Dodadi 41 - Ma Jou ai Demo-demo o Totobelohoka

O Firaunu ai buluhara

¹ De o taongo hinootoli ipahaika, de o Yusupu una nagahi o bui ma tauoka. De o futu moiuku o Mesiiri ma nyawa manga koano, o Firaunu gea, unangoli wobuluhara. De abeika gea wamake ai buluhara ma goronaka: una bari womaokoino o Nili ma akere ma ngigoroka.

² De wolega-lega de wamake naga o hapi o doomu moi de gea o gahumu tumidi ihupuino o akeroka, de ma hapi tumidi gea ma rorahai de ma gogutufuru mata-mata. Ifareniye ma ngigoroka de gea ahao iolomo o ruruubu o ngigoroka gea.

³ De ahao naga wamakeoli o hapi o doomu moioli de enangoo ma gahumu tumidoka ikokihupuino o akeroka. Masara o hapi tumidi gea duru ma bobelelaka mata-mata. De ahao iboaino o hapi ma gogutufurino.

⁴ Ka de o hapi ma bobelelaka gea imahiadonoka de akokilahiri o hapi ma gogutufurika gea ho hiadono ka yotengouku. Ho ka de o Firaunu wamake hokogea ai buluharino de womatodokanoka.

⁵ De ahao o Firaunu ka iwikiookokali de ka wobuluharokali. De bari naga iwangoiye o pine o lifunu moi de ihofoko ma gosela tumidi, de duru irahai de naga de ma bunuhoka o gosela tumidi gea.

⁶ Masara abeika, o pine ihira iwango de ahao ihuhu de gea ma huhuino enangoo ihofoko de to enangoo ma hofoko o gosela tumidoli masara ma gosela tumidi gea itoturuino ko iwa ma bunuhu mata-mata angamoi o hidaloko o wange ma hiwariha awuwu hiadono ma hofoko ma roehe gea ko imariadonua.

⁷ De bari ma pine abe ko iwa ma bunuhu ena gea alahiri o pine de ma bunu-bunuhoka. Ho ka de gea idadi de o Firaunu womatodokanokali de ahao wohioriki gea abe wamake ka o buluharino dika.

⁸ Ho ka de o ngoru-ngorumino de ai hininga ihuha angamoi ai buluhara ma titi ko wohiorikua. Ho ona abe iwileleani ai tauoka onangika wahuloko wato, “Ngini kiani niloiki nialingiri o Mesiiri ma amokika ona abe yotobahioriki, de onangoo abe yososawaro yotobamai-maihi o buluhara ma titi, de ona gea mata-mataika niakokiahokino.” Hokogea o Firaunu ai mau ho gea yokokiboa de ahao onangika wahingahu hokokia wamake abe ai buluhara ma goronaka. Masara ai buluhara gea ma titi ko moiua de ihioriki ngaro ona ko manga ngoe abe yolingiri ma titi.

⁹ De ahao una abe witobaleleani ai akere womulaenge wohininga o Yusupu ai behehongo abe kiani wihingahu o Firaunika wato, “Ahi koano, o wange naa tomangaku ahi howono.

¹⁰ Marai ngona nohininga nengokadau abe duru nomingamo ngomino, ngohi de ahi dodiawo abe wahibaluhu ona yotobahohakai ani inomo hiadono ngomi nomibuioka ani gogoana manga hidimono ai bui ma tauoka.

^11-12 De ma oraha genangoka mimahibui moi de naga womatengo o Ibarani ma nyawa o goduuru, una o bui ma tau ma dutu ai duduhunu. De o futu moiuku ngomi imihinooto miboribuluhara imaketemomomoi de ma titioo imaketemomomoi. De ngomi o goduuruika gea wiwiade-ade mia buluhara de una homoi-homoiika womihingahu mia buluhara ma titi.

¹³ De una wohihingahu ngohino wato, ‘Hokonaa ani buluhara ma titi: ahao ngona nolio ani karajaangika.’ Masara ahi dodiawoli wihingahu wato, ‘Nako to ngona ani buluhara ma titi marai ngona ahao inihohowono inidide.’ Hokogea mia buluhara womihingahu ma titi de duru ikokitaana idadi ngomino abe hoka womihingahuoka.” Hokogea ai demo o Firaunika abe witobaleleani ai akere.

¹⁴ Ka de hokogea woihene de o Firaunu wibehehongo la o Yusupu woboa ho ai gogoana itaiti yoiki o Yusupu iwile la iwihihupu o bui ma tauino. De ona duru o Yusupika iwitataiti la ai gumi womakuluokahi de ai pakeanga womaturuuruokahi de ahao iwingotaka la o Mesiiri manga koanoika wihimanga.

¹⁵ Ho o Yusupu naga ai himangoka de o Firaunu wihingahu o Yusupika wato, “Ngohi toihenoka bari ngona ka idadi o buluhara ma titi nohioriki ho naa tonihingahu ahi buluhara ma dola. Ho abeika nako ngona ka idadi nohihitararono ngohino ahi buluhara ma titi. De angamoi ngaro o nyawa ko manga ngoe abe ato yososawaro masara ko moiua onangoka ihioriki ahi buluhara ma titi naa.” Hokogea o Firaunu wihingahu o Yusupika.

¹⁶ De o Yusupu wipaluhu o Firaunika wato, “Koano, ngohi ahi hiakunu ko iwa la hiadono tonihitararono abe ani buluhara ma titi. Ma Jou dika wohioriki o buluhara ma titi ho kiani Una ihira wohihingahu ngohino de ahao ka idadi tonihingahuoli ngonaika ani buluhara ma titi. Hokogea de ahao ngona o Firaunu namake Ma Jouino ani leleha ma babaluhu ma owa.” Hokogea o Yusupu wihitararono o Firaunika.

¹⁷ Ho o Firaunu wiade-ade o Yusupika wato, “Ngohi ahi buluhara ma goronaka naga tomaokoino o Nili ma akere ma ngigoroka.

¹⁸ De tamake naga o hapi o doomu moi o gahumu tumidoka o akeroka ihupuino, de ma hapi tumidi gea duru ma rorahai de ma gogutufuru mata-mata. O akere ma ngigoroka ifareniye de iolomo o ruruubu ma ngigoroka gea.

¹⁹ Masara ahao naga o hapi enangoo o doomu o gahumu tumidoli ikokihupuino o akeroka. Masara o hapi tumidi gea itorou de duru kohabobelelaka mata-mata. De igoungu ngohi ko ma moiuahi tamake o Mesiiri ma tonakoka o hapi hokogea idadi dorou abe ma hapi tumidi gea ahi buluharoka.

²⁰ De ma hapi itotorou gea ikokiboaino ma hapi ma rorahaiino abe ihira ihupuino o akeroka de ka imaketemomoiino akokilahiri ho ma hapi ma gogutufuru gea ko iwaka.

²¹ Masara ngaro o hapi ma bobelelaka aolomoka de o hapi ma gogutufuru gea masara ma belelaka ka ihirahi dika. Ka de hokogea tamake de tomatodokanoka.”

²² “De ipahaino ngohi ka ihikiookokali de ka tobuluharokali. De nagali tamake iwangoiye o pine o lifunu moi de ihofoko ho hiadono naga ma gosela tumidi de duru irahai de ma bunuhoka.

²³ De ahao abeika, o pine ihira iwango de ahao ihuhu de gea ma huhuino enangoo ihofoko ho hiadono o gosela tumidoli masara ma gosela tumidi gea itoturuino ko iwa ma bunuhu mata-mata angamoi o hidaloko o wange ma hiwariha awuwu hiadono ma hofoko ma roehe gea ko imariadonua.

²⁴ De o pine abe ko iwa ma bunuhu gea ena akokilahiri o pine de ma bunu-bunuhoka. Ho moioo de ko iwaka abe ma hofoko ma rorahai! De ngaro ahi buluhara hinooto gea taade-ade ahi nyawaika abe yososawaro yomai-maihi masara moioo de ko iwa onangoka abe ka idadi ihioriki de ihihitararono ngohino ma titi ahi buluhara.” Hokogea o Firaunu wiade-ade o Yusupika.

²⁵ De ahao o Yusupu wihingahu o Firaunika wato, “Ahi koano, ani buluhara hinooto gea imakadaene ma titi, de gea Ma Jou wonihingahuoka ngonaika gea ahao Una wodiai.

²⁶ O hapi ma gogutufuru tumidi, de o pine ma hofoko o gosela tumidi abe de ma bunu-bunuhoka gea hohidotoomuino ka ma moi angamoi ma titioo ka moi dika. De ma titi gea o taongo tumidi ma dekana abe o datomo mata-mataika duru de ma hasiloka.

²⁷ De o hapi ma bobelelaka tumidi de ma pine ma hofoko o gosela tumidi abe ko iwa ma bunuhu, enangoo hohidotoomuino ka ma moi angamoi enangoo ma titi ka moi dika. De ma titi ka moi gea o taongo tumidi ma dekana abe ko iwa o tonaka ma hasili.”

²⁸ “Ho ahi koano, ani buluhara hinootoo gea ma titi ka moi. De Ma Jou woigo wapake ani buluhara gea la nohioriki abe ahao idadi ani tonakoka. De gea ahao idadi duru imaketero hoka Ma Jou wonihingahuoka ngonaika ani buluhara ma goronaka hoka ngohi naa tonihitararonokau.

²⁹ Naa de imulaenge abe ma oraha o inomo duru kohangoe o Mesiiri ma tonaka ma amokika ka hiadono o taongo tumidino ma dekana.

^30-31 Masara ka de o taongo tumidi gea ipaha de ahao o taongo tumidinoli ma dekana o Mesiiri ma tonaka ma hasili o datomino duru ahao ko iwaka. De gea ikiriakaholi hiadono ngone ko hohiningakaua abe ma dihiraino o inomo ma ngoe-ngoe o Mesiiri ma tonakoka naa. De gea ahao hawohanga angamoi o hafini kohagiria de hiadono ani tonaka ma amokika duru ihibinaahaka.

³² De ma titi ani buluhara ihigali ma hinootoino hokogea la duru ngona o Firaunu, nohioriki igoungu Ma Jou wodiai hokogea. De igoungu ko itedekanokaua de ahao imulaengoka abe hoka ngona nobuluharoka gea.”

³³ De ahao o Yusupu wihingahuoli o inomo ma hiaturu wato, “Ho ngona o Firaunu, kiani nilingiri o nyawa moi abe duru wososawaro de nihitagongo la una gea ma inomo wohikaaturu o Mesiiri ma tonaka ma amokika.

³⁴ De nairikoo o balu-baluhu la ona yagogono ma inomo abe o taongo tumidino ma oraha naga o inomo kohangoe. Abe o redi ma hasilino hoka o pine, o gooko, o boteme de o gandumu mata-mataika o Mesiiroka, ona kiani yaregu motoa. Hokogea kiani yodiai la o regu iata o kokawaaha yapake de o regu moi ona ihiatu-aturu yale la yagogono o inomo gea.

³⁵ De o inomo mata-mata abe ona yaleino o tao-taongiye abe ma oraha o inomo kohangoe ahao yagogono. De o inomo ma gogogono ma ngi ma ngoe abe yapake kiani imanoa to ngona o koano ani kuahaka. Hokogea ihingohama o inomo ma gogogono ma ngi-ngiika la ngaro ma oraha o redi ma hasili ko iwaka masara naga nanga inomo o Mesiiri ma kota mata-mataika.

³⁶ Hokogea ma hiaturu la naga nanga inomo ma oraha ma taongo tumidi gea iboa abe o tonaka ma hasili ko iwaka o Mesiiroka. Nako hokogenangua nodiai o Firaunu de ahao o kangela duru ma amoko idadi de hiadono o nyawa mata-mataika yobinaaha.” Hokogea o Yusupu wihitararono o Firaunika ma titi ai buluhara.

O Yusupu wahipareta mata-mataika o Mesiiroka

³⁷ Ka de yoihene o Yusupu ai demo gea de o Firaunu de ai duduhunu yokokurutiye abe manga kokawaaha yahipareta, ona mata-mata yosanangi yaniiki.

³⁸ De ahao o Firaunu waleha onangika wato, “Done o kiaka hamake o nyawa yomakadaene hoka o Yusupoli naa? Abe duru itararono Ma Jou ai Womaha naga unangoka.” Hokogea ai hininga wahingahu ona yososawaroika.

³⁹ De ahao o Firaunu womadogiliorika o Yusupika de wihingahu wato, “Angamoi Ma Jou wonihingahu ka ngonaika dika mata-mata gea abe ahao idadi, ho nako ngona de o nyawa utu ka ngonahi nososawaro de nohidotelega itiai o Mesiiri ma tonakoka naa.

⁴⁰ Ho ngohi naa tonigoraka la tonihitagongo de ma hiaturu mata-mata gea abe nomihingahuoka naa kiani la ngone o Mesiiroka haniiki. Ho ngona naa ani karajaanga tonihititi ahi tauoka la nohikaaturu ahi tau ma goronaka de ma hoanoka. De ani tagongo ma kuaha hiadono ngona nahipareta ahi kokawaaha mata-mataika o Mesiiroka. Hokogea ani kuaha ma amoko masara naga ma batingi ani kuaha abe o demo ngohi o koanoino dika kiani nohihigihene.

⁴¹ Ho o Mesiiri ma nyawa tonihigunoa la ngona nahipareta mata-mataika ho ona kiani inihigihene ngonaika ma, ngona gea ka ngohi dika tonipareta ho ngona naa tonihidadioka ahi hiaturu ma demo ma dodofanga.”

⁴² Hokogea o Firaunu wotemo ibooto de ahao ai ali-ali wihuputu de wihinoa to Yusupu ai hagaraaraoko, abe o ali-ali gea ma dodunguu o koano ai kuahaka de aino. De ahao waleino o baju duru ma rorahai abe ma lawe ma alu-aluhu de genangoli wihinoauku o Yusupika de ai tomarukuoli wihinoauku o gule abe o gurasino. De mata-mata gea o Firaunu wodiai la wohitunguu o Mesiiri ma nyawaika abe o Yusupu ai kuaha wamake manga koanoino.

⁴³ De ahao o Firaunu wahokino ai goroba moi abe ngade-ngade hoka to unangoli de wihibarene o Yusupu ai gorobauku gea. De naga o gogoana yamuruono naga iwihihira-hira o goroba ma himangika de yokokiboaka o nyawa mata-mataika la ona iwihidagi-dagi yopoa-poaka ato, “Niatotilabukuku! Niatotilabukuku!” Hokogea yodiai la manga nyawa mata-mataika ihitunguu manga horomati o Yusupika. Hokogea o Firaunu wigoraka o Yusupu la wihidadi ai hiaturu ma demo ma dodofanga abe duru de ai kuahaka hiadono naa una dika mata-mataika wahipareta o Mesiiri ma tonakoka.

⁴⁴ Abe duru de ai buturungu wihibehehongo o Yusupika wato, “Ngohi naa manga koano o Mesiiroka ma naa tonihibehehongo ngonaika tato to ngona ani kuahaka ka hiadono o karajaanga mata-mataika kiani ngonaka dika de aino nahigunoa. Ho ko moiua ahi nyawa ka idadi manga lou eko manga giama yagoraka nako ngona nato ko nahigunoaua.” Hokogea o Mesiiri ma koano wihidoaka ai kuaha o Yusupika.

⁴⁵ De ahao o Firaunu o Yusupu wihiromangoli abe wato, “De naa tonihiromangoli ho naa ani romanga o Safanata Panea.” De ahao wihidoaka unangika o ngofeka momatengo ami romanga o ngo Asenata la modadi to Yusupu ngoi fekata. Muna gea ami baba ai romanga o Potifera de una wogogere o kota moiokali ma romanga o Ono abe genangoka o Mesiiri ma nyawa wahidemo manga popangaoika. Ho mata-mata gea wodafongo ibooto de ahao o Yusupu woiki waika waino wopaki-pakiti watailako o Mesiiri ma tonakika.

⁴⁶ O Yusupu ai ngumuru adonoka ai taongo moruange ma oraha wodadi o Firaunu ai hiaturu ma demo ma dodofanga de ahao wileleani waika waino wohiaturu mata-mataika o Mesiiri ma tonaka ma amokika.

⁴⁷ De igoungu o taongo tumidino ma dekana manga datomo duru ikutufuru hiadono manga redi ma hasili duru kohangoe.

⁴⁸ Ho o taongo tumidino gea o Yusupu wohikaaturu la manga hasili o inomo ma hononga kiani yatoomuino la ena gea ihingohama ma gogogono ma ngi ma ago-agomika. De o Mesiiri ma tonaka ko ma etetekua ho naga o kota ma ngoe de manga kota mata-mataika manga kokawaaha naga manga redi ma ngoe. De o kota homoi-homoiika kiani agogono manga inomo ma hononga de ma inomo gea o Mesiiri ma popareta manga kuahaka imanoa.

⁴⁹ De o taongo tumidi ma dekanino manga gandumu duru ma hasili kohaamoko hiadono imaketero hoka o dowongi o gahi ma ngigoroka ma ngoe. Abe manga inomo ma gogogono ma ngi ma ngoe gea duru yokokidokemoka hiadono ko idadiokaua o nyawa yaetongo o gandumu ma hofoko gea ma ngoe.

⁵⁰ De ma oraha gea, abe ma taongo tumidi o inomo kohangoe gea, o Yusupu de ngoi fekata o ngo Asenata yamake manga ngofaka o nauru yahinooto.

⁵¹ De ma oraha manga ngofaka o riaka womaboa de o Yusupu wotemo wato, “Ma Jou wohiduhunoka hiadono ka idadi ahi kangela takokiwohangoka de ngaro onangoo ahi baba ai tauoka ma, onangoo ko tahohiningakaua.” Ho ma titi gea wapake la ai ngofaka o domoro gea wihiromanga, “o Hiwohanga” abe to ona manga demo, “o Manase.”

⁵² De ai ngofaka o dodoto wihiromanga, “o Totohofoko,” abe to ona manga demo “o Efaraimi” angamoi ma oraha womaboa o Yusupu womahingahu ai hiningaka wato, “Ma Jou wohiaturu la ahi wowango de ma utumoka ngaro ahi kangela ma ngoe o tonakoka naa.”

⁵³ De ahao ipahaka ma taongo tumidi gea abe manga inomo duru ifoloi ho manga joro ko yamakeokaua manga redi-redino.

⁵⁴ De adonokali o taongo tumidoli abe o tonaka ma hasili ko iwa ho idadi duru imaketero abe hoka ma dihira o Yusupu wahingahuoka. De o tonaka mata-mataika o nyawa yakokihafini mangale ma titi o hiwara ikiriaholi hiadono o nyawa manga datomo ko ihofokokaua. Masara o Mesiiri ma tonakoka naga o inomo ma ngoe abe ka ma dihirahi de yagogonoka.

⁵⁵ De angamoi naa manga tonaka ma hasili ko iwa ho o hafini gea kohagiria hiadono o Mesiiroka ma kokawaaha manga koanoika yomagahoko o inomo. De ahao o Firaunu wahingahu onangika wato, “Ngini niloiki dika o Yusupika de o kia dika winihiaturu gea kiani nidiai.” Hokogea o Firaunu wahuloko.

⁵⁶ De angamoi ma hafini naa yadaenoka mata-mataika o Mesiiri ma nyawa, ho o Yusupu manga inomo abe ka ma dihirahi de yagogonoka naa womulaenge wohihupu onangika. O gandumu gea wafukunu o Mesiiri ma nyawaika angamoi o hafini gea duru kohagiria manga tonakoka.

⁵⁷ Masara ko o Mesiiri ma tonakokaua dika, ho hiadono o nyawa abe o tonaka mata-mataika yakokihafini. Ho o tonaka mata-mataino naga o nyawa yoboaino la ka idadi manga inomo yomaija o Yusupoka.