Dodadi 44 - Ma Jou ai Demo-demo o Totobelohoka

O Yusupu ai mangko o haakaino ihidataoka

¹ De adonoka ma oraha ai roria-dodoto yolio de o Yusupu wihuloko wotobahiatu-aturika wato, “Ngona nohiaturu abe hokokia yapoa yomagao manga gandumu de hokogea ma amoko nahidoaka onangika. Ho to ona manga karongo amomoiika niakokioma-omangiye la yomagao abe ka idadi yapoa. De manga tiwi abe o gandumu ma ija ngona nohigilioli homoi-homoiika onangika. Abe nako manga karongo ko niaurituahi de manga tiwi ihira ngona nonoaukuohi ma bionoka de ahao niauriti.

² De to ngohi ahi mangko abe o haakaino enangoo gea nohidotonoauku to una abe manga baha ai karonguku de nohiloku-lokuiye ka ma moi de ai gandumu ma tiwi.” Hokogea o Yusupu wihibehehongo wotobahiatu-aturika ho hokogea wodiai.

³ De ma dawangeino duru o ngoru-ngorumino yahigunoa la o Yusupu ai roria-dodoto yokokilio manga tonakika de manga keledai ihikokibarene hiadono duru de ma ginaka amomoiika.

⁴ Masara o kota yanoa ko yokurutikauahi de o Yusupu wihulokoli una wotobahiatu-aturika wato, “Ho naa ona yopahaka ho ngona kiani nomatai-taiti nahiduru la ona gea natumungukuohi. De gea naleha onangika nato, ‘Ngomi midiai nginika ma rorahai ho adodoa ho nia balaha itorou ngomino?

⁵ O kia ma titi hiadono ahi baluhu niwidohiki ai mangko o haakaino gea abe wapake ai akere ma ngongokere de ai mamaihi ma ngi? Duru itorou ngini nidiai unangika.’ Hokogea kiani ngona naleha onangika.” Ka de o Yusupu wihuloko hokogea de una wohiatu-aturu wosoboka.

⁶ Ho una womatai-taiti wahiduru, de wadaene, de ona wataere duru waniiki to Yusupu ai demo ho wato, “Done sarakia ngini? Ngomi midiai nginika ma rorahai ho adodoa ho nia balaha ma dorou ngomino? O kia ma titi hiadono ahi baluhu niwidohiki ai mangko o haakaino gea abe wapake ai akere ma ngongokere de ai mamaihi ma ngi? Duru itorou ngini nidiai unangika.” Hokogea wataere onangika.

⁷ De ona yomademo ato, “Mia baluhu, marai ngomi duru ko mihiorikua ani demo gea ma titi. Adodoa ho nomitae-tae hokogea? De ngomi naa duru miagoungu ko midiaiua hokogea angamoi ngomi naa o nyawa biaha dika ho mihioriki ko idadiua hokogea itorou midiai mia baluhika!

⁸ Barikua hoka nengokadau mia inomo ma bobangu abe miamake mia karongoka, genangoo de mihigilio ngonaika angamoi mianiiki ma totiai dika. Ho nako hokogea to ngomi mia hininga done sarakia de mianiiki abe ko itiaiua hiadono ani dutu ai haaka eko ai gurasi ai tauoka mimagoraka?

⁹ Ho naa ngaro ka notailako dika mia kiahonanga homoi-homoiika de nako ngona ahao namake ani dutu ai mangko gea, ngaro to onaguna dika ai kiahonangoka abe genangoka namake ani baluhu ai kiahonanga gea, de una abe womagoraka ka idadi una gea nihohonenge. De ngomi utu nomihikokidadi ani baluhu ai gogilaongo ngaro ka hiado-adonika de ngaro ko iwa mia gaji.” Hokogea o Yusupu ai ria-riaka yopaluhu de o hidungono ma demo.

¹⁰ De wohiatu-aturu gea wapaluhu onangika wato, “Itiai ahao ngohi todiai hoka ngini nitemoka. Masara una dika abe ahi baluhu widohiki ahao titumungu de tihidadi o gilaongo hoka nitemoka. Ngini utu nia howono ko iwa ho tinihigunoa nigila-gila dika nilio.” Hokogea ai demo de yoborisanangi.

¹¹ Ho gea yomataiti manga karo-karongo ihiguti manga keledaiino de yakokihohe la ka idadi watailako.

¹² De una wohiatu-aturu o Yusupu ai tauoka wakokitailako womulaenge de to ona manga riaka ai kiahonanga de wogila-gila ka hiadono manga dodotuku ai kiahonanga. Ho gea womahiadono to Benyamini ai karongika de genangoka wamake o Yusupu ai mangko.

¹³ Ka de wamake abe gea ena wolingiri de ai ria-riaka manga pakeanga yakakihi ma titi manga hininga duru ihuha de manga kiahonanga ihibarenoli manga keledaiuku de ona mata-mata iwiniiki wohiatu-aturu gea ho yokokilio o kotaikali.

¹⁴ De o Yusupu nagahi ai tauoka ma oraha yoboainoli de o Yehuda wahihira-hira ai roria-dodoto de ona yatilabukuku ai himangokali hiadono manga pea itikiuku ma meheluku.

¹⁵ De o Yusupu waleha onangika wato, “De ngini naa sarakia? Abeika naa nidiaioka o howono! Mode ngini ko nihihiorikua o nauru naa abe de ahi sosawaroka de ahi tobahioriki ho hiadono ngaro ko ahi himangokaua ma, ka idadi tahioriki o nyawa manga howono?” Hokogea ai dodaere ma leleha ai ria-dodotika.

¹⁶ De o Yehuda wipaluhu o Yusupika wato, “Mia baluhu, done sarakia de ngomi ani gogilaongo naa de mimademo miato ko iwa abe miahowono ngonaika. Abe hokokia ngomi mimahitaana abe ko midiaiua? Naa duru itararono Ma Jou womihohowono ani gogilaongo ngomi naa ma titi Una wakokimakeoka to ngomi mia howono. Ho naa miboali mia baluhino la nomihidadi ani gogilaongo ngomi ka ma moi de mia dodoto abe to una ai karongoka ani duduhunu wamake to ngona ani mangko gea.” Hokogea dika o Yehuda wotemo.

¹⁷ Masara o Yusupu wopaluhu wato, “Koua, nako hokogea ngini mata-mata tinitumungu gea ko itiaiua. Ma abe una wohidohiki, una dika titumungu la tihidadi ahi gilaongo. Ngini utu ka idadi nikokilio nia babaika.” Hokogea o Yusupu ai demo.

¹⁸ De ahao o Yehuda womatotomoroini woaguru waika o Yusupu ai himangika de ai roria-dodoto waademo ka ma moi wato, “Ahi baluhu, ngohi naa tato kiani ngomi tomidemo ngaro de ahi demo ma hohutulu dika ngonaika. De duru tonganono ko nohingamoua ngohino angamoi ahi baluhu hoka nodadioka o Mesiiroka manga koano.

¹⁹ Marai, ahi baluhu, ma dihira ngona ka nohiningahi abe ngona nomileha ngomino nato, ‘Nako ngini sarakia, nagahi nia baba eko nagahi nia ria-dodoto utu?’

²⁰ De ngomi minihingahu miato, ‘Mia baluhu, igoungu mia baba nagahi masara una iwiperekioka de nagahi womatengoli mia dodoto ma baha abe womaboa ma oraha mia baba iwitimonoka. Masara to una ngoi meme ami ngofaka ka yahinooto dika masara ma riaka una gea wohihangoka ho mia baba ai ngofaka manga memeino gea ka unangokahi mia dodoto naa de duru mia baba widora unangika naa.’ Hokogea minihingahu ngonaika.”

²¹ “Masara, ahi baluhu, ka de gea mia demo gea noihene de ngona nogahokoli nato, ‘Nia dodoto gea kiani niwiaoino la ka idadi timake.’

²² Masara ngomi naa ani gogilaongo miato, ‘Mia baluhu, mimahilooa masara nako una gea wiwihikatingaka mia babaino de marai mia baba ahao wohonenge.’

²³ De naa duru tomihilooahi masara ngona ma oraha gea nomihitiari nato, ‘Nako ngini naa hoka niboali la o inomo nimale de nako nia dodoto gea ko niwiaoinoua, ngaro ufa de niboa angamoi ko tinidafongua.’ Hokogea, ahi baluhu, ani demo ngomino.

²⁴ Ho ani demo mata-mata gea ngomi ka de milio mia babaika de kiani wiwihingahu unangika.”

²⁵ “De ika-ika de mia baba womihulokoli wato, ‘Ahi ngofa-ngofaka, kiani naa niloikoli o Mesiirika la nanga inomo ma hohutuloli ninaijaino.’

²⁶ Masara ngomi wiwihingahuoli miato, ‘Baba, ngaro ufa ngomi miloikoli nako mia dodoto o Benyamini ko wominiikua. Ma, nako unangoo woiki de ahao ka idadi miloiki angamoi manga popareta ma hidimono doka wato ngomi ko wiwimakeokaua nako mia dodoto ko iwiwa ngomioka ma oraha miboali.’ Ahi baluhu, hokogea mia baba wiwihingahuoka.”

²⁷ “De ahao una womihihohininga ma titi ngoi fekata gea abe mia dodoto ngoi meme, wato, ‘Ma, abeika o ngo Rahele ami ngofaka yahinootoka dika.

²⁸ De womatengo woikika de ko timakeokaua angamoi marai o fuhuku ma aewani iwigolioka ho hiadono ai badanga ihikokatingakoka.

²⁹ Ho nako ai dodotoli naa unangoo ngini nimihikatingaka ngohino hiadono unangoo ahao wobodito de gea ahi tadauru ma gare-garehe naa nohilungunoka angamoi ahi hininga ma huha dika de tohihonenge!’ Hokogea mia baba ai hininga, ahi baluhu!”

³⁰ “Ho ani gilaongo naa, ngohi ko idadiua tolio unangika nako mia dodoto ko wominiikua angamoi hokogea o baba widora hiadono ai hininga de ai wowango hoka duru imahitataulika unangika.

³¹ Ho nako ahao miboa de o baba womalega ngomino de mia dodoto ko iwiwa ngomioka, gea wohonenge! De gea wohonenge ma titi ngomioka angamoi wiwihihuha hiadono idadi hoka wotemoka abe ai tadauru ma gare-garehe ngomi ma hirete mialungunoka angamoi ngomi wiwihihuha hiadono ai hininga ma huhaino dika de wohonenge!”

³² De o Yehuda ka widemohi ai dodoto wato, “Ahi baluhu, ngomi mia tonakokahi abe ko misobouahi miboa nenangino de ngohi tihibehehongo ahi babaika abe mia dodoto tigoana itiai tato, ‘Baba, nako mia dodoto gea ko tihigilioua ahao iotaka ngohino ma hohowono ka hiado-adonika.’

³³ Ho ahi baluhu, duru togahoko la ngohi ahi dodoto tituruuru la una ka idadi wolio de ahi riaka de ahi doo-dodoto waniiki. Duru ahi baluhu, togahoko nako ka nomodeke la ngohi dika nohitumungu nenangoka de nohihidadi to ngona ani gilaongo la gea tituruuru mia dodoto o Benyamini.

³⁴ Angamoi duru ahi baba tidora de ko tapoaua ai hininga ma huha tamake abe ma oraha miboaika unangika de mia dodoto ko iwiwa ngohioka. De ma kangela gea iotaka unanguku de ko idadiokaua ngohi tihimanga!” Hokogea o Yehuda ai demo ma ngoe o Yusupika.