Dodadi 48 - Ma Jou ai Demo-demo o Totobelohoka

O Isiraele wahiowa o Yusupu ai ngofa-ngofaka

¹ De ipaha o wange moiuku naga iwihingahu o Yusupika ato, “Marai ani baba ai buturungu ihihanga hoka iwigogama.” Ho ka de woihene hokogea de o Yusupu woiki ai baba witutumu de ai ngofakoo o Manase de o Efaraimi onangoo wao.

² Ho yomahiadonoka de iwihingahu o Yakubika, abe naa yapake ai romanga o Isiraele, de ato, “Ani ngofaka o Yusupu woboaka.” Ho o Isiraele womaribuutu womomikiye hiadono wogogeruku ai koioka gea.

³ Ho gea yowohama o Yakubika de witemo o Yusupika wato, “Ahi ngofaka, naa moi kiani toniade-ade ngonaika ma titi Ma Jou ai behehongo ngoneino. Abe ngohi ma moiuku o Beteloka abe ma ngi gea naga ma romanga moioli o Luusu de genangoka Ma Jou Wokokurutiye womahimatoko ngohino.

⁴ De Una wohihibehehongo ngohino wato, ‘Ngohi naa tonihiowa ngonaika la duru nofaa-faatuku hiadono ani totoforauku yodadi o nyawa manga dutu ko manga ngoe. De naa Ngohi Ma Jou tonihibehehongoo ahao tahidoaka o Kanani ma tonaka naa onangika la yomahitoonangoka ka hiado-adonika. De ngaro ngona nohonengoka masara nako ma tonaka ma behehongo gea ko ihihangua.’ Hokogea Yusupu, abe Ma Jou Wokokurutiye ai hiowa ma demo ngohino.”

^5-6 “Ho nako to ngona ani ngofaka o domoro de ai dodoto abe ko ahi himangokaua de yomaboa angamoi ngohi ko ihiwainohi o Mesiiri ma tonakino naa de ona yomaboakau, ona gea taetongo ahi ngofaka idodutu. Abe imaketero hoka o Rubene de o Simeono to ngohi ahi ngofaka idodutu, hokogenangoo o Efaraimi de o Manase. Ho ma oraha gea ahao o Kanani ma tonaka yomaregu de onangoo yamake o regu homoi-homoiino. De nako ngona ahao namakeoli ani ngofaka de ona gea ahao ka idadi haetongo to ngona ani ngofaka idodutu masara manga gogere o Kananioka gea o Efaraimi de o Manase manga tonakoka.

⁷ De o tonakoka gea naga ngoni meme ami lungunu. Abe ma oraha o Padana-Arama ma tonaka tanoa de tolio o Kananika de ahi dodagi ma goronaka de o ngo Rahele mohonenge. De ngohi ahao genangoka tomilungunu o ngekomo ma datekoka abe ma ngekomo gea ma dumutu o Efaraatika. De ma ngi gea naga ma romanga moioli abe o Beteleheeme.”

^8-10 De angamoi o Isiraele, una naa duru iwitimonoka, de ai lako ihomuoka hiadono ngade-ngade ko womahiorikokaua. Ho womalegaika o Manase de Efaraimika de wileha o Yusupika wato, “Ho naa ona onagona?” De o Yusupu wipaluhu ai babaika wato, “Baba, naa ona abe kangano nafetongoka gea ona ahi ngofaka abe Ma Jou wohihidoaka nenangoka o Mesiiroka.” De o Isiraele gea wotemo o Yusupika wato, “Ona gea nahitigi-tigino ngohino la ka idadi taso la tagahoko ma owa onangika.” Ho o Yusupu wao duru ai baba ai himangika la ka idadi waadono waso. De o Isiraele homoi-homoiika wakooino o Manase de o Efaraimika gea de wabounu.

¹¹ De ahao wotemo de ai heranga ma demo o Yusupika wato, “Abeika, ngohi ma dihira ko tonganonokaua duru ahao to ngona ani himanga tamakeoli masara Ma Jou wohiduhunu hiadono ka idadi tonidaene ngona de hiadono ani ngofa-ngofakoo wohihigunoa la tiniborimake.” Hokogea manga ete ai demo o Yusupu de ai danongika.

¹² De ahao o Yusupu ai ngofa-ngofaka wahirehene manga ete ai himangino de ahao de ai horomati ma gahumu womaponuku ai baba ai himangoka ka hiadono ai pea itiki o meheluku.

¹³ De ahao ai ngofaka yahinooto gea wahirihimangoli de manga ete de wahiaturu la ma riaka o Manase naga o Isiraele ai nirakoka de o Efaraimi una naga o Isiraele ai gubadioka.

¹⁴ Masara o Isiraele ma oraha wafokumu de ai giama wohisalioaino ho ai giama ma niraka yadaene o Efaraimi ai mumukuku de nako ma gubadi gea iwidaene o Manase ai mumukuku. Hokogea wodiai ngaro o Manase una o riaka de o Efaraimi una o dodoto.

¹⁵ Hokogea o Isiraele wakokifokumu de wagahoko ma owa la manga baba unangoo iwidaene ma owa abe ai hininga ma dumutu o Yusupika. Ho gea ai hiowa ma demo hokonaa, wato, “Ahi hingahu ma owa nginika, gea ihititi Ma Jouoka, Gea Una abe ahi ete o Abarahaama winiiki ka ihikaika, Hokogenangoo ahi baba o Isaka wowango ai himangoka, De Unangoo to ngohi ahi Jou abe wohitobagoana. Abe ka de tomaboainohi de hiadono ma oraha naa, Una duru wohipaliara ngohi hoka to Una ai domba.

¹⁶ De Una gea o Malaekata abe watobabangu o nyawa, Hiadono ngohi wohidatoko o boditoino ka ihikaika. Ho ahi ngofa-ngofaka naa, ngaro onangoo Una wahiowa. La ona gea yahiromanga o Isiraele ma nyawa ka ihikaika. De ka ma moi ihidefetongo o Abarahaama de o Isaka manga romangika. De ngaro yongofa-ngofakuku de yodano-danonguku ona naa, Hiadono manga totofora duru yowoe-woeuku o duniaka.” Hokogea o Yakubu ai hiowa ma demo o Manase de o Efaraimika.

^17-18 Masara ka de o Yusupu wimake hokogea ai baba wafokumu de ko wosanangiua angamoi de ai giama ma niraka wafokumu ko o riakikaua masara o Efaraimi ai peauku. Ho gea wotemo wato, “Baba, hokogenangua ani giama angamoi naa una ahi ngofaka o domoro ho kiani ani giama ma niraka nihifokumu to una ai mumukuku.” Ka de hokogea o Yusupu wotemo de ai baba ai giama ka wagoraka de wakelenga o Manase ai mumukuku.

¹⁹ Masara ai baba woluku wato, “Ahi ngofaka, marai naa ngohi todiai tohioriki, abe nako o Manase naa, unangoo ai totoforauku ahao yowoe-woeuku masara nako o Efaraimi ka to unangohi ai totoforauku yofoloiika yowoe hiadono yodadi o dutu manga ngoe de manga tonakoo homoi-homoiika.”

²⁰ De ahao o Isiraele wahiowa de ai demo moioli hokonaa, wato, “Ho ngini naa ahao ka ihikaika inifetongo ma oraha o Isiraele ma nyawa yomahiketehiowa. De ma betongo naa yapake ato, ‘Ngaro ngonaoo Ma Jou wonihiowali, Imaketero hoka onangoli o Efaraimi de o Manase wahiowa.’ Hokogea manga hiowa ma betongo.” Hokogea manga ete o Isiraele o Efaraimi wihitihira wihiowa ngaro una o dodoto.

²¹ De ahao wihingahu o Yusupika wato, “Ahi ngofaka, naa itigioka ngohi tohonenge masara ngini Ma Jou ka ihikaika wininiiki de hiadono winihikokigilio nia totofora manga tonakika, de gea o Kanani ma tonaka.

²² De nako ngona de ani roria-dodoto ka ngonahi tonitihira ho tonihidoakoo ngonaika ma tonaka abe ma dihira ngohi tapake ahi dia de ahi toimi la hiadono ma tonaka gea tale o Amori ma nyawaino. De manga tonaka gea o loku ma geleforo de ma doku abe ena gea ani hidoaka ma tonaka abe tonidingakoka la idadi to ngona.”