Dodadi 49 - Ma Jou ai Demo-demo o Totobelohoka

O Yakubu ai behehongo ma baha ai ngofa-ngofakika

¹ De o Yakubu wabehehongo ai ngofa-ngofakika la ai tauino yokokiboa ho gea yoboaka de woigo la yomahitigi-tigino wato, “Ahi ngofa-ngofaka niaino nihihigororomino la ka idadi tinihingahuohi abe ahao hokokia idadi ngini homoi-homoiika abe ma oraha nia totoforauku ahao yolape-lapeuku.”

² De ona iwihigororominoka de ahao una wahingahu onangika wato, “Niaino la nitotoihene to ngohi o Yakubu ahi ngofa-ngofaka, Nihihigihene ngohi o Isiraele ti ngini nia baba,

³ Ngona o Rubene ahi ngofaka o riaka, Ngohi ka o goohi de ngona nomaboa Ho ngona nodadi to ngohi ahi buturungu ma dodunguu, De gea kiani ka ngonahi inigorakiye de inihoromati,

⁴ Masara ani horoodo hoka o moku-moku abe ko iwa ma hiaini, Ho ngona ahi ngofaka o riakika ko namakeokaua o riaka ma horomati, Angamoi ngona nomaidu de ngohi fekata momatengo, Hiadono ani horomati ngohino ihonenge ahi koi ma lokuoka.

⁵ O Simeono de o Lewi, to ona manga hininga ka moi, Ona o ria-dodoto abe manga dae yapake o nyawaika,

⁶ To ngohi ahi jiwa tohitiari la tomatingaka onangino, La ko iwa ma oraha ngohioo taniiki manga hidee itorou. Angamoi manga ngamo ifae hiadono o nyawa yatoma, De o hapi ma dengo yaafo-afokoka la ihilugu, De gea yodiai la yogie-giete ato yomahigogule dika.

⁷ O sadeino manga ngamo ho tahidohohowono angamoi ihaukuholi, De manga dohata tahidohohowono angamoi yotualonoholi, Ho gea manga totoforauku ahao tahikokabarihika, Hiadono yogogere o Isiraele ma tonaka mata-mataika.

⁸ Ngona o Yehuda, ahao o higiriiri namake ani gogianongoruino, De ani gogianongoruoo ahao yomakokiponuku ani himangoka. Ani musu ahao nahikala abe ahao manga tomaruku nasouku.

⁹ Igoungu, o Yehuda, ngona hoka o boki o singa ma ngofaka, To ngona ani kuaha hoka o boki kohaamoko ma kuaha, hoka o boki o singa ma nauru ka ma goohi abe ma doma aolomoka, De ahao idoakali ma ngiiye abe genangoka itobagogoana, Abe hoka o singa ma ayo ihitobagoana to ena ma ngofaka hokogenangoli ngona. Ho onagona de yamoroini la ato o Yehuda iwiruwae?

¹⁰ Ko moiua la iwiakunu ai kuaha ma dodunguu iwiora, Ho ai totoforauku onangino ka ihikaika naga abe yodadi o koano, Hiadono una woboa ai romanga o Silo abe o koano ma tutukunu gea to una ma dutu. Gea una abe ahao o nyawa o tonaka mata-mataika iwihingounu.

¹¹ De abeika hokokia yamake ma owa, o Yehuda ai totoforauku, Gea manga angguru ahao duru ikutufuru manga tonakoka, Hiadono o keledai yalikoika ma jagaika ma, ko yopusingua ihirusaka, Manga angguru ma hofoko kohangoe yadoko-doko ma baakoka, De ma teongo yadoharabaka manga bajuiye hiadono yapehaka. Hokogea ona ihikaya de manga akere o angguru ma teongino.

¹² Manga lako ma rupa hoka o angguru ma teongo, De manga ingiri ma rupa hoka o susu ma magarehe, Angamoi manga susuoo kohangoe ona yaokere.

¹³ O Sebulono de ai totoforauku manga tonaka o gahi ma ngigorino, De ka ihikaika ona yotobanganono o kapaika ma oraha iboa, De naga o kota o Sidono abe ma leleotiha itobatapu o kapa, Manga tonaka ma batingi ngade-ngade imahiadono o Sidonika.

¹⁴ O Isakara hoka o keledai abe ma kobongo ma dogowini, Abe unangoo o gina ma dubuho ka idadi unangoo wapoa,

¹⁵ De ka wamake ai gogere ma tonaka ma rahai, De una de ai magaweoka ai karajaanga watagongo, Hokogea o Isakara ma nyawa hiadono yodadi o huhuloko, De o karajaanga itubuho o nyawa utu yahikarajaanga.

¹⁶ O Daana watobatailako ai nyawa manga howono, De ngaro manga hohowono wahitaana onangikaoo, Abe waniiki o Isiraeloka manga dutu homoi-homoiika, La gea yahipareta itiai manga gogianongoruika.

¹⁷ Masara o Daana hoka o dodiha onangika abe iwimusu, Ai miriidi hoka o dodiha abe ko hamakeua de nanga lako, Ho ka de yoboaino de manga kuda, ona abe iwimusu, De gea wahikangela hoka watuduku manga kuda ma louika, Hiadono imakibanga manga kuda ho iwiumo ma dutu.

¹⁸ Masara ngohi o Isiraele ko tadadiua tomaduhunu. Ngohi o hiluasa ma gou-goungu tododamaahi, Ngona Ma Jou o Yawe ahao nohihihupu ahi hohowonino.

¹⁹ O Gaada ngaro naga ai musu manga tentara iwingino, La gea ai kiahonanga ka ihikaika iwiora, Ma wakiniiki dika ngaro ona ka ihikaika iwitobangino-ngino. Ho manga hidee wohikawalimi de onangika waora.

²⁰ O Asere ai utumu gea to ona manga inomo ma rorahai, Hiadono o nyawa utu yahidailako manga inomo, De ma inomo gea irahai hoka o koano manga inomo.

²¹ O Nafatali una hoka o luadana ma hiapoto womapopaata, De ai nyawa yotemo-temo yososawaro o demo ma hohailoa.

²² O Yusupu tihiromanga una hoka o tohofoko ma jagaino, Ena gea abe ihibelohuku o akere ibubungiye ma datekoka, Ho duru ikutufuru hiadono ijagali, de ma jaga gea imaliara, Imaliara hiadono o batingi ma dadaduhu atilakuroka, Ho gea o Yusupu tihiromanga ai wowango de ma hofokoka.

²³ Ona abe yotobatoimi la ato iwitoimi de iwihikangela,

²⁴ Masara, ka to Yusupohi ai giama de ma buturungoka, Ho to unangohi ai toimi ma deli watauru ikurutoko, To una ai buturungu gea womahibitumu to Yakubu ai Jouino, Ma Jou, Una o Isiraele ma nyawa manga hakaru wodadioka, Abe to ona manga buturungu ihititi Unangoka de aino. Ho Una gea wodadioka manga gogoana ma gou-goungu.

²⁵ Ahi ngofaka ngaro Una gea ani totofora manga Jou abe woniduhunu, Ngaro Una Wokokurutiye gea ka ihikaika wonihiowa, Ani hiowa wohiboa o dihangino de o tonaka ma hakino, Winihiowa nia ngo-ngofekaino manga ngofaka ma ngiino, Hiadono manga ngofa-ngofaka ko manga ngoe yakokihuhu.

²⁶ Abeika, o loku-loku ma dodihiraka de ka ihikaika naga, De o loku-loku gea inihiowa de to ena ma hasili irupa-rupa, Masara ani hiowa namake ani babaino naa, ka enangohi ilakuiye. Ngini o ria-dodotino masara ka o Yusupohi wodadi wokurutiye, Ho ngaro una iwilufungoka de ma owa abe naa tigahokoka.

²⁷ O Benyamini hoka o fuhuku ma kaho abe ena duru itualono, Hiadono ai nyawa yososawaro yagogataheke manga musuika, O ngoru-ngorumiye yamataka manga musu abe yahikalaka, De o futu-futuiye yahikodoku manga musu manga kiahonanga.”

²⁸ Hokogea o Yakubu wahiowa ai ngofa-ngofaka yangimoi de yahinootoika de o hiowa ma demo abe duru imakataana de ona homoi-homoiika. De gea wohioriki itigioka wohonenge de wapake manga oara ma behehongo ma demo abe wahitaana onangika la wahingahu homoi-homoiika abe hokokia idadi onangika abe ma oraha manga totoforauku ahao yolape-lapeuku. De ona yangimoi de yahinooto homoi-homoiika ahao yodadi o Isiraele ma nyawa manga dutu.

O Yakubu wohonenge

^29-30 Gea wahiowa ibooto de ahao o Yakubu wahingahu ai ngofa-ngofakika wato, “Ngohi tohioriki itigioka ahi gahe abe genangika toiki la mimatoomuino de ahi totofora manga ngioka abe ona yododihiraika yohonenge. Ho naa ahi behehongo moioli abe kiani nianiiki, togahoko la ngini nihilungunu ahi ete de ahi baba manga lungunoka o Kanani ma tonakoka. To ona manga lungunu ma ngi gea o Makapela ma aruku ma goronaka abe ma dihira to Hete ma nyawa abe ai romanga o Eforono to una ai redioka abe imakitingaka ko ikurutikaua de o Mamere ma ngi. De o Abarahaama womaijaka ma aruku gea abe imaritonakika de ma redi la ika-ika de idadi to ngone dika nanga lungunu ma ngi.

³¹ De genangoka iwilungunu ahi ete o Abarahaama de ngoi fekata o ngo Sara. Ahi baba o Isaka de ngohi meme o ngo Ribeka onangoo manga lungunu genangoka. De ngohi fekata o ngo Lea munangoo tomilungunu o aruku ma goronaka gea.

³² De ka idadi hokogea yapake angamoi o aruku gea ahi ete o Abarahaama womaija o Hete ma nyawaino.”

³³ Hokogea o Yakubu wahibehehongo onangika ibooto de ahao ai lou wagoraka de wakelengali ai koiuku de womarubaiha ai koioka. Ka de womaiduokali hokogea de ai ngomaha itoaka ho Ma Jou wahidotoomuino ai totoforaka manga jiwa ma ngioka abe ona yododihiraika yohonenge.