o Firaunu wohihigunoa toiki tilungunu. De ka de tilungunu ibooto de ahao tolioli nenangino.” De o Yusupu ai behehongo ma demo gea yadofanga o Firaunika.

⁶ De o Firaunu wosanangi de ai behehongo gea ho wihingahu o Yusupika wato, “Safanata Panea, ngona ka idadi noiki nilungunohi ani baba hoka nihibehehongoka.”

⁷ Hokogea o Firaunu ai hininga yadaene ho o Yusupu woiki de naga ko manga ngoe yomakiniiki de o Yusupu. Naga o Firaunu ai duduhunu manga ngoe abe iwileleani ai datekoka yoiki de ngaro o Mesiiri ma tonaka ma amokika manga popareta manga dimo-dimono mata-mata ma, onangoo yoiki yomakiniiki de o Yusupu.

⁸ De o Yusupu wahiaturu la ai ria-dodoto de ai gogianongoru mata-mata onangoo ka idadi yaniiki yoiki manga baba iwilungunu. Masara manga ngofakokahi abe ka manga hohumudurohi yanoaika o Gosenoka de naga manga higoana. De to ona manga aewani ma duduono mata-mata enangoo kiani yanoaika de o aewani ma gogoana.

⁹ Ho gea ona mata-mata abe yoiki yomakutuono duru yodadi o dodagi moi kohaamoko ho kiani naga o goroba kohangoe yao. De naga ko manga ngoe o tentara abe de manga kudaka de onangoo o Yusupu iwiniiki.

¹⁰ Gea yomahiadono o ngioka abe o nyawa yapake la manga gandumu abe yautukino de genangoka yotobarero ma gandumu ma hofoko ma ngi. De manga kapongo genangoka ma romanga o Hatada ai Rorero ma Ngi. De ma ngi gea naga o Yorodani ma akere ma datekoka. De genangika o Yusupu de ai doomu yomahiadonoka de yodiai manga huha ma dodunguu ma gari o wange tumidino ma dekana ma titi manga horomati ai baba o Yakubika.

¹¹ De o Kanani ma nyawa abe yogogere genangoka, ona duru yoheranga abe yawuningi manga huha gea o Hatada ai Rorero ma Ngioka gea de ahao ma romanga yaturuuru abe ihiromangoli ato, “O Mesiiroka manga gari ma amoko ma ngi” abe nako to ona manga demo, “o Abele Misiraimi,” angamoi yomakoketemo ato, “O ngi naa idadioka o hohininga ma ngi abe ihitunguu ma oraha o Mesiiri ma nyawa gea manga huha duru itubuhoholi.”

¹² Manga huha o minggu moi gea ipaha de ahao o Yakubu ai ngofa-ngofaka yodiai hoka manga baba wahibehehongoka.

¹³ Abe manga baba ai peti yagoraka la iwingotaka ai honenge o Kanani ma honongaika de iwihingohama o Makapela ma arukika de genangoka iwilungunu. O aruku gea abe ma dodihiraka o Abarahaama womaijaka o Hete ma nyawaino la idadi manga lungunu ma ngi o Eforono ai redioka abe imakitingaka ko ikurutikaua de o Mamere ma ngi.

Ngaro ufa o Yusupu ai ria-riaka iwimodongo

¹⁴ Gea manga baba iwilungunu ibooto de yolio ho o Yusupu de ai ria-riaka de ona mata-mata abe iwiniiki yokokilio o Mesiirika.

¹⁵ Masara ai ria-riaka manga hawana ka ipudakali manga hiningaka abe ona yomakoketemo ato, “O baba wohonengoka ho naa marai nanga dodoto womahibalaha abe ma dihira hihikangelaka unangika.” Hokogea manga hininga itagi manga hawanika.

¹⁶ Ho womatengo iwihidingoto la una gea wademo o Yusupika de hokonaa manga demo abe wadofanga o Yusupika ato, “Ma oraha nanga baba wohonenge de naga ai behehongo ngomino.

¹⁷ Abe una wato, ‘Ngini niwihingahu nia dodotika o Yusupu abe ngohi ahi mau la kiani nia howono unangika waofi. Ngaro ngini nidiai duru itorou nia dodotika masara ngohi tato kiani winihiapongo nia dohata gea.’ Hokogea to una ai demo ho ngomi, Ma Jou ai gogilaongo naa, duru mimagahoko ngonaika la mia howono ma dorou gea nomihiapongo.” Hokogea ai ria-riaka manga demo imahiadono o Yusupika de duru ai hininga ihuha hiadono ko womatongohonokaua ho hiadono woari.

¹⁸ De ma oraha womatengo gea wototaka ai ria-riaka manga demo o Yusupika de onangoo iwihidoduruika. Ho ka de o Yusupu manga demo woihenoka de ko itedekanokaua de ai ria-riaka onangoo yoboaino. De ona ihitunguu manga toduba abe duru ihidodiai yoboa o Yusupino de duru yomakokiponuku ai himangoka de iwihingahu ato, “Ngomi naa mimahidoaka la midadi to ngona ani huhuloko abe ngaro ufa nomigaji.” Hokogea yomangaku o Yusupika.

¹⁹ Masara o Yusupu wabole-bole de ai demo ma dora onangika wato, “Ngini ngaro ufa nihimodongo. Ngohi naa ahi kuaha ko iwa la hiadono genangika tohisapuru de Ma Jou ai hiaturu ho ngohi ko tiniurusua de ko tinihohowonua.

²⁰ Igoungu, ma dihiraino ngini nihihidee niato nidiai duru itorou ngohino, masara Ma Jou ai mau la ma dorou gea wohikawalimi la idadi ma owa. Ho wohiaturu la ngohi tamake ahi karajaanga naa abe de ma kuahaka la o nyawa duru ko manga ngoe ka idadi taduhunu hiadono naa ka yowangohi.

²¹ Ho ibootoka nihimodongo nia dodotino ngohi naa. De angamoi ko iwa ahi hidee tomahibalaha nginika masara naa duru imakawalimi ahi hiaturu hiadono ngini ahi ria-riaka tiniao irahai. To ngohi ahi mau la ngini de nia ngofa-ngofaka tinipaliara ka hiadono nia perelu mata-mata tinihidailako.” Hokogea o Yusupu walaru. De ai hininga ma mobole itagi onangika hiadono de ai lalaru ma demo utuohi waduhunu.

O Yusupu unangoo ahao wohonenge

²² Ho o Yusupu de ai gogianongoru ka ihikaika yowangohi genangoka abe manga gogere o Mesiiri ma tonakoka. De o Yusupu wowango hiadono ai ngumuru adonoka ai taongo o ratuhu moi de ngimoi ai dekana de ahao wohonenge.

²³ Una wowango hiadono ai danongo wamake abe o Efaraimi ai ngofa-ngofaka. De to una ai kuwewete abe ai danongo o Makiri ai ngofa-ngofaka, ona o Yusupu wapaliara hoka wahidadi to una ai ngofa-ngofaka. O Makiri gea o Manase ai ngofaka.

²⁴ De ma oraha itigioka wohonenge de o Yusupu wabehehongo la ai gogianongoru yoboa unangino de wahingahu wato, “Ahi ngofa-ngofaka, itigioka ngohi tohonenge masara Ma Jou igoungu ahao woboa nginiuku de ka ma moi winihihupu o Mesiiri ma tonakino naa. Una gea ahao winihihira-hira la winihigogere o tonakoka gea abe wahibehehongo o Abarahaamika de o Isakika de o Yakubika.”

²⁵ Hokogea wahingahu ibooto de ahao o Yusupu wahibehehongo o Isiraele ai totoforaukuika gea wato kiani onangoo iwihibehehongo unangika la ahao iwilungunu o Kanani ma tonakoka wato, “De ma oraha Ma Jou woboa la wonahihira wonahigilio o Kanani ma tonakika de kiani ahi honenge ngini niao la ngohioo nihihigilio nanga tonakika abe o Kananioka.” Hokogea wogahoko de ahao hokogea ona iwihibehehongo o Yusupika.

²⁶ De ma oraha gea o Yusupu wadonoka ai taongo o ratuhu moi de ngimoi. Ho gea o Yusupu wohonengoka de ai honenge ihidiai la ko wowederua de ahao iwikelenga o peti ma rorahaiuku la iwigogono genangoka ma dekanohi o Mesiiroka.