Dodadi 38 - Ma Jou ai Demo-demo o Totobelohoka

O Yehuda ai howono ngoi hunungika

¹ De ma oraha gea abe o Yusupu iwifukunika o Mesiiroka de doka o Kanani ma tonakoka ai riaka o Yehuda una womahihupu ai baba de ai ria-dodotino de woiki o Kanani ma dobikika ma romanga o Adulama. Genangoka o Yehuda widodiawo o Adulama ma nyawaika ai romanga o Hira.

² De ma oraha gea o Yehuda wogogere o Hira ai datekoka de naga o ngofeka momatengo o Kanani ma nyawa womimake de womile la muna gea womihidadi ngoi fekata. Muna gea ami baba ai romanga o Sua.

³ Ko itedekanua de muna de ami badangoka de ahao momagerewoto de ami ngofaka o nauru de o Yehuda wihiromanga o Era.

⁴ De ahao ngoi fekata mamakeoli ami ngofaka o nauru de manga ngofaka gea muna mihiromanga o Onana.

⁵ De ahao ma moioli mamake o ngofaka o nauroli de ka munangoli mihiromanga o Siela. De ma oraha o Siela womaboa ona yogogere o Kesiboka.

⁶ De o Yehuda ai ngofaka o riaka o Era gea wobaluhiye de ai baba wohiaturu ai gogilaka de o moholehe momatengo ami romanga o ngo Tamara.

⁷ Masara woilaka ipahaino de o Era una gea ai datoro itorouholi Ma Jou o Yawe ai himangoka. Ho ma titi ai datoro ma dorou gea hiadono Ma Jou o Yawe Una ma hirete wihohonenge o Era gea.

⁸ Ho una o riaka wohonengoka de ahao ai baba wihuloko o Era ai dodotika o Onana wato, “Ahi ngofaka, ngona kiani ani riaka ngoi fekata nomile la muna gea nomihidadi to ngonali ngoni fekata. Nako to ngone nanga paretaka inahingahu ato nako naga womatengo wohonenge de ngoi fekata moilakoli gea kiani moilaka de ai ria-dodoto ma dutuoli. Ho ngona naa kiani nomile ani riaka ngoi fao. Ho muna gea o ngo Tamara kiani ngona nomihidadi ngoni fekata de ahao ami ngofaka o domoro una wodadi ani riaka ai ngofaka abe una ahao wamake o Era ai oara.” Hokogea ai baba ai huhuloko ai ngofaka o Onanika ho o ngo Tamara gea womile.

⁹ Masara o Onana gea duru woluku la muna de ami badangoka ho ma oraha yomakitigi de una wodiai la ai bibitino muna ko mamakeua la ufa o ngo Tamara mamake o ngofaka. Hokogea ka ihikaika wodiai angamoi duru woluku mamake to una ai ngofaka abe ahao done iwietongo ai riaka o Era ai ngofaka.

¹⁰ Masara nako Ma Jou o Yawe ai himangoka gea o Onana wodiai duru itorou abe woluku la ai riaka wamake ai ngofa-ngofakuku ho ma titi gea hiadono unangoo Ma Jou wihohonenge.

¹¹ De ahao o Yehuda womihingahu ngoi hunungika o ngo Tamara wato, “Ngohi hunungu, marai ngona kiani noliohi la nogogere ani babaka de nofaoohi angamoi ahi ngofaka o Siela ko wobaluhuahi. Ho kiani o Siela wobaluhokahi de ahao unangoli wodadi to ngona ani rokata.” Hokogea o Yehuda ai demo munangika ho molio ami dimonika. Masara o Yehuda womieluku angamoi ko woigoua womihigogilaka de ai ngofaka o dodoto angamoi wohawana done ahao o Siela unangoo wohonenge hoka ai ria-riakoli.

¹² De ahao o Yehuda gea ngoi fekatoo munangoli mohonenge. Ngoi fekata gea muna abe to Sua ngoi ora de muna o Yehuda womigari gea ka hiadono ko wokarajaangua. Ho ma oraha ai huha ma gari ibooto ma titi ngoi fekata womigari de ahao una wapoali wokarajaanga. De ma oraha gea ai domba ma gogoana wato watutumu. Ona naga o ngi moiokali ma romanga o Timana de genangoka ai domba yotobaguti-guti ma gogo. Ho ai dodiawo o Hira, o Adulama ma nyawa gea, una de o Yehuda yoiki yomakiniiki yotowongi o Timanika.

¹³ De naga o nyawa imihingahu o ngo Tamarika ato, “Bari ani dunungu o Yehuda gea woiki o Timanika la ai domba ma gogo waguti genangoka.” Hokogea imihingahu munangika.

¹⁴ De naa ma dekanoka ami rokata wohonengoka ho o ngo Tamara mohiorikoka o Siela una gea wobaluhoka masara ami dunungu womihipongono. De muna ami hininga-kuranga unangika ma titi ko womiahokua la womihigogilakoli de ai ngofaka o Siela. Ho ka de moihene o Yehuda woikoka la ai domba wolega de muna ami hidee la mibudi ami dunungika. Ho ami bao ma baju, abe kiani o bao-bao ka ihikaika yapake, gea ena mahuputoka de maturuuru de o pakeanga o fara moioli abe manga biaha ona o ngo-ngofeka yatobapake nako manga badanga yomafuku-fukunu. De hoka to ona manga biaha ami himangoo matatokoka de o ngoere la ufa o nyawa imihioriki muna naa o ngo kia. De ahao moiki o Enaimi ma kapongika abe kiani genangino o Yehuda watilakuru ma oraha woiki o Timanika. De muna ahao mogogeruku o ngekomo ma datekoka o Enaimi ma kapongo ma ngorana ma himangoka.

¹⁵ Ho gea o Yehuda woboaino de womimake de wato bote muna gea igoungu o ngofeka abe ka idadi womihewa la womaidu de muna angamoi momaaduru hoka ona yomatobafukunu manga biaha abe ami himanga matatokoka de o ngoere gea.

¹⁶ Ho ai hininga womihingahu munangika abe woigo la yomaidu de muna angamoi ko womihiorikua muna gea o ngo Tamara ngoi hunungu. De muna ko ma orahuahi yomaidu de mileha unangika mato, “Ho ngona de o kia nofangu ngohino?”

¹⁷ De o Yehuda wopaluhu munangika wato, “Nako ngohi ahao tonihidoaka moi o kabingi ma goo masara gea ahao tohidingoto la o nyawa yototaka ngonaika.” De muna mopaluhu unangika mato, “Masara ani behehongo gea ahao hokokia hiadono ngohi tamake? Ho kiani nagali moioli ma dodunguu nohihidoaka ngohino la duru tohioriki abe ahao tamake ahi kabingi.” Hokogea muna mogahoko.

¹⁸ De una womileha munangikali wato, “Ho o kia noigo la tonihidoaka la ena gea natumungikahi ka hiadono ani kabingi namakeoka?” De muna mopaluhu unangika mato, “Ngohi toigo la ani gule de ma haekoka abe to ngona ani dodunguu de ani tutukunoo abe nasoino. Gea ena mata-mata nohihidoaka ngohino. De ngohi ahao ani kiahonanga gea tohigilioli ngonaika abe ma oraha ahi kabingi woboaino wohidotaka de ahao unangika tohidoaka la wao ngonaika.” Hokogea mogahoko de ahao ai kiahonanga gea womihidoaka ma oraha yomaidu una de muna. De yomaidu ipaha de o Yehuda wogila-gila ai dumutika. De ngoi hunungu gea ipaha muna de ami badangoka.

¹⁹ De ka de o Yehuda wosoboka de muna ami himanga ma dadatoko mahuputoka de o bao-bao ma baju momahinoa enangoli hoka ami biaha mapake. Muna hokogea o Yehuda mibudi de ahao molio ami baba ai tauika.

²⁰ De ai dodiawo o Hira gea widuhunu o Yehuda la ami kabingi gea womidotaka munangika la ka idadi wohigilio o Yehuda ai kiahonanga abe muna masoinohi. Masara womahiadono o Enaimi ma kapongika de ngaro duru womilingiri ma, ko womimakeua o ngo Tamara gea.

²¹ De gea angamoi muna ko imiwa ma tauoka gea abe o Yehuda de muna yapake. Masara naga o nau-nauru genangoka ho o Hira waleha onangika wato, “O kiaka muna gea abe ami biaha ami badanga mafukunu la gea momahihuba ami pangaoika? De gea muna tomilingiri abe mogogeruku o ngekomo ma datekoka nia kapongo ma himangoka angamoi naga ahi perelu munangika.” Hokogea o Hira waleha o nau-naurika genangoka. De ona yopaluhu ato, “Masara ko imiwa mia kapongoka! De ngomi ko minielukua, duru ko moiua o ngofeka ngomioka abe ami biaha hokogea.”

²² Hokogea iwihingahu ho ma bahauku kiani o Hira wolio dika angamoi ko womimakeua. De wihingahu o Yehudaika wato, “Dodiawo, marai muna o ngofeka gea ko tomimakeua. De hongoli o nau-nauru abe yogogere o kapongoka gea ihihingahu ato duru ko iwa o ngofeka onangoka abe momafuku-fukunu la ami badanga mapake hoka o huhuba o pangaoika.” Hokogea wihingahu o Yehudaika.

²³ De o Yehuda wato, “Naa ibooto, ahi kiahonanga tanoaika dika munangoka. Ngone hohitaili la ami kabingi homidotaka ma ko imiwa ho naa hominoaika dika! De nako ka homilingirohi done ahao o nyawa duru inagiete de ihihohedu ngohi, ho ibooto.” Hokogea o Yehuda ai hininga abe wato ko womilegaikakaua.

²⁴ Masara o mede hange ipaha de o ngo Tamara gea imihiorikoka o nyawa abe muna de ami badangoka de imihiorikoo abe ami rokata ko iwa ho hiadono iwiade-ade o Yehudaika. Ona iwihingahu ato, “Marai ngoni hunungu o ngo Tamara gea muna maniiki manga biaha ona abe yomatobafuku-fukunu manga badanga angamoi muna naa de ami badangokau.” Ka de manga hingahu gea woihene de o Yehuda duru wongamo hiadono wopoaka wato, “Muna gea kiani nimihihupuika la nimitufuku! Hokogea ma howono ho kiani mohonenge!” Hokogea ai huhuloko ma demo.

²⁵ Masara ka de o ngo Tamara gea imiaoika ato imihohonenge de ahao muna motemo mato, “Bole-boleohi nihihohonenge, kiani nihihiainohi, naa moi totemohi, de ahi demo naa kiani niadofanga ahi dunungika. Abe naga ahi pokoro ma goronaka naa, naga to una ai baba. De una gea ahao ai kiahonanga tinihimatoko abe to una ai dodunguu. Ho ngini ko nihihohonenguahi de ngohi togahoko la ahi dunungu watailakohi ma dodunguu naa. Ho ma gule de ma haekoka naa abe ahi ngofaka ai baba to una ai dodunguu, de to una ai tutukunoo naa kiani niwidotaka ahi dunungika de niwileha unangika niato naa ena to onaguna ai kiahonanga?” Ho ami behehongo gea yaniiki.

²⁶ De ona yoiki de iwihimatoko o Yehudaika ma kiahonanga gea. Ka de yoade-ade unangika abe ngoi hunungu ami hingahu de duru womangaku ai howono wato, “Muna gea itiai minihuloko ngohino la niboa. Igoungu, nako muna de ngohi marai ka ngohiohi tahowono de munangohi ami datoro itiai angamoi ahi behehongo ma dihira munangika ko taniikua. De gea tomihibehehongoka tato ka idadi muna de o Siela yoilaka masara ngohi tomieluku munangika.” Hokogea o Yehuda womangaku ai howono ho ngoi hunungu gea ko imihohowonuali.

²⁷ Ho adonoka o ngo Tamara ami gahe momagerewoto de ami ngofaka yohago.

²⁸ De ami ngofaka womatengo una wohira ai giama ihupu ho muna gea abe momiduhunu o ngo Tamara ka de mamake ai giama gea de mipakitika de o lawe ma doka-dokara de mato, “Naa una titunguu abe una naa wohira womaboa.”

²⁹ Masara ai giama gea wohigiliokali de ai dodiawoli womahiwalimi ho ka una wohira womaboa. Ho muna momiduhunu gea moheranga de mato, “O kia naa? Done sarakia de ngona nohira nomaboa?” Hokogea ami heranga ho hiadono una gea ahao ona iwihiromanga, “o Hiribuutu” abe de to ona manga demo gea, “o Perese.”

³⁰ De ahao unangoo womaboa abe muna mitunguuika de o lawe ma doka-dokara, de una ahao iwihiromanga, “o Kahubara” abe nako to ona manga demo gea, “o Sera.”