Dodadi 47 - Ma Jou ai Demo-demo o Totobelohoka

O Yakubu wihiowa o Firaunu

^1-2 De ahao o Yusupu woiki witutumu o Firaunu de wairiki ai ria-riaka yamotoa de ona wangotaka o Firaunu ai tauika. Ma gea yomahiadonika de o Yusupu wohiraika wowohama o Firaunika de wihingahu wato, “Ahi baluhu, ahi baba de ahi ria-dodoto yokokiboaka o Kanani ma tonakoka de aino. De ona yakokiaoino manga kiahonanga mata-mata ho manga aewani ma duduono ma ngoe de ona naa naga o Gosenoka.” Hokogea o Yusupu wihingahu o Firaunika. De ahao waleino ai ria-riaka yamotoa gea de wahirihimanga de o Firaunu.

³ De o Firaunu waleha onangika wato, “Naa ngini o kia nia karajaanga?” De ona yopaluhu ato, “Mia koano, nako to ngomi mia totoforainohi manga wowango ma karajaanga moi dika, de gea o aewani yotobapaliara de ma duduonoka.

⁴ De ngomi naa miboaino o Mesiirino angamoi mia duduono ma inomo ko iwaka o Kanani ma tonakoka. O hiwara dika de ka hiadono o hafini kohagiria o tonakoka gea ho naa miboaino mimagahoko la nako ka idadi, mia koano, nomihigunoa migogere ani tonakoka ma romanga o Gosene.” Hokogea manga hingahu o Firaunika.

⁵ De ahao o Firaunu witemo o Yusupika wato, “Ho naa ani gogianongoru inihiorikoka abe ngona nenangoka ho gea yoboa yogogere ngonaka.

⁶ Ho o Mesiiri ma tonaka idadioka to onangoo manga tonaka! Ngona naa nangiriki ma tonaka abe duru irorahai la ani baba de ani gogianongoru nahigogere genangoka. Marai gea ena o Gosene ma tonaka irahai manga ngi. De nako naga onangoka abe onangohi yososawaro o aewani yopaliara gea ona nahikarajaanga la to ngohioo ahi aewani ihidopaliara.” Hokogea o Firaunu wadafongo de ai sanangi onangika.

⁷ De ahao o Yusupu ai baba o Yakubu unangoo wiaoino la yomarihimanga de o Firaunu. Ka de woboaino de o Yakubu wotemo wihiowa o Firaunika.

⁸ De o Firaunu wileha unangika wato, “O Safanata Panea ai baba, nako to ngona ma oraha naa ani taongo muruono hiadono ka nowangohi?”

⁹ De o Yakubu wipaluhu wato, “Ahi koano, to ngohi ahi wowango de ahi paradidu ma kangelaka hiadono adono ahi ngumuru o taongo o ratuhu moi de moruange ma dekana. Masara nako de to ngohi ahi tofora manga ngumuru tanu to ngohi ko kia-kiauahi. Abe ka to onangohi manga paradiduoka yatedekana.”

¹⁰ Hokogea o Yakubu womahingahu de gea ko woliouahi de wihiowali o Firaunika ma titi ai demoino.

¹¹ De o Yusupu ahao waniiki o Firaunu ai demo abe hokokia woigo ai gogianongoru waduhunu ho ona de ai baba mata-mata wahigogere o Gosenoka. De wohiaturu la ma tonaka gea idadi to ona manga tonaka. O tonaka abe ihiromanga o Gosene gea naga o Mesiiri ma honongaka abe ihiromanga o Ramese de ma tonaka gea ka enangohi naga de ma ruruubuoka de ma joro ikutufuru ngaro o Mesiiri ma tonaka mata-mataika.

¹² De o Yusupu una ka ihikaika wahidailakoo to ona manga inomo la yakokiwedono abe ai hiaturu aniiki manga ngoe o tau homoi-homoiika la manga ngofa-ngofaka yakokiwedono manga inomo. Hokogea wakokipaliara itiai.

¹³ Masara o tonaka utu ngaro mata-mataika ma ko iwa o inomo angamoi o hiwara kohagiria hiadono o hafinoo duru kohagiriaholi ngaro o Mesiiri ma tonakoka de ngaro o Kanani ma tonakoka. De o kokawaaha mata-mataika duru yakokiboleoka ma titi o hafini gea.

¹⁴ Ho o nyawa mata-mataika kiani o Yusupino manga inomo yomaija hiadono yamataka manga tiwi. De o inomo ma bobangu ma tiwi mata-mata o Yusupu watoomuino de gea ahao wagogono o Firaunoka abe ai tiwi ma ngi-ngioka.

¹⁵ Ho ka de manga tiwi ko iwaka o Mesiiroka de o Kanani ma tonakoka de ahao o nyawa yokokiboaino o Yusupino de iwihingahu ato, “Ngomi naa mia tiwi ko iwaka ho nako mihonenge ani himangoka o kia ma utumu? Ho duru mimagahoko o inomo la ngona nomihidoaka dika.” Hokogea yomagahoko.

¹⁶ De o Yusupu wapaluhu wato, “Nako hokogea ka idadi tiniduhunu. Hokonaa ma ngekomo, kiani nia aewani nimahituruuru de o inomo ho nia aewani nihihidoaka ngohino de ngohi ka idadi o inomo tinihidoaka nginika.”

¹⁷ De ona yodiai hokogea ho yale manga aewani ngaro o kuda, o domba, o kabingi, o hapi de o keledai ma ka idadi iwihidoaka o Yusupika de una ahao wohituruuru de o inomo. Hokogea o taongo moi ma dekanino o nyawa yamake manga inomo. De ika-ika manga aewani mata-mata idadioka to Firaunu ai aewani.

¹⁸ Ka de ma taongo gea ipahaka de manga aewani ko iwaka de angamoi ma dihirainoo manga tiwi ko iwaka ho naa yoboali yomagahoko o inomo. De ona o Yusupika iwihingahuoli ma titi manga inomo ma bobangu ato, “Mia kangela naa ko mihipongonua, abe mia tiwi ko iwaka de mia aewani idadioka to Firaunu ai aewani mata-mata ho ma hou ka mimahidadi to ngona ani gogilaongo. De to ngomi mia tonaka mimahituruuru de o inomo. Kiani hokogea la ngaro to ngomi mia wowango eko to ngomi mia tonaka ma idadi to ngona ani hiaturu ma goronaka.

¹⁹ Iti ufa ngomi mikokihonenge de to ngomi mia tonakoo parahaja mianoaika hiadono idadioka hoka o tonaka ma kakaaha. Ho nako ngona ka idadi o bibiti nomihidoaka la ena mihibarihi mia tonakika la ufa hokogea o tonaka ihomoaika dika.” Hokogea yomagahoko o inomo de yonganono o hiwara gea ahao ipaha la manga datomo ahao iwangoli.

²⁰ Ho o Yusupu manga tonaka waija la idadi to Firaunu ai tonaka o Mesiiri ma amokika. Ai kokawaaha mata-mataika kiani manga redi yakokifukunu unangika angamoi o hafini gea kohagiria ho manga tonaka iwidamataka yafukunu o Firaunika.

²¹ De manga kokawaahaoo o Yusupu wahikokidadi to Firaunu ai gogilaongo abe duru o Mesiiri ma tonaka ma amokika. Ho ona mata-mata yodadioka imaketero hoka to una ai kiahonanga idodutu abe manga karajaanga mata-mata kiani to una dika ai mau yaniiki, abe ko idadiokaua yomahiaturu manga wowangoka.

²² Masara naga o nyawa utu abe ngaro ufa yafukunu manga tonaka. De gea ona abe o Mesiiri ma nyawa yahidemo manga popangaoika angamoi to ona manga inomo o Firaunu dika watagongo. Ho to ona manga tonaka ngaro ufa yafukunu angamoi ka ihikaika to ona manga inomo naga.

²³ De o Yusupu ko wawohangua manga gogahoko o bibiti ho ai kokawaahaika wato, “Abeika, ngohi naa tiniijaino ngaro ngini de ti ngini nia tonaka ka ma moi. Ho naa nia wowango idadioka to Firaunu de naa tinihidoaka nia bibiti la ka idadi nihikabarihi nia redi-redioka.

²⁴ De abe iwangoiye nako hiadono naga ma hofoko de niautuku ibooto de ahao kiani niaregu motoa. De o regu moi o Firaunu ai redi ma hasilino gea wale. Masara nagahi ma regu iata abe idadi ti ngini nia inomo de to ona manga inomo abe yogogere nia tauoka la nia ngofa-ngofakoo yamake manga inomo. De utu niapake la idadi ti ngini nia bibiti abe niafaatoli.” Hokogea o Yusupu wahiaturu ai kokawaahaika.

²⁵ Ka de o Yusupu ai hiaturu gea yoihene de yotarimakase unangika ato, “Mia baluhu, duru ngona nomiduhunu la ko mihonengua de nomipaliara ho ngomi misanangi dika midadi o Firaunu ai gogilaongo.” Hokogea manga hininga yomahingahu o Yusupika.

²⁶ De o hiregu ma hiaturu gea ko ihihangua angamoi o Yusupu wohitulihuku la idadi o pareta moi o Mesiiri ma tonakoka. Abe manga pareta gea itemo, “Onagona dika yodatomo o joro ka de ma oraha ma hasili yaleino de kiani yaregu motoa la o regu moi iwihidoaka manga koanoika de ma regu iata gea to ona.” De ma pareta gea ka yapakeohi ka hiadono o wange naa. Ho ma oraha gea o Mesiiroka, ona abe de manga tonakokahi, gea ona manga hidemo dika abe o Mesiiri ma nyawa yahidemo manga popangaoika. Ka ma hou to onangokahi abe ngaro ufa dika de manga inomo yomahituruuru de manga tonaka.

²⁷ Ho naa o Isiraele ma nyawa yogogere o Mesiiri ma tonaka ma honongaka o Gosene ma romanga. De yamake manga tonaka ma rahai genangoka hiadono manga wowango duru de ma utumoka. De yofaa-faatuku hiadono itaiti manga ngoe.

²⁸ De o Yakubu, abe Ma Jou wihiromangoli o Isiraele, una wowangohi ai taongo ngimoi de tumidohi ai dekana o Mesiiri ma tonakoka gea. Ho gea ma oraha wohonenge de ai ngumuru adonoka ai taongo o ratuhu moi de moruata de tumidi.

²⁹ De ka de wohioriki itigioka ai gahe wohonenge de o Yakubu wibehehongo ai ngofaka o Yusupu la woboa. De wihingahu unangika wato, “Ahi ngofaka o Yusupu, nako noigo nohihisanangi ani babaika kiani nagou-goungu nohihibehehongo ngohino abe ahi gogahoko naa ma baha ngonaika nodiai. De gea togahoko la ahi honenge ufa nohilungunu o Mesiiri ma tonakoka.

³⁰ Ho ma oraha ngohi tohonengoka de ngona kiani nohihihupu o Mesiirino de kiani nohingotaka ahi tofora manga lungunika la nohilungunu onangoka.” Hokogea o Yakubu ai behehongo o Yusupika. Ho o Yusupu wato hokogea ahao wodiai.

³¹ Masara o Yakubu wotemoli wato, “Masara, kiani nohihibehehongo nagou-goungu de ma dodunguuoka!” Ho o Yusupu duru wihibehehongo ai babaika de o behehongo ma demo ma gou-goungu ma dodunguu. De ahao o Yakubu womaponuku abe ma oraha womaokoino womatukunuku.