Dodadi 40 - Ma Jou ai Demo-demo o Totobelohoka

O Yusupu wohioriki o buluhara ma titi

^1-3 De ipaha ona gea iwitobaleleani o Mesiiroka manga koano o Firaunu ai tau ma goronaka naga yahinooto onangoka abe o Firaunu wabuika ai bui ma tauoka ho yomahibui moi de o Yusupu. Yahinooto gea womatengo una gea wahibaluhu ona abe iwitobaleleani o Firaunu ai akere de womatengoli una wahibaluhu ona abe yotobahohakai ai inomo. Masara ona gea yahinooto yodiai abe o Firaunu wato duru ko idadiua ho duru wangamo onangika de wihuloko o Potifarika, una ai gogoana manga hidimono wato, “Potifara, ona yahinooto gea nabuioka!”

⁴ Hokogea o Potifara wodiai ibooto de ahao wihingahu o Yusupika wato, “Ona naa yahinooto duru iwitobaleleani nanga koano ai datekoka ho naa ngohi tahidoaka ngonaika dika la nahiaturu.” Hokogea wihibehehongo ho o Yusupu waleleani ona yahinooto gea de hatoli ko manga dekana ka o bui ma tauokahi.

⁵ De o futu moi una abe witobaleleani o Firaunu ai akere de una abe ai inomo wotobahohakai, ona gea yokokibuluhara de manga buluhara imaketemomomoi de manga buluhara homoi-homoiika de ma titioka.

⁶ De ma ngorumino o Yusupu watutumu onangika de wamake manga himanga duru ihuha.

⁷ De waleha onangika wato, “Adodoa ho ngini o ngorumino naa de nia hininga ko iwangorua? O kia ma titi hiadono nia hininga ihuha naa?” Hokogea waleha yahinootoika gea abe yahidubuika ka ma moi de o Yusupu.

⁸ De yahinooto gea yopaluhu ato, “Ngomi o futuika mikokibuluhara masara mia buluhara gea ma titi ko mihiorikua. De done onagona naga nenangoka abe yososawaro yotobamai-maihi la o buluhara ma titi ihioriki.” Hokogea manga ade-ade. De o Yusupu wahingahu wato, “Nako o buluhara mata-mataika ka Ma Jou dika ka idadi wohioriki ma titi. Ho sarakia nako ngini nihihingahu ngohino homoi-homoiika abe hokokia niamake nia buluhara ma goronaka.” Hokogea o Yusupu woigo waduhunu.

⁹ De una wahibaluhu ona abe iwitobaleleani o Firaunu ai akere, una wohira wihingahu o Yusupika abe gea wamake ai buluhara ma goronaka wato, “Ngohi naa tobuluhara de tamake moi o angguru ma roehe abe ijaga hangeoka.

¹⁰ De ma jaga hange gea ahao ikokitori de ka itodokanino de ikokihurioka ma dori hangeino gea. Ka de ihuri ibooto de ahao ma gosela yogetongo de ma hofokoka. De ka jai-jai dika de ma hofoko gea ikokilomukoka.

¹¹ De gea ngohi tatutumu o angguru ma hofoko ma gomuku gea, de to Firaunu ai mangko naga ahi giamoka. De ma gosela tohidofokoto de ma hahaku ka ma moi la ma hofoko tateouku o Firaunu ai mangkouku. De ahao o angguru ma teongo gea tidotaka o Firaunika ai mangkoka de ngohi de ahi horomatioka tihidoaka ai giamika. Hokogea ahi buluhara ma ade-ade.”

¹² De o Yusupu woihene ibooto ai buluhara ma ade-ade gea de wihingahu unangika wato, “Hokonaa ani buluhara ma titi: o angguru ma jaga hange gea tohidotele ka ma moi abe ma titi o wange hange.

¹³ Ho naa ma hou duru o wange hangeokahi dika de ngona ani pea nomaboaiye de ani sanangi angamoi o Firaunu wonihigilio ani karajaangika. De ngona ahao nileleanioli abe ai akere nohiaturu de nihidoaka unangika imaketero hoka ma dihirali ani karajaanga unangoka.

¹⁴ Masara naa moi tonihibehehongo ngonaika, abe ma oraha nodadiokali nileleani o Firaunika, de togahoko la ahi duduhunu naa ngonaika nohibalaha de ma owa ngohino. De hokonaa nohiduhunu, toigo la nihingahu o Firaunika nato, ‘Ahi koano, naga womatengo abe wohiduhunu o bui ma tau ma goronaka abe wato ko iwa ai howono.

¹⁵ Ho to una ai demo abe naa tadofanga o Firaunika hokonaa, “Ngohi o Yusupu de duru tagoungu ihitaoko o Ibarani ma tonakino de ihifukunu nenangoka. De tanu ko iwa ma titi ngohioka abe ahi howono naga de ka ihibui ani tonakoka naa.”’” Hokogea o Yusupu womagahoko o duduhunu unangika abe witobaleleani o Firaunu ai akere ma oraha gea abe wihitararono ai buluhara ma titi unangika ibooto.

¹⁶ De womatengoli gea abe wahibaluhu ona abe iwitobahohakai o Firaunu ai inomo, ka de woihene ai dodiawo ai buluhara de ma titi irahai, de to unangoo ai buluhara woigo wihingahu o Yusupika. Ho naa unangoo woade-ade wato, “Ngohioo tobuluhara de tamake o kiahonanga abe naga ahohangeoka.

¹⁷ Abe naga o tupa hange yaoma-omangiye de o roti de o kue irupa-rupa abe iharo-harongino tihidiai o Firaunu ai inomo. De o tupa hange gea tohilafafanguku de ahao ka ma moi tateruiye ahi peaka. De o tupa gea daku iloku-loku aomangoka de o inomo ena gea abe duru o Firaunu waolomo. Ho ena gea tato tidotaka unangika masara naga o totaleo ma ngoe iboa ngohino de iharo-harongo ma inomo gea daku ahi peaka aolomo o totaleo. Hokogea tamake ahi buluhara ma goronaka.”

¹⁸ De o Yusupu woihene ibooto ai buluhara ma ade-ade gea de wihingahu unangika wato, “Tomahilooa masara nako to ngona ani buluhara hokonaa ma titi: o tupa hange gea tohidotele ka ma moi abe enangoo ma titi o wange hange.

¹⁹ Abe o wange hange ipahaino de ahao o Firaunu ai nyawa wahuloko la yamatagaiye ani pea de ahao yaliko ani tomarino la inidideuku o gotaka. De gea ani honenge ahao yanoaika genangoka hiadono o totaleo naga abe ahao ikokiboaino de ani roehe aolomo. Tomahilooa masara hokogea ani buluhara ma titi.” Hokogea Ma Jou wipake o Yusupu la wohioriki mata-mata manga buluhara ma titi.

²⁰ De idadi duru imaketero hoka o Yusupu wahingahuoka abe o wange hange ipaha de adonoka ma hohininga ma wange gea abe o Firaunu womaboa de wato ai wange gea wohirame-rame. Ho o inomo duru iwoe yodiai de ahao ona abe yokarajaanga ai tauoka de ona yokokurutiye mata-mataika abe iwiduhunu manga kokawaaha yahipareta, ona gea wakokiahokino la yolomo yorame-rame. De wahuloko ai gogoanika la yahinooto abe yahibaluhu ona iwileleani to una ai akere de ai inomo, onangoo kiani naga ai rame-rameoka ho o bui ma tauoka yale.

²¹ De manga rame-rame ma goronaka de ona yahinooto o Firaunu wahiketehirihimanga de ona yowoe-woeika abe yaniiki ai rame-rameoka gea. De ahao o Firaunu wahingahu ona yowoe-woeika wato, “O wange naa de ahi horomati unangika naa tigorakoli ti ngini nia himangoka la niwihioriki tihigilio ai karajaangika abe ma dihiraino wohileleani ahi akere.

²² Masara abeika una naa abe wahibaluhu ona mata-mata yotobahohakai ahi inomo, una gea kiani tihohowono! Ho naa to una ai pea ngini niakibangiye de niwidide o gotauku abe gea ti ngini nia karajaanga o nyawa niatobahohowono!” Hokogea o Firaunu ai mau, ho gea idadiokau duru imaketero hoka manga buluharoka o Yusupu wamake ma titi homoi-homoiika.

²³ Masara una gea witobaleleani o Firaunu ai akere o Yusupu wiwohangoka ho ai behehongoo gea ko wihingahua o Firaunika.