Dodadi 5 - Ma Jou ai Demo-demo o Totobelohoka

O Adama ai totoforauku manga ade-ade

¹ Naa o Adama de ai totoforauku manga ade-ade ihitulihukuoka o bukuoka abe ma titi hokokia yolape-lapeuku. Ma dodihiraka abe ma oraha Ma Jou o nyawa watulaada ona ngade-ngade hoka Unangoli.

² De ona gea watulaada o nauru de o ngofeka. Ho ka de yahinooto gea watulaada ibooto de ona wahiowa ho wahiromanga o nyawa.

³ De o Adama wowango o taongo o ratuhu moi de moruange ai dekana de ahao wamake ai ngofaka womatengoli abe wihiromanga o Seete de to una ai rupa hoka ai babali abe duru wituruuru o Adama.

⁴ Ho gea o Seete womaboa de o Adama ka wowangohi ai taongo o ratuhu tufange de nagahi to una ai ngofa-ngofaka yomaboa o nau-nauru de o ngo-ngofeka.

⁵ Ho o Adama ai wowango ma dekana o dunia ma lokuoka ai taongo o ratuhu hiwo de moruange de ahao wohonenge.

⁶ Ai ngofaka o Seete ai ngumuru adonoka ai taongo o ratuhu moi de motoa de ahao wamake ai ngofaka o Enoso.

⁷ Ho o Enoso womaboaka de ai baba o Seete gea ka wowangohi ai taongo o ratuhu tufange de tumidi de nagali to una ai ngofa-ngofaka utuoli o nau-nauru de o ngo-ngofeka.

⁸ Ho o Seete ai wowango ma dekana o dunia ma lokuoka ai taongo o ratuhu hiwo de ngimoi de hinooto de ahao wohonenge.

⁹ De o Enoso ai ngumuru adonoka ai taongo morihiwo de ahao wamake ai ngofaka o Kenana.

¹⁰ Ho o Kenana womaboaka de ai baba o Enoso gea ka wowangohi ai taongo o ratuhu tufange de ngimoi de motoa de nagali to una ai ngofa-ngofaka utuoli o nau-nauru de o ngo-ngofeka.

¹¹ Ho o Enoso ai wowango ma dekana o dunia ma lokuoka ai taongo o ratuhu hiwo de motoa de ahao wohonenge.

¹² De o Kenana ai ngumuru adonoka ai taongo moritumidi de ahao wamake ai ngofaka o Mahalale.

¹³ Ho o Mahalale womaboaka de ai baba o Kenana gea ka wowangohi ai taongo o ratuhu tufange de moruata de nagali to una ai ngofa-ngofaka utuoli o nau-nauru de o ngo-ngofeka.

¹⁴ Ho o Kenana ai wowango ma dekana o dunia ma lokuoka ai taongo o ratuhu hiwo de ngimoi de ahao wohonenge.

¹⁵ De o Mahalale ai ngumuru adonoka ai taongo moributaanga de motoa de ahao wamake ai ngofaka o Yarete.

¹⁶ Ho o Yarete womaboaka de ai baba o Mahalale gea ka wowangohi ai taongo o ratuhu tufange de moruange de nagali to una ai ngofa-ngofaka utuoli o nau-nauru de o ngo-ngofeka.

¹⁷ Ho o Mahalale ai wowango ma dekana o dunia ma lokuoka ai taongo o ratuhu tufange de morihiwo de motoa de ahao wohonenge.

¹⁸ De o Yarete ai ngumuru adonoka ai taongo o ratuhu moi de moributaanga de hinooto de ahao wamake ai ngofaka o Henoko.

¹⁹ Ho o Henoko womaboaka de ai baba o Yarete ka wowangohi ai taongo o ratuhu tufange de nagali to una ai ngofa-ngofaka utuoli o nau-nauru de o ngo-ngofeka.

²⁰ Ho o Yarete ai wowango ma dekana o dunia ma lokuoka ai taongo o ratuhu hiwo de moributaanga de hinooto de ahao wohonenge.

²¹ De o Henoko ai ngumuru adonoka ai taongo moributaanga de motoa de ahao wamake ai ngofaka o Metusala.

²² De gea o Metusala womaboaka de ai baba o Henoko gea ka winiikohi Ma Jou ma dekana o taongo o ratuhu hangeino abe ma titi duru yomaketedodiawo de Ma Jou. De ma dekanino gea to una ai ngofa-ngofaka utuoli o nau-nauru de o ngo-ngofeka wamake.

²³ Ho o Henoko ai wowango ma dekana o dunia ma lokuoka ai taongo o ratuhu hange de moributaanga de motoa.

²⁴ De gea o Henoko duru Ma Jou wisanangi ho de o wange moiuku de o Henoko ko iwimakeokaua o duniaka angamoi de ai badanga ka ma moi Ma Jou wigoraka.

²⁵ De o Metusala ai ngumuru adonoka ai taongo o ratuhu moi de moritufange de tumidi de ahao wamake ai ngofaka o Lameke.

²⁶ Ho o Lameke womaboaka de ai baba o Metusala gea ka wowangohi ai taongo o ratuhu tumidi de moritufange de hinooto de nagali to una ai ngofa-ngofaka utuoli o nau-nauru de o ngo-ngofeka.

²⁷ Ho o Metusala ai wowango ma dekana o dunia ma lokuoka ai taongo o ratuhu hiwo de moributaanga de hiwo de ahao wohonenge.

²⁸ De o Lameke ai ngumuru adonoka ai taongo o ratuhu moi de moritufange de hinooto de ahao wamake ai ngofaka o nauru.

²⁹ De o Lameke ai ngofaka gea wihiromanga o Nuhi. De wotemo wato, “Ahi ngofaka o Nuhino naa ahao hamake o lalaru nanga kangela ma goronaka. Gea nanga kangela abe ma titi Ma Jou o Yawe o dunia ma tonaka wohipohaka de o hohowono ho hiadono hokangela hokarajaanga.”

³⁰ Ho o Nuhi womaboaka de ai baba o Lameke gea ka wowangohi ai taongo o ratuhu motoa de morihiwo de motoa de nagali to una ai ngofa-ngofaka utuoli o nau-nauru de o ngo-ngofeka.

³¹ Ho o Lameke ai wowango ma dekana o dunia ma lokuoka ai taongo o ratuhu tumidi de moritumidi de tumidi de ahao wohonenge.

³² De o Nuhi ai ngumuru adonokau ai taongo o ratuhu motoa de ahao wamake ai ngofa-ngofaka o Seeme, de o Haama, de o Yafete.