Dodadi 42 - Ma Jou ai Demo-demo o Totobelohoka

O Yusupu ai ria-riaka yoiki o Mesiirika ma titi o hafini

¹ De o Yakubu o Kanani ma tonakokahi wogogere de onangoo yadaene o hafini gea. Ho ka de o Yakubu woihene bari naga o gandumu o Mesiiroka, de wotemo ai ngofa-ngofakika wato, “Adodoa ho ngini nenangokahi bowahu ka nimaketedamaanoka dika de ko niloikua?

² Ngohi toihenoka bari naga o gandumu o Mesiiroka, ho kiani ngini niloiki doka o Mesiirika la ninaija nanga inomo la ufa hohonenge.” Hokogea manga baba o Yakubu wahuloko onangika.

³ Ho o Yusupu ai ria-riaka yangimoi yoiki o Mesiirika yomaija o gandumu.

⁴ Masara o Yakubu ko wihigunoaua o Benyamini waniiki done unangoo hoka o Yusupoli wobodito. O Benyamini duru o Yusupu ai dodoto abe manga meme ka moiino dika.

⁵ Ho o Yakubu ai ngofa-ngofaka yangimoi gea yoiki o Mesiirika yomalingiri o inomo. De naga manga ngoe o nyawa o tonaka utuino onangoo yokokiboa o Yusupika angamoi o Kanani ma tonakokaoo ko iwaka manga inomo.

⁶ De mangale naa o Yusupu wodadioka o Mesiiri ma tonakoka manga hidimono wokokurutiye ho una dika wofuku-fukunu ma inomo o nyawa mata-mataika. Ho o Yusupu ai ria-riaka o Mesiirika yomahiadonoka de yoboaino o Yusupino de manga horomatioka yomaponu-ponuku ai himangoka.

⁷ De o Yusupu ka de wamake de wahiorikoka ona gea ai ria-riaka, masara wotemo onangika hoka wahidadi o nyawa ma homoa dika ho hiadono wabobanarata onangika wato, “Ngini gea o kiaino niboa?” De ona yopaluhu ato, “Ngomi naa o Kanani ma nyawa, de ngomi miboaino la o inomo mimaija nenangoka.”

⁸ De o Yusupu duru wahiorikoka ona gea ai ria-riaka, masara ona ko iwihiorikokaua to ona gea manga dodoto.

⁹ De ahao o Yusupu womahohininga una de ona ma titi ai buluharoka abe ma dodihiraino gea. De watemo onangika wato, “Ngini naa marai o nyawa abe nia hidee la niato nimingino ho marai naga inihuloko la niboaino mia tonaka naa niatailako la nihioriki o kiaka ko iwa ma gogoana!” Hokogea o Yusupu ka wahiree-reeika ai ria-riakika.

¹⁰ De ona yopaluhu o Yusupika de manga demo ato, “Masara, mia baluhu, hokogenangua mia dumutu nginika. Ngomi naa hoka ani gilaongo dika abe miboaino la mimalingiri o inomo.

¹¹ De ngomi miboaino naa ka o roria-dodoto dika mata-mata naa. De ngomi naa minihingahu ngonaika mia demo duru ma gou-goungu dika de mia baba ka moi. De ngomi ko minielu-elukua de ko o nyawa manga huhulokua ngomi naa ho ko ma titiua miatailako o tonaka naa.” Hokogea ai ria-riaka yomademo unangika.

¹² Masara o Yusupu ka wotemohi wato, “Koua, ngini marai naa niboaino la niatailako mia tonaka nenangoka, la nihioriki o kiaka mia buturungu de o kiaka mia mobole genangoka abe ko iwa ma gogoana.” Hokogea wahigali-galioli wotemo ai ria-riakika.

¹³ De ona yomademoli de yomahideetongo ato, “Ngomi naa ani gilaongo dika, de ngomi igoungu imingimoi de imihinooto de mia baba ka womatengo dika de mia gogere o Kanani ma tonakoka. De naga mia babaka mia dodoto womatengohi ma, ona yomagoo-gogere doka o Kanani ma tonakoka. Masara womatengo mia dodoto una gea ko iwiwaka.” Hokogea yomahingahu de o Yusupoo iwihidetongoka to una ai himangoka.

^14-15 De o Yusupu watemoli onangika wato, “De ngohi duru tagoungu totemo imaketero hoka igoungu o Firaunu ka wowangohi. De tato ngini marai o nyawa manga huhuloko. De hokonaa tinitailako la tinihioriki nako nia demo gea igoungu eko nihieluku. Ngini ko tinihigunoauahi nilio nia tonakika hiadono nia dodoto woboaka ngohino la timakeohi de ahao tinihioriki abe ngini ko nihielu-elukua.

¹⁶ Ho ti ngini nia dodoto gea kiani niwileohi ma, nginioka womatengo dika woiki wile nia dodoto ma baha gea. De nako ngini utu kiani tinibuiokahi ka hiadono yoboali yahinooto gea nia ria-dodoto. Hokogea tinitailako nia demo nako igoungu eko koua. Ma, nako igoungu nihieluku, genangoka de ahao duru tohioriki abe ngini o nyawa manga huhulokino dika. De gea ngohi duru totemo tagoungu imaketero tagoungu tato o Firaunu ka wowangohi.” Hokogea o Yusupu wahingahu onangika.

¹⁷ De ahao o wange hangeino ma dekana ona mata-mata gea wahingohamika o bui ma tauoka.

¹⁸ O wange hange ipahaika de o Yusupu watutumu ai ria-riakika de wahingahu onangika wato, “Ngohi naa duru de ahi horomati Ma Jouika. Ho hokonaa ahi behehongo nginika, tato ngini naa nako nianiiki ahi hiaturu de ka idadi ngohi tinihigunoa niwango.

¹⁹ Ho kiani nihihibehehongo ngohino niato ahi hiaturu gea nianiiki de hokonaa tinitailako nako ngini niagoungu nianiiki eko koua. Abe naa ngini utu ka idadi tinihigunoa la nilio nia inomo nimagao nia tau homoi-homoiika masara womatengo nginioka una ngohi titumungu naangoka ka hiadono niboali nenangino.

²⁰ Masara ngini naa abe nilio kiani ahao niagoungu ahao niboali nenangino abe nako nia dodoto ma baha gea ko niwiaoua ngohino, de ahao tinihioriki abe ko niagou-goungua nihibehehongo ngohino. Ma nako gea una niwiaoino nenangoka de ahao tinihioriki abe niagoungu de ngohi ko tinihohonengua. Hokogea tinihibehehongo.” O Yusupu ai demo gea yoihene de iwihingahu unangika ato ai behehongo gea yaniiki.

²¹ Masara ona yomakoketemo de to ona dika manga demo yapake ato bote ko wohiorikua. Ho yotemo ato, “Abeika, ngone naa ngade-ngade de hoboditoka, de gea ma titi nanga howono nanga dodoto o Yusupika! Ma dihira gea hihikangela de hamake ai hininga ma huha de hoihenika womahigaho-gahoko o duduhunu ngoneino masara ngone ko hilegaikaua nanga dodotika. Gea duru ma titi hiadono ngone naa hokangela!” Hokogea yomatoduba yotemo duru o Yusupu ai himangoka.

²² De o Rubene womademo ai doo-dodotika wato, “Masara ngohi dika tinitaere tato, nanga dodoto ho ufa hahowono unangika. Hokogea ahi demo nginika e? Masara nia riaka ko nihihigihenua! Ho nanga dodoto ai awunu ikopoa de naa ai hibalaha inadaenoka. Ho nanga dodoto wohonenge de naa ma bahaika de ngoneoo hohonenge angamoi nanga dodoto hitomaka.”

²³ Hokogea yomakoketemo o Yusupu ai himangoka angamoi ona ato bote una o Mesiiri ma nyawa ho ko wohiorikua to ona manga demo. De angamoi naga o Yusupu ai duduhunu womatengo abe to Yusupu ai demo wadofanga ai ria-riakika. De to onangoo manga demo waturuuru o Mesiiri manga demoika ma oraha wadofanga o Yusupika. Masara o Yusupu ka womangaratii ma oraha ai ria-riaka gea yomakoketemo.

²⁴ Ho ka de woihene manga demo gea de ai koongo imulaenge itifa ho womadohuku womalingiri ma ngi la genangoka womahidutulukino de woari. Gea woari ibootino de ahao wagilioli onangino de ma hohutulu watemoli onangika. De ahao wiiriki ai riaka o Simeono onangino de wahuloko ai gogoanika la una iwipakitoka duru ai ria-dodoto manga himangoka.

²⁵ De ahao o Yusupu wahuloko ai duduhunika la ai ria-riaka manga karongo yakokiomanga de o gandumu. De ai ria-riaka homoi-homoiika yofangu mata-mata manga gandumu gea. Masara o Yusupu wahihuduika dika ai duduhunika la manga inomo ma tiwi gea ihigilio ma, iti ufa ona ihioriki. Ho ma tiwi gea yonoa manga karonguku masara ihiloku-loku manga karongo ma bionoka homoi-homoiika. De yahidoakoo manga bilaono la yawedono manga dodagi ma goronaika.

²⁶ Ho manga gandumu gea ihibarene manga keledai homoi-homoiuku de yosobo yolio manga tonakika.

²⁷ De manga dodagi ma goronaka de yomahiainukuohi. De ahao womatengo o gandumu wale la manga keledai wohitofo masara ka de ai karongo wahoheiye de wamake ai tiwi o gandumu ma lokuoka.

²⁸ De iwitodokana wato, “Abeika naa! Ahi gandumu ma tiwi ena nenanga! Adodoa ho hiadono naga ahi karongo ma goronaka?” Ka de gea yamake de ona duru yokokihawana, de yomakokeleha, ato, “Maraioka naa Ma Jou wonahohowono eko o kia ma titi?” Hokogea yotemo de manga hawana dika hiadono yofafara.

²⁹ Ho gea yomahiadonoka o Yakubika de iwiade-ade manga babaika gea mata-mata abe idadi manga dodagioka.

³⁰ Iwiade-ade ato, “Una gea abe o Mesiiri manga popareta manga baluhu duru wotemo de ma buturungu ngomino. De womitae wato ngomi de mia hideeoka o Mesiiri ma nyawaika ho hiadono miboa la manga tonaka miatailako la mihioriki o kiaka ko iwa manga gogoana.

³¹ Masara ngomi wiwihitararono unangika abe hokogenangua ma titi miboa naa abe ngomi o nyawa abe mia demo duru ma gou-goungu dika.

³² De wiwihingahuoo abe ngomi o ria-dodoto imingimoi de imihinooto de mia baba ka moi masara mia dodoto womatengo ko iwiwaka de mia dodoto ma baha womagoo-gogere doka o Kanani ma tonakoka de mia baba.

³³ De ahao una manga baluhu gea wato, ‘Hokonaa tinitailako la tinihioriki nako nia demo gea igoungu eko koua: kiani womatengo nginioka niwinoaikahi nenangoka de nilio nia inomo nimakokigao nia tau homoi-homoiika.

³⁴ De ahao ti ngini nia dodoto gea kiani niwiaoino la tinihioriki nia demo gea igoungu. Una gea kiani timakeokahi de ahao nia ria-dodoto abe niwinoaika nenangoka ka idadi tihigilio nia giamika. De nako ngini niagoungu de ahao ka idadi ka ihikaika niboa nimaijali o inomo ngohioka angamoi tiningaku.’ Hokogea ai behehongo ngomino de abeika naa nanga inomo minaijaino.” Hokogea yoade-ade manga babaika.

³⁵ De ahao manga karongo yakokipoa de homoi-homoiika yamake manga popoje abe de ma tiwioka. Ho ka de manga gandumu ma bobangu yamake de ona de manga baba duru yokokihawana.

³⁶ De o Yakubu ai ngofa-ngofakika wataere wato, “Ngini naa duru nisosawaro nihihikangela nia baba! Hoka nioigo la niato nimamata! Ihira o Yusupu ko iwiwaka de ahao o Simeonoo unangoo ma ko iwiwa, de naa niato o Benyaminoli niwiao la unangoli niwihihihanga! Ho done sarakia ahi kangela ka ihikaika ngini niodogoli!” Hokogea o Yakubu ai ngofakika wotemo.

³⁷ De ahao o Rubene manga babaika wihibehehongo de o koboto ma demo, wato, “Baba, ngohi o Benyamini titagongo abe nako nohihigunoa la ngohi tiao de tonihibehehongo de ahao tihigilio ngonaika. Abe nako una wobodito de ka idadi to ngohi ahi ngofaka o nauru yahinooto gea natoma.” Hokogea o Rubene wihibehehongo ai babaika.

³⁸ Masara ka de gea woihene de o Yakubu ai hininga ma huha ka idogo dika de wato, “Ngona kiani nototoihene ahi demo naa, ahi ngofaka o Benyamini, ko woikua! To una ai riaka wohonengoka ho ka unangokahi abe ngoi meme ami ngofakino ho ko tihigunoaua! Abeika ahi pea naa iarehoka ho nako unangoo ahao wobodito de ahi hininga ma huha dika de hiadono tohidohonenge!” Hokogea o Yakubu ai hininga ma huha ma demo.