Dodadi 43 - Ma Jou ai Demo-demo o Totobelohoka

O Yusupu ai ria-dodoto yoikoli o Mesiirika

¹ De o hafini kohagiriakaholi o Kanani ma tonakoka angamoi o hiwara kohadekanino o tonaka mata-mataika.

² Ho ka de manga gandumu yamataka abe yomale o Mesiirino de o Yakubu wahulokoli ai ngofa-ngofakika wato, “Ngini naa kiani niloikoli o Mesiirika la ninaijali nanga inomo iti ma hohutulani.”

³ Masara o Yehuda wipaluhu ai babaika wato, “Baba, ngomi ngaro ufa dika de miloiki nako o Benyamini ko wiwiaoua. O Mesiiroka manga popareta ma hidimono gea ai demo ko ma homoaikaua masara gea ma dumutu mia dodotika ai behehongo ngomino. De marai wagoungu wotemo wato ko idadiua ai himanga miamakeoli nako o Benyamini ko iwiwa ngomioka ma oraha miboa.

⁴ Ho kiani ngona nihigunoa la wiwiao mia dodoto o Benyamini de ahao ka idadi miloiki o inomo minaijali.

⁵ Masara nako koua gea ko miloikua angamoi ai demo ngomino duru wagou-goungu womihibehehongo, wato, ‘Nako ngini niboali nenangino de nia dodoto ma baha gea ko niwiaoinoua ngohino, gea ko niamakeokaua to ngohi ahi himanga!’ Hokogea womihingahu de ai demo ma buturungu.”

⁶ Ka de hokogea o Yakubu woihene o Yehuda ai demo de duru de ai hininga ma huha de ma demo gea wahipaluhu wato, “Adodoa ho ngini hokogea niade-ade unangika ma titi naga nia dodoto womatengoli? Ngini duru nihihikangela nia baba angamoi nia hingahu hokogea unangika!” Hokogea wataere ai ngofa-ngofakika.

⁷ De ona iwipaluhu manga babaika ato, “Masara, Baba, duru una wolingiri ma titi abe to ngone nanga tau ma goronaka ho womileha-leha ngomino. Barikua ngonaoo de wonileha abe nako ka nowangohi eko nohonengoka. De womilehali ngomino nako naga utuohi mia ria-dodoto ho hiadono ngomi wiwihingahu unangika. Masara ngomi ko miafikirua ahao wogahoko wato, ‘Kiani nia dodoto ma baha niwiaoino la ngohi ka idadi timake.’ Gea ma titi hiadono wiwifetongo miato naga womatengohi mia dodoto.”

⁸ Hokogea ona iwihingahu o Yakubika ibooto de ahao o Yehuda wihibehehongo ai baba o Isiraelika wato, “Baba, ngohi duru mia dodoto tigoana iti ngona nihigunoa la o Benyamini wominiiki la itaiti ngomi misobo la ufa naga ngoneoka yohonenge o hafini. De done ngonaoo de ani dano-danongo nikokihonenge.

⁹ De naa ngohi tohitunguu de ahi behehongo ma gou-goungu la nohioriki ahao tihigilio ngonaino naa, abe nako ko tihigilioua ahao iotaka ngohino ma hohowono ka hiado-adonika.

¹⁰ Kiani itaiti ngomi misobo. Abeika, nako ma dihiraino de nihigunoa la una wominiiki tanu naa abe ma hinooto ibooto miaika miaino de nanga inomo minale.” Hokogea o Yehuda ai babaika wiribuutu.

¹¹ Ho ma bahaika manga baba, o Isiraele, wihigunoa wato, “Nako duru ko iwa ma ngekomo utu marai naa ka idadi o Benyamini tihigunoa la ngini nikokiloiki masara kiani niwihidiaiohi nia hidoaka o Mesiiroka manga hidimonika la niwihisanangi. Ho nialeinohi nanga tonaka ma hasilino abe duru o nyawa ihigiriiri enangika hoka o balama ma hilo, de o ofungu ma gula, de o rampa-rampa, de o muuru, de o kemiri ma hofoko, de o badama ma hofoko. De nia karo-karongo niakokiomangiye de ma hasili gea la mata-mata idadi nia hidoaka unangika.

¹² De o inomo ma bobangu kiani ma hinootoino nifangu abe ma dihira ma tiwi niamake nia karongo ma bionoka kiani nihigilio angamoi marai yahowono yakelenga genangoka. De ahao o tiwi utuohi niao la nifanguoli o inomo abe naa niloiki ninaijali.

¹³ De nia dodoto ka idadi niwiao la niwihimatoko o naurika gea abe winihibehehongoka nginika.

¹⁴ De ngone duru honganono la Ma Jou Wokokurutiye winiduhunu la ma oraha niwihimanga o Mesiiri ma popareta gea de una winisanangi nginika hiadono o Simeono wihigilio nginika de o Benyamini ko witumungua genangoka la ka idadi ngini nikokilioli nenangino. Masara nako yohonenge de gea ahi hininga ma huha ngaro kohadubuho masara ka tamoku dika.” Hokogea o Yakubu ai behehongo o Yehudaika de ai ria-dodotika.

¹⁵ Ho ka de wahigunoa yoiki de yosoboka ka ma moi de o Benyamini de manga hidoaka de manga inomo ma bobangu ma tiwi abe naa ma hinootoino yakokiao. De yomataiti o Mesiirika de ka yogila-gila yomahimatoko o Yusupika ai ngioka gea abe una biaha watobadafongo ona de manga pereluoka unangika.

¹⁶ Ka de o Yusupu wamake ona yoboaino de ai lako ma dumutu duru o Benyaminika. De ahao womatengo o Yusupu ai duduhunino, abe wohiatu-aturu mata-mataika o Yusupu ai tauoka, una gea wiahokino de wihingahu unangika wato, “Ona naa yoboaino gea toigo la o wange ikorona yolomo ngohioka. Ho ngona kiani bootino ona nangotaka ahi tauika de nomidomaoo o hapi abe hoka o rame-rameoli ma inomo nomihidiai.” Hokogea o Yusupu wihuloko una wotobahiaturika.

¹⁷ De una gea wodiai duru imaketero hoka o Yusupu wihulokoka ho o Yusupu ai ria-dodoto gea wangotaka to Yusupu ai tauika.

¹⁸ Ho gea o Yusupu ai ria-dodoto ka de yamake manga dumutu ahao genangika wao de duru yohawanoka. De yomakoketemo ato, “Naa adonoka inataoko! Marai ma titi ma tiwi gea ihigilio nanga karongika hiadono inataoko hokonaa. Marai wonahideeoka wonahidadi to una ai gogilaongo angamoi wato ngone hidohiki ho naa ka idadi wonahohowono de marai wonahikarajaanga kohadubuho. De marai nanga keledai mata-mata womahitouna.” Hokogea ipuda manga hiningaka.

¹⁹ Ho gea yoboa o Yusupu ai tau ma ngoranino ma ko yowohamuahi de o Yusupu ai roria-dodoto duru de manga horomati iwihimanga una wotobahiatu-aturu gea de yomahilooa unangika,

²⁰ ato, “Mia baluhu, marai ihira mimahilooa ngonaika angamoi ma dodihiraka miboaino miato mimaija o inomo masara ma bobangu marai ngini ko niamakeua.

²¹ Angamoi ma oraha ngomi milio de mia dodagi ma goronaka de miato mimaidu ho mimahiainuku. Mimahiaini ho miato mia keledai mihiolomo ho miahohe mia karongo ma papakiti de duru miamake genangoka mia karongo ma bionoka naga mia popoje homoi-homoiika de ma tiwioka abe mia inomo ma bobangu. De gea ena ma tiwi marai o nyawa yawohanga eko ihilihowono yakelenga o karongo ma goronauku duru mia gandumu ma lokuoka.

²² Ho gea mimahilooa mia baluhu ngonaika, de naa ngomi miboa la mihigilio ma tiwi gea ngonaika de naga mia tiwi utuohi mimagao la ka idadi nia inomo mimahijali. Ho duru mimahilooa mia baluhu!” Hokogea iwihingahu unangika.

²³ De ahao una wohiatu-aturu gea wapaluhu onangika wato, “Ngini naa ngaro ufa nihawana de ufa nia hininga ihuha ma titi ma tiwi gea abe o inomo ma bobangu. De angamoi ma inomo ma tiwi gea ena ngohi tamakeokau. Ho marai ti ngini nia Jou, abe nia totofora manga Jou, gea Una wohiaturoka la nia tiwi naga genangoka nia karongo ma goronaka.” Hokogea wahingahu onangika ibooto de ahao manga ria-dodoto o Simeono wihihupu de wingotaka onangika.

²⁴ De ahao o Yusupu ai roria-dodoto gea wahigila-gila la yowohama to Yusupu ai tau ma goronaika de wohiaturu la o akere yadotaka onangika la ka idadi ona manga lou yomaihoro. De wohiaturoli la manga keledai yatofo.

²⁵ De wahingahu onangika wato, “Bootino o wange ikorona ngini niolomo de nanga hidimono, ho gea ma titi nginioo miniahokino ai tauino naa la ka idadi niolomo de una.” Ho ka de gea yoihene de o Yusupu ai roria-dodoto yomakoketemo ato, “Marai ngone naa kiani homahidiai nanga hidoaka la ka idadi hihidoaka manga popareta ma hidimonika abe ahao bootino wonatutumu.”

²⁶ Ho ka de o Yusupu woboaino de yatilabukuku ai himangoka hiadono manga pea itiki ma meheluku de manga hidoaka yakelenga ai himangoka.

²⁷ De o Yusupu waleha onangika wato, “Ho ngini ahao naa niboali de sarakia abe ti ngini nia baba abe ma dihira nihihingahu iwiperekioka? Gea una ka wowangohi?”

²⁸ De ona iwipaluhu ato, “Marai una nagahi gea doka mia tonakoka abe ma oraha ngomi wiwinoa de una ka woputurungohi.” Hokogea yotemo ibooto de ahao yomaponukokali o Yusupu ai himangoka hiadono manga pea itiki o tonakuku.

²⁹ De ahao o Yusupu duru womalega ai dodoto o Benyaminika abe ona yahinooto manga meme ka moi, de walehali onangika wato, “Ho una naa marai ti ngini nia dodoto abe ma dihira nihiade-ade ngohino eko sarakia?” De ko yopaluhuahi de ka wogila-gila wotemo o Benyaminika wato, “Ahi ngofaka, ngohi tonigahoko Ma Jouika la wonipaliara de ai dora.”

³⁰ Masara ka de hokogea wotemo ibooto de kiani o Yusupu womataiti wohupu angamoi ai dora ilamoko ai dodotika hiadono ko womatongohonokaua. Ho wowohama o kamarika moi abe duru womatengoka de ahao duru ai koongo itifa.

³¹ Gea woari ibooto de ahao womamomahauohi ibooto de ahao wohupuoli de womatongohono la ibootoka woari. De ahao o Yusupu wahuloko iwileleanika wato, “Ngini o inomo nimihidiai la ngomi naa miolomo!”

³² De manga ngolo-ngolomo ai duduhunu yahidiai la manga meja hange. Masara o Yusupu womatengoka o meja moioka de angamoi ai roria-dodoto o Ibarani ma nyawa ho hiadono yomaketemomoi manga meja. De o Mesiiri ma nyawa abe naga genangoka onangoo o meja moioli angamoi yomahibohono ko idadiua yomahisapurino yolomo de o Ibarani ma nyawa.

³³ De o Yusupu ma hirete ai roria-dodoto wahiaturu la yomatatatorika yogogere o mejaka la yomarihimangino de una. De gea ona yomaketedamaanoka de yomakeheranga angamoi o Yusupu watatorika manga riakoka de waino hiadono o Benyamini manga bahaika.

³⁴ De naga o nyawa yaleleani manga inomo homoi-homoiika de yale o Yusupu ai mejaino manga inomo. De una wohiaturu la o Benyaminika iwileleani o inomo kohaamoko hiadono wihifoloiika ma motoa de ai ria-riaka. De gea o Yusupu de ona mata-mata yolomo de yokere yogogarago hiadono duru yakokipunuhoka.