Dodadi 46 - Ma Jou ai Demo-demo o Totobelohoka

O Yakubu de ai ngofa-ngofaka yoiki o Mesiirika

¹ Ho o Isiraele wosoboka woiki o Mesiirika ka ma moi de to una ai ngofa-ngofaka. De ai kiahonanga, de ai duduono, de ai nyawa ka ma moi waoka. De gea yotuluikahi o Beresebaka de yomahiaini genangoka. De ai aewani muruono naga wairikino de watoma la womahihuba Ma Jouiye abe ai baba o Isaka to una ai Jouika.

² De ma futuku gea hoka o Yakubu wobuluhara de Ma Jou womahimatoko ai buluhara ma goronaka wato, “Yakubu, Yakubu!” de o Yakubu wopaluhu wato, “Iya, ahi Jou, ngohi naa.”

³ De Ma Jou wihibehehongo unangika wato, “Ngohi naa to ani baba ai Jou, ho ufa nohawana noiki o Mesiiri ma tonakika, angamoi Ngohi ahao tonihidadi o dutu moi abe duru ko manga ngoe abe ani totoforauku.

⁴ De Ngohioo naga toniniiki ma oraha o Mesiirika nowohama de Ngohioo ahao ani totoforauku tahihupu o Mesiiri ma tonakino la ona tahigilioli o Kanani ma tonakino naa. Masara ngona nogogere o Mesiiroka hiadono nohonenge genangoka de ma oraha ngona nohonenge de ahao ani ngofaka o Yusupu ani lako watuku.” Hokogea Ma Jou ai behehongo o Yakubika o futu gea abe manga dodagi ma goronaka.

⁵ De ahao o Beresebaka yosoboli yogila-gila o Mesiirika yoiki. De o Yakubu ai ngofa-ngofaka iwihibarene manga baba o gorobauku, de manga ngofa-ngofaka, de manga feka-fekatoo yahibarene ma gogorobauku abe o Firaunu wihidingotino la manga baba o Yakubu iwihiao.

⁶ De to ona manga aewani o dofo ma duduono mata-mata yakokiao, de manga kiahonanga mata-mata gea abe yamake ma oraha ka yogogerohi o Kanani ma tonakoka enangoo yakokiaoka. Hokogea o Yakubu de ai ngofa-ngofaka de ai dano-danongo yokokiloiki o Mesiirika.

⁷ Ho gea yongodumu o Yakubu de ai ngofa-ngofaka o nau-nauru, de o ngo-ngofeka, de ai dano-danongo mata-mata wakokiao ma oraha yomaturuuru o Mesiirika.

⁸ Hokonaa to Isiraele ai ngofa-ngofaka de ai dano-danongo manga romanga abe naga ma oraha yoiki yowohama o Mesiiri ma tonakika. O Yakubu ai ngofaka duru o riaka o Rubene.

⁹ De to Rubene ai ngofa-ngofaka o nau-nauru manga romanga: o Henoko, o Palu, o Heserono de o Karami.

¹⁰ O Simeono ai ngofa-ngofaka manga romanga: o Yemuele, o Yamini, o Ohada, o Yakini de o Sohara de nagali ai ngofaka o Saulu abe ngoi meme o Kanani ma nyawa.

¹¹ O Lewi ai ngofa-ngofaka manga romanga: o Gerosono, o Kehata de o Merari.

¹² O Yehuda ai ngofa-ngofaka manga romanga: o Era, o Onana, o Siela, o Perese de o Sera; masara o Era de o Onana yohonengoka ma oraha yogogerohi o Kanani ma tonakoka. De naga o Yehuda ai danongo abe o Perese ai ngofa-ngofaka manga romanga: o Heserono de o Hamulu.

¹³ O Isakara ai ngofa-ngofaka manga romanga: o Tola, o Pua, o Ayubu de o Simirono.

¹⁴ O Sebulono ai ngofa-ngofaka manga romanga: o Serede, o Elono de o Yaleele.

¹⁵ Hokogea o Yakubu ai ngofa-ngofaka de ai dano-danonguku o nau-nauru de nagali ngoi ora o ngo Dina abe wamake o ngo Leaino ma oraha ka yogogerohi o Padana-Arama ma tonakoka. Ho yamoruange de yahange manga ngoeuku abe to ngo Leaino ami ngofa-ngofaka de ami dano-danongo.

¹⁶ O Gaada ai ngofa-ngofaka manga romanga: o Sifiono, o Hagi, o Suni, o Esebono, o Eri, o Arodi de o Areli.

¹⁷ O Asere ai ngofa-ngofaka manga romanga: o Yimana, o Yisawa, o Yisiwi de o Beria; de naga manga biranga o ngo Seraha. De naga o Asere ai danongo abe o Beria ai ngofa-ngofaka manga romanga o Hebere de o Makiele.

¹⁸ Ho yangimoi de yabutaanga manga ngoeuku to Yakubu ai ngofa-ngofaka de ai dano-danonguku abe wamake o ngo Sipaino abe muna gea o ngo Lea ami duduhunu abe ami baba o Labana womihidoaka munangika.

¹⁹ De o Yakubu ngoi fekata o ngo Rahele ami ngofa-ngofaka o Yusupu de o Benyamini.

²⁰ O Yusupu ai ngofaka yahinooto de ona yomaboa o Mesiiri ma tonakoka manga romanga o Manase de o Efaraimi. De manga meme o ngo Asenata abe ami baba o Potifera, una gea o hidemo abe wogogere o Onoka abe genangoka o Mesiiri ma nyawa wahidemo manga popangaoika.

²¹ O Benyamini ai ngofa-ngofaka manga romanga: o Bela, o Bekere, o Asibele, o Gera, o Naamana, o Ehi, o Rosi, o Mupimi, o Hupimi de o Arede.

²² Ho yangimoi de yaiata manga ngoeuku to Yakubu ai ngofa-ngofaka de ai dano-danonguku abe wamake o ngo Rahelino.

²³ O Daana ai ngofaka womatengo dika ai romanga o Husimi.

²⁴ O Nafatali ai ngofa-ngofaka manga romanga: o Yaseele, o Guni, o Yesere de o Sileme.

²⁵ Ho yatumidi manga ngoeuku to Yakubu ai ngofa-ngofaka de ai dano-danonguku abe wamake o ngo Bilahaino abe muna gea o ngo Rahele ami duduhunu abe ami baba o Labana womihidoaka munangika.

²⁶ Ho gea ona abe yomaboa o Yakuboka de yoiki yomakiniiki yowohama o Mesiiri ma tonakika ka ma moi de una. Ona mata-mata yamoributaanga de yabutaanga manga ngoe abe iwiniiki o Yakubu. Masara ngoi hunu-hunungu ko yaetongua abe ai ngofa-ngofaka manga feka-fekata.

²⁷ De nako yaetongo o Yakubu de ai ngofaka o Yusupu de to una ai ngofaka yahinooto abe ona nagau o Mesiiroka de ahao ona mata-mataika manga ngoe yamoritumidi o Yakubu de ai dutu-dutu abe yogogere o Mesiiroka.

O Yakubu de to una ai tauoka yogogere o Gosenoka

²⁸ De o Yakubu ai hiaturu la o Yehuda una wohira o Mesiirika la witutumu o Yusupu de wileha unangika ma titi ma ngekomo o Gosenika abe genangoka yomahidodogumu. Ho gea o Yusupu witutumu ibooto de o Yehuda wagilio ai gogianongoruika de ona mata-mata wahihira-hira de ma ngekomo yaniiki ka hiadono o Gosenika yomahiadono.

²⁹ Ho ka de o Yusupu woihene yoboaka de wato woiki watutumu. Ho ai duduhunu to Yusupu ai kuda de ai goroba ma rorahai iwihidiai ibooto de wosobo ai baba witutumu. Ka de womahiadono ai babaika de duru wikooino de woari-ari ma dekana ai baba ai belekaka.

³⁰ De ahao ai baba o Yakubu wotemo o Yusupika wato, “Ngohi naa ngaro ka tohonenge ma ka idadi angamoi de to ngohi ahi lako ahi ngofaka tonimakeoka ho ngohi tonihioriki ka nowangohi!”

³¹ De o Yusupu wahimanga ai roria-dodoto de ona mata-mata genangoka de wahingahu onangika wato, “Irahai ngini naa nikokiboaka ma naa kiani tomahilooahi la ngohi toikohi o Firaunika de tihingahu unangika abe ngini ahi gogianongoru o Kanani ma tonakoka de niaino niboaka la nigogere nenangoka ngohioka.

³² De ngohi ahao tihingahu o Firaunika abe ngini naa nia perelu mata-mata nia wowangoka gea ihititi abe nia aewani ma duduonino. Hokogea tihingahu la winihioriki abe nia aewani gea niatobapaliara irahai ho ka ihikaika ti ngini nia karajaanga niogoana nia duduono. Abe kiani o Firaunu wohioriki abe ti ngini nia duduono enangoo niaoinoka de nia kiahonanga mata-mata ka ma moi niakokiaoinoka.

³³ Hokogea tihitararono o Firaunika la ma oraha una winibehehongo la niwitutumu de ka idadi nginioo niwihingahu imakadaene de to ngohi ahi hingahu unangika abe ma titi ti ngini nia karajaanga nako ma oraha winileha nginika.” Hokogea abe o Yusupu wahitararono onangika.

³⁴ De wato, “Ho ma oraha niaika de nako o Firaunu winileha nginika de hokonaa nia demo unangika, niato, ‘Mia koano, nako to ngomi mia totofora yolape-lapeuku manga wowango ma karajaanga moi dika, de gea o aewani yotobapaliara. De manga aewani gea ma ngoe hiadono de ma duduonoka. Ho ngomi naa, ngaro mia etetekinohi ma, ngomioo hokogea mitobapaliara o aewani de ma duduonoka hoka mia totoforali.’” Hokogea o Yusupu wadotoko ai gogianongoruika manga babaluhu ma demo o Firaunika de ahao wato, “Ka de ahao hokogea woihene nia demo de o Firaunu marai duru wosanangi winihigunoa la nigogere nenangoka o Gosenoka la nimakitingakika de o Mesiiri ma nyawa. De angamoi o Mesiiri ma nyawa mata-mataika yaemono o aewani ma gogoanika.” Hokogea o Yusupu ai hingahu ai gogianongoruika ma oraha watutumu onangika.